|
2008 年 3 月 24 日 星期一 【晴】
真係好攰..
沉晚已經頂梗上繼續做,
但係今次攰係身心都疲累,
根本唔可以專心去做,
對眼攰用冷毛巾提神,
身體攰訓係床度做,
但係思想太混亂,
真係好想做好想堅持,
但係頂唔到,
諗諗下係床度訓著左,
其實今朝果堂仲唔上就比人遲兩堂,
但我就算返去都係無野俾佢睇,
結果都係俾佢鬧,
唉..我真係好想做好份pj,
但點解成日都要我諗d我無興趣既野,
我會諗唔到..
好大壓力好辛苦,
今日攰到晏晝訓醒食完野,
諗諗下ideas又訓過訓到八點,
唉..好想做好份pj
>>March 25, 2008 at 1:20:19 PM GMT+8
2008 年 3 月 23 日 星期日 【晴】
經過車車車,
終於返黎香港,
真係好想即刻返屋企訓陣教之後做pj,
但為免誤會,
都係同佢地一齊係上水飲完茶先走,
返到屋企訓一陣就要做做做..
>>July 23, 2008 at 2:06:28 PM GMT+8
2008 年 3 月 22 日 星期六 【晴】
晨咁早五點幾六點起身,
送昨日d同志們返學,
朝早真係凍到唔知有無十度,
成街都俾d霧包圍,
但途人倒有不少,
跟住係街邊買包食,
點知果d包真係誇哂張,
開頭食左淡以為係叉燒包,
但後尾發現唔對路,
中間d餡全部都係豆瓣醬同辣椒,
真係...竟然有d咁既包存在!?
食到個胃熱哂,
跟住返去再訓多一陣,
就一眾出去逛下街,
見到豆腐花,
我地個個一碗清左佢袋,
邊行邊睇有咩手信買,
但發現係無..
最特別既辣椒香料乾買番黎都唔知點洗,
後尾見到乜乜糖諗住買返去,
(但未返到去已經變左一舊野)
跟住要趕返去集合食野回程,
搭勁勁勁耐車返出長沙,
落車又食過,
今次終於有淡好食,
去左間酒樓叫番d正常野,
食飽遊夜市..
不過真係夢遊咁遊,
期間都係最難受既時期,
好孤單既感覺,
依夜突然覺得周圍d人好陌生..
思想好混亂,
唔知係覺得依次扶貧我地唔似扶貧定覺得人既可怕..
還是突然間一切活動完結而產生既空虛感!?
我自己都唔知,
最令我沉多沉既係一位隊友上前問左我幾個令我再混亂既問題..
"你係咪好憎我地?"
"如果以後約你出黎玩你會唔會出黎架?"
衰d咁講..
依d完全無智慧既問題點解可以問得出!?
依d問題係關心我??
有無諗過我聽完既感受!?
就算唔理我感受正常都會知我會點答吧..
果晚真係好唔開心,
我真係好少會話自己好唔開心,
但果晚真係好難受..
夠鐘就上火車返去..
車上明明想訓但又為左廢事佢地誤會而同佢地傾計,
我唔似佢地,
我返去仲要趕我既final year pj,
不過講出黎都係以為我係度染色既藉口..
>>July 23, 2008 at 12:40:00 PM GMT+8
2008 年 3 月 21 日 星期五 【晴】
今日行程係去梅山龍宮,
又係長長既車程,
沿路睇既山水都睇膩喇,
落完車坐依個渡河船,
再坐疑似澳門觀光車運我地去龍宮,
依個龍宮打哂燈,
搞到七彩顏色既石加埋湖水都唔錯,
跟住我地搭架人力艇仔,
個個人都要帶個勁臭既消防帽,
帶到成個頭都癢哂..
不過唔帶唔得,
因為有d位要成個身訓低黎避d石,
危險到有d好玩,
後尾都係個導遊勁up野我地呆企睇千篇一律既石頭,
睇到又攰又熱又餓勁想快d走..
夜晚節目好精彩,
首先掃街同玩左幾次勁無聊無獎既射槍,
返去再同同志們玩糖痴豆,
再夜d玩我地買左二百幾蚊既煙花!!
都可算是正式第一次玩d咁大聲咁激動既煙花,
射到勁高渣係手既龍吐珠,
同一大舊放係地等飛天既乜乜..
精彩過後仲有個卡拉ok,
我都俾臉飲左幾杯,
之後玩大話骰發現依度d野連菜都辣到痴根,
最後我都join埋佢地唱卡拉ok(一定要用全名先貼切)
後尾唔記得有無繼續玩野..
>>July 23, 2008 at 12:14:50 PM GMT+8
2008 年 3 月 20 日 星期四 【乍寒還暖】
夜晚落好大雨,
一晚醒左好多次,
朝早八點半劉聰叫我地起身,
其實我都醒左好耐,
唔知點解唔想訓,
跟住食早飯..
都係食果d粉邊果類做菜,
雨一直在下,
真係可惜,
本來有好多野可以做,
但依家...
不過劉聰佢好好客,
力盡地主既身份冒雨帶我地出山,
我地都著住佢家僅存既兩對水鞋出發,
首先劉聰兄帶我地去佢家既山墓,
又介紹下d一個個存放薯仔等食物既洞仔,
跟住再行去山頭,
講番話佢阿爺係山上自製引水管落黎,
行多陣我地返番去,
食多次擂茶我地就離開依度,
熱心既劉聰仲想帶我地去佢小學附近既山頭參觀,
正合我意啦可以開多d眼界,
我地就起行步行去,
不過其實真係有一段距離~
都唔知行左幾耐,
不過知道我地個個都行到急尿,
通街屙依d情況下小不免,
我地一個接一個係馬路黎個方便,
但到我黎料既時候前有車後有嬸,
不辦法..忍下先,
我地繼續行..行到見到省,
不過離目標仲有段路,
再經過n個街口終於到左一個煤礦場,
地面全都是黑色,
但我地係去礦場左邊既山,
又行山..
一口氣上到去,
飽覽一個『瀑布下的礦場』,
跟住上到山頂,
有一個好細既古舊寺廟,
劉-聰入左去,
開頭以為無人,
但後尾有個和尚邀請我地入去,
仲以為入去有d咩睇,
點知係入去一間房仔,
裡面已經有兩位長老係度煲煙,
門關上..
一間睡房size既空間空位左我地六個,
依個唔係問題,
我地坐係度唔郁咪得,
但問題係...佢地兩個都食緊煙,
仲要離譜到用d木技生火取暖,
好似拍緊ptu既光線下佢地請我地食柑,
咪以為好人大哂先得架,
我地仲要呼吸架..
無幾耐我地搵藉口走人,
係附近小個便留個記念~
跟住落番山回程,
係間店食完個麵搭人蛇車返旅館,
四點幾返到去,
之後出去買左二百幾蚊煙花..
夜晚去一間比較好既餐館度食,
依幾日我地三餐都係旅館果間野度食,
d餸菜都唔岩我地胃口,
除左d菜好多都唔知咩黎!?
仲有每餐都奉送兩支花生奶..
食完返去我地全部人集合開會,
應該可以話係獻心會,
講番依兩日既野..有咩深刻野,
但依度當然個個人都要講,
對於不善表達既我唔明點解d人可以講咁多野..
我有感受但都唔可以好仔細咁形容,
仲有係大家分享既期間發現左好多野,
心裡好多既問題係度問自己..
點解佢地可以分享自己咁多既野?
連私人既野都同大家講!?
點解非基督徒既...比..!?
點解佢地...??
點解我...!?
好多好多問題係腦裡面..
深夜一齊玩下同生共死..魔術..
結果得番三兩個小時既睡眠..
>>April 15, 2008 at 6:02:29 PM GMT+8
2008 年 3 月 19 日 星期三 【乍寒還暖】
有件事唔記得打,
係關於昨晚沖涼既時候,
等我先交待下先,
我間房個廁所對門係壞既,
即係你係出面用隻手指尾輕輕推一推,
就可以開到門,
唔緊要啦有同房既睇水應該無問題,
我就係咁入去除哂d衫褲,
好吸引嗎!?
你估有d咩事發生!?
相信大家都估唔到,
就係我一開水既時候,
發現...無熱水既!?
果時天氣我諗十三度左右,
咁我就試下d水,
噢..打哂冷震!!
我以為可能夜得濟無熱水供應,
所以硬著皮繼續沖,
唔知有無人試過咁凍既時候沖凍水涼!?
d水灑落皮膚就好似俾人淋天拿水咁,
隔一秒後水既寒氣完完全全刺入d骨頭裡,
全身抖震下繼續完事,
沖完依個冰水涼即時與死亡距離近左一大步..
事情就係咁,
講番依日..依日係最重要既一日,
早上出發去小學,
搭架小車去,
我負責三年班,
開始時係操場玩麻鷹捉雞仔,
d小朋友好開心咁發哂癲,
玩左無幾耐就落雨,
咁唯有返課室,
進行一連串活動,
本來整麥芽糖餅,
但竟然搵唔到最重要既麥芽糖,
問題係派哂d手套快子先發現,
咁我地唯有好白痴咁繼續行事,
強行教佢地用梳打餅夾住d朱古力豆黎食,
後尾又介紹下香港叫佢地畫下野玩泥膠影下相,
好快就差唔多三個鐘,
最後叫佢地寫我的志願同今日既感受,
佢地個個好乖咁唔出聲好認真咁作文,
之後佢地逐一出黎分享同收禮物,
但有樣野估唔到既係佢地寫既野,
"今日係我係學校裡面最開心最難忘既一日"
"我希望你地可以再來同我地玩"
"..........
仲有好多好感人既句子,
離開後食完午飯,
就由我地既農戶家庭對像劉聰帶領我同個partner出發,
搭左一個鐘既車,
落車再步行去佢屋企,
沿途佢就介紹下周圍環境咁,
因為落雨黎,
d路變得好屎,
我地沿路都係行泥地,
所以對鞋同條褲都屎哂,
但周圍環境都好靚,
一大片綠色有層次既田地山峰,
又經過河流小丘,
見到好多既家禽,
係腳旁既走地雞..
被人劏緊既肥豬..
係隔離經過既牛..
係河邊滑水既鴨..
看門口四維走既狗..
全黑沒精打睬既山羊..
唔知行左幾耐,
經過一個山洞,
佢話我地可以由果度都行到返屋企,
但係落雨所以唔行得,
之後經過一個木製既橋,
係裂縫間見到下面既河..
跟住好快就到達,
意外地佢家人係哂門口,
有佢爺爺嫲嫲阿叔同堂弟,
仲有d鄰居係度,
咁都好既,
一開始以為得番一兩個家人..
飲完碗擂茶,
雨勢仲未停下,
咁我地唯有邊等邊玩樸克,
佢教左我地兩種玩,
k 10 5同鬥地主,
後尾又玩埋象棋但仲未完全停雨,
咁我唔理照出去玩,
佢個堂弟都一齊,
我地行行下上左山,
個山當然唔係香港果d有條路果d,
個山勁鬼斜,
而且都幾窄下,
但唔知點解我地咩都唔理係咁衝係咁衝,
有d斜到要捉住d樹支上,
衝到我喘哂氣真係要抖下先停,
望番落去..原來已經好高,
問題係...點落番去呢!?
d地咁扇又咁斜,
果時又開始天黑咁,
如果慢慢行落去都唔係辦法,
咁我地唯有踎低用對鞋扇落去,
真係極速傳說,
但太危險一定要扇下停下,
因為兩邊都係山崖黎,
四人成功落山,
係河邊玩多陣返去食野,
食完又玩下牌咁,
後尾我地都攰想訓,
咁佢就沖左一盆熱水,
三個人一齊用一條毛巾洗臉浸腳,
跟住上樓上準備訓教,
訓前又想呵尿,
又唔想落番去下面,
咁佢話用出面窗台個尿壺,
無所謂啦..下面果個都係肥落個大桶度,
咁我就拿住個尿壺開始呵,
但一呵無啦啦下面有車聲,
望過去見到架電單車開哂車頭燈咁駕過黎,
我嚇到不知所措,
又唔可以急停,
架車已經黎到屋下,
我唯有拿住個尿壺轉身扮下傻仔..
但我感覺到其實佢係見到我..
我地九點鐘就訓教,
之前又話自己平時三四點先訓,
反而劉聰佢仲係床度睇陣書先訓,
成晚落住雨醒左好幾次,
咁就完左依一日...
>>April 8, 2008 at 4:01:46 PM GMT+8
2008 年 3 月 18 日 星期二 【颳風】
火車終於到達,
係依個長沙落車,
一出去全都要龍的傳人,
果時六點幾,
全街d人都好似訓醒左好耐咁既樣,
但點解會有d無所事事既人咁早起身無所事事呢!?
仲有d守獵捕捉旅客既人都夠勤力咁早起身,
了解完周圍就去食早餐,
去左間個樣都唔錯既酒家,
可以話係地鋪茶樓,
試第一度湖南野食,
oh..唔係難食既問題,
係全部野食都係凍架,
連d茶都係全凍..
食物方面食d唔知咩黎既食物,
d包全部都係粉黎,
其他唔講喇,
依d係佢地既特色,
我係唔可以厭人地,
只不過無諗過依度d食市會係咁,
跟住我地就上旅遊巴,
車程..五小時!!
本想張目仰望四周,
但望多幾眼個街道,
塞車..跟住又係街道,
係時候訓教,
恰左個幾鐘,
由城市漸入郊區,
又視察環境後恰下恰下,
由郊區轉到郊外,
間車開始震醒d人,
再行山路就真係訓唔到,
d路凹凹凸凸,
間車上上下下,
勁激!!
有d路沿崖邊勁窄d路又凹又凸又有對頭車過,
保險真係隨時用得著~
經過萬長既車程到達中學,
間中學好大,
架車入左去都唔似入左學校咁,
而我地似係俾人參觀既珍禽異獸一樣,
終於落車,
前往飯堂,
枱上面係一窩打邊爐必備既邊爐,
而且每枱來了兩個人,
佢地係當地既大學一年級生,
依幾日都會同我地一齊體驗同幫忙,
普通話真正既開始,
食完野搭車去我地既旅館,
裡面既環境都唔錯,
似係南丫島去camp feel,
接住就去返中學參觀間學校,
之後同d中學生介紹下香港d野,
跟住同佢地一齊玩d小遊戲,
打左幾球波,
好快又食飯,
同聽日探訪既一群一齊食飯,
我仲未適應到d普通話,
所以接收接收接收,
但我都唔知點解坐左係一個左邊幾個都係同志們既位,
所以發放都在所難免,
但斷哂線..
食完飯就公佈邊個跟邊個去邊個既家庭,
我竟然好衰咁心諗..
千祈唔好俾我同頭先坐隔離果個一齊..
因為我未熱身,
好好彩,
我可以同partner根一個唔同枱既男生一齊,
可能阿sir知我咩料所以搵個人陪我~
就咁天黑再回中學,
沿路再接收,
開始習慣d可以溝通下,
雖然有d真係扮聽得明...
返到去果度一齊玩game,
後尾仲黎左場友誼籃球賽,
不過我都無咩點打..
玩完暫別後回旅館,
沖完涼玩下牌就四點幾訓..
>>March 31, 2008 at 5:40:43 PM GMT+8
2008 年 3 月 17 日 星期一 【微冷】
等待出發..
六點上水火車站,
早到,
結果等左成個鐘佢地先黎,
跟住一直上過關到深圳火車站,
係一間叫李小龍既快餐店食晚餐,
好快就要上火車,
第一次搭依d有床既火車,
基本上係得床同容納一個人行既走廊,
十點鐘火車開啟後心情有d興奮,
唔知去到既環境係點!?
見到既人又係點呢??
火車以均速行駛,
望住出面漆黑一片既環境,
湖南真係咁遠!?
因為之前幾日都係做pj,
都無充足既睡眠,
諗住係火車都唔會做到d咩可以訓喇,
點知...雖然好早就熄左燈,
但係我地成廿人一齊逼哂係兩張床度,
成班係度吹水講鬼故玩猜結局,
唔經唔覺四點幾,
因為要為之後打算所以要訓教,
六點要起身...
>>March 29, 2008 at 4:05:41 PM GMT+8
2008 年 3 月 16 日 星期日 【微冷】
朝早都預左俾人鬧,
依家d進度慢左,
假期又去埋扶貧,
返黎又即刻上堂,
真係無時間做功課..
帶唔帶埋d野上去做好呢!?
唉..
根本無時間準備扶貧d野,
依家搞野兩份英文應該可以執下野先做design,
聽日就出發..!!
有心人請訢個禱..thx~
>>March 17, 2008 at 11:01:26 AM GMT+8
2008 年 3 月 15 日 星期六 【微冷】
係屋企被壓迫,
原本諗住星期六執行李,
到聽晚都未執過野,
因為d功課真係..
慘..
>>March 17, 2008 at 10:55:06 AM GMT+8
|
![]()
|
人氣: 55556
Design & Scripting by ShowHappy.Net
|
