2004 年 9 月 11 日 星期六 【晴】

大病初瘉，手軟腳軟，走步路都有少少暈，十足十果D貧血人仕咁，真要命。

下午同阿恒去中央圖書館借書，總算完成任務，然後我地去左食野，我食車仔面，佢食牛腩面，然後再加多廿蚊，叫左兩串燒賣同豬腸粉。

閒談之間，發覺原來我地都唔係選民。有時諗，D人都唔知諗乜，好似唔做選民就係錯事，唔投票就係無盡公民的責任咁。又有陣時，選保皇派就係罪過，選長毛就係英名……支持廿三條係天地不容，反廿三是「歷史潮流」……

我無意見，亦無立場，因為我根本都唔知呢D係乜，亦唔知邊個對邊個錯，更無興趣深究，所以我唔會投票，因為無投票的對象，既然要投白票，咁我不如就省翻呢張票啦：）

PS不過，有一樣我識，我睇過一次候選團辯論，就相當肯定曹宏威好白痴，咩叫「將科學帶入立法會」？哈哈哈！short short地……如果城城又去選，佢可以話「將風水帶入立法會」，哈哈哈哈！！！

＝＝＝＝＝＝＝＝＝＝
Queen：THX！我近日都成日想起偶像的呢個思想：）
我估我係因為一向太過寬於責己，所以至走向另一極端（偶像經常強調呢種由一個極端走向另一個的情況），而家終於稍為清醒D，希望可以把握到「最適點」啦︿︿

>>September 12, 2004 at 3:21:06 PM GMT+8

2004 年 9 月 10 日 星期五 【晴】

之前張海報，印出來效果唔好，雖然寄比學校都OK，但係要貼出來大會堂，都係過唔倒自己果關，所以決定整個張，而家終於完工啦！︿︿

2004 年 9 月 10 日 星期五 【晴】

原來患左腸胃炎，病左兩日，而家終於有翻d精神啦。

十五分鍾前，我重係無神無氣咁，乜鬼都唔想做，十五分鍾後竟然有翻曬精力同埋衝勁，原因係我用左以前睇書學的鬆弛方法：

一、全身放鬆，訓在床上
二、盡力收緊全身包括手腳臉部的肌肉收緊十多秒，然後慢慢放鬆
三、如有需要可做一次（二）
四、閉上眼
五、慢慢地深呼吸，並把氧氣導入肚內（單田），令身體細胞注入更多新的氧氣
六、若能睡著十五鍾，則能回復精力（睡太多反而會無效）

＝＝＝＝＝＝＝＝＝＝＝＝＝＝

在此一次過多謝您地對我的關懷和支持！
阿佳真係受寵若驚！
今朝剛剛睡醒見倒大家比我的留言，真係睇到我鼻都酸埋︿︿

>>September 11, 2004 at 1:17:10 PM GMT+8

2004 年 9 月 9 日 星期四 【晴】

Ocamp後，無論學業、工作、做人，我都把目標定得很高，這是往日的我所不會做的。

不知自己是否發了癲，竟然想一嘗6A（或6A-）的奇蹟，換來的惡果就是身心疲累以太，精神緊張至極。雖然我不是為了名，也不想與人比較，我只是想嘗一下挑戰頂峰的感覺，正如那些苦行者一樣。

除此之外，也不許自己逃避責任，甚至連遲到也不允許……這也是我過往不會做的……

後果是，我不單達到自己的目標「洽如其分」，甚至做到「過如其分」；實在不能想象我會做這些stupid things。

昨晚我的意志終於崩毀，甚麼也再不想做，只想休息。之前強烈的意志消失後，我便立即病了。睡了十多個小時，頭腦終於稍為清醒，反省自己：「我搞了甚麼鬼了？！」

我一向認為「缺乏幽默」及「過如其分」（要知道我只是梁俊佳，不是偉大的天才或苦行者）是非常非常傻的事，但自己不知不覺明知故犯了。

要停了，要停了，做回自己，放鬆一點罷。

＝＝＝＝＝＝＝＝＝＝＝＝＝＝＝＝＝
Opal、Raymond、Kiki：深深感謝您們的關懷，我無事了︿︿

Amanda：傻啦，講追數技巧，我怎也及不上Ivy姐︿︿

>>September 10, 2004 at 12:31:04 PM GMT+8

2004 年 9 月 8 日 星期三 【晴】

今日工作壓力突然大左N倍……透唔倒氣……

聯地「果間」大學的代表，又係咁既「很樣」……頂……

成個exhibition只係需要整一本爛鬼場刊，乜鬼都唔使佢做，竟然整左本垃圾翻來，重要話無時間去印，叫我地搵人去印……仆佢個……

班中學生叫佢用電腦做少少野，又話部電腦壞左，點知我一翻到屋企就見佢online……what the fxxx……

我好少會有咁重壓力……而家真係好辛苦……呼吸好急促……

我不能逃避，不能逃避，不能逃避，這是我責任，這是我的「分」！

>>September 8, 2004 at 4:51:48 PM GMT+8

2004 年 9 月 6 日 星期一 【晴】

哎呀，做乜最近日日都朝氣勃勃咁，哈哈哈哈！！！

今日上左GIS個lab，又見倒benson，哈哈，到而家教書都唔敢望下人，死未？：Ｐ

唔知點解，雖然重未正式上GIS，總係覺得佢淺過Cartography喎。

然後即上energy，好正呀！愛死Larry呢種教學方法，至少唔悶先丫～～～而且上完堂就幾乎記得曬佢讀過乜，正呀～～～～～～

然後又即上社會哲學，超爆笑，Lv1及Lv2一齊上堂，難度又一樣，考試份paper又一樣，只係Lv2要計weight，算點先？同倒班歷史系year2,3猛人（個勢似囉）一組present及寫paper，睇來呢科有機Ａ啦（相當有信心，因為呢科好似好淺，加上有咁多freshmen陪我地……嘿嘿嘿！！！）～～

哇，正！原來社會哲學全學期只上三個tutorial！！咁我星期一咪無啦啦遲翻兩粒鍾？強呀！！！

同阿恒在hall can tea左陣，又去左lib記睇左陣書，就要上Introduction to modern chinese history。哈哈哈！又有好事發生！原來呢科只係由晚清讀到中日戰爭，而且全班得一個係歷史系人……有力一戰！

不過都有Ｄ撼事……就係阿恒始終調唔倒組，要同其它人一齊寫term paper（八千字＠＠），而我就同阿Gene不幸選了最唔識的題目……至少我一Ｄ都唔識。

晚上一丁友在舊can食飯（其實我幾enjoy），突然收倒余Sir call，話樹仁想入翻聯地，叫我比張form佢，而且重想請我幫佢做排版（好似係排一份會考生物的雞精書，十一月出版），叫我試下學PageMaker幫佢手，比翻錢我……雖然我好高興，但係我真係唔識PageMaker……真係要叫Kerry教我＠＠

晚上開會，很有趣，有風有浪，但我依然在岸。

＝＝＝＝＝＝＝＝＝＝＝＝＝
思緒筆記（今日學倒好多野！︿︿）：

‧「熱情」能維持心理動力，具提神作用；
「幽默」能保持明視距離，具明目作用。

‧一個論點是否確當，與任何人是否認同無關；要有自信。

‧妥協不一定是退讓。僅是技術的考慮，不是立場的改變。

＝＝＝＝＝＝＝＝＝＝＝＝＝
Kiki：嘿嘿，我只係開開玩笑罷了，其實我想阿包同我一齊上堂就真，原因係：「我有阿包指導而拎高分」的可能性遠大於「我在沒有阿包的拉高條curve而拎高分」的可能性︿︿

Gene：死野，既然係咁，好心就唔好寫啦＠＠

Opal：哈哈，如果我讀GIS讀得暢快，可能會修埋remote sensing ga！︿︿
乜Applied Geomor好難GA？！不過妳今個sem團火咁猛，無有怕啦！撐妳！（其實係怕妳同我一齊修同一科，會強姦曬我D GPA炸，騎騎騎！）

「鬚根是我的天賦，冬根是我的天敵。」

Raymond：因為佢英文好，又有幽默感，而且個樣又cute，哈哈，死未！

Queen：哈哈，如果發現自己的惰性遠超常人，試過勉強抗拒這種惰性卻只帶來巨大痛苦，則適當地順著這種天然惰性，是理性的表現︿︿

>>September 7, 2004 at 5:15:56 PM GMT+8

2004 年 9 月 5 日 星期日 【晴】

死火，今日又係好開心～～搞乜呢～～～

本來我要九點半上堂，但係頭三堂都係tutorial，所以十二點半先上。
最正係臨出門口，手多多login SIS睇時間表，見倒有得add/drop，嚇左一跳（我真係唔知重可以add/drop@@），跟住比我發現星期五的歷史tutorial有位，立即轉過去，咁我就唔使星期一一口氣剷七粒鍾，連lunch都無得食啦。轉左之後，應該係同阿Gene一齊上，yeah！至少做功課可以同翻地理人做，希望阿恒都轉倒啦！



十二點半係上GIS ( Geographical Information System），見翻我最鍾意的QM Zhoi，哈哈，佢又肥左，好似Friends裡面的Joey，正！


Dr. Zhoi Q.M.

果然，擁有充足的思方學訓練的人，在好多科目都有優勢。QM Zhoi一開始就同我地玩語理分析，界定甚麼是GIS。結論係GIS無客觀的定義，如果根據一般的所謂定義，即空間性資料的系統，則GIS的定義會大到幾乎失去認知意義云云……呵呵呵，apply倒我睇得最痛苦的思方書：《分析邏輯》的概念添︿︿

原來阿包都係上GIS，但落左堂在Lib記見倒佢，佢話打算Drop左呢科……我不禁大喊：「Good drop！」，嘿嘿嘿！！！

然後係上鍾謙的Regional Geography of China，一聽倒佢講野，開心到飛起，因為：原來我今個學期Take的Geog科的Lecturers（鄧生、鍾謙、QM Zhoi、Larry Chow），都係「識講」英文ＧＡ！！我直覺認為，呢四份老師，會係我最愛的四位地理老師，如果跟倒佢地（唔要Larry，因為我唔係靚女）做Hon Pro就正啦！

依理性走堂主義的進路（Rational Absentationism Approach），這個學期，暫時沒有一科具足夠的可走性（Absentibility），所以今個學期做唔倒走堂王lu~~~~~~~~~~~

＝＝＝＝＝＝＝＝＝＝＝＝＝＝
思緒筆記：

‧若要人愛（be loved），必先可愛（lovable）。

‧真正自信的人，不會及不需要向別人炫耀自己的甚麼。
　缺乏自信的人，總會及總需要向別人誇耀自己的甚麼。

>>September 6, 2004 at 12:42:33 PM GMT+8

2004 年 9 月 4 日 星期六 【晴】

今朝與漢記同學去西環飲茶，原本約左十點，自己以為八點，早左好多起身，搞到勁唔夠訓，去到巴士站打比Tracy，先知自己搞錯時間，然後死死地行翻屋企，九點鍾再訓過，訓左半個訓又要再起身，再左翻巴士站，Join Tracy出發。

今次有飲姐、墨魚（哈哈，成年無見佢啦，依然咁Cute^^），Suki，阿宇、新生、Tracy、Jess及一個我唔熟／唔識的同學。

飲完茶，同Jess去中環三聯睇書，不過佢有事要早走，而我就繼續睇，睇左兩粒鍾，返歸。返歸前食左個tea，然後返家訓覺，呵呵呵。

晚上，為左追翻條JSGA Camp費（有個學生想玩野唔比錢，以為我會放過佢，太天真啦！），打比銀禧中學的地理老師Miss Fung（有無串錯呢）追討欠款，好在呢位老師好好人，我相信件事應該解決倒。

＝＝＝＝＝＝＝＝＝＝＝＝＝＝
甚麼是「理性走堂主義」？

簡言之就是：
「走盡一切可走的堂，
　不走一切不可走的堂。」

怎樣界定「可走的堂」及「不可走的堂」？
沒有標準答案，因人而異。
徵結在於，權衡所有相關因素（例：自己的性格或能力／該堂的內容／該教授的教育效果等）及後果（例：會否低分／得罪教授等？），通過自己的理性去界定。

＝＝＝＝＝＝＝＝＝＝＝＝＝＝
Queen：果然係英雄所見略同呀！！Great minds think alike！

>>September 5, 2004 at 3:11:29 PM GMT+8

2004 年 9 月 3 日 星期五 【晴】

Ocamp之後的數日，唔知點解，日日都好開心，
心與思都與往日拆然不同：心變暖了，思變銳了；
重拾學習的熱情，
新悟處世的藝術。
或許我的幸福的ＢＵ生活，即將開始。
＝＝＝＝＝＝＝＝＝＝＝＝＝＝＝＝＝＝＝＝＝＝

爆笑，昨晚十一點四十幾分，距離我Add/drop的時限重有十幾分數，阿恒突然打來，叫我幫佢Drop左Investment planning，改Add Accounting，搞到手都震埋（因為自己都未Drop過野，又得翻咁少時間，怕趕唔切），好在都搞得掂。然後同佢吹左好耐。

自己嘛，無得Drop無得Add，一切照舊。

今日十二點去灣仔印Poster，兩點半去油麻地地恒交Posters比阿Mi，真係扺，八毫字一張。
然後同培正的Daniel去買Figure，for 我地的Exhitbion遊戲攤位「搖控車撞地標」用，但唔使開公數，因為佢本身都想儲。

買齊貨，然後我地去Ｍ記傾呢個攤位點Set，傾左一粒鍾，終於有一個非常不錯的清徹概念，決定今個星期六動工。

「搖控車撞地標」係我同Daniel負責，而另一個「地標拼拼拼」攤位則由我的活動小組總動員負責，不得不讚他們，我一落order，佢地第日就即刻自己去ＢＵ開會，重即日完成Ｄ拼圖，真係扺讚！！多謝您地！

死啦，好似我要負責搵ＢＵ教授做開幕禮嘉賓喎（唔通又搵ＫＫ？），重要我呢口齒不清的傻仔做ＭＣ添，真係又一個新挑戰啦！

昨晚約左Fiona今個星期四一齊食lunch，傾下十月點同我的下莊傳莊；呵呵，好期待知道我的仔／女係邊個。

＝＝＝＝＝＝＝＝＝＝＝＝＝＝
啟明：哈哈，我無Add/drop到喎，科目依舊，你又點？︿︿


Kiki：唔准寸我～～哈哈哈哈！！其實我見倒妳ＧＡ，妳好似坐響課室左下角丫嘛︿︿
無錯丫，阿包係神人，我地呢類蟻民都係安份Ｄ拎A-啦，嘿嘿嘿～～～
聯地展梗係要妳支持，記得班多Ｄ人來呀！多謝多謝！！！

>>September 4, 2004 at 12:10:16 PM GMT+8

2004 年 9 月 2 日 星期四 【晴】

今日提早翻學去Join阿恒，睇佢Add/drop成點，佢煩左成日，竟然比啟明一話「讀Investment planning啦」，而選了這科，理由是無Tutorial，唔使同人一齊做project，又可以經常唔留心聽書，真係有唸頭。

我就去左Lab印聯地Poster，聽日再去灣仔大量印製，派比Ｄ學校。點知發現出左事，在此不作解釋了，結果係我好可能要從頭整過一張新的。

終於上過Larry堂Energy啦，唔錯喎，佢肯理下我地Get唔Get倒，雖然Ｄ鬼劃符一如傳聞般可怕。

Larry呢堂好強，至少八成以上係女仔，搞到我呢位少數男仔有Ｄ驚，因為傳聞Larry重女輕男＠＠不過實話實說，這方面我與Larry可謂臭味相投，我絕對鍾意女同學多過男同學，唔係話想追女仔，而係女仔一般上可愛過男仔好多好多：

女仔有出現下列三種組合的機會遠高於男仔：
１、外表可愛 + 性格可愛
２、性格可愛
３、外表可愛

以上三種組合我也喜歡得很，所以我覺得女仔遠勝男仔！哈哈哈！！！

第一次與上屆莊員（重要有阿包呢個神人＞＜）一齊上堂，感覺很新奇呢～！

有同學暗暗叫苦：哇，做乜呢班咁高手雲集呀？！！雖然佢一定一定唔係講我，但我知道佢講緊邊幾位高手，所以我也有點害怕。唔得咁！要積極一點！積極一點想……「你地拎Ａ好啦，唔好同我爭Ａ-呀，嗚鳴嗚＞＜！！！」



講時講，這個學期，我可能因為自己那套「理性走堂主義」而令自己不能怎樣走堂，苦！

－－－－－－－－－－－－－－－－－－－

呢幾日，可能係我在ＢＵ，最快樂的日子。
我終於知道，how to be a responsible and reliable person.

－－－－－－－－－－－－－－－－－－－
Queen：哈哈，我鍾意讀書ＧＡ，只係唔鍾意上堂之嘛︿︿

Gene：妳重好笑啦，買左飛又唔去得，搞到要四出求救，哈！哈！哈！哈！哈！

Raymond：哈哈，我怒讀比你睇！

Opal：竟然！！！？！！我都只係試過一次發夢追住佢拎簽名，佢重要唔肯比添？！＞＜！！

>>September 3, 2004 at 5:16:00 PM GMT+8