2004 年 10 月 2 日 星期六 【晴】

成日無心機做野，又去左裝修自己間房，呵呵呵，又靚左～～～
去左日本城買左個特價叮噹咕「口臣」，係幾舒服喎～～～（我懷疑係咪見倒Opal間房有一個，自己唔抵得，又想要翻個，所以無啦啦買左翻來）

＝＝＝＝＝＝＝＝＝＝＝
Ke：妳好似係第一次留言比我喎︿︿
請留意「／」呢個符號的用法，嘿嘿嘿！！

珊：我都睇到眼濕濕呀＞＜！

啟明：一定借比你！等你親眼睇下willison，哈哈哈！

「茵妹」：哈哈哈！！如果妳係剛廿歲生日，咁我老過妳添！
我十月廿二日就廿一歲啦！！（昧係我名前加個死字丫唔該，死皇后～～～）

Tracy：問小強啦！

>>October 3, 2004 at 5:50:29 PM GMT+8

2004 年 10 月 1 日 星期五 【晴】

終於睇曬Kill Bill Vol1-2啦，屁痕果然無介紹錯，真係好好睇！
D音樂太正啦！D對白都好正！

最近睇左好多片，除左Kill Bill之外，最深刻要算是湯漢斯的「機場客運站」。
我一見倒佢張海報，就直覺認為佢會一套超正的片，因為好有阿甘正傳（我最愛的電影）的味道。
果然！機場客運站已經成為我心目中第二最愛的湯漢斯片（第三係劫後餘生，第四係雷霆救兵），超正呀！！！！我睇完之後，心情好耐先平服倒，坐又唔係，企又唔係，訓又唔係，好好想做D野表達呢種情緒，但又唔知可以做乜……差點兒即刻睇多一次（但果時已經係晚上三點，第日要翻學，所以放棄左）。

又翻睇左「連鎖蝶變」，真係太正啦！最驚喜的是，原來我上次睇的版本，同今次睇的唔同，結局唔同左，嚇左我一跳！！

又睇左「Marci X」，其實唔係咁好睇，只係支持Friends的Lisa Kudrow。（我而家每餐飯都有睇Friends，實在不能目拔！可能真係日子有功，英文好似又好左少少咁）

又睇左聖鬥士星矢天界篇序章～～

然後打算翻睇「明日之後」，「地心浩劫」，哈哈哈哈！！！！


落莊後的計劃：
減少一切活動
減少一切任務
減少一切虛浮的交際
減少一切淺薄的溝通

一個字：摺／靜／平／冷

＝＝＝＝＝＝＝＝＝＝＝
Raymond：哈哈哈！估唔到有呢個效果喎～～

>>October 2, 2004 at 11:55:48 AM GMT+8

2004 年 9 月 26 日 星期日 【晴】

今日心情有點怪，無心情上堂，於是上完GIS就同阿恒走堂，食TEA，然後去灣仔行左耐。

不過心情仍然有點怪。

>>September 27, 2004 at 5:56:05 PM GMT+8

2004 年 9 月 25 日 星期六 【晴】

漢記大專同學會廣州行！

今次我地真係人強馬壯，集齊三屆同學會成員，一齊去廣州玩。哈哈，好開心，又見翻d好朋友，大家好似都無乜點變丫︿︿

過關時，發生左一件有趣的意外，獨姑同阿茂，因為唔小心帶左份法輪功報紙（其實係人地派比佢地）過關，比內地海關check倒，被人「上堂」及「思想教育」左個幾鍾，重要寫悔過書，先走啦，真係好想插班共產黨（IN THIS CASE）。因為已經BOOK左車，唯有我地自己去廣州先，然後佢地兩個自坐車來。

星期六一到步就食午飯，然後坐車去中山大學。之後聽左個TALK，然後參觀。但係我就要同內地一位同學plan定一陣點做MC，點hold d game。過程都幾搞笑，因為我唔識講普通話，唔係點聽得明普通話；佢就唔識講廣東話（佢係貴州來的），又唔係點聽得明廣東話，更聽唔明英文……所以都幾雞同鴨講……


當日MC：Guy及秋萍（中山大學心理學系三年級）

完左個GAME，我地一齊在中山大學食晚飯，然後翻酒店。晚上同Lili、Jess、Tracy、香組、小強、阿茂一齊去北京路怒食小食，正呀～～！！

果晚最難忘係在飲組間房，我同Lili、Jess、Tracy、Suki、小強、阿茂玩「爆大獲」，互問極尖銳的問題（後來以性為主題），聽倒好多笑料，哈哈（當中以Lili的回答最強最妙，簡直神乎奇技！哈哈）

第日去左睇新機場，然後食百姑自助餐。食完成肚箘，再飲黃老吉，再飲靈芝茶，真係有D擔心個肚出事（好在無事）。

全個trip，最正係玩「飄流」（其實叫急流重洽當）。兩個人一組，坐在一個橡皮艇上，身穿救身衣，頭帶軍盔，在一條四點三公里的峽谷，沖落去～！！每經迥湍流／急流地帶，我地都差d被拋出艇外（小強已經中左招，好在無事），全身濕透，而且要用軍盔買艇內的水放走（否則會過重反艇），總之好刺繳，好正！！

回程大家在車上分享感想，有同學重講到喊添。呢度真係好warm……

回到香港，已經係星期日的晚上九點幾啦。


上排左起：Suki, Lili, 飲姐, 獨姑, Tracy , Jess
下排左起：Guy, 阿茂
攝於廣州新白雲機場
＝＝＝＝＝＝＝＝＝＝
Amanda：哈哈哈，點解死人都識留言GE？
Raymond：咩無聊呀，都唔知幾有創意呀～～：P
Mo競：下？成個week唔翻？ok啦，我盡量錄比你（如果我無走堂的話）
Ivy：嘿嘿嘿，梗係啦！︿︿
Viola：佢好在唔係同好一組，哈哈哈

>>October 7, 2004 at 8:14:39 AM GMT+8

2004 年 9 月 22 日 星期三 【晴】

︿︿

聯地異獸戰
Eric Wong, CUHK vs Guy Leung, HKBU

好拍檔！

好兄弟！

頂～～

佳為聯地殉職！

搖控車撞地標！
======================
Raymond: 哈哈，當然強啦～～

>>September 23, 2004 at 2:32:06 PM GMT+8

2004 年 9 月 21 日 星期二 【晴】

今日終於有時間寫倒日記啦︿︿

無寫日記呢幾日有好多重大事件發生，例如最新地理學理論Guy's CBD Model (Leung,2004)啦；我變左Kerry馬仔，做「過氣外秘‧宣傳二」啦；跟莊小三寶成功Re-u啦；趕urban趕到想死啦等等

Guy's CBD Model形象地描述了課室內學生的空間分佈，革命性地提出影響分佈的作用力不是不同學系學生的內凝力，而是一個流動CBD的推力。

這Model只有三個環，內環是CBD環（稱為「點」更洽當），人口極度稀少，人口一般不會超過二；第二環不是過渡環，而是inner city decay至極限的真空環，空空如也，寸草不生，；第三環是Sub-urban，人口密雜，欣欣向榮。

Leung Guy C.K.(2004), From Burgess Concentric Zone Model to Guy's CBD Model, GEOID Pubication, 2004.


講翻今日啦，今日只係上一堂，就係Regional的tutorial。啟明好鬼慘，同左一個「識少少扮代表」的presenter合作，Q/A部份一直搶曬D野來答，但係問非所答，且態度惡劣，咁佢當然成為我等的劍下亡魂啦，哈哈哈！！

然後Kerry打來叫我幫整手poster，估唔到宣傳一咁快叫宣傳二做野，但係deadline係聽日，太趕啦，所以推左佢；但聽倒佢把聲好苦惱咁（原來佢要趕urban），唔忍心，所以打翻比佢，TAKE翻個JOB。好在佢話可以hea做，所以好快就做好啦～～

＝＝＝＝＝＝＝＝＝＝＝＝＝＝＝＝＝＝＝＝＝＝
Natalie：放心啦，搞翻掂啦，點會少左妳果份︿︿
Amanda：多謝妳地咁幫手呀，唔係個exhibition就會無左一個counter啦！︿︿
Opal：我玩都最後都好似唔夠妳玩得好喎～～～
鬼王珊、基因：哈哈哈！一於問下鄧生比唔比我做啦，哈哈哈！！！！！

>>September 22, 2004 at 12:40:39 PM GMT+8

2004 年 9 月 19 日 星期日 【晴】

昨日Exhibition啟動，八點就去到HKU搬野，坐WAN去大會堂，然後狂set野，跟住採下排，就正式開始開幕典禮。今年好強，大間U都班倒教授做嘉賓，而我地BU係KK。

印象中，今次係KK無廢話，無「播帶」的致辭，真係講倒我地個主題「地標」，然後口才顯然係三個嘉賓中最差的一個。

半被迫半自願下，要同KK social，講講下Opal同Kiki都相繼到場比面，真係唔話得！Opal玩我地個counter「搖控車撞地標」個樣搞笑，成個細路女咁，嘿嘿！

然後，阿麻Fiona同埋佢個超串咀男友阿Bon（四屆前的聯地浸大代表）到場。好大對比！Fiona講野好客氣，雖然係批評，但有POINT，有理性，相反果個阿Bon一入來就擺大牌，呢度串下，果度串下，重要爆埋粗，無野呀？最慘係無POINT囉……佢D批評類似「蘋果無橙味係錯」，「你唔能夠同時是男人及女人是錯」……港大同中大，重有阿Roy好似為比面佢咁，死都聽住串，重要連連稱是……而我，聽左廿秒就即刻閃埋一二面，叫其它幹事保護我，收藏我，哈哈哈！！

果個Roy後來串我，話我做乜作為第一代表唔去聽人講野……我心諗，唔好話你地性格唔夠堅定？有D人，唔使理就唔好理，使乜顧忌咁多？除非佢係乜教授，乜官員等，而我唔理佢會令自己及個會惹上麻煩，咁我就一定好圓滑咁積極應付呢D人，否則理佢都「傻」呀。

唔知係咪開左個勢，兩日的Exhibition，大概有五、六個好似阿Bon呢種人，大多以阿叔阿伯為主，極度麻煩，成日想認叻，以插人來抬高自己。例如我地試過比個阿伯叫曬我地所有幹事，質問我地識唔識讀「San Pietro」（聖彼德大教堂）呢個字……

昨晚完左之後，立即飛去彩虹，同文聰、青鬼去大排檔食飯，飲酒，然後去公園吹水吹到十二點翻家，然後睇reference睇到三點訓覺。

今日都好搞笑，超多阿伯阿叔上來睇，佢地真係超認真睇，重係咁問我地題，當然亦有不搞事份子，為串而串啦！

十二點半左右，Raymond專登來睇，真係無得彈！跟住我半偷走地同佢去lunch，吹左陣水。哈哈哈，佢好強調我地「跟莊小三寶」快d re-u。佢實在太盡責可靠啦！都係果句，Raymond不愧為我心目中最好的榜樣。

終於完成Exhibition啦！我的任務將將完結啦！之後狂影相，我重比人捉住，被聯地banner裹屍，搞到我好似做左聯地烈士咁，然後班友扮曬傷心，然後培正的老師Mathew師兄就狂影，笑到爆。

之後去左尖咀巴西燒烤餐廳食興功飯，D野食好正呀！重有巴西人彈結他，唱歌，正！！不過好貴……

已經決定左，十月廿三日，BU，AGM。我的任期即將完結。

PS 今日成日比人話我個樣似女人，由exhitbtion講到dinner，乜我似咩？

>>September 19, 2004 at 6:53:33 PM GMT+8

2004 年 9 月 15 日 星期三 【晴】

被人耍了一次又一次……
下午的心情墜入谷底，重要同阿Roy傾電話，佢D語氣成世都係咁，寸到爆，莫明火起，CUT鬼佢線……

自Ocamp，接到一份又 一份design的工作，已經做到上左手（雖然肯定未及得上Kerry）……創意好似好左，今日走左去文具店買左堆硬咭紙，然後為間房「裝修」：以黑色硬咭紙當牆紙咁用，間房即刻靚左好多！用左十幾蚊就有咁正的效果，阿媽笑到飛起（因為平）。

原來我一唔開心，就會執房，執電腦桌面……然後享受成果，跟住心情就會好翻。


哇……連漢記同學會都要我設計咭片，重要星期一交倒貨，又唔好意思推……
點解會突然又多翻咁多野做GA＞＜！！！！

=======================
而家早上一點半，終於比我hea做好d 咭片，連slogan都係抄今屆中研的，死未，哈哈哈！！！




＝＝＝＝＝＝＝＝＝
Moses：死Mo競你真係乜話都識喎好似～～：）

>>September 16, 2004 at 5:41:32 PM GMT+8

2004 年 9 月 14 日 星期二 【晴】

呀，八點半死翻BU，同自己組組員傾urban份paper點寫。點知隻死Roy放左飛機。得翻我、阿恒，同埋一位武漢大學的交換生Tracy三個。

我地傾得好爆笑，廣東話＋英文＋普通話，三種模式急速轉換。我都係第一次用英文同人傾功課，哈哈哈～～～

傾到十點半去左影印，然後十一點要同班莊員一齊GIVE個上莊Briefing比Year one。睇來今年班新生都算熱衷上莊喎：）希望遲D多翻三個總務幫大家手啦！（到時我已經逍遙快活中，哈哈哈！！！）

十二點半，Ada來比野我帶去HKU。原本打算同佢食飯，點知撞正peak lunch hour，間間都佳滿人，唯有唔食啦。咁佢就翻銀禧，我就翻屋企～～～

四點半去HKU，原本係開會，點知變左做庇護……一直做到十點＠＠

（「某學校」再展本色！真係好野！………）

又由於開會唔成，星期五要再開過……＠＠

唔掂，篇urban paper，我聽日一定要寫好自己果PART，唔係就仆直～～～

呀，漢記大專同學會打來，要我廿五、甘六去廣洲同中山大學交流，兼睇新機場。原本話去，但而家好唔想去，因為好想要翻D自閉時間（最近實在太缺乏這種充電時間啦！），好想唔使再講咁多野，唔想再煩野，「享受存在本身」。點知強哥打來……無辦法唔比面，挶住去。我地會同中山大學班學生玩，我原本要同當地學生一齊做MC，但而家真係唔想再take up any duty，希望推得倒，唔使做啦……

別人充電可能係同一大班人瘋下，玩下
而我則只有摺翻陣，先能夠充倒電，所以點解我Ocamp成日要訓覺，即使得15分鍾（其實我未必係訓，我只係想有一段時間，我可以連思想都停止埋，冷眼看著天花板一會兒）

晚上要寫聯地的感想交比出版小組做年刊，真係就快就落莊，又好似開始有D唔拾得。

臨訓前，看了阿MI叫我交比BU圖書館的HKU GGAS年刊，睇左佢地上屆主席的感想，佢引左一個句話，極有意思，令我回味無窮：

「真理會敗於人際關係前。」

＝＝＝＝＝＝＝＝＝＝＝
Opal：我地個Re-U又要再約過啦＞＜

>>September 15, 2004 at 6:31:02 PM GMT+8

2004 年 9 月 12 日 星期日 【晴】

拖房執到好整齊好靚，
連個桌面都執到企企理理，
美麗的工作環境，能有效減低工作壓力：）



>>September 13, 2004 at 3:49:45 PM GMT+8