2005 年 2 月 4 日 星期五 【陰】

今日好唔開心.
踢波........其實係一場比賽.
但係竟然唔夠人踢..........甩底的甩底, 忙的忙, 個個都唔黎.
最過份的, 係靠我地踢波的幾個人去"班"夠人黎踢.........
無得換人, 傷左、累了也無辦法.........
更加無任何 Geog 人黎支持.
我地踢呢場比賽, 為咩?
為 Geog Soc? 還是為了自己的波癮呀?
望見對方, 很大的對比 !
心中很鬱鬱不樂.
忍不住去 newsgroup 留了言.
絕對唔想「哀莫大於心死」.
我未試過灰到咁.........

其實呢場比賽中, 豪哥勇戰受傷, 撞親個頭.
可大可少呀.
好彩之後有呀澤陪佢入院.
夜晚, 也走去探探他.
幸好他沒大礙.
新年呀, 唔好搞0的咁唔老黎野.
最邪的, 是我們開波前都有講：「新年喇, 唔好咁搏.」
點知, 都係防不勝防, 對方太"茅"了 !

最心痛的, 都是這件意外發生時, 只有我們 7 個參賽者知.........

>>February 7, 2005 at 5:26:04 PM GMT+8

2005 年 2 月 3 日 星期四 【陰】

今晚係 DCSP 朋友聚會晚.
9 個人0係深水灣 BBQ.
不過我同呀敏、呀 Ming 遲好多先入到去.
皆因我地搭巴士過海........但係塞到傻左.......

最搞笑係我地 3 條友入到去後, 唔知個 BBQ 場0係邊.
我就唯有睇睇地圖, 之後就沿住0個方向, 聞下聞下咁聞到去目的地~

最後, 我地燒到 12 點幾先肯走人.
不過今次竟然係食剩好多丸喎, 都係第一次係咁~ 人地燒野食通常都係食制扒 gar ma.
我就負責拎哂0的"濕"貨返屋企.
搞到我之後0個日0係屋企到食火渦咁食哂0的丸、腸仔~

>>February 7, 2005 at 5:57:55 PM GMT+8

2005 年 1 月 31 日 星期一 【乍雨乍晴】

新年前 !!
我話過我新年前一定要做哂0的 lab 去 !!!!!
好憤怒呀 !!! 做極都做唔完??!!!
我要離開 9 樓 !
之後改去圖書館 !

呢排發覺一路聽收音機一路做 lab 幾開心.
0的 DJ 又勁無聊, 令我不時發笑~
又可以解下悶.
真係做 lab 都做得有精神0的.
最緊要都係有新歌仔聽下 ma ~

今日羅生打電話俾我.
同我講話知道有份工可能0岩我喎~
嘩 !! 好多謝佢 !! 估唔到佢會主動幫我 !
我聽到佢個電話同呢個消息, 好感動.........
不過........呢份民航處見習航空交通管制主任要會考同 a-level 英文拿 C 或以上...........
我就係得 D lor..........
雖然真係同 GEOG 有關, 但係都怪我英文底子差.........無努力學英文之過..........
浪費哂呢個機會...........
真係好感激佢~!
其實, 我尋晚心血來潮都上過政府個網到睇過, 都知道有呢份工了.

政府工, 真係人工高、福利好~

>>February 1, 2005 at 4:26:55 PM GMT+8

2005 年 1 月 26 日 星期三 【陰】

今日又一次破哂紀錄......
今日竟然 9:05 am 先返到去上堂.......
哈, 自己都覺得遲到得越黎越離譜........

原來自己照住個 manual 去做 lab 係幾難0既事. (同靠 Johnson 教好唔同)
有好多野都要 plan 好先.
仲要研究好、譯哂0的 steps 先能夠開始做.
今次做呢個 soil chemicals 0既 tests 真係好有挑戰性~!
越做越想清脆地搞掂佢 !

下晝約左我個 mentor 羅生食 tea.
哈~ 越來越覺得同佢幾夾.
好多野都可以同佢吹好耐水.
今日, 家事、工事、學業、宗教..........咩 topic 都差唔多講齊.
join 左呢個 mentoring programme, 估唔到可以認識到呢位長輩、社會上的成功人士.
從佢口中, 確實係學到唔少野.
自己的想法實在太過簡單.
仲記得呢個比喻：屋企裡有一盒朱古力, 如果人人都只係拿來吃, 終有一日會無哂；如果人人都放粒朱古力落去, 咁就會越堆越滿. 人對社會, 唔好只望回報, 自己也要 contribute, 屋企如是, 如果屋企裡人人都愛大家, 不望家人對你怎樣好, 個家就會好幸福.
好難得, 我竟能與一個 50 幾歲的長輩傾得埋.
他的思維、建議, 就是我一向期望的那種 style. (諗唔到點樣形容)
反之, 對著我老豆說同一樣的話, 得出來的回應肯定有很大分別 !
畢竟, 他和他, 大家的背景都很不同.
我同我老豆, 真係無咩可能可以坐低傾偈傾 2 個幾鐘頭..........

那一句, 令我都覺得自己有點煩.
完全唔知自己做咩.

一個字形容我呢排個衰樣：「殘」

>>January 27, 2005 at 4:11:40 PM GMT+8

2005 年 1 月 25 日 星期二 【陰】

經過尋晚 12 小時昏迷後, 今朝終於知醒起身, 上堂無遲到~
不過~ 今日第一堂係 1130, 理論上應該唔會遲到的~

今日先做完 conductivity 0既 test.
仲有成堆 soil chemicals 未 test.
唉........我個大計又一次地失敗..........
睇黎今個月內都未必做得哂.
見著其他人陸續做完 lab, 也開始畫 graphs、計數.
自己不期然有種不知所措、徬徨的感覺.

尋日係大媚生日.
不過我地今日先同佢慶祝.
我只和他們到中環吃晚飯.
果然係一個吹水好地方.
吹了 3 個鐘頭也無人趕~ (雖然多次 feel 到個 waiter 想我地走)
不過略嫌有點貴.......但佢地竟然話都 ok 丫, 唔貴喎.
我當堂 O 咀.......

今日知道啟明 pass 到考車.
聽佢講返, 佢個牌真係考得驚險呀~
佢咁都 pass 都算佢得~
不過佢講係咁講, 佢考到係一定有原因的.
有其他過人之處吧~
總之, 恭喜哂~

始終, 有種不入流的感覺.
大家有大家已知的話題.
時間、人物、地點, 一點也不清楚.
我真的是「不知道」先生?

尋日, 拿了 IELTS 的 result.
喜出望外~
竟有 average 的成績, 也是公務員考試英文卷之"pass"的資格~
但, 一時之間, 我想不起我應該和何人分享我這一刻的喜悅.

今日睇明報新聞.
見到一則令人感動的新聞.
一個父親為尋找在海嘯中失蹤達一個月的女兒, 不捨不棄, 終不負有心人, 從一張名單中發現自己女兒的名字, 順利的找到她.
那張圖片給我很大的震撼.
兩父女緊緊的相擁著, 父親含淚而笑；女兒合拾相眼, 感受著與父親相擁的一刻.
只有 5 歲的女兒說了句：「爸, 你去了那裡? 我很掛念你.」
這句話, 充滿了稚氣~
這個父親, 確實很幸運、幸福.
願所有與親人失散了的人能像他們一樣幸運.
至少, 也可以找到屍體吧.
一個親人失蹤, 連屍首也不知所蹤, 這個遭遇確實令人心痛.

>>January 26, 2005 at 6:20:10 PM GMT+8

2005 年 1 月 20 日 星期四 【陰】

今日超級傻仔.......
又係遲起身, 遲到......
以為今朝上 2 個鐘啦, 返到去都仲有 1 個鐘上.
點知我記錯左.......
返到去, 坐底, 20mins 後走得.......
我返去做咩呢........

晏晝同 Bella, Vaneesa & Jeff 食飯.
起因竟然係 Bella 想食餃子.......
真係搞笑.
呢個配搭都算係第一次~

今日一樣係好 tired.
好似有病咁.
成日無黎精神.
所以無做 lab 就返左歸訓.

訓左個幾鐘, 又起身去食飯.
今晚約左舊中學同學食飯.
今晚出黎的, 都係超耐無見的舊同學.
個配搭又係好奇怪 gar 喎.
得我一個文科人.
其實大家都只係中一至三的同學.
Jasmine 更係無見成 5-6 年的舊同學~
真係唔同左好多, 個 feel 唔同哂.
雖然我同佢地唔係好熟, 但係都無悶場.
食飯時又一路玩遊戲咁.
玩 black magic, 玩 magic (包括啤牌同銀仔).
我地食完飯都仲繼續玩, 一路行一路玩.
搞到我地由尖咀行到旺角~
真係好鬼好笑~ 一行 6 條友, 0係條街到玩銀仔~

今晚學左幾個遊戲同幾條 IQ 題~

>>January 21, 2005 at 4:56:40 PM GMT+8

2005 年 1 月 19 日 星期三 【陰】

今日又有好消息~
我 OC lab 已經完畢~
對做完 lab 又邁向一步~

呢排身邊的女同學整日嚷著要減肥.
唉.........
青茶淡飯, 又何必呢?
農曆新年點過呀......
之但係又有人同我講佢想增肥喎.
做咩呀.........
0的女人咁搞笑0既? 有人鍾意瘦0的, 又有人鍾意肥0的喎.
其實肥瘦唔會對搵工有咩影響下話?
除非你去見「香港小姐」啦.
只要身體壯健, 搵咩工都0岩啦.
又唔係話減肥/ 增肥唔0岩, 因為始終太肥/ 太瘦實在對身體唔好.
跟餐單係好.
之但係又無理由肚餓都唔食野 gar?
餓壞又何必呢? 何不食0的能飽肚的生果呢?

今晚食飯找少左錢........
俾左好多 tips 添........
死蠢.

>>January 20, 2005 at 3:31:24 PM GMT+8

2005 年 1 月 18 日 星期二 【颳風】

今日上堂又遲到.
始終未有上學的心態.......
要快0的 catch up 返先得.

今日 Dr. Chung 0個堂其中一張 powerpoint slide 有循道幅相.
哈~ 睇到呢張相, 我同佢都笑了出來.
其他人都唔知發生咩事~
其實皆因我同佢都係師兄弟關係 lor~

今日填左表報大都會.
同老豆佢講時, 同佢差0的鬧到飛起......
有0的野唔係一定要用錢黎衡量 !
去外國睇驗下, 做下野吸取工作經驗都係好難得的.
無錢收又去做野係傻仔咩?
我唔認同.
最頂心的都是那句：「你想唔收錢又去外國做野咩?去姑媽屋企掃地啦! 佢都需要人.」
我0係今晚之內, 絕對唔想同佢再講野 !

>>January 19, 2005 at 2:37:24 PM GMT+8

2005 年 1 月 17 日 星期一 【颳風】

今日本身 day off.
之但係俾呀佳同 Opal 勸左 add Intro. of Phil.
所以就搞到今日都要返.
其實我因為 add 左科垃圾 PE 科, 先去諗 add 其他科.
今日聽過一堂後都幾得意.
之但係我真係無哲學思想 lor......
要搵呀佳補下習先得.

夜晚去左踢波.
不過正確黎講係去睇波.
因為無出場.
不過都好開心~
我地 Geog win 左中研 2-1
我地入左決賽, 不過係對 PE...........
班 PE 日操夜操, 都幾難贏佢地.
今年其實已經超哂班, 從未 expect 過我地會打到入決賽.
都係多得今年班 yr 2 and 1.
靠我地 yr 3? 死硬.........

之後打籃球.
今晚手風都幾順~
如果著返對戰鞋同短褲, 我諗會表現好0的添~

>>January 18, 2005 at 5:11:18 PM GMT+8

2005 年 1 月 15 日 星期六 【乍雨乍晴】

今朝又一早起身返 KFBG, 不過最後都係遲到.......
今日唔係帶團, 而係去 HKU KFBG Research Center 上一個 Deep Ecology Saminar.
個講者 Alan 係鬼佬, 所以今日全程都聽英文, 簡直係練足整日 listening.
不過我都服左佢. 得0個少少 slides 就可以吹足一整日 (9:30am-5:15pm).......
朝早0個 part 就玩 exercises 多, 用眼用心去感受唔用口, 感受人的感受.
哈~ 好玄, 不過都幾有意思. 教我地要多0的用眼用心去感受大自然, 當佢地有情有生命, 唔好破壞環境.
之但係下晝0個 part 佢就齋講, 又食完飯喎........關哂窗簾關哂燈........想唔訓都幾難.
有唔少人都"林"底左, 仲聽到一下鼻寒聲添~!

不過今日有兩個位我覺得最深刻同精警.
1) 有個中年女觀眾表達感受：佢話細個時住在鄉村地方, 周圍風景優美, 人與人的關係也很好 (不像現在的石屎森林、高樓大廈般人與人間陌生), 就算與動物也一樣. 夠鐘食飯時, 家養的禽畜會自自然然返黎一齊食, 不用困著它們. 人們在門口坐著食飯, 飯粒跌到落地上, 就有小鳥飛到身旁, 不驚人般與人同餐~
這是一幅很美的畫面, 大自然的美、人的本性應該如此.
這就是自然的可愛~
我們現代人所追求的物質生活, 完完全全與之背道而馳.
"Materialism is the Real Lifestyle ? No !"
2) 另一個有眼疾的觀眾表達感受：雖然他看不見, 但他也能感受得到自然; 雖然他看不見, 但他也能用一些書中/名人所說的名句作比喻, 實在令我佩服. 他說：「人說要日行一善, 我說不夠好, 我認為我們應該日行一惡, 因為人每天對大自然所作的惡 (破壞) 實在太多 !」
從未聽過有人會這樣說.
這句話實在值得令我反思.
我究竟一日中做了幾多件事係會破壞環境呢?
連一個看不見東西的人也能出口成文, 我又如何呢?

夜晚, 同 Benny, 朱德同老 Bri 勁無聊咁入左元朗食飯.
因為我地無個係住0個頭的, 全部都係九龍 & 馬安山人.
本身想食日本野.
但係最後又只係去左 Pizza Hut.
真係唔知搞咩........

終於見到朱德女朋友幅相.
都唔錯丫, 死朱德佢成日都咁鬼好運~

今晚與他們討論 A、B、C.
又有朱德「遇人不淑」事件.
哈~

>>January 16, 2005 at 5:45:32 PM GMT+8