2008 年 5 月 25 日 星期日 【綿綿細雨】

問題仍然存在……
我或者可以接受某些原則
但不能接受將那信仰放在最首位
很多東西可以更重要吧？
又或者不要在我面前搬出來，去推翻先前所作的「華麗」原因

是要去接納，還是要去忍受？
我還未有這種級數……

>>May 26, 2008 at 12:56:51 PM GMT+8

2008 年 4 月 24 日 星期四 【陰】

今朝收到一個噩耗……
在加拿大時間的今早七點半，我四姑媽因為胰臟癌離我們去了……
堅信基督教的她，願她可以在天父的懷中開心的繼續生活下去
正如老豆所說，她不再痛苦反而更好吧！

雖然我和姑媽相見的時間很少，但我還記得兒時到她家拜年、玩的情景
她以前在香港的家的每一樣佈置都仍然在我記憶中。因為在當時，她的家比我的要大得多！

她知道我未信基督教，她曾經寄了一些與基督教有關的剪報和 vcd 給我
我還有留下，但我沒有拆開看過，但這些東西很有可能已埋沒在我的一大堆雜物中了
對不起……

>>April 25, 2008 at 1:26:27 AM GMT+8

2008 年 4 月 21 日 星期一 【晴】

等我又 update 下近況先

我終於調左去第二個「環頭」喇！再不是今日唔知聽日事，望天打掛望收工，收工先知聽日返幾點的生活……
好感動呀！
不過唯一唔好的就係無 OT 錢收了
呢家又過返兩早兩晏兩通宵的生活~
著返制服，無以前咁 free 了，一舉一動都被人監視住咁
算啦，經過左最殘酷的洗禮後，呢0的事已經變得小事

另外有個壞消息
我四姑媽患了胰臟癌……
呢家只是和時間競賽，但我都希望有神蹟吧！
多謝 Candice 都有為我的姑媽禱告

>>April 22, 2008 at 5:10:47 PM GMT+8

2008 年 4 月 12 日 星期六 【陰】

對一個人好，原來可以有反效果
當習慣了好的時候，有時好的也會變得壞了……
想法有差異，究竟結果會怎樣？

>>April 13, 2008 at 3:07:50 PM GMT+8

2008 年 3 月 18 日 星期二 【陰】

今日我好開心呀~！
因為 Candice 為我預備了一頓豐富又好味的晚餐
首先有美味的沙律，入面有蛋、士多啤利、番茄、煙肉
跟住又來了一碟香噴噴的意大利粉喎！(哈哈~ 我有份煮的)
食得飽飽的，之後原來她還學整了 Tiramizu！
味道就唔錯，不過0的口感就唔同出面食到的，哈哈，真係觸一無二了 ^.^

其實呢餐真係大餐！
因為我見 Candice 成晚0係廚房整食物，好忙呢！
雖然要食完呢餐大餐要成晚的時間~但係她整得咁好食，咩都補返 :D
辛苦她了

我一路食一路感受到她無限的心意，酸的咸的甜的，食起上來通通都是甜的了 (=^0^=)

>>March 20, 2008 at 2:21:43 AM GMT+8

2008 年 2 月 22 日 星期五 【暴雨】

唔經唔覺去到鼠年了
做左兩年工，自己都仲係"草"唔到錢
好多野想做但係又無錢去做

今個新年又係多得我呀媽幫我出去逗利是，我先可以有0的額外收入~
真係多謝哂佢呢~

不過……0的錢始終都唔係自己辛苦得返來，就始終都會辛苦地洗返佢
唉……
今個新年由年三十就一路病到今日，個病斷斷續續
上個星期末就來大爆發，發燒兩日、痾就三日……
嘩！來一個體內大掃除一樣！！
好彩我病其間有呀媽同女朋友照顧
之不過就令到佢地都病埋一份，真係對唔住佢地了

太耐無運動了！
寒冷的天氣實在令人唔想出戶外，何況運動？
快0的回暖，又要好陽光，咁就正喇！
最重要都係少0的 OT，等我有時間去運動啦
下個月又係時間調了，唔知會去邊呢？

>>February 22, 2008 at 4:38:05 PM GMT+8

2007 年 10 月 30 日 星期二 【晴】

呀媽呢排康複左好多
真係安心哂
梗係啦~ 我地成家日日都探佢
Candice 都有陪我探左呀媽好多次，仲買埋靚靚的花添~ 抵讚~
最搞笑就係連天詠都要我家姐帶埋佢去探婆婆，真係好乖
不過呢兩日都因為要返工而無去探佢

自己的感冒還未完全清哂……
幾時先好番架？！

>>October 31, 2007 at 3:43:30 AM GMT+8

2007 年 10 月 26 日 星期五 【晴】

近排轉了 post
呢家0既工作壓力確實大了很多！
返工唔定時、放工也唔定時
唔知係咪唔習慣的關係，又病倒了
昨日頂唔順便告假一天

尋日呀媽又入了院做手術
見到佢0既痛苦樣和她身邊的一條條的喉管，我真係好唔開心、又好擔心！
希望佢真係盡快康復啦
醫生話佢成個星期唔食得唔飲得，仲有機會發燒添……

仲記得前幾日我因為返 OT 又心情不好而和呀媽鬧了幾句
其實佢都是為我好而幫我執下張檯
呢家望到張檯，就會諗起呀媽當時的樣和尋晚見到的有很大分別！
我感到很不安呢……

>>October 27, 2007 at 3:15:26 PM GMT+8

2007 年 9 月 26 日 星期三 【晴】

今日本來高興得很

朝早駕著呀哥部車回米埔一日遊~
好耐無返去喇！雖然同0的舊同事都有 keep 聯絡，但係都不及回米埔真實地看看
多得 MeiLing 同舊老細的安排，讓我免費借 permit 入去行下
仲要特別多謝呀雯幫我借部單車讓我在米埔入面走動，唔洗行到一碌木

米埔入面都變了唔少
先是人事，計埋我都有 5 個人離了職，所以我見到的是代我們的新面孔
而米埔入面都多左條新浮橋，哈~ 我偷雞先睹為快了
而且周圍的雜草也多了，可能是人手不夠或者新人新作風吧
去看看從前有份植樹的地方，雖仍見到樹苗，但已雜草叢生了，希望那些雜草不至令它們難以生存吧！

其實今日去米埔有另一個目的，就係睇雀
今日朝早好水呀
所以可以看到很多雀
不過我仍然是認雀初哥，認得出的雀鳥品種十隻手指數得哂~

米埔真係受到好大威脅，因為后海灣的沖積物越來越多、越來越厚了
從前浮橋出面是廣闊的淺水泥灘，但現在已是紅樹高壯的紅樹林了，甚至蘆葦也佔了位置
究竟遲些米埔出面的泥灘還有沒有生態價值呢？
呢0的就係 succession 喇，天然填海

另外值得一記的事是米埔來了個奇女子
此奇女子乃替我職位的人
但此人人緣極差，聽到的都是她負面的意見
哈！今日我終於一見盧山真面目！
確實世間罕有「珍」品！
我今日一見到她，我舊老細介紹我，她第一句便是「邊個 Raymond 呀？點會記得呀！」
好，無事啦。我老細跟住話我係佢的前任米埔 AO。丫！佢語出驚人，技驚四座：「Raymond 呀，你個衰人！」
…………大家呆哂
我真係想即刻星巴佢，衰丫喇！
我想是我之前留了手尾給她跟吧，但妳有無基本禮貌架？！

此人實屬特別個案
其他米埔舊同事依然好好人！大家都仲記得我，又問候下我工作、近況
呢個就係米埔工作的優點

至於夜晚發生的事，不記也罷
今日本來高興得很

>>September 27, 2007 at 3:44:23 PM GMT+8

2007 年 9 月 20 日 星期四 【微雨】

今晚返左中學參加陳 Sir 的追思會
我想有很多人都知，因為報紙都有賣過呢件新聞
陳 Sir 雖然在七年來無教過我，但我對佢的印象好好
佢真係一個好有教育熱誠的老師
0係學校入面，除左 Ms Lau 之外，我覺得教得最好的就是他了
因為佢地真係 prepare 好多俾學生，keep 住 update 0的教材同升學資料

陳 Sir 真係好好人，今晚成個教會禮堂都坐滿人，都是來思念他的
當中有很多舊生和他的學生都表達了他們對陳 Sir 的敬佩與思念
有的作了歌唱出來獻給他、有的作了篇文章給他、有的在台上說出曾經與他的一點一滴
很感動、很哀慟……
當中我也差點忍不住流下淚
見到我的師弟師妹，他們真的很出色，他們一手一腳籌辦了這晚的活動
他們作的歌詞、文章，可見他們的水準很高
有時有人說我的母校是名校，我常否認；但今晚我見到出色的後輩，我可以說，循道中學還是一間有水準的名校！

另外，今晚也見返不少唔知幾多年無見過的舊同學！
人真係好易變，我講的是外貌。有的肥了、有的成熟了、有的卻還一臉稚氣、有的更頭髮少了！
好開心的是有師弟還記得我認得我，過來拍拍我叫了我一聲~
畢業五年的我還存在於一些人的記憶之中

陳 Sir，雖然你走得非常突然又迷灕
但願你能看見我們今晚的行動，使你安心及滿足的離去，在另一個國度快樂的生活

>>September 21, 2007 at 4:03:23 PM GMT+8