2007 年 8 月 16 日 星期四 【晴】

久久沒有看電影，還一看就是兩套卡通，很滿足，是電影滿足，也是陪我看的人可以滿足我，415，如果那天我同房都在就好了。晚上公主又再提起私竇的事，其實......我心中有數，是不太可能吧！有時候，你不得否認，經過了那個階段，我們無人可以再任性下去。

今天才出電梯，10多個小伙子等我開門，一下子衝了18個人來，又要開機、又要清潔、又要換水！( 就是蒸餾水機的水，就是office要boy換的那種)，要我死麼？幸好，在丁醫生當姑娘時有換水的經驗。這天，多得苦苦和苦妹到來，幫這幫那，很開心，跟你一起，永遠都是開心和充滿驚喜的，很記掛在宿舍你一切瘋癲的行為，都不明白為什麼你每次都不能正正經經地洗手，總要把 416 撥過濕透才可。

身上的痕和痛繼續折磨，還每天加多一點身體其他的毛病，我自己會「撐」。

>>August 17, 2007 at 3:27:12 AM GMT+8

2007 年 8 月 10 日 星期五 【晴】

一直纏繞了我很久很久，令我戒掉口香糖數年的智慧齒，今日與我永別了。

一直都恨不得你離開我，你經常令我間歇牙痛和頭痛，最痛的時候，我甚至不能好好吃我最愛的墨魚丸。奈何因為你要求的分手費太貴，才一直把你留在身邊，現在也不怕告訴你，我並不是真心留你在我身邊的，今天朱醫生花了不過二十分鐘就把你趕走了，你痛嗎？我看見你被分開了三份，全屍都留不住......可想而知，你是多麻煩，就是這個「嚴重阻生智慧齒」的罪名，令我多費一倍的金錢才能把你趕走，你說我無情，我也不會辯護，況且你令我痛苦，我也沒有因為你而變得更有智慧。如果你可以安分留在這兒，乖乖的、靜靜的和其他兄弟姊妹一起，我是不會反對你留在這裡，但你實在太不懂性，因為你，你上面同一位置的哥哥也要無辜陪你送死，因為朱醫生說你走，你上面的哥哥也要走，是平衡的問題......幸好，他是完整的被趕走的。

就算你已經被趕走，但你附帶給我的麻醉藥還在折騰我，害我喝水漏口，像一個傻瓜一樣，邊喝水邊漏水，在中環地下鐵失儀，弄得滿地是水，幸好今天是下雨天，才不致令我太尷尬。下星期還要處理你留下的「蘇周屎」，待我休息好了，還要考慮要不要把另一邊的都給送走......

智慧齒，so long......我不會懷念你。

感謝今天一直陪伴在側的男人，有你，真的會倚賴。

>>August 11, 2007 at 1:18:13 AM GMT+8

2007 年 8 月 5 日 星期日 【晴】

難得地，齊腳。

因為陳腸生日，我又成功借屋，所以大家非常難得地聚首。對他們來說，地點確實不算方便，但勝在不用到cafe燒錢，而且地大任玩。是一個天堂地方，你就想像一個六樓後座的地方吧！其實真的很想一、兩年之後，我們這一伙人可以一起租個「私竇」。

闊別個多月，終於再見我的八婆姊妹，很期待這天，今天都和肥在忙著弄吃的，也沒有時間和你們在廳玩玩，不過真的很開心，很喜歡為你們忙這忙那，照顧你們真的很開心。最後送你們走，也是開心的，是我太喜歡照顧我愛的朋友吧。

感想﹕
和肥一連三天的一起，真的很開心，有點在宿舍的感覺。
和Becky很少機會說話，知道她又「落錯車」，又打錯電話......傻的！
替腸腸準備一切，很開心，希望她會滿意。
和loomate只有很少的談話機會，希望下次可以多一點多一點多一點。
又有機會「腰潤」jose，哈......很攪笑，我們都喜歡！
感謝alex和man費神畫腸腸的生日卡，如果沒有你們，我和肥......死掉。
缺少了deep仔，但我知道你的苦衷，一些事，是沒有辦法的吧！(嗚謝你的wii，嗚謝你抽空趕過來！)
感謝庭庭，你最後有心送我上樓，我真的很感動啊，很細心的表現，迷死人了，哈哈......


看著你們笑，我就開心。我今天很真切的感受到「你快樂，所以我快樂」......朋友的魔力啊！！！

>>August 9, 2007 at 1:57:28 AM GMT+8

2007 年 8 月 4 日 星期六 【晴】

有人討厭有人喜歡的陶傑，雖然真的很偏激，但又不能否認看他的文章有點大快人心的感覺，最近就密密批評林鄭月娥，呼~不錯！

也許殖民地的關係，香港人都比較欠缺愛國意識，我以為美國才有那種令人煩厭的大美國主義，原來中國的也夠令人嘔心和討厭。最迎亞視播<榮歸>，一看片名，就知是讚美香港回歸是光榮的事，但都事少，最要命的是整套片的角色安排、對白、劇情。每個飾演香港人的演員都是貪錢、急功近利、見利忘義、無情、膚淺、狗眼看人低，而每個飾演內地人的演員就是重情、忠厚、有義氣、看破名利。電視劇刻意從其中的白和演員的表情來反映﹕港英政府令香港敗壞，令香港人有以上的種種缺點，相反，是回歸後，中國要令香港振作云云......為了看了兩集的<榮歸>，真的很光火，那種瘋狂盲目的愛國，很嘔心。

我從不否認中國人的身份，也不會死命保住BNO( 所謂英藉) 。( 那些人真的很無知，手執 BNO，皮膚會變色？手執 BNO在外地出事，英國領事館真的會出手相助？)但要這樣瘋狂的愛自己的國家，我真的做不到，什麼人種都有好人壞人，人的好壞是品格、素養的事，不是國藉的事。<榮歸>在香港播，會激怒香港人，在內地播，會抺黑香港人，快雪藏這套電視劇吧。

>>August 7, 2007 at 12:00:11 AM GMT+8

2007 年 8 月 2 日 星期四 【晴】

「水深港闊」這個香港得天獨厚的優點，是我在小一的社會科學來的，在偽港人治港的情況下，維多利亞港早已消失，Man亦多次以「維多利亞巷」和維港由海變河來開玩笑，其實我不想笑，諷刺得令人不想笑。

我討厭港人一窩蜂把「集體回憶」搬出來，人做你做，你知道自己做什麼嗎？集咩體回咩憶呀？解釋「集體回憶」比解釋嶺南的「博雅教育」還要難，不明白的，又為什麼將之瑯瑯上口？也許你們明白，只是我不明白你們......

我討厭的不是拆掉「天星」和「皇后」，而是填海，我討厭一切不尊重大自然的行為。

我討厭大眾的人云亦云(雖然我可能曾經是當中的一份子)，只是我仍討厭。

>>August 2, 2007 at 2:02:44 AM GMT+8

2007 年 7 月 30 日 星期一 【晴】

Ruby 說過﹕旅行過後會帶來失落，因為旅行中的開心太多，會對比現實更多的不快。

我可能正潛伏這樣的心情，但不盡是出於旅行的開心，而是我正擔心將來的一切未知數。急燥的心情應該好好自我調整，可知易行難，也不知道我應該把期限定於何時？e-mail 海會把我遺漏嗎？

要樂觀的尋找和等待，要利用等待的時間好好豐富自己、裝備自己，讓機會來的時候，不致浪費。我要努力，好心情才能遇上好的一切，因為我相信，所以要做到。

>>July 30, 2007 at 11:38:19 PM GMT+8

2007 年 7 月 29 日 星期日 【晴】

<西藏回歸>

希望係最近最後一篇用口語打日記。我終於好實在咁返左黎香港啦！係26號一上火車，經過五十幾個鍾既車程，我又返到黎我地福地----香港。一出廣州，都攰到唔係好識驚廣州火車站既危險，一路都冇黎既時候咁防人。急急腳去搵直通車返香港，又delay......真係dee你，攪到成11點10先出紅磡，打的返去都過12點了。好攪笑，我冇帶鎖匙，家姐又唔返歸，我係井頭，見到屋企對門半閂，原來媽媽一早係到等我返，真係幾warm既......反而，爸爸有預計唔到既冷淡......係佢扮cool嗎？明明好鬼緊張我架喎，成鬼日send sms 比我架，做咩扮cool啫？男人！！！

返到去，其實唔係好餓，但就好想食香港野，媽媽整左好耐冇整既酸辣鳳抓(走辣)，太好喇！我阿媽好少好少會咁架，一定係冇左個女成個月，佢先肯咁做，呵呵......於是半夜，我就係咁「損腳指」喇，仲同好多好多人係MSN CHATTING，竟然仲同大家姐玩MSN UNO，太攪笑了！結果都係成4點先訓。第二日，我一心要去食麥當奴，要食McNUGGETS，點知，咁啱媽媽去銀行，順手買埋，太美好了，返香港既願望又完成多一樣，只可惜我食六件唔係九件，有點不滿足，哈。返到黎，同左好多人講電話啦，講到喉嚨有少少唔掂。

處理完旅行的東東，仲有好多好多東東，例如﹕QUIT HALL 個三箱仲係原封(再唔執，我阿爸會哦我)、處理相片啦、搵工啦(一點擔心中)。至於，遊記......係我手寫既停留左係珠峰就......我一定會完成架，話哂本遊記係LogOn買左成百蚊架，唔可以浪費(我希望......)

em......我發左癲，唔理自由行既身世，買左好多野，結果一袋去，三袋返，拎到有點狼狽。我會好快好快完成網上版的遊記架(我希望......)旅程比較諗唔到既，係我竟然去左睇天葬，但請各方好友，唔好再問我有冇拍video同影相了，一來，個度係嚴禁的，二來，我個人覺得係好唔尊重既事，攪到我都有點歧視問我有冇拍video既家姐，雖然我都有暗暗覺得冇得影而覺得「哎也」，但係諗深，有啲野，睇過體驗過，其實都夠了。係回程既路上，我同man仲一步步咁回憶番天葬既步驟，我仲用紙筆記錄，所以口述絕對冇問題，應該都可以滿足到好奇既你們既。另外，我亦冇諗過自己會一路係馬路行，一路截車(好鬼電波feel)，仲坐左一程拖拉機添，好攪笑。

唔講太多，都係遊記再分享。我想呢度變番以前既日記啊。

P.S. 感謝一直好掛住我既你們，好鬼鍾意你地啊！

>>July 29, 2007 at 3:04:36 PM GMT+8

2007 年 7 月 13 日 星期五 【晴】

miss HK food so much

miss HK breakfast meal A, miss Mcdonald......

>>July 13, 2007 at 8:53:52 PM GMT+8

2007 年 7 月 9 日 星期一 【晴】

< 西藏臨時日記 >

過去呢四日，我地三個同左兩個唔識既香港人，租車去左珠峰大本營， 兩個人好nice，年齡同我地好接近，亦都幾啱傾。今次旅程真係好難忘，好在冇高山反應，住上了最差的旅館(家姐頂唔順，因為實在太恐怖)，亦住上了最得意的帳篷(係珠峰黎既，好似睇戲蒙古人住個啲，好多得意野)。入黑既星係多到癲呀！我未見過咁多星架！仲有好多好多，但係呢度既上網程度，實在好難詳盡咁講。返黎啦......連相一同post上。

我想讚下我個司機，真係超勁！好多驚險野，得佢做到，好懷念坐住架豐田4500越野車入珠峰個幾個鍾癲癲疲疲既山石路，勁有墨西哥+美國西部+大峽谷 feel，勁正啊！！！下次有人去西藏，我要推薦佢比大家！

and......呢四天，有點不愉快事情發生啦，sexy babies.....對唔住呀，我又發癲喇，我想join 番SAA呀，不過我會好好ENJOY 餘下的旅程，我會聽BEC BECK 話，ENJOY!!! 即使我想入番 SAA，你地都唔駛擔心我呀，I'M OK!!!!!

後天家姐返香港先喇，好唔括得佢，有佢陪住我做好多野，真係好好架，又傾多左計，好想佢同我一齊繼續旅程，佢走之後，我會去 1. 納木錯兩天( 世上最高既咸水湖，有5000幾米，高過西藏，請繼續保佑我唔好有高山反應，據珠峰PARTNER說，個度又係好多星，勁浪漫，都有點期待) 2. 林芝兩天( 大自然風景野，應該唔錯) 3. 山南一天 ( 未知係咩黎，哈！) 之後就STAY 多拉薩一至兩天，就坐火車返。詳細返黎既日期同時間，一知道我就會係度講架喇。

最後......
想補祝以下人物生日快樂
STAN LEE and 天
PLUM and VINCENT YIP

SEE YOU ALL SOOOOOOOOOON

>>July 9, 2007 at 8:20:44 PM GMT+8

2007 年 7 月 4 日 星期三 【晴】

(報平安日記，唔口語化表達唔到而家上網難得既機會。)

千辛萬苦( 唔講得笑既辛苦，不過又真係一個好好既經歷。)來到拉薩的第三天，高原反應已經適應左，只係有時返房行兩層樓梯一急既話，就會喘氣之外，基本上，我都係改唔到好急既性格。最高我去到 5000 幾海拔既唐古拉山，家姐同我頭痛靠食藥，我仲眼乾到成日隻眼流哂眼水，勁 lar 眼。而阿 man 就嘔到傻。

有太多難忘的經歷，我都有寫落遊記，希望返香港仲有心機打上網啦。

呢度天空好大好低好近好藍，是鬼但用爛鬼機都可以影到靚相。不過真係好曬，uv 超勁，個個都著長袖衫，而我勁低能怕熱帶哂短袖，好怕返黎變左藏民，搵唔到工啊！最食屎係......我後日會上珠峰大本營 stay 一晚，但我既衫.......真係識野既都會想鬧我囉，不過唔該留啲責任比家姐，係佢不斷動搖我唔好帶咁多野，我唯一既後著......就係阿肥既羽絨同水銀既睡袋，真係唔該你兩個，小女無以為報！為左應付珠峰，我呢幾日都係拉薩搵衫買，哈！

to me dear sexy babies ﹕西藏男仔真係唔講得笑既靚仔，就算黑左啲，但你係好清楚見到佢地既眼、鼻好靚，眼珠係好明亮，家姐話帶一個返去執執啲衫，真係見得人，哈哈......好掛住你地呀！比上次去旅行仲諗得你地多左，加上啲野好靚好平，時時刻刻都諗起想買野比你地，呢度買野係勁講價架，好鬼好玩，如果我地一齊黎，一定shoppng 到癲左，玩講價玩到傻，分分鐘 chur 爆哂啲西藏人，哈哈。聽聞陰陰搵到工，其他成員唔駛怕呀，一定好快搵到架，千祈唔好相信佢「感謝神」之說呀，kakakkakaka......我最多去布達拉宮幫你地祈福。今次唔可以偏心becky 啦，因為唔知點解，我今次真係掛住肥肥同otto 多啲，真攞命，成日諗起你地。otto 的太陽眼鏡真係幾正，攪到我鬼死咁型，wkakaka。仲有仲有.....話比你地知，明白我如你們，一定未見過我皮膚乾到咁，成手成腳出哂粒粒，塊面 full 完mask，即搽lancome 勁潤霜，但十分鐘唔駛，個鼻又甩皮 ( 唔係講笑，我嬲到唔識講粗口。家姐同阿 man 都呆左，家姐仲叫我皮兄)呢樣野攪到我好慘呀！

後日同兩個陌生人上珠峰base camp，你地要保佑我地頂得順高山反應啊。我唔講喇，返到黎有手信就有，冇都唔好怨我啦，真係睇唔啱之麻......okey ?????熟我既，都知我其實唔太喜歡買手信啦，BACKPACK 買手信，會死架......我又唔係 BUYER 喎。而且係西藏咩住個 65 L背囊真係唔講得笑架，邊可以買太多野呢...... ( 講咁耐，其實都係想其他朋友唔好怪我，如果唔係，我會怪可兒咁怪大家，哈)

最後......我想講，呢度值得黎，但唔係個個都會喜歡，個個都頂得順，而我，只會一生黎一次而已。家姐成日係呢度高呼「香港人在西藏，YEAH！」，冇錯，呢度真係幾難黎，我見到有人一到拉薩就即刻要走，真係唔係講笑。

不過......我都係想去多次布拉格多啲，哈。

日記勁長啦，但愛我既，一定會睇哂，哈，MISSSSSSSSSSS YOU ALLLLLLLLL。

>>July 4, 2007 at 6:20:00 PM GMT+8