2012 年 6 月 26 日 星期二 【晴】

整整一個月都是在Diablo3
不過之後應該就不太會了吧
話說...D3...真的是挺無聊的!!!
D3唯一優點係...令我買左一組full size無線KB加mouse!!!

因為D3，所以本《教你讀經典》我剩係睇左一小章節就無睇喇，更遑論其它~.~
不過，我又買左本新書!!!
本講老任的書!!!
當然!!!我係未開來看的...

3DS一如所料會出XL版
雖然我部3DS早已(或者一直都是)處於荒廢狀態
但，我應該都會照買XL版的!!!
錢係要來浪費的!!!吼!!!
我要買WiiU呀!!!

連這兒64都無寫文，新BLOG當然都係無更新的!!!

6月2日大佛與大澳一日遊，昂平市集好無謂，不過一出就到大佛還是有存在價值的吧
大澳都幾無謂!?香港版的九份?
!晚上某海鮮店家可以乜海鮮都無而單用白灼蝦就宰掉二百元...厲害!!!
6月3日晚上出外放題，晚上再到維園慶祝(?!)平反六四

今年兩套追左好耐的美劇都完結喇
House + Desperate Housewives
兩套都是去到今年第八季結束
兩套都是由我UST YEAR2/3時的當季season4/5由頭追起到現在
以後都不能聽House大叔說出人生真理，Everybody lies
看不到幾個靚太亂來喇(雖然我S8都剩係睇到E2就未睇落去orz)
有機會再補完感想吧~~有機會的...!?

6月26日又是公司船河日
今年較特別的是...我嘔左...orz
同埋居然用兩支伸縮晾衫竹加麻繩就係沙灘砌左一個排球網出來!!!太厲害喇!!!

以往，我會寫日記的年份的六月四日，我都會寫一篇感想與冀昐
不過寫下的已多得過度分享
要做的，確實還沒實踐多少
所以，也沒啥好說
我信
我會做得更好的!!!

>>June 27, 2012 at 2:10:50 PM GMT+8

2012 年 5 月 23 日 星期三 【晴】

現在，正在下載Diablo3
玩唔玩到都未知，lag就一定好lag架喇~orz

上次唔記得講
說時遲，剛剛話連個天都唔比我用Google+
那時快，過兩日就可以用Shadow Chan做名開a/c喇
不過因為無add過人...所以亦近乎無用就係啦

都係上次唔記得講
某weekday晚上
食完拉麵後(拉麵到底有咩好食呢?!我唔知!!!)
由rtyuiop帶領，連同獅子去左玩擲飛標
灣仔一間bar，所以有酒有煙...亦即係只能喝啤酒...
個場有好多部bill gates...標機s
5蚊一個人，所以一局係15蚊
部機係有牌子的，唔記得係鳳凰機丫，定係其它標局才有的鳳凰機先好玩喇
第一局玩701?!
鬥快由701分擲到0分，而我亦以君臨天下之勢勝出我的第一次!!!(羞)
之後玩左個儲分game，我...又好似係勝出的!!!(大羞)
再之後係boxer、再儲分lucky版、再boxer改、再701
擲飛標其實都頗有技術含量的，不過亂掟都可以喇!!!
rtyuiop不斷將他新買的標擲出界外、跌在地上...有錢想換標都唔係咁架!!!
玩完之後第二日、第三日隻右手關節捐血針口位好痛...所以初初我以為係捐血後遺
再醒起自己玩完bill gates先知道...擲標係可以好累的!!!

未到書展就買左書
易中天的《教你讀經典》
周非的《非議歷史》，佢本《諸子百家大解讀》無貨無得買...>_<
黃國英的《決勝在期權》
仲有二兄王的呃錢火鳳外傳敗將~.~

五月十二日
同kkk聽左個財經talk
好多師奶~好多講者都好廢up
黃國英講野幾有趣，睇完佢本書，發覺佢睇幾多書，有品三國、有李天命
後續係join左一個要俾錢的財經文章集...嗯...錢係要來浪費的^^~

新blog
本來影左張westlife CDs的相，想寫第二篇講英文歌的
不過...都係再過幾日先寫吧!!!

PS3買左返來...我都唔係玩的...
3DS買返來...都叫做得閒，又無野做會玩下MK7
但...我都仲係好想好想好想買Wii U!!!同埋3DS改版!!!
錢...就係咁樣浪費的了

係個細KB度打字...打到隻左手食指好痛呀!!!!!!!!!

這篇文...係因為等下載D3...又好似無乜野好hea而打的
^___^

>>May 24, 2012 at 3:04:57 PM GMT+8

2012 年 4 月 30 日 星期一 【晴】

話都無咁快就過左一個月喇!!!
我都係差不多乜都無做過的

4月14日至4月15日
亦即係舊曆的3月24日
今年同往年一樣都有返到大陸
這天是我鄉下的唔知咩誕(天后?!)
會成條村一齊係大街度食飯
上年先係第一次返，今年剛好是星期六日就可以返喇，下年就唔知仲會唔會返喇
早上6點多些起身，6點9出門口，11點9先返到去，成五個鐘呢!!!
下午，去左「行清」，即拜山是也
這次是我第一次去西樵拜阿爺阿麻的
車程沒之前聽說的久，半小時左右就可以由鄉下到達
回到去吹吹水就食飯喇，午飯同晚飯都係有點類似爭人的情況出現的

某星期一
波記舊同學食飯
五個麻甩佬(?!)聚餐吹水
最後還由rtyuiop動議下次要玩煮飯仔、學煮野...

某星期六
老媽子的鄉里約飲荼，實則係幫鄉里個仔同我個妹相睇
但都唔駛叫埋我去飲荼的，九點未起身架
去到都係老媽子同鄉里吹水
條仔係正常仔一條，嗯...
相睇結局係阿妹幾日後被告知被無興趣，當然阿妹都係被迫去的
到底老媽子係咪弱到能被迫地促成這次飲荼呢?!
下次會唔會真係到我呢?
係唔係真係靚女來的呢?
係唔係真係有下次的呢?
下回分解，如有的話

終於
叫做背完五十音
背左兩年都係背得四五行
點知一個星期六日有android之助就背完
雖然未完全熟晒，同埋仲有特別音要背，以及我仲未識讀
不過都叫做背好喇!!!
但...之後的生字...原來先係惡夢呀!!!
所以，打日文GAME的夢想能否實現呢?
去日本旅行又能否成事呢?
下回分解，如有的話

終於
我係blogger的第一篇正式文章打好喇
希望可以會再有心機打埋其它
網址?!打多幾篇先算啦!!!
同埋
這兒都可能會搬去blogger的
以上都係視心情而定!!!

>>May 1, 2012 at 4:07:23 PM GMT+8

2012 年 4 月 1 日 星期日 【晴】

號外

又過左三個月無甚意義的生活喇(無誤)
應該係無乜野值得記下來的
因為根本就無做過d咩(絕對無誤)

所以會寫一下近況!?

保險
本來一早就plan好要買保險
但係就一直因為各種原因(懶同懶和懶)而擱置至今
最後就因為渣打的preferred banking要收手續費而在遊說下買了一份危疾
我果然係要被半強迫才會行動的...orz
雖然而家只係買左一份半儲蓄半人壽半危疾半呃錢的保險
但應該仲要買醫療住院同term人壽的
不過...唔知我又要去到何時才買到呢?

固定消費
除了新加入的呃錢買平安保險金、積穀防饑的月供、被打釜頭的家用外
本來應該還有另外一筆每月布施的(...無誤!!!)
自磐古初開，我就夢想着有一天能每月把一少部份的薪金捐出去的(...無誤x2)
嗯...
以我不可靠的記憶來說
應該不太可能是始自小學，因為我一直以來都是想捐一千出去，而一千大元對小學生的我來說是天文數字來的(就算是現在都是亞天文數字)
但亦應該不可能是始自高中，因為我這個想法來源已久
所以...應該是初中時，不知痴左咩線，從此決定，將來打工時，要最少都捐一千大元出去
為何是一千?因為我覺得，將來的我會搵到一萬一個月
為何只是一千?因為我覺得，將來的我只能搵到一萬一個月
雖然我不信某邪教信條十一奉獻，但我就是覺得這個比例是可行而合適的吧
當時的我是沒有想過要捐給誰的
應該是後來才想捐給無國界及奧比斯的其中一個，再之後就想到平分一半，每邊五百的吧
嗯...
以上一切...皆為幻想!!!
因為直到現在我都仲未執行!!!
嗯...
請原諒在下的懶散及自私
我會在世界末日前實踐這個自小的承諾
不過，請不要在12月就末日喇，因為我驚我真係會懶到去那時呢...orz

打字
我發覺
自己打字速度應該係慢左好多
或者係因為我無同人chat、又無打日記
根本就不用打中文字而久疏戰陣吧

睇英文書
本來係諗住靠睇英文小說來學習英文的
但係由最初的The Game買左返來後得個擺字
到後來本身係諗住睇A Game of Thrones的，點知又變左睇它的美劇版
然後Mistborn就睇完中文版後就無睇返原文英文版喇
連Animal Farm都係睇完中文版就無睇到自己本買左成舊水的英文版
試過睇The Game的序章，但我發覺根本就係多生字到我睇得一d效率都無
或者要用將來應該會買的平版來睇英文eBook吧

睇中文書
上次講過我居然開始睇小說——奇幻小說——Mistborn，迷霧之子
係圖書館借左本《冰與火之歌》第一部返來睇，睇左幾章，發覺寫得很好呢，相對電視劇有另一番味道
所以可能會買返一套返來擺?!
因為Mistborn，所以我幾有興趣買同一作者的《王者之路》系列返來，但作者講明係一套十部
所以就算可以做到一年一部...都要十年先睇到結局呀!!!
雖然《冰與火之歌》要睇到結局都可能要十年後...orz
之前係PageOne見到本書叫《讓你看懂全球局勢的現代世界史》睇左幾眼好似還不錯
可惜圖書館未有，買返來又...無位放...(出來做野之後，花錢買野唔係大問題，問題係買完無位擺呀!!!)
然後係商務見到本《諸子百家大解讀》(周非著)，睇左幾眼又係好想買的
再search下作者周非其它著作，佢另外兩本書《拷問歷史》同《非議歷史》，我睇完目錄同一兩章試讀後，又係好想買返來
所以...下次書局減價或者係書展就有好多書想買喇...
兩套小說的第一部(共四本枕頭)、三本周非、一本世界史?!，希望我唔會見到更多想買的書啦
丫!!!
仲有本《任天堂 創造”驚奇”的方程式》想買呀!!!>___<

書局
行(大型)書局係一種零消費的活動，嗯，無買書的話
而我自己行一次就可以hea到差不多半小時以上的了
嗯...
以上都不是重點...
重點是台灣誠品會係九、十月開係希慎廣場呀!!!
一間超近的大型書局呀!!!

影子
I see a shadow of you
最近幾個月
居然試過兩次
分別在兩個不認識的人身上
霎眼看到你的身影
說真的，我真係覺得有點不可思議喇
可能我一直以為自己已忘了把你放在心內
卻又可以突然將你遙遠的身影投射在別人身上嚇自己一跳
或者，你在我心中真的是一個遙遠而重要的存在才會一再不可思議地看到你的身影
或者，真的是因為我那曾沒膽量回答你的、告訴你的，我愛你啦

Google+
正如以前曾說
我從心底很討厭Facebook
所以，我其實很想開個google+出來玩的，或者就是一種反抗心理吧
但...google大神那個煩人/擾人的命名政策卻令我一直都開唔到個google+ a/c
雖然之前係facebook用Shadow Chan做user name都係被拒，不過交涉一輪都OKed
但...google大神真的很頑固地拒絕我開a/c
也許...係個天都認為我真係柒到無朋友的說...

WiiU
幾年前我買部wii返來係想給一家人玩的，就好似以前部N64咁
但好快就半壞了(一定係個天，任天堂，懲罰我玩老翻>_<)
所以就大計擱置
終於
wii都出第二代喇!!!下半年快d到啦!!!
希望今次一早有行貨同無分區碼，買game方便d
network又會做好d
雖然，我覺得，就算買左返來都無乜機會開來玩，就好似部PS3咁~.~

夢想
兒時的夢想
除左世界和平之外(笑甚麼，畜生，你也是地球人)
同埋每月捐一千
再之後就應該係將來出來做野都可以跟朋友一星期聚一次
不過這個真的是一個夢想
雖然我的朋友數目可能是雙手都數得晒
又或者係一個都無，因為全部都係同學來的(無誤?!)
但最大的問題係...我根本就不會主動約人
可能小時的我就係夢想我人長大後會有所成長
嗯...發夢無咁早...>_<
可是，尋夢只需一根長篙就可以了
再花多一點時間就可以去到更青處喇
(嗯...我做人真係無乜夢想可言的)

Blog
本來係諗住會一星期更新一次日記的
但，最後係一個月都無一次的
而另一個新開的blog除了半年前的第一篇廢言就無更新過
呀!!!
應該會開始更新的
因為我一直以來就堆積左好多野想寫喇
應該會的

孝順
尤記得幾年前我說過會開始學習如何孝順的
但...毫無疑問地...我係毫無進步的!!!
或者我真係唔識點樣表達情感的
嗯...
最好就有人教下我啦!!!

S.H.E
三隻先後以自己的本名，田馥甄、任家萱、陳嘉樺單飛出專輯、EP
然後年底終於會復活?!再以S.H.E之名出專輯喇!!!
應該會係S.H.E完全成為人妻團前的最後一張喇?!
嗯...Hebe要快d嫁得出喇!!!中女指日可待呢!!!
期待期待!!!
另，Ella隻EP應該係專登揀3月30日出的，即係Hebe生日推出
因為入面就係有首歌叫《330》
然後入面又改左佢之前作的《公主Selina》是要配合返現在的selina吧
仲有首佢以前作落的《我就是我》，感覺上又係改編左/改左詞
不過...真係好貴呀!!!香港居然賣$105!!!呃錢架!!!

這篇文...
本來係想下午打完再講聲愚人節快樂的
點知，成家出街了...
返到來再打，打左成個半鐘有多，打到隻手指都痛埋先打得完
希望下次篇文...唔會又係要6月4日先出到啦
^_____^

>>April 1, 2012 at 5:16:24 PM GMT+8

2011 年 12 月 30 日 星期五 【晴】

回憶日記
以下為回憶之前的一些無聊事而寫的日記
可能有重要的
更可能有毫不重要的
應該就係我突然記得就會寫下來
如有任何記錯、回憶美化/醜化...恕不負責

2008年5月尾到6月頭
同kkk大大、阿Tai、大佬john去左馬來西亞，kkk大大的家鄉
好似係6日5夜定7日6日之類的
出發前tai哥仔雙子特質發作，情緒低落症候群，無故發脾四，病發至...回程仍在病發中...orz
出發日提早到機場食早餐，到達機場後打俾大佬john...發現...我嘈醒左大佬...nani?!!
大佬居然可以用不足一小時的時間到達機場!!!太厲害喇!!!
因為目的地係馬來西亞的檳城，所以到達後仲要轉一次內陸機
嘩!!!第一次搭飛機就可以連搭兩次~~超抵!!!
到達後就在檳城閒逛一下
然後就去左熱浪島玩
要搭成8個鐘旅遊巴先到的，而我又居然頂得住啵
小插曲是...巴士司機放錯左我地幾個落車
所以我地同另外一家人調轉左駁船坐入去
入去時係坐大船，回程就係坐大飛
話說...熱浪島就係《夏日的麼麼茶》取景點...但...其實我無睇過套戲的~所以都無所謂喇
不過真係水清沙幼呀!!!
可惜的是...我唔記得左當地女孩是否波大腰幼喇...(羞)
浮潛左一兩次，唔識游水都可以近距離同魚魚玩遊戲的!!!
但...就咁浮潛我都有d暈的說...雖然真係ok舒服的
另外就係我貌似第一次在外地過生日喇
感謝慶祝喇~~~~(雖然我唔太中意人地浪費時間同我慶祝的)
重點是...大佬john即席表演搭訕，仲要成功，成功結識左一位新加坡(?!)籍美女
有美女同我講生日快樂呢!!!(羞)
合照時好似仲食左一下波餅呢!!!(大羞)
熱浪島後就去左雲頂入賭場玩
賭場真係好大陣煙味、好鬼死臭!!!
(我記得仲有一日係去左主題公園玩的...不過唔記得左係邊日...好似就係雲頂這天...有坐到d 都ok驚嚇的機動遊戲的說)
再之後就落左吉隆坡參觀某山中佛及遊玩某水上樂園
kkk大大好受其表妹歡迎呢!!!
水上樂園...好多水呢!!!
回程檳城後...tai就發現唔見左價以千計的眼鏡...情緒更低下...orz
之後就棄kkk大大於家鄉不顧而回港喇!!!

2008年6月尾至7月頭
第一次出發去台灣(有第一次...自然就有第二三四次...)
目的地係高雄某布偶集中地
其間去過台南，水上樂園，萬人迷生日，xo摩天輪
嗯...以上!!!(腦退化係咁架喇)

之後...
hea左整整一個暑假到九月先開始搵工
都係因為好似要開始搵工喇(或者係有心情搵工喇)先開始
見過七八份工
搵埋agent幫我搵工...
最後agent都唔想理我咁...sosad
仲有搭fd介紹的都無人要我...deaded
到最後連畢業禮都過埋先搵到而家份工
可見我係幾咁無人要的說...

2008年10月
正如xanga所寫
飛機遠在夏威夷悄悄去世了
想不到這麼突然就有一個相識十載的朋友去世
還曾在一年前暑假在科大hall5(定hall6?!)跟中學同學一聚
相隔一年...就永久訣別
正如我在xanga所寫...我希望我能從此更珍惜友人的
奈何還是再要花上三數年光陰去驅除心中的黑暗
結果中學時代的兩個心願到執筆的現在都未曾達成(有機會再寫係咩啦...)

科大畢業禮，十一月中旬
本人基本上係唔中意影相的
不過既然係一個應該稱得上人生中特別的日子
所以還是接受了所有邀約，跟大部份大學同學、部份中學同期畢業的同學仔影相
雖然我到現在都無整理過d相...orz
以我記憶係有一日去左嶺大(中同)
一日去左城大、理大(中同)
一日去左城大、科大(城大同)
一日去左科大(科大同)
當然仲有畢業禮正日連同一家五口啦
雖然好似不少同學仔已沒再聯絡
還是祝願各位前程似錦、鴻圖大展的XD

返工地點就係位於離家十分鐘路程的灣仔中部(嗯...不用妒忌...恨唔到架喇)
見工日一開門...見到一個外國人...呆了...
再見到一個貌似城大asso同學...再呆了...
以在下爛到不能再爛的英文...居然能夠有2nd in...甚至見工成功...
運氣女神果然是有照顧在下的!!!
返工要做的東西就係...寫下c#...hea下...打雜下...咁上下啦
不過建基於在下怕羞的個性(笑甚麼笑?!唔俾人怕羞架?!)
我一天裏經常都係除左早上的morning同晚上的bye...係可以唔再講其它野的!!!
厲害吧!!!

2009年7月4日
7A波記天台BBQ
唔知點解...
魚蛋強好好人地俾我地借用波記天台來BBQ
所以就促成了這次殺BB大會喇
總共有18位7A的同學仔及班主任(&兩位同學仔女朋友)
很多人的說!!!
應該係最齊人的一次

2010年3月尾至4月頭
第二次台灣登陸戰
戰友仍然是那個不成材的劍仔
攻略點全是首次出征地點，台北，南投(日月潭)、台中
以下全部都是睇返當時拍下的照片來回憶亂寫
台北其中一天...居然走左去行山，行陽明山!!!
應該無乜人可以咁「浪費」一天的喇
有一日去左九份...成條老街都係香港人...orz
回程仲要嘔...天妒英才呀!!!
淡水老街...都係香港人一大堆
去日月潭，就係一個潭，潭中有個島，島外有個潭
去到就病病地...副眼鏡仲要爛左呀!!!天妒英才呀!!!
然後去左台南，即係劍仔密會戰友的地點，燒烤吃到飽同k房
台灣k房真係好似日劇中的k房，出面有部tv連椅俾人出去唱歌的
不過當時就無人咁做...太可惜喇!!!
之後就係去左浸溫泉，可惜沒甚靚靚台妹啦...可惜...
回程機，因為唔夠機位...所以我升級做business class
個位係大少少、舒服少少，個飛機餐係好睇d...好唔好食d就唔記得lu

2010年6月尾
公司搞第一次遊船河
我居然無嘔到呀!!!
還記得中學時的那次係全程都係嘔，除左嘔都係嘔...
不過我就唔夠膽玩佢d水上遊戲喇...
2011年6月頭
公司搞第二次遊船河
內容同上

2010年12月上旬
台北巷戰
今次同屋企人(除左那個遺傳基因上令人會暈車浪的老媽子不能出行)
出戰台北的商圈?!
基本上都唔太記得去過d咩地方
去左幾間誠品不過無買書
去左101，仲上埋天台!?食住風睇夜景
去左艋舺拍攝場地參觀，但我又無睇過艋舺
去左袖珍博物館、國父紀念館、郵政博物館...一一參觀
同埋食野...小籠包!!!

2011年11月16日
波記5B燒野食
地點係赤柱監獄...附近
人數大約有14人，都係OK多的了，仲何況係有3人臨時缺席
接近散場時居然係講下時事(風化案?!)，太令人估唔到喇
回程架小巴浪到我想嘔呢...

2011年12月中旬
第四次新台北市戰
今次係一行三人，老父及小妹的台北遊
第一天先去左新北投的春天酒店浸溫泉
間酒店房真係OK靚，無限浸露天風侶，包日式晚餐定食(雖然一D都唔好食)，超豐富自助早餐，房內小浸浴
當然...真係OK貴喇，一晚九千幾台幣
次日行淡水，不過落雨，因此少左好多人
去返西門町的酒店CHECK IN後就去左師大夜市，都OK旺同好行的
第三日就去左行動物園，好平的60台幣入場費，好大同好多野睇的，不過皇帝企鵝館就維修...
晚上上左無HELLO KITTY的貓空，吊車來回就花掉一個鐘喇，茶館飲茶超呃錢
回程去左饒河街夜市，果然係最好行的夜市，兩邊街道井井有條，一來一回就剛好行完
第四日本來改行程落九旅文化村睇ONE PIECE的...但無車返...就照原計劃去青桐
不過落雨就無去到平溪，搭火車去返十分放天燈，阿嫲的天燈某工作人員仲半訴苦要跟其它店一樣整隻四色天燈出來
夜晚無野做特登去買豬肉紙...一D都唔好食的!!!去搵一間朱古力CAFA...點知係執左...
最後都係行下西門町
最後一日就去左台北車站附近行、買手信
台北收穫係...一張Selina EP、一張五月天CD、一本迷霧之子小說、一本講Google發展的書
買CD同書都平D架!!!

2011年12月24日
平安夜波記7A燒野食
平安夜居然都有成十個同學仔外加三位女朋友們出席，比我想像的還好呢
不過其實都無乜人係24號燒吧，聖士提反灣都唔FULL半吉的
裝修完個場又幾靚的
但係增援時的通訊大有問題，變成差不多所有增援食物都係多出咁濟...
同埋D環保炭真係超廢呀!!!一D用都無架!!!
話題都係圍繞當年的暴力哥爾夫!!!
大隻釗的女朋友非常有趣!!!
回程搭巴士N6X，非常好，行香港仔隧道!!!

基本上
除左BBQ就係旅行
因為...都無野好寫，又或者係無野記得咁濟吧，再或者係無野想寫
幾年來的重要大事
Selina燒傷...>__<
EyeShield21連載七年告終>__<
我居然會睇小說，睇奇幻小說，睇外文翻譯奇幻小說，明明目的係想睇完中文版就可以容易d睇英文版，但...我仲未開始睇原文版呢>__<
買左PS3先知...我係一個一D都唔Hardcore的gamer...無乜興趣開來玩呢...我果然係任飯/任系的!!!

>>December 31, 2011 at 6:52:22 AM GMT+8

2008 年 6 月 3 日 星期二 【晴】

一篇本來早就要寫好的文章
如果上一篇是要來記一點畢業感受的
這一篇本是用來正式回顧最後一年學業生涯的
又或者是回顧整個學業生涯的
只是...因為一點事...因為想寫而又寫不了...
一次又一次推遲這文
甚至把所有的日記更新也擱置了
還記得在08年七八月左右，劍仔問我幾時會寫返日記
我當時應該是答大約九十月吧，但卻被拖延至今...(還好不是大約九十個月吧^_^)

在腦海中一直想著這兩篇日記應該寫什麼?怎樣寫?
文字段落不斷地在思海中修正
什麼可以寫?什麼不可以寫?
寫出來會怎樣?不寫出來又如何?
我又為何要寫...

這篇本來要寫的是什麼呢?
說真的...早已忘了...
如果真的要回顧整個學業生涯
就不得不說最後一年...
但...我真的一點也不想說這一年的事...一點也不...
所以還是...隨心地寫吧!!!

================================================================
真的很感謝你
感謝你的存在
感謝你對我的關照
感謝你讓我喜歡上
從你身上努力學習
因為你而努力改變
也許時間真的不足以讓我改進
只是...既然我已是一個多餘的存在...
我不會再多管閒事
不會再多說一句
半句也不
我很清楚在我的心深處
你仍是一個很重要的存在，沉重得很
仍然是一個很遙遠的存在，遙不可及
我...衷心的希望你能得到真正的幸福與快樂

付出不等於收穫
喜歡不代表擁有
應該算得上是我的座右銘的兩句
曾經在xanga(August 10, 2007)寫出我對這兩句的感受與想法
但當時因為一些原因...所以隱掉了下面的一段
之前的文章只從廣義來說這兩句
只是...如果...
喜歡一個人，就是要擁有嗎?
不可否認，喜歡是包含著佔有的
沒有佔有的想法，焉能稱得上是喜歡
可是，一個人，可不是一件死物
一個我喜歡的人是有著自己的想法，自己的定義
佔有只能滿足一部份的喜歡
而喜歡一個人對我來說更是要滿足這個人的幸福與快樂
我當然想佔有我喜歡的人
但我喜歡的人的想法、幸福與快樂應該永遠優於我自己的想法
這亦是我推而廣之的價值觀
朋友的想法永遠優於自己的想法
因為我的想法就是希望能實現朋友的想法
嗯...一種近乎白痴的想法
所以...我離題了!!!orz
因為喜歡，所以希望對方幸福，亦希望自己有能力給予對方幸福
如果我沒有這種能力，憑什麼去佔有對方?
我有這種能力嗎?
我...何時才有這種能力?
何時才有自信...我可以有這種能力?

對!!我是一個既冷且淡的人
一直如是，將來亦(近乎絕對)如是
所以每一年都在這兒感謝朋友
換轉是我...我才不會一再接近一個能冷淡如斯的人
從不會主動關心別人的事
更不會讓人探聽自己的事
這樣的人早就不用多作理會
因此...那些願意一再嘗試被拒絕的人真的很厲害...
而我...一直以來亦只會在心中由衷感謝...

我很清楚...
這樣是不對的
很記得在十八歲那年
我對自己說過要改變
要學會主動一點，哪怕只有一點
只是...
過去的一年把這數年來的努力付之一炬
未來的數年就變得更封閉，更不想說話，甚至討厭說話
而最可怕的是...當封閉變成習慣...

很怕打擾別人
所以基本上發生什麼事都不會求助於人
更不會貿然詢問別人什麼事
記得一位好友拍拖兩年...我都沒過問一句，甚至求證一句
最後，從他的口中，我變成第一個知道他分手的人...(嗯...理論上都係最後一個知道他拍拖的人...orz)
為何會這樣?!
也許...亦是同一個問題...
我是一個沒膽量的人，正確一點來說...是一個沒自信的人
我沒有自信我能在別人心目中佔有一點地位
我很怕我的一言一行對別人來說都是煩擾
正如前述...
別人、朋友的想法永遠優於我自己的想法
我不允許自己干擾到別人的生活
就算一些相識十年以上的朋友我亦不敢認為自己能有所席位
不敢輕舉妄動地打擾半分

過去的一年
如果要我說
我可以好肯定地說
是我一生中最黑暗的一年
或者我應該慶幸自己是一個會很快地忘憂解困的人
執筆的現在要我再說發生了什麼我真的忘記了
如何黑暗亦淡然得差不多想不起了
不是因為失去什麼，或者得不到什麼
可怕的是一種精神上的崩壞
居然有一刻有著不要再相信朋友、別人的念頭
當然這想法在下一個瞬間就被自己打破
但有著這一絲想法的我都是不可原諒的
信任...對我來說是絕對的
別人可以辜負我的信任，但我絕對不能不相信朋友以至打破這種信任
而更可怕的是我居然間接也好直接也罷地令朋友難受
我明明一直告誡自己不可以再任性地做出會傷害到朋友的事
我對自己的教誨不就是我可以虐待自己，但不可虧待別人嗎?(當然...這是近乎實行不能的!!!不用在我身上試驗喇!!!)
我應該可以做得更好的
卻沒有做到...
只是...要我眼看朋友受到一點委屈而我卻不應多說半句
甚至那多說的半句只會帶來更多一點的委屈而我又更不能幫到半分
或者...我沒有能力做得更好...回避才是我能做的事
當然，一切的一切都只是我主觀的想法...
單是這點就已自私與任性得很...
我沒有能做的事或者我沒有做到任何事
明明很想很想用盡一切方法去感謝你
不是沒有嘗試，但當看在眼內卻不能多言半句
沒有資格與地位去多管半分
只能愧疚自己未能懂得更佳的應對方法才去回避一切
真的很對不起

過去的一年
明明黑暗得很
但卻居然能跟別人混得更熟，kkk大大同ricky神
尤其是kkk大大
如果沒有kkk大大
我不知我到底會在過去的一年能說上多少話
還會有多少活著的感覺
雙子座是一個在別人面前總是掛著笑臉，卻在別人背後憂愁低落的人
如果沒有kkk大大，我連掛著笑臉也不用(當掛著笑臉時是真的會在心中笑著的!!!)
有人跟我說話(嗯...我是不懂得跟別人主動說話)是很重要的!!!
所以我很感謝kkk大大這一年的存在
最少還有會跟我說話的對象
不會像之後封閉的數年般一整天也可以不說上一句話
^__________^

我不喜歡別人對我言謝
我可以對你默默的好、對你默默的溫柔
但請記著默默的終究是默默的
不要把它道破
當別人感謝我的一絲一毫
我就會反省自己為何做得如此著跡
應該要做得更不著痕跡，更淡然無物
更不為人所察覺
或者我是怕別人會得寸進尺地要求我的付出
怕別人會不安地接受我的好意
怕別人會以為我另有所圖
或者...我只是不喜歡別人對我的感謝會令我飄然
所以就會要求自己不要太著跡的溫柔
甚至乎不再對別人好
嗯...這是很弔詭的想法
所以...我是一個很弔詭的人
聰明的你就不要再對我言謝了

我很討厭別人稱讚我
我是一個很無知的人，很不知所謂的人
每一個稱讚都是愧不敢當
我明明可以做得更好
你卻認為我做得很好
而我所作出的回應居然是下次不要再做得咁好，不要再做得咁出眾
嗯...這是很白痴的想法
所以...我是一個很白痴的人
千萬不要稱讚一個白痴的人，除非你都是一個白痴

身為雙子座同馬嬲仔的我
轉數本來就不可能會低得去邊
舉一反三、一里通百里明、觸類旁通等等都只是我的常置技能
甚至乎當別人把話說到一半，我就已經自動地猜想到對方想說的話
以至想好怎樣回應
唯一要做的是等對方把話說完再回應(或者在那一半我已等不及地回應了^_^)
而這些都不是重點...
重點是...我說話的方式都是會轉幾個彎
總是要一層一層地聯想才能被解讀
或者因為說話的方式總是很白痴，不明所以
別人聽在耳內總是覺得我不認真，總是在開玩笑
嗯...雙子座就是愛開玩笑
因為雙子座就是喜歡身邊的人充滿歡樂
但不代表我說的話就全是玩笑毫不認真
我只是喜歡開玩笑
但在玩笑的背後總是包含著誠懇
像是不加思索、不經大腦的話其實已在腦海中轉蕩多少回
可惜的是除了另一個我又有多少人能理解我的說話的真正用意與意途
更可怕的是...當我認真地說出自己的想法時...別人總是會以為我在開玩笑
儲了多久的氣才膽敢說出的心中想法，卻在剎那間被否定、排除、誤會
或者我其實不懂如何跟別人溝通吧

客觀來說，我算得上一個聰明的人
最少，我比一般人有著更多的小聰明
總是能靠著小聰明與小運氣把大部份的難題一一解決
主觀來說，我絕不認為自己聰明
最少，有好多好多好多人比我聰明
嗯...
因為...主觀永遠勝於客觀
所以...我是一個毫不聰明的人
^________^

說謊
Everybody lies
我討厭別人對我說謊，大的也好、小的也罷，不喜歡就是不喜歡
我好清楚謊言並不可怕，可怕的是謊言的背後，為何而說謊?為誰而說謊?
但...可以的話請不要對我說謊，正如曾經寫過
你可以什麼都不說，可以隱暪，可以遊花園地帶過(我就是用這些方法來避免說謊吧~.~)
那麼一點的體諒我還是懂得的
但請不要說謊，半點的謊言都會令我生厭

真的很感謝你的存在
因為喜歡一個人，才能有動力去進步(動力對雙子來說是尤其重要!!!)
曾經的你的認真與率直更是我一直追求的目標
奈何，這兩個詞語總是難以用在雙子座身上..
認真，對雙子座來說真的是很多餘
追求的明明就是和平歡樂的生活，以雙子座的能力來說不需半點認真就手到拿來
就算真的遇上什麼緊急事，只需在最後的最後稍微認真應對一下就萬事OK
明明用上三分鐘的認真就可以把杯麵弄熟，吃飽醫肚後，還要認真o黎做乜?!
率直，雙子座真的用不上這個詞...orz
因為酷愛和諧(雙子座只愛與好友吵鬧，才不是愛好吵架!!!吵鬧跟吵架是兩樣很不同的事!!!吵架是很煩厭的事!!!)
在別人簡單的一言一行中，已經判斷出什麼可以說，什麼不可以說
又要如何率直的把真話說出口?
其次...對雙子座來說，心底話是不可以說的
又或者...連自己都不知道心底真正的話是什麼...
那又要如何率直呢?
認真與率直...
永遠都只能是追求的目標吧

每次吃飯被問意見
我都只會答無意見
一來，別人的想法就是我的想法
二來，我對食...真的無甚特別要求
不過...請不要吃得太貴(超過一百就很貴喇...原因如下句...)
當然，最主要原因是我真的很窮很窮很窮呀!!!
其次...
偶而會想起...在這個世界上，在第三國度裏
還有多少人把三餐溫飽視為夢想，以至奢想
多少人一天所吃的連自己小小的一餐也不如，遑論那花費更甚的一頓飯
多少人為吃喝在祈求著，而我居然能在這兒和平無憂地選擇食物
要用上那筆足以他們能吃上一個月的金錢來吃那一餐半餐?
或者對別人來說會是享受，但對我來說絕對是折墮
當然我還是會消費娛樂，浪費金錢
但...我真的不敢把「吃」這種本應人所共享的事當作一般消費來虛耗
只不過...人類真的是一個矛盾的存在
在傾向節儉、簡約食物的同時...我...係...一個極度偏食的人!!!
人...就係咁矛盾架喇!!!(吼!!!)

解釋即係掩飾
我討厭解釋，或者是因為我把兩者看成近乎同樣的東西
我當然樂於傾聽別人的解釋，別人的事、別人的想法，我是無法輕易理解的
只有透過別人口中的解釋，我才能接近事情的真相，當然...只是他想我知道的「真相」
但我討厭解釋，就像要為自己所做的事作出掩飾
有時，還是會用上三言兩語試圖解釋一番，可是當仔細一想，又為何要這樣?
明白我想法的自然會明白
不想理解的，我再主動地說明理由都沒有半點作用
尤甚覺得解釋就像是因為理虧時才需要做的事
或者...更主要的原因是我不喜歡讓別人理解我內心想法
更甚是，有時當察覺到別人對我有所誤會時
不僅不解釋半句
還會故意說出一些會加深對方誤解的話
也許是天性使然
總是在做著些會更孤立自己的事

幸福是什麼?!
生於斯，長於斯，活於斯
不就是一種幸福嗎?
每一個晚上閉起雙眼，每一個早上睜開雙眼
不就是一種幸福嗎?
是雙子座天生對幸福就有著一種「低定義」
又或者是在我眼內，幸福著實太簡單吧
在這個世界上，多少人希冀三餐溫飽?
多少人奢求平安渡過一天?
幸福是相對的
某些人的幸福就是比別人平凡、就是比別人簡單
甚至只是別人眼中的理所當然
相對地，有些人的幸福...實在數之不盡
我所求的，我所想要的...
也許真的太簡單、太平凡
但...這就是我所想要的

或許是「品種」的「血繼」吧
我總是能看到一些異性親人為了自己的另一半而背地暗自心裏落淚
這樣的幸福又是怎樣的一回事?
我沒資格說上什麼
但我就是看不過眼這樣的男人
不是曾承諾要一起幸福嗎?
就我個人而言，承諾是絕對的，而絕對...相對來說...真的是絕對!!!
人總會自私，總會軟弱，總會懶散
可是做出會令自己喜歡的人在心內流淚的又算得上是什麼人?!

我知道我還有很多需要學習的地方
很多需要改進的地方
雖然我未胖得足夠來讓肚子大得能撐船，但撐隻小艇應該還是可以的
我可以好肯定的說
我是一個能虛心受諫的人
如果我有任何不著之處請隨便指正
如果我有時把話說得太快真的出口傷人也請隨意糾正(不過請知道，我只會在好友面前才會針鋒相對的)
當然，可以的話請不要當眾人面前大聲糾錯...我的面皮還是很薄的(羞)
但我知道，只有重視我的人才會對我指點一二
或者我學習、改進得真的有點兒慢
但我再慢...都會一直改進下去的!!!

也許
一點的嫉妒、一點的不忿、一點的自責、一點的愧疚、一點的看不開、一點的看不破、一點的看不穿
我明明可以做得更好
可以做得更多
以我的能力是可以的
只是...我不是沒有試過...
只是...我...
要我眼看喜歡的人跟別人一起
以至眼看受委屈時卻不能多管半點閒事
連朋友這身份也當不好
或者我仍是當年那個自以為看懂別人想法而自作主張地退避的人
既然是我犯下的過錯
我會一力承擔
只是我再沒心力是糾正錯誤
甚至根本沒力去求證量刑

再說下去...也許真的太多了
既然我是一個多餘的存在
我只能衷心的希望你能過得幸福快樂
縱使我不能認同你為此而所作出的妥協
但既然是你的選擇
一定有著你的理由，你的想法
我不敢想像你現在的生活
但請一定要過得比我所能想像的更幸福快樂
你值得得到真正的幸福、快樂

===================================================
本來...
還有更多的想法、感受早已默然在心想一一寫下
但...真的寫下來...
越寫...就越發覺得太多餘了
我是在為自己辯解嗎?
在平反嗎?
在訴苦嗎?
不正是說我討厭解釋嗎?
所以...還是...算了吧...
已經寫得夠多了，觸得夠深了

我知道...
就算是執筆的現在
我仍然處於半封閉的狀態
不想說話，一點也不
我不知道要花多少時間、多少心力才能解除這種封閉的心態
我知道我已錯過了很多朋友、很多很多
也許還是會繼續下去...
但...我會再次嘗試踏出主動的一步

律己必須以嚴，待人應當以寬

悟已往之不諫，知來者之可追。
實迷途其未遠，覺今是而作非。

>>October 27, 2011 at 3:34:14 PM GMT+8

2008 年 5 月 30 日 星期五 【晴】

今日...如無記錯就係我學業生涯最後一天
即係o係科大last sem的sem end
雖說是last day...不過是考試period的last day
我係更早就考完晒試的...不過...我已經唔記得晒我係幾時考的了...(以兩年多三年後的日子來回想...是不可能的吧...加上可能有keep record的電腦都死掉了...orz)

要說的...應該就是grading吧
comp...A
huma...A
civl...B+
sosc...C+
fyp....B+
比想像中的好...吧...

comp(music)在差不多無上堂的情況下 (只係開頭兩三堂同最後一堂有上，好似仲有堂quiz都有上)
只係靠最後溫notes下拿到A...還不賴吧:p
不過...我記得...sunny同我份final係同分的...不過佢最後係A+...
即係...我份project低分過佢...
但係我份project明明就係fyp改出來的...~.~

huma(香港文學)一堂要八半(定九半?!)就上堂的科目
仲要我除左這堂...上午(上完堂都仲係上午...)同下午都無堂的科目
不過居然係我成個sem最認真的一科!!!
情況許可的話我都會返去上堂的!!!
本來只係因為kkk大大話好grade先上的
後來可能因為真係好耐無讀過中文先會咁有興趣
最後的最後個grade又真係不錯
之但係...我記得我份final都係考得很不錯的...
所以...即係又係我份閱書報告寫得差?
看來...我真係無乜寫作能力...死讀書才適合我吧!!!

civl(環保?)一個阿sir仲hea過學生的科目orz
每一堂都只係由學生present，然後由佢總結「重點」
quiz同考試就會講定邊d重要、邊d要溫
雖然佢hea，但係又好好grading
明明我都不算太好成績，但居然都有B+，太好人喇

sosc(science, technology and business)
本來係諗住用這科來cover我前另一科sosc psycho的
但係居然得C+...雖然都好過psycho的C...咁...都應該叫做cover到吧...orz
同psycho一樣...lee科都係考英文的
份note有七八成野我係睇唔明的
要我溫書根本就係殺左我咁濟...

fyp...不提也罷...而且之前已經寫過了

總結的話...
在科大的GGA只有8.49...只差一點點就有8.5...即係可以呃到個B+返來
只要有是但一科...高一個sub-grade就可以了...orz
或者...天意如此吧...
其次...在科大...我一個A+都無拿過
在CITY都叫做呃過兩個A+返來(math & stat同埋database)
但係在科大...一個都呃唔到呀!!!
正A有三科，簡單來說就係數(linear algebra)、中(香港文學)、電腦(computer music)
中、數係我我由中學開始就要來呃分的科目...即係唔駛溫都可以考得還可以的科目
或者...我應該報考中文系或者數學系...來達至更強的呃分之道!!!
(嗯...我知道我讀電腦系...基本上都係無盡過力來呃分...如果轉系...一定會死得很慘喇!!!)
(而且...以我的成績根本就轉不到系吧...orz)

或者
以上
====================================================================
如果...還有要說的感想...也許...就是以下吧

還記得
在winter sem時上的某一堂english
miss很鄭重的提醒我們
人際網絡在社會上是十分重要的
每一個人都需要不斷擴闊自己的社交圈子
或者，有時需要用上各種社交手段，因應不同的人而說不同的話
不是要欺騙別人，只是說一些別人想聽的話來增進感情、關係，一些不應說就更不消說
對將來投身社會有莫大的幫助

我唔係好肯定當時miss要講的就係這些
始終已時隔多月
但我較肯定的就是當時miss的大要就是擴闊自己的圈子是何其重要的!!!
本來我就好認同這個世界要「成功」，一講機遇，二講關係，三才勉強到自身的實力
要有一層又一層的圈子來協助自己更容易邁向成功，最少...失敗時都還有人情可依
只是...只是...
要擴展社交圈子...就要這樣的見人說人話，見鬼說鬼話嗎?(雖然這本來就是雙子座的常置技能:p)
就要戴上各種面具去扮演對方想見的角色嗎?(再一次...是雙子座的本能...orz)
我很討厭戴著面具做人，尤其面對著「朋友」，居然還要扮演另一個角色來交談
這就是現實所需嗎?
難道就不能真誠的說話交往嗎?難道所謂的交情只僅是一件又一件多多益善的工具嗎?
或者...只是我看不透這個世界...
又或者...只是我太不屬於這個世界...
因為miss的一番話...令我思索不少...
我要的是怎樣的關係鏈?
為了「討好」朋友、別人而勉強自己扮演不情願的角色嗎?
我不介意勉強自己，反正自小至今還勉強得少嗎?
我介意的是...面對著朋友...居然要戴著面具...這樣的是朋友嗎?
我要的是這樣的朋友嗎?
我不允許自己對朋友說謊，對待朋友就是要真誠的交往...
也許...這也是我沒甚朋友的因由吧...
聽miss一席話，一連串的反思
反問自己是一個怎樣的人?我要做一個怎樣的人?
而...亦因此下了最後一個決定

上面是lastsem前的一段小插曲的話
那下面就是lastsem後期的另一段小插曲了

兩星期
尤記得大約在lastsem仲有兩個星期就完結時
好似係落堂離開ust時
朋友在旁邊說了一句
「仲有兩星期就畢業喇，好唔捨得」
(大約如此吧...因為上述的都不是重點...orz)
聽到一句這樣的話...
在同一時間...
我想到的居然是...
「嗯...仲有兩星期...快d過完就好喇」
一念及此...我才意識到原來我係如此厭惡科大的
我居然一點不捨之情都沒有
反而仲想最好就快d過完佢，甚至乎有點討厭這兒的感覺
厭惡這兒的人?這兒的事?
一直以來都只係自我壓抑
以為已經沒事了，以為已經平復了
原來只是自欺欺人
根本就沒解決過什麼
明明還有不足兩星期就完結的學業生涯
我居然恨不得能再早一點完結
而我一直都沒有察覺到自己的這些真實想法...
原來...只是...這樣...
當然!!!
以上的一切想法都只是一瞬即逝
把一切想完之後...說出口的僅是...
「嗯...」
一些不應說出口的想法，還是不該說出來
尤其在不適當的場合吧!!

兩件跟畢業毫不相關的事、毫不相配的事
居然就是我對最後一個學期的感想
或者就是反映著我的學業是如何失敗吧...orz

也許跟本來想在這天記下的事有著不少出入
始終一切已事過境遷
兩三年來我偶以提醒自己，我要在這天記下什麼
因為我希望為所有寫下句點
應該還有一些我本想在這篇記下的
但...當坐下來打著寫著時...
才發現忘了的已不少
才發覺真的很難寫出來
才了解有些事...還是難以言及...

節錄兩句我很喜歡的詩詞作結(基本上我只係記得頭兩句，後兩句我從來都唔記得的!!!orz)
喜歡
是因為一直都好鍾意一些借景抒情的詞句
好鍾意這句所包含的意景
以及...這句所說的對象...正是在下吧...XD

人生到處知何似？應似飛鴻踏雪泥。
泥上偶然留指爪，鴻飛那復計東西。

>>October 24, 2011 at 3:13:17 PM GMT+8

2008 年 5 月 10 日 星期六 【晴】

星期四係civl的final
星期二中午o係barn溫左課半
晚上飛多課半
星期三晚上才有心機再溫...
溫埋剩返的七課~
然後review~
本來係諗住認真d溫好佢的~~
結果...因為心情又或者係身體...問題...都係heahea地溫完就算...

份卷都ok的~
d問題都叫做睇得明~
mc都係撞下幾條~short question就盡答~
ok吧^^~

星期六
雖然ok早訓~不過都係訓得ok差...
約八點~六點諗住再訓一陣...set好7點鬧鐘響~
點知...訓到7點44分~突然扎醒~唔係因為鬧鐘第五次響先醒的~真係突然扎醒~~(醒左先聽到有聲)
第一感覺...就係又遲到喇!!!
第二感覺係...居然會聽唔到聲!?真係咁好訓咩?!
極速出門口~~8點06分就到左太古~
在劍仔的「英明」帶領下~二人暢遊左太古mtr方圓數公里~上演覓食之旅~
結果都係返返去太古城中心食...火鍋~~
食d乜...都唔係重點...
重點係我飲左兩次好貴的可樂~$9一鑵百事~同$16一杯20oz可樂~~好貴的說!!!
遲左5min入場~結果又趕得切睇開場^^~

睇戲~都係唔駛錢~劍仔果然係交遊廣闊~
《柴犬奇蹟物語》
故事還可以啦~~o個幾隻柴犬真係ok得意的~~~
睇睇下諗起套又係講災難中幾隻雪犬極地求生的~突然想看~~
另一個想到的就係...
人越大~就越多顧慮~要考慮別人的感受~要關注整體的利益~一動一靜都不再隨心~
不能如小孩般~~因為「我喜歡」，所以「我做」~
越是會體諒別人的人，就越多掣肘~越不能做自己想做的~
這就是成長嗎?!
講返套戲...
估唔到有成125mins
播到一個鐘仲諗住佢無野做的了~.~

星期日
睡得極差~
都唔知訓左d乜~
已分不清是心理還是身理因素了~~
是內感未清嗎?!
還想溫下星期二考的sosc的說...
~.~

>>May 11, 2008 at 2:52:53 PM GMT+8

2008 年 5 月 3 日 星期六 【晴】

今日睇返布拉格戀人的大結局~~
個結局都編得不錯的說~~交代得ok~~~
感人的有~搞笑的都有~~
唔知點解一直都覺得個女主d行為好cute的說^^~
男女主角的互動就係白痴得來好好笑^^~

然後就再睇返旋風管家的ending~~
end得唔錯的說~~~比逮捕令end得好~~~
不過...我都係中意睇雛菊條線多d~~~佢好得意呀!!!
追開的四套動畫同一個period大結局~~
但...都係因為fyp的關係無追哂~
終於其中兩套都追返~~
仲爭bamboo最後一集~同es21的幾十集^^~

見到bb女喇!!!
好得意!!!
好好好好好好好好好好好好可愛呀!!!
不過...病病地...都係唔好掂佢喇...
無得同佢玩添...
><
至於bb女的由來係...
自從19號~某表親下來等生女而寄住我家~及至5月2號~晚上9時48分~bb女出世喇~~~
雖然同表親無乜兩句~
但...
bb女真係好得意呀~~
幾時先再有機會同bb玩遊戲呢?!

仲有兩個星期...
學生生涯就完結喇~~~
有點兒不太捨得呢...
無得再太hea了...
不過...我到而家都未搵工呢!!!
果然...一個成功的二世祖先係我的人生目標!!!
^_____^

>>May 4, 2008 at 3:31:43 PM GMT+8

2008 年 5 月 2 日 星期五 【晴】

今日考埋ielts喇!!!
一字記之曰: 炒!!!

好耐之前就plan過下~
要稍為努力一下的喇~~
可惜...較為成功的...可能就係...聽左英文歌...(westlife ok好聽的說!!!)
同埋...有一排係手執一本ce英文書看的...
之後...都係無乜點努力過...
去到開考前三日...做了第一次reading...24/40...orz
前兩日...做多了reading...30->25->33...我果然是來亂的...
前一日...做左三份listening...18/40->20->24...orz
我果然係唔識聽英文的!!!雖然已比ce同al時好得太多了...唉...

到今日考試...
狀態不是太好...病...還未好...
reading...被秒殺...好難...好多mc...撞左一半...
到listening...分心了一下子...有d字唔識串...(advise!!!)...死上加死...
writing...亂來的~不用提~~
speaking...我...dead了好幾下air...加...都係好怕羞...唔係好敢望住佢講野...望左一陣就望去第二度...orz

嗯...5分...希望會有的啦~~~

即係...用左...
千一蚊買左支鉛筆返來咋!!!

>>May 3, 2008 at 3:21:02 PM GMT+8