2003 年 8 月 7 日 星期四 【雷雨】

LAST DAY喇！今日大家都帶套U返黎同ｄ阿Sir影相，Jason仲帶埋熨斗，勁！

原來就黎有班新紮出學堂，所以佢地都加緊練操。當然相比之下，佢地ｄ操就梗係好過我地多多聲啦！哈，ｄ肥佬阿Sir都操得下喎。跟住就係上最重要的課─消防安全大使導師，仲即時有個Test，合格先至有牌(→那就當然啦)，老實說，十成裡有八成唔記得，超級無記性哩！今日Nora著左條裙番黎，但「1:99」一黎就話佢，又打晒電話番head report，shit，而家有幾大件事先，洗唔洗咁呀，搏邀功呀~

午飯之後，我地又上左喉架學「爆閘」，另一邊果班青訓响個Ground度播「大無畏」，有點兒覺得自己唔係响消防學校咁。等到人地用完個場，我地就好快咁換U，同班阿Sir＆同學仔影大合照，仲有架消防車做背景，正！

五天課程完結，唔捨得之餘，我地ｄ怒火開始澎湃，事關我地放左學留响學校影相，已經問准晒ｄ阿Sir，比「1:99」見到，仲大我地話report比head office聽，黐線~ 今晚跟左華哥去旺角食飯兼睇波，估唔到係芷萱、嘉茹會如此瘋狂。臨走華哥收到sandy電話，我唔知佢地講乜，但我地知道華哥係撐我地，好感動呀！

>>March 28, 2004 at 9:55:44 AM GMT+8

2003 年 8 月 6 日 星期三 【晴】

不經不覺已來到Day4，上午有講堂也有實習，午飯後就係大量的勞力了。

隻腳還是痛，拿住個入滿水的水劑滅火筒去撲火，我還可以撐下去的。接下來的節目，係認識各種救人工具及實習，我同嘉茹一齊用電剪去剪車門，當然那道車門是從廢棄的車拆下來。今日又再一次克服唔到痛楚，要爬梯 ... 爬鋁梯都應付得來，但爬喉架裡的鐵梯就不行了，萬一碌左落去就死得~ and我地又上左雲梯，wow~爽呀

今晚同小飛補祝番生日，唓 ... 一ｄ都唔好玩既，比個侍應踢爆左「7位」呢兩個字，穿晒煲。但果間餐館(→唔記得叫乜名＠奧海城)都唔錯，都坐得幾舒服。

過多十日左右，我地唔會再係AU7的Committee，唔知仲有無機會七個坐埋一齊食飯、傾偈＆玩呢？？

>>March 28, 2004 at 9:58:11 AM GMT+8

2003 年 8 月 5 日 星期二 【乍寒還暖】

嘩！今日隻腳仲痛過昨日，想慳d醫藥費都唔得。

死撐捱到消防訓練學校。弊！原來今日係體力勞動呀，真係大件事。同Ada一齊「爬箱」，結果因為痛而完成唔到，好失望 ... 好在「帶豬鼻」我又可以捱到。又一氣頂的事，我地來自五湖四海的24個人當中，有ｄ係團長，佢地未必識步操，但ｄ人貪方便成日叫ｄ人地唔識既動作，做唔好又比佢鬧到九彩，變態架。又係中午飯的時候了，我地因為「乾碗」而捱鬧，今次我覺得我地興奮過龍，但未至於要「喝」我地嘛。下午大家齊齊學繩結，打得一撻胡塗。

約左家惠一齊去Quote價，為的又是combine enrolment ... 由消防訓練學校返出荃灣那程巴士，隻腳被巴士的震動震得很痛＞＜，直至回家才看醫生，那時隻腳已經紅、腫、痛，醫生話條筋發炎得好犀利，仲嚇我：「如果隻腳再係咁腫，就要做手術。」→果時才知驚

p.s.: 我地好叻幫人地改花名架！

>>March 28, 2004 at 9:52:05 AM GMT+8

2003 年 8 月 4 日 星期一 【晴】

今日係Day 2，一起床就覺得隻右腳有點痛，以為只是傷了少少舊患，照去上堂。

開始習慣了那陣牛屎味，但有d人把口真係臭過牛屎......

上午依然是講堂，差d就訓左~。今天的中午飯食得開心得多，起碼大家熟落左，有講有笑；昨天食午飯的樣子，好似監獄風雲咁，可能當時大家都未熟吧。食完飯仲有時間同滅火筒影相添。下午就上CPR，比果度d阿Sir讚我做得好呀，仲叫我做示範~死未！

返到屋企先至發現無證件相，too bad~

>>March 28, 2004 at 9:52:36 AM GMT+8

2003 年 8 月 3 日 星期日 【晴】

DAY 1去上FFI，晨咁早就乘巴士入八鄉，可算是舟車勞頓，落左巴士亦不能呼吸一口清新空氣→因為好大陣牛屎味，嘔！

比預期中早到，同Jason & 雞翼在canteen坐，等左十幾分鐘先至齊人，但估唔到課程未開始就己經比人話 ... 上午是一般的講堂：學分街喉之類。到十點半的時候，大家會一齊去飲茶，咪以為去茶室品茗：只係飲奶茶&咖啡，跟住又再上講堂。

到午飯lu，要自己去set餐具、取飯餸。食完午飯還有好多空閒時間，都唔知去邊度好，又未晒到其他人，得個悶字。終於可以返房lu，識左兩個WKD既嘉茹&芷萱 ... 下午的課程又展開啦，葉sir教我地用「喉公喉乸」、喉筆、開喉收喉&手勢，而且仲話會比我地試下開喉玩，只係講都已經興奮~^^~

有機會嘗試到著消防員衫，仲要係成副武裝，好英啊！大家都忍唔住要帶埋部相機去開喉。其實，個頭盔&水鞋好重，走起路來好唔慣，係呢個時候，突然間有人推左我一下，我失去平衡之下，成塊臉撞了牆，仲聽到「副班長」話：「唔好阻住條路」，嘩，咩意思呀？！

原來，開喉容易收喉難，收到腰骨痛呀，結果係收得好核突。到有水比我地開喉，我同Ada都high左，同時又嗌晒救命，因為係好重、衝力好大，真係紮晒馬都未必頂得順。

>>March 22, 2004 at 2:37:07 PM GMT+8

2003 年 7 月 31 日 星期四 【晴】

今天是媽咪的生日！每年都只是一家四口去食晚飯，如果我和哥哥那年有錢的話，都會夾錢買一份小禮物給她。但有時她會說：「你們買禮物送給我，用的都是我給你們的零用錢，即是等於用我的錢去買，沒有分別！」話雖如此，但收到我們送的生日禮物，也甜到入心哩！

最近，我突然覺得媽好像老了，白頭髮又多了一點，以往我無聊地為媽咪剪白頭髮，她說：「都四十幾歲人，有白頭髮有什麼出奇？不用剪了。」我慣常用同一答案去反駁：「你把頭髮咁黑，但又有廿條白色的咁礙眼，剪鬼左佢喇！」媽都沒有辦法，只好坐定定，由我充當「白髮檢剪器」替她剪短那些白髮 ...... 現在一剪，都不是十幾廿條了，而是三、四十條。我心頭突然酸起來，腦裡又閃過從前小時候的相片，唉 ...... 反問自己：「我將來能夠給什麼予爸媽呢？」

其實，今年不用送禮物了。因為最好的禮物，就是哥哥被港大取錄的好消息！

>>November 26, 2003 at 5:33:53 PM GMT+8

2003 年 7 月 30 日 星期三 【晴】

約好了和牛丸一起去書展，今年入場時間有點奇怪，我只好購了15:00入場的票。在荔景地鐵站等牛丸，發現月台某處牆上有一個「7」形狀的洞，還有一個警務處的Logo，非常有趣，所以我忍不住那「發現新大陸」的情緒，與它拍下了一張合照。

既然「過海」，就先去了柴灣IVE，然後再去灣仔。但我計算錯誤，結果交完已經是15:00，得「趕頭趕命」去排隊入場，嘩！那條「龍」真是長得嚇人，還有更嚇人的，是排隊時撞上同是入場的Debbie & Becky......卒之排了45分鐘，如果不是「左攝右攝」，可能不只排45分鐘了！差不多16:00多才進入場館。今日尚算收穫豐富，買了兩本書，其餘的全是雜項用品。

>>December 25, 2004 at 5:11:19 PM GMT+8

2003 年 7 月 28 日 星期一 【晴】

不經不覺，今日到DAY 4...下午就要回 HK了。這幾天過得很愉快，實在有點唔捨得。

吃過「最後的早餐」、換過制服後，到課程最後的環節：檢討 & 對培訓營的內容給予意見。接著當然是拍照留念啦，大家不斷的狂影。拍到後期，我的笑容「緊」了、眼也「澀」。午飯前回房執拾行李。出發的時候，行李是漲卜卜的，現在反而多了空間，還幫Big C放她的制服，幾好！

出營啦...3:00到了碼頭，大家也顧著拍照；而我呢，則坐在地上寫postcard，因為只知道小琼家的地址，所以亦只寄了一張給她吧！時間緊拙，postcard裡的字寫得很潦草，還要在出境前十五分鐘，匆匆忙忙向團友借葡幣、買郵票、搵水貼郵票 &寄出。在船上很無聊，亦不想再拍照，可能經過幾天的辛勞，想有一個靜下來的時候吧。想閉目睡一會，但居然睡不著→（都唔知點解？？）於是我又send SMS比人，意想不到有回覆電話，原來是少雯，先問我：「好唔好玩呀？」，跟住就同我傾「公事」，哼！

4:00到HK，弄到黃昏才回到家。啊，多麼掛念我家的...梳化、電視；我房的...睡牀、還有我的家人啦！回家第一件事：洗澡→有陣味，哈哈。又忙著清理我的行李、分手信，反而精神過來，一點都不覺累，神奇！

>>November 8, 2003 at 4:59:59 PM GMT+8

2003 年 7 月 27 日 星期日 【酷熱】

今日又一大挑戰 ... High Wall，至怕就係「佢」啦！個Wall成個籃球架咁高，最終雞手鴨腳的成功上了去，還被阿兒攝得一張我上緊High Wall時「吊臘鴨」的樣子！外出前有一個「事故處理」的工作坊，分組討論完要發表處理方案，大家互相推辭，一點都不像過往大家的作風，最後唯有我去發表。事後Jaye提到96年八仙嶺的case，我反思假如真的有行山意外的case，我身在其中又會否可以鎮定去處理呢？發表時就天下無敵，但做就有心無力，可能會驚到手震→我都唔希望會在我身上發生！

LUNCH之後去澳門童軍參觀，去的車程中還想像會有什麼活動讓我們參觀呢？只是坐在一個廳裡聽介紹，有點兒失望 ... 收穫尚算豐富：可以與當地童軍合照&購買紀念品。不過時間緊迫，匆匆買完就被趕鴨仔上車，活像個旅行團。與Jaye在車上分戰利品，嘩！原來買了唔少＄，要控制下 ... 到澳門紅十字會，才知道當地還未有制服隊，反而佢地ｄ職員問番我們在HK如何推行紅十字青少年的活動、向我們取經，sorry~在呢part我沒有發言，因為我地有一個好好的代言人^^。值得一提，我們去了阿爺─始創人亨利．杜南像拍照，還有紅十字車呀、電單車，我地就發顛似的謀殺菲林。入夜前到主教山拍照，景色不錯，真是一處拍照的好地方，但這兒內有惡犬，起勢咁吠，嚇親！

Dinner之後兵分兩路：觀光團&購物團，我當然跟購物團吧，始終是第一次到澳門，要買點手信才像樣；與其夜媽媽去觀光，不如下次同朋友再來。又再度發顛的買手信&試食，不是太想吃，因為晚餐吃得太飽了，但ｄ阿嬸狂將鉅ｘ出品放入我地個口，好滯。恐怕這次訓練不瘦反肥！

>>October 20, 2003 at 7:56:21 AM GMT+8

2003 年 7 月 26 日 星期六 【酷熱】

今日係體力(大量)與意志的大挑戰，做什麼呢？... High V、空中飛人&巨人梯。每次接受挑戰前，都要向Teammate講：「我，朱敏敏願意接受呢個挑戰，請大家支持我！」接著大家就要回應我：「支持~」→可能大家心裡會想：「支持...你唔住」...哈哈，講笑咋！

High V完全順利，似玩鋼線。到了空中飛人反而有點怕，個跳台面積只有一張F4 Size紙大，唔驚就假！冒險撲了出去，右手成功地扣在木桿上，但左手就抓不住，結果是半天吊，最後放棄了木桿安全著陸。

LUNCH之後就有一個環節叫「MISSION IMPOSSIBLE」，這是整日裡最不知道自己要做什麼的一環，只係做「放繩收繩」。彩兒就慘了，由於她嬌小又輕磅，被眾人(包括我)「推舉」做「扯線公仔」，事後知道她被安全繩勒瘀了，我慶幸自己夠份量，免加深皮肉之苦。

P.S. : 間房真係凍到似雪櫃，成間大雪房咁。睡到半夜跌了件風褸，之後比彩兒叫醒陪去Toilet，事後佢話見到我起身執衫，所以就咁無喇喇陪佢去。

>>October 19, 2003 at 10:18:14 AM GMT+8