2003 年 10 月 10 日 星期五 【微雨】

尋日一早就要去開會啦，9:00尖沙咀帝苑酒店開會，原本的諗住搭地鐵去架，不過遲左起身，攪到最後都係搭的士囉，都係claim個會錢姐，今次開會主要係傾11月的周年大會，文件上的資料已預備好了，秘書長個秘書原來好老架啦.....個會總括來說的ok啦.....同其他秘書分左工作安排，原本份文件係英文的，某秘書又話好似收過中文版，嚇到我呀，因為如果要做中文版好麻煩架，d文字又唔可以錯喎，好彩最後秘書長都係話用英文得架啦，費時煩啦，舒服晒，開完個會都好準時係10:00呀，秘書長話佢緊住要開會走先，留下我地全部秘書，食埋d野(中式早餐我就麻麻地)，跟住傾左一陣計，主要都係傾流浪足球隊隊長的事啦，個個都登佢可惜，跟住我地就走啦，因為時間都唔早.........我地回到公司已經差唔多11:00lu.......又一朝..........

今日係亞paul的last day，所以我地決定同亞paul farewell(只不過去飲茶姐)，因為平時都係叫飯食，去飲茶好high架啦，我地用左會長間公司名，所以去的時候，好快就有枱，叫了好多野食呀，不過因為朝早開會時又係中式，我就麻麻地食得多囉，不過叫左個南瓜酥，甜品嚟架，好好味呀.........但因為我地等d野食等左好耐呀，我又要去寄信喎，所以我走先囉....跟住去買d文具，回到公司又已經係3:00lu....又半日..........

回到公司之後，亞paul好忙呀，又要教新人做野啦，我地又要佢做番d未做好果d文件啦，所以佢話好夜先有得走呀，所以我都係一樣囉，因為d文件好比佢架嘛......晏晝果餐真係好飽呀，攪到我頂住頂住咁呀.......又好眼訓喎.......最後我都係佢講我想走先啦，不過其實果時都已經係8:00lu.....都唔可以叫走先........

近期天氣好似真係轉冷了，好想找件冬天衫著tim，lee幾日天氣又一時落下雨，一時又好天，令我想到，主雖然沒有應許天色常藍，雖然沒有應許過我地人生的道路係平坦，但祂確應許過陪伴我地直到世界的末了﹐幾寶貴呀。每個人都心情唔好或者不穏定的時候，但感謝主祂卻從來沒有推卻我任何的要求，祂真是我最要好的朋友。



>>October 11, 2003 at 5:04:27 AM GMT+8

2003 年 10 月 9 日 星期四 【晴】

尋日一早就起左身啦，應該係話被家淳打的電話嘈醒，因為約左家淳食早餐呀..去麥當勞食早晨全餐，好豐富架，佢就遲到囉，但不關她的事，因為佢果度冇車去藍田呀嘛，7;00出門口，成7:40先到，攪到佢都好辛苦咁，第一次見佢穿校服的樣子，感覺好似大個左好多咁，話晒到係F.1呀，之後送佢上返去地面跟住我就走LU，費時被佢話又要人送啦，咁大個此終都唔鍾意人送返學GE，我都明白lee一點，跟住我都返工lu，不過時間真係好早呀，8:00已經係地鐵站lu，平時可以8:25到都冇所謂，不過早有早的好處，就係地鐵有位坐呀，真係難得，可以係地鐵內坐係度睇聖經確實難得。睇聖經的時候，心好想睇返少年人要見異象，老年人要發異夢的那一段，感謝主都比我找到，因為我實在太唔熟聖經啦，心中有睇法，原來除了年青人要有夢想外，原來老年人都可以有夢想，不可輕看每一個，其實每個都有長處，十隻手指都有長短啦，我諗我自己係又肥又短的手指，雖然用途看似不大，但每個都不可少。年青人要有佢自己的夢想同心志，在主內大有盼望。

返到公司都係差唔多8:45，實在太早啦，加上好眼訓，訓左一陣，下次約佢地都係唔可以連續2日，要隔開先得，如果唔係真係太攰啦。一早的工作量可以叫ok啦，因為10/10要開會呀，要預備文件，所以有排打，打到手抽筋都似。

食飯又係係公司食，叫我鍾意食的鳳爪排骨飯，正呀。下午的工作開始多啦，又要改文件，又要改LEE改路，最唔鍾意就係咁架啦，亞會長真係煩死人啦。!!!!!最重要係星期四要小組架嘛，咁改法喎，實係冇得去啦，又要預備開會D野，文件又未得，就嚟比秘書長個秘書殺死我架啦，一日打成7-8次電話過嚟問得未，我估佢真係好得閒咁，時間過得好快呀，到6:00亞MAY都話未得，我已經知道我應該去唔到小組架啦，最多去到都係遲到啦，點知，因為文件又要對，又要印喎，加上我要做剪報，又要寄信，攪到成9:00先走得呀，唉...........又冇得出小組TIM............不過原來去到小組的人不同，姊妹得大妹姐、敏萍組、慧英同月香咋......個個都好忙掛........

我返到屋企已經係10:00啦..........野都唔想食......沖完涼就訓LU.........實在太眼訓啦........

>>October 10, 2003 at 7:14:03 AM GMT+8

2003 年 10 月 8 日 星期三 【晴】

尋日一早去左靈修team，當我去的小巴站的時候，又係冇人喎，攪到我唔知點好，不過等左一陣就見到慧珊啦...佢話佢打唔到比恩儀喎,,,不過我都係打唔到，唔知佢係咪放唔好個電話呢?跟住因為雅婷病了，我估佢唔到啦，所以最後我同慧珊一齊搭的士走lu.....去的公園的時候，見到媚媚一個，心裡其實好寶貴每個姊妹願意一早去親近主，可以有時佢地會傾計啦，有時會好似未訓醒啦，有時佢地會去左打千秋啦，但係最緊要係佢地有個願意出的心先啦!!!見到雅婷病了呀，冇乜精神咁...真係辛苦啦!!願主醫治佢啦!!

工作量也不算太多，但因為又要預備周年大會的文件，又要做野lu....大一堆信要出，不停打字打字，個腦都唔想諗野呀...因為太眼訓啦，電話永遠都不停響，好似一個接線生咁，今日亞paul都有返工呀...因為佢驚做唔晒d野呀..還有佢做埋下星期一咋.....終於佢找到工作lu，都唔知祝唔祝福佢好，佢走左﹐我地好多野都攪唔諗架，新果個又剛剛跟喎，死啦，自己做埋就仲死tim，睇下星期可唔可以同佢farewell啦，佢真係好好人架，又肯幫我地手，新果個都唔知點tim?

晚上去了尖沙咀安靜，心好想親近主呀，雖然放工放8:00，去到已經好夜，但都去行一陣囉，跟住行了一陣便回家lu，因為太攰啦，好想訓覺呀。

>>October 9, 2003 at 1:31:10 AM GMT+8

2003 年 10 月 7 日 星期二 【晴】

尋日可以叫做冇乜特別野做....好開心又一日啦啦!!!!

中午時分，約左公司附近2個秘書一齊去飲茶呀..我都係第一次去酒樓飲茶當午餐咋...因為太貴同冇時間囉...今次係因為會長個秘書辭職唔做lu...所以咪約埋一齊去farewell囉...不過佢因為去北京果件事，同亞may唔啱feel...所以冇約到亞may呀...仲要靜靜雞咁去tim呀...最後3個人食左百幾蚊...都OK啦...最好就係另外一個秘書比錢..我唔洗比呀...哈哈....

晚上的時候我去祈禱會...彷彿已經好長時間冇出祈禱會，心裡有一想望，就係主同我講話，好寶貴同感謝神，雖然環境一樣(都係咁凍)，但我心確實體會主好大同在。我到大牛的時候，其實已經開始了，但當聽到永生的分享時，我心裡好應同他所說的話﹕做人要有夢想，在主內要大心志同想望，主真係會返來的，主真係要我地完成教會，如果做人冇夢想，過每一日的生活都係白過，時間就一日一日咁過左去，永生講佢已經38歲，19歲的時候出外事奉主，有一種為主沖的感動，那一刻我回想我自己，我曾幾何時，都有一種為主去的感動，無論去台灣的日子、去馬來西亞的日子，心裡真覺得那段時間沒有白過，主好大同在及感動我心，雖然有難處，但靠著那愛我的主凡事都可經過，但返過來現今的生活，好似每日都係為工作而工作，為生活而糊口，為錢而去計算，好似失落左主內的夢想，好似好多事都靠自己去過。那一刻彷彿主同講﹕要在主內計算花費、主必會帶領你。

有時自己都幾睇自己的果效同成績，而決定自己的位置同價值，但好寶貴主不是睇果d而決定我lee個人有幾好，寶貴我地每個都有不同的位置同價值，同樣主不是要一個工人，而是要個孩子的心，寶貴主睇得起我，我可以放心全人倚靠主。

在聚會中，唱到願你裂天而降時，心好想求主開我心眼，使我明白祂那份測不透的豐富，進入祂那長闊高深的愛中，暢飲在祂愛河內，心靈得著更新而變化，全心全人愛神........好勁咁好似..... 盼望一齊進步吧......!!!!

>>October 8, 2003 at 9:37:40 AM GMT+8

2003 年 10 月 6 日 星期一 【晴】

尋日地鐵有意外呀!!!!一早起身(好難得架)咁咪諗住早d出門口囉....點知當地鐵去到牛頭角時，叫晒d人落車話架車要反廠喎，落車的時候咁啱比我撞到慧英喎...(真係感謝主呀)...跟住咪諗住再上車囉...點知當架車去到九龍灣時...車又唔開、門又唔關，跟住個司機不停講播但係都唔知佢講乜喎..因為太細聲啦....攪到我同慧英係架車度好無奈...落車又唔係...等又唔係喎....果時已經係8:50啦....激死人...原本諗住早返...點知變左遲到tim.......最後我地見架車d人大部份都落左車..我地咪一齊落車囉...去坐的士返公司...諗諗下...應該係慧英感謝主使啱..佢撞到我..我比的士錢喎..不過我都係claim公司姐...因為交通意外嘛....kaka....最後攪到我要9:20先返到公司...下次都係唔好咁早.....哈哈....

下午時候..亞may已經去了開會...又係得我一個係公司...唔洗做...發達.......不過都係有幾份文件要打囉,....跟住夜晚去左九龍灣同大妹姐食飯...傾下計....我諗我都比較少講自己d野...盼望能夠自性情上更多進步....我都歡喜同大妹姐傾計的時候.....佢會解我同幫到我好多問題..好開心身邊有咁多b/s照顧同幫助我成長.....回到家都好夜lu.....都係一撻落床就訓lu...zzzzzzz

>>October 7, 2003 at 1:29:12 AM GMT+8

2003 年 10 月 5 日 星期日 【晴】

今日又到6號啦...回想之前的2日，確實發生了很多事呀....

首先3/10原本是去流浪足球會的party，但卻發生了一件事，令整個氣氛都轉變晒: 隊長張耀麟(阿乸)因車禍而過身，新聞都有報導到的，發生時間在當日的凌晨時分，佢駕車坐人去屯門時，可能因為太疲倦同埋飲酒，而撞上燈柱，全車撞到接埋一齊，佢就咁離我地而去，佢份人都好好架，又有禮貌，佢對我都好好，再加上太太有bb呀...8個月大，我覺得好慘呀...果日個party個個好唔開心，d球員又冇晒mood，唔想講野，最後大家一齊為阿乸點哀。流浪會最後開大會商量佢的身後事。這件事我感受人生的生死真的不在我們掌握當中，惟有信主才能對將來有盼望及把握，雖然個個都話佢好人，好先生，但最終的決定都在神手中，如果一個人唔信最終的結局都是如此，好感謝神使我有機會信佢同有生命氣息到而家啦。!!!

另到到4/10啦....原本果日係假期，但係因為要參加步行日及踩單車，所以都係要一早起身，又係咁早囉....所以等於冇放假，仲攰到死咁tim呀....果日約了9:30沙田等，去到都已經10:30lu...我地只不過圍住城門河行一個圈...行遠之後去西田食野...跟住就去踩單車...對上一次踩已經係6的事...今次踩真係好多人呀....超多個隻呀....途中又見到不少人發生意外..有個仲流晒血tim呀..好恐怖呀...所以我都為大家禱告....免生意外啦....起初...我都驚呀..因為又好似唔多記得tim...不過好彩我都唔係好似柏航咁冇記性...佢就真係好誇呀...攪到手震晒...聽講連"樓"到挎唔到tim呀....真攪笑呀...另外就係瑩芬啦...佢原本真係學識踩冇幾耐...見佢踩單車呀,,,,真係驚呀...原本想轉2人車...但係又冇喎,,,,攪到佢要踩足全日...真係辛苦佢啦...不過佢都好比心機架啦...當中又見到不少b/s幫佢啦...真係為有此經歷才能建立手足之情呀...真係要身處其中才能體會及感受到呀...果日最後我地去了pizza hut食晚飯...原本諗住去食日本嘢..但係太貴啦....下次先去啦...不過都好開心呀...秀芳都有到呀....我想都係第一次同班妹一齊夜晚去食野咋(有瑩芬、妍妍、倩惠，倩惠細路、碧茹).....不過大家都好開心...不過果晚真係辛苦呀..因為隻腳太攰啦...又找2個公仔墊住2隻腳先訓到...但係第2日又冇上次咁攰囉.....可能踩得短時間掛......

5/10..又要早起，因為係大牛親近主同禱告呀嘛....不過實在太攰啦....攪到我個腦都轉唔到，又諗唔到野...但係果日好好呀...我個組有麗香、倩惠同碧茹，我想佢地諗下自己失落了什麼、有什麼需要更新，因我自己本人都覺得有好多地方需要更新同變化。我揀了羅馬書第8章，其中一段來看，雖然睇的時間不多，但每個都有感動同激勵，我真覺主真係活生生可以經歷同佢好妙架...因為我原本想講點樣分配時間喎,,,但我又冇時間同佢地講(因為要禱告呀嘛)，點知係禱告時，大妹姐分享信息時就係咁啱講lee d喎....嘩...真係可以証明有神呀....

>>October 6, 2003 at 3:54:57 AM GMT+8

2003 年 10 月 2 日 星期四 【晴】

講起寫日記，唔知係咪一定要果日夜晚先寫架呢?我就慣咗係第2日早上寫..因為時間多d呀嘛...會唔會好怪呢?....算啦...冇所謂啦...都係想寫下d感受姐...

今日睇到秀芳的e-mail，說真一句，我會唔捨得d人一個一個走架，我此終都好怕陌生人(不是唔識只不過唔太熟姐)，尋日中午係公司安靜的時候，我心裡有個體會，我都需要更新(心靈)，果日星期日當叫到信主9年的b/s企起身時，心裡突然有個感覺，原來的信主已9年啦....但仲好似白白痴痴咁...乜都唔識，聖經又唔熟，好唔諗呀......果刻心裡好想有更新，特別事奉上，親近主上，我發覺好似有d人陳舊咗，好想主同我講話呀...其實之前有一日我去淺水灣安靜的時候，心裡都有一渴求，就係睇見主想我lee個人點呀...返工返工，事奉事奉，究竟主想我點呢?我諗我都係要再多去親近主先得。

不過我相信，誰人有願作的心必蒙神的悅納。盼望主不斷開我心靈眼睛，使我明白神更加多。尋日雅婷病咗呀....我都有為佢同美鳳媽媽禱告。願主醫治她們啦....不過最開心係雅婷打電話比我呀...我好想得著團裡面每個妹妹，惟有多表達，多關心她們才能使她們感受到姊妹之情。

今晚要去食飯呀...不過其實唔係好想去...因為今晚係流浪足球隊的周年大會，去到又要做，又要同班唔熟的人一齊，好悶架嘛...都係睇下點先算，可能唔去返屋企，天日係假期呀...好開心呀..不過都係要一早起身，因為天日係步行日，下午去踩單車，跟住去食飯，又一日，好忙tim呀...不過可以建立關係同感情的時候，願主使我在愛中建立自己同b/s的愛吧!!!

>>October 3, 2003 at 1:46:59 AM GMT+8

2003 年 10 月 1 日 星期三 【晴】

今日是10月2日，剛剛去完靈修team，開頭去的小巴站只有我一人，我仲估佢地唔記得又或者唔知醒啦，所以我諗咗好耐究竟去唔去好，最後我打咗比慧英，佢話佢都唔知有冇人到，最後我都決定去啦，原來坐的士只要24蚊咋.....以前比人蝦tim.....最後都有4人嚟咗...都好d啦....

尋日我地一班同工去咗睇煙花呀...開頭我驚好多人，去到又真係好多人喎..不過感謝主呀...我地企個位置原來都幾好架...好大...好靚架....下次一定要再去先...

>>October 2, 2003 at 1:03:59 AM GMT+8