2003 年 12 月 25 日 星期四 【晴】

祝各位聖誕快樂、新年進步、每日都過得開開心心!!

這幾日我地家族去wild camp，由24-26號，起初諗住我會好疲倦，但感謝主，我夜晚可以訓到，但其實我去親camp都可以訓到，因為我無論何處都可以訓覺的，哈哈。

我地的目的地係鶴藪，原本是去流水響的，但後來我地都係改變主意，因為地方大，最緊要係近廁所囉。我同慧英、志健因為可以早放，所以24號晚我地早入去，雖然話早，但係因為去粉嶺又要不停買不同的食物，所以最後入到去都已經大約8:00lu。雅婷打比我叫我快d喎，我起初以為佢真係咁關心我，但係原來係大妹姐話我地唔入到去，佢都只可以燒3樣野食同埋要15分鐘食一條腸喎，我先知原來係咁。

但因為有其他弟兄遲入，佢地自己走左去食飯先入，所以我地有好多野食燒，但係我地係粉嶺因為太肚餓，所以3個人瓜分左一個大麵包，所以都好飽，當班弟兄入黎後，佢地又燒野食喎，唔係因為佢地唔飽，係因為佢地話佢地冇野做喎。真攪笑。

但係果晚有一件攪笑事，就係瑩芬再一次跌了佢(重要野)，跟住我地幫佢周圍找都找不到，但係比富榮拾到喎，佢仲開左個袋來看，一看之後嘩了出來，跟住佢交左比大妹姐，話都唔知邊解又係佢眼到，因為話說上一次美鳳同志華結婚的那一日，又係瑩芬跌，又係咁啱比富榮見到。夜晚訓覺的時候，富榮又話自己訓唔著，要月香講故仔佢聽喎，月香又聽佢話，講左個3隻小豬的故事，跟住比妹姐話你仲細呀，F5啦，仲要講故仔。

果晚我同慧英、瑩芬、倩惠一齊訓一個營，但係因為個營係a字型，實在太凍啦，我全晚都叫可以訓得ok啦，但係因為太凍啦，所以訓得麻麻地。但係係晚上我同慧英都有傾下計，因為我覺得我少機會同佢傾計，同埋都想支持佢架，因為佢果團d同工都好忙，實在各有各忙，我都好想同慧英能夠多禱告多相交。

>>December 26, 2003 at 11:06:42 AM GMT+8

2003 年 12 月 23 日 星期二 【晴】

尋晚有出到祈禱會，我起初以為我好耐冇出，原來已經用到新科技，即時傳播，好似睇現場咁呀，不過原來係今次先係第一次試姐。

雖然我早走，因為我去camp d野未收拾好，又有好多野未買，又肚餓喎，所以我和碧茹走先。但係係聚會度，志光講到有什麼難阻我這個人去完成神在我身上的任務/使命呢，我記得就有以下一dd。

1. 被其他事吸引
2. 對b/s有陰影或有受到傷害
3. 自己的理想高過主

自己好深刻志光講人越大，想的野會越多，好多時會為將來而計劃，或者因為將來而自已去煩惱，從而使自己在現今的光境中感到不安，或者會做好多野去確保將來的生活能過得好。簡單一句，就係忘記主在我身上的旨意同使命。

講真我份人就真係冇乜理想，簡單過生活就可以，餵得飽我就ok，但係會被其他事吸引，因為其他事而忽略主，主究竟想我這個人點樣呢?真係要慢慢思想下。

晚上自己在床上的時候，都有思想主在身上的恩典，因為一年又過了。又想到我怎樣回應主呢?

>>December 24, 2003 at 2:34:26 AM GMT+8

2003 年 12 月 22 日 星期一 【晴】

轉眼間又到聖誕啦，又到聖誕，又到聖誕.........

時間真係過得好快呀，話咁快d時間就過左去，回想自己轉lee份工都有差不多9個多月，點解我計得咁清楚，因為.................我出雙糧啦..............哈哈，真令人開心的時候呀。

尋晚雖然係要回家做冬，但係冇得早走，因為尋晚係新一年度的例會，仲要係個會度開，d老闆都齊晒，惟獨欠藍眼睛的老闆，藍眼睛係我叫佢架咋，因為佢實在太麻煩，次次都要提佢提老闆，都唔知係佢係秘書還是我係佢秘書，尋晚都係一樣，話明4:00開，又話我冇提佢，又話佢唔知，但係佢填埋form比我架啦，都話唔知，又話咁又話咁，我叫佢那那林打比老闆囉，最後佢都有到，不過遲到囉，但係我地開會如果遲到要罰500蚊，佢又話佢唔知，最後會長都話要罰佢，攪到佢黑口黑面咁呀。

開完會後，大家係度睇番就職典禮的相，當d老闆走晒之後會長秘書同亞姐鬧交呀，因為佢話個攝影師冇跟住會長影相喎，又話佢派少人去影相，但係我同亞姐都冇聽過佢講明要派一個人跟住會長喎，咁大家咪係度爭論囉，會長秘書最後好大聲冇面比咁講我忙都有顧你地啦，你地都唔知點攪ge，跟住就自己開門走左lu，我冇理佢地呀，我一味係度收拾d野呀，最後亞姐好無奈話洗唔洗呀，大家都係同事，我唔係佢下屬喎，唔通叫我殺左個攝影師咩。

之後我都走lu，我回到家都差不多8:30，係有史以來最早的一日，電視劇轉晒，唔知，做緊乜，唔知，最開心都係同屋企一齊食飯。尋晚原本諗住整下去camp d野，但係最後我都去訓覺lu，因為好疲倦啦，惟有今晚整啦。

這幾日，我睇聖經，睇番我最鍾意的以弗所書，心裡好想一睇再睇，求主使我睇見祂的恩召有何等指望，祂在聖徒中得的基業，有何等豐盛的榮耀，並知道祂向我們這信的人所顯的能力，有何等浩大。

我好期望有一日我能親眼見主，雖然我唔算得事奉的能手，雖然我唔係d乜偉人，但主稱我為祂的佳偶，在荊棘裡的百合花，祂的完全人。雖然今年有好多事同物都轉變，惟有主對我個人的愛永遠都不改變。

我越來越歡喜去跟隨主，但係我同樣求主使我知道祂心意，不是活在自己生活中，我近期發現可能我忙碌的日子少打電話比b/s，我而家都少左，我渴望自己比以前更熱心去愛主同更愛身邊的b/s。

>>December 23, 2003 at 2:01:11 AM GMT+8

2003 年 12 月 18 日 星期四 【晴】

尋晚終於我的大日子到了。這幾晚真的好像沒有訓過一樣，每晚回到家已經2:00多，訓醒又起身，起身又出門口。

尋日一早就回到公司啦，因為亞姐一早就要出去攪個洽談會，之後亞tim到我車野走，食完飯後就開始工作啦，攪禮物啦，紙袋啦，講起紙袋呀，冇那那被個秘書話我地冇協調喎，一時又話放書，一時又話放公仔，死都要我地將d野放晒係枱面先做喎，大佬d書好重架，又話咁樣唔點喎，又話咁樣做法係冇經驗喎，我都費時理佢呀，跟住叫做禮品枱d野，佢又話冇人同佢講過喎，我咪冇叫佢囉，全晚佢自己坐係度食野，我由佢囉。

rundown方面，其實都好啦，但係會長秘書又話我地冇講過佢成日轉喎，攪到佢都亂，重話下次唔跟tim喎，唉，明明上次開會時已經提到的啦嘛，又話我地冇講，真激死呀。

尋晚的節目實在太多啦。由7:00準時開始，由聖約翰銀樂隊開始奏樂，帶領唐英年進場，原本都好好地的，但係另外一個嘉賓原本話佢8:20到，但係臨時改到9:20先到喎，我地惟有不停轉節目，轉到酒店都怕怕，協會授証完到太太團表演後，之到基金會授証，然後到青委會授証，跟住到抽獎，然後到張明敏表演，再抽獎先完全晚節目，完的時候已經係11:30，跟住先收野走。

我由中午12:00食過午餐後一路去到凌晨12:00都冇食過野，只係飲左3杯水咁多，廁所只係去過一次，真係耐力賽咁呀，亞姐同我一樣都係不停叫人，不停做，不停走。真辛苦。

不過好感恩係我原先話周街去找的那本會議簿，最終係找台灣那邊的商會幫我地買，佢地好好人架，又可以說笑，最好係唔收我地錢tim呀，一次買4本比我地，好靚架，絨布質地有金邊。

之後我地3個秘書去左附近的茶餐廳食野，我都冇試過12:00夜晚去食野，之後才回家沖涼，訓的時候，時間已經係2:00啦。

今朝一早又要接待內蒙古d人，又要一早起身。真的叫命呀。希望之後會好過d啦。

>>December 19, 2003 at 11:16:53 AM GMT+8

2003 年 12 月 16 日 星期二 【晴】

我親今朝有d時間，又寫下日記啦，時間又過左一日啦，好似冇訓過咁呀，今朝訓到8:30先起身呀，因為實在太眼訓啦，我真係需要放一日假期去訓呀，但係最殘酷係19號一早又要開會呀，仲要係接待國內團體tim，超眼訓又要拾下個會議室喎，而家個會議室好似個貨倉咁呀，好亂呀，天晚實攪到成1點先走得，19號又要一早爬起身喎，實攞命呀。

我尋晚回到家個個都訓左lu，但阿媽已幫我熨好衫tim，佢以為我今日著呀，今朝叫我的時候佢話我知的，真係好啦阿媽。

>>December 17, 2003 at 4:00:13 AM GMT+8

2003 年 12 月 15 日 星期一 【晴】

話咁快時間就去到16號啦，但係我仲有好多野都未做好喎，雖然如此，但係我有平安如江河，我有平安如江河，我有平安如江河在我心..............

話雖如此，但係我今日真有d激氣呀，因為幫我book酒店的那間agent一定要我今日bank in cheque比佢喎，我都唔知去邊度找1萬多元比佢呀，我話要找老闆簽名啦，佢又話唔等得，叫我即刻去喎，我去邊度找老闆cheque比佢呀，同佢理論完一論之後，佢又叫我bank in 5000比佢啦，咁好啦，bank in 左佢又叫我天日又bank in喎，佢都唔知係咪得閒得濟呀，我咪同佢講，唔洗咁呀，我一定要房架啦，佢又話佢公司冇錢架，唔係大公司呀，萬幾蚊都擺唔到架，大佬，咁就唔好同我講叫我比5000訂金啦，玩咩。

最後，我同亞姐商量完後，佢天日比左個尾數先，跟住會比番佢囉，我唔會再幫親佢呀。

星期日終於我去咗整個頭呀，今次係我第一次整曲髮咋，可能睇唔慣啦，我覺得怪怪咁，今朝開會的時候，d秘書話我個頭好得意喎，但係我都唔知咩叫得意，佢地話ok啦，但係麻煩就係我要每日gel頭囉。唔知大家點睇呢，但係我都未比大家睇過，因為我又開始過著與世隔絕的日子。連我阿媽都冇見過我呀，我仲要叫佢幫我去取衫tim呀，真有點不好意思，但我真係冇時間呀，由9:00坐到9:00都係公司tim，尋晚仲勁呀，時間不等於一切ge，最緊要係做好一切野。

今朝因為要開會，所以8:30要返到公司啦，真係非人生活呀，今日我算勁啦，因為我下午的時候，由長沙灣行到去深水步就係要找本靚d架會議簿呀，因為18要用囉，d老闆就好口響咁話要本好似d人簽約的簿喎，咁我就通街去找囉，平時冇行過的地方今次一過行晒，仲要行到去深水步。嘩...........真係勁呀，我都唔知原來我可以行得咁快同埋行到去咁遠喎。

今日個咀又生飛滋啦，又係4粒，唉.............都唔知點攪ge。但係今次唔同啦，我有敏萍姐的維他命c，又有麗香的藥膏，應該點啦掛，但係今晚亞姐叫外賣........係KFC，哈哈........以毒政毒。

>>December 16, 2003 at 1:49:40 PM GMT+8

2003 年 12 月 12 日 星期五 【晴】

今日好疲倦呀，唔知點解呢，今朝一開眼就已經係8:15啦，嘩..........嚇得我呀，回到公司差唔多9:30啦，但係都係好疲倦，可能尋晚成晚都發夢掛。

今日攪埋d麻煩野先，因為原本訂左酒店比d嘉賓住，但係冇那那話我未同間agent傾實，又話又比全數喎，攪到扎扎跳呀，因為咁樣計法會好貴架嘛，另外就係我要找2個老闆幫我係支票度簽名架嘛，我都唔知去邊度找呀。

今日真係好似發緊夢咁呀。.......................希望下午會好d啦。

>>December 13, 2003 at 4:27:26 AM GMT+8

2003 年 12 月 11 日 星期四 【晴】

今日基本上又係得我一個咋，因為今日下午亞姐要去睇場地，原本約3:00，但係佢又要去會長果邊同個秘書夾d嘉賓坐位，所以12:00就走lu。下午的時候，會長個親戚又話有事要走先喎，所以我一個睇晒全間公司，哈哈，威啦。不過係忙到抽筋呀，因為又要出通告，又要聽電話，又要出fax喎，嘩....不過我好快手就做好啦，可能我真係打字打得快掛，美鳳話我我打字嚇到佢有心臟病喎，仲快過講野喎，可能真係架，因為我可以一路諗一路打字架，下次有機會的時候表現下比大家睇啦。

下午的時候，因為我有帶第8-9冊的cd，所以我係公司播黎聽囉，好正呀，有多歌第1次聽的時候，好似麻麻地，但聽多幾次又會覺得好好聽架。我覺得我雖然忙碌，但主都好識得令我開心，又會使我忙裡偷閒。另外一樣事，就係敏萍姐找到工作啦，雖然係做1個月，但係我覺得主真係聽左我地為姊妹的禱告，在她有需要的時候，為她預備。真係大件大事呀。

雖然日子好似仲有幾日，但係我冇上次咁大壓力喎，尋晚差唔多11:30先走，但係今日睇聖經的時候有精神喎，祂確實能顯出恩待我的憑據。因為那位主係奇妙的策士，是奇妙的主，是和平的君，是全能的神。哈利路亞。

>>December 12, 2003 at 10:55:48 AM GMT+8

2003 年 12 月 10 日 星期三 【晴】

今日好勁呀，一返到去就開始做野啦，因為尋日亞姐對稿對了8:30先走，所以佢冇返公司做野，今朝返到去我枱面就已經有好野要做lu。

今日我忙左一朝早，又係打電話比d會員時候啦，因為18號晚實在太多人啦，而家成60圍啦，我都冇位坐tim呀，都唔知點攪架，又不停請人黎喎，果日一早就要出門口tim呀，都唔知有冇得訓呀。

>>December 12, 2003 at 1:14:42 AM GMT+8

2003 年 12 月 10 日 星期三 【晴】

尋日基本上係得我一個人係公司咋，因為亞姐10:00幾就去左香港仔對稿，原本係1-2個鐘就可以回來的啦，不過去到的時候，原來對方未出齊d稿，所以每只可以對到10幾張，但係我地有150頁喎，所以亞姐中午的時候打電話回來話佢應該不會返公司啦，嘩.............即刻感謝主，因為我想早d走呀，但係我覺得是沒有可能的事，尋日終於可以早d走啦，大約7:30啦。

跟住去左尖沙咀九龍公園安靜，唱下歌比主聽，禱告下，我心裡覺得好開心呀，主真係沒有按我們的過犯去對待我們，我禱告的時候，覺得主特別向我講話，同樣我都有同自己講信息，我今日是那位創天造地神的兒女，同樣能夠活得豐盛同榮耀。哈哈，我的內心可以一天新似一天，因為主與我同在，同樣，今日我能與主同渡每一天。

回到家的時候，我終於可以聽我買回來的cd啦，第8-9冊的cd呀，星期日已買都沒有時間聽，尋晚終於可以聽啦，好多歌都好似好好聽，要慢慢學下先。如果有時間的話，哈哈。

>>December 11, 2003 at 1:40:01 AM GMT+8