2004 年 1 月 4 日 星期日 【晴】

苦的滋味

近期彷彿聽到身邊的b/s覺得自己在過去的一年過得辛苦同艱難，最放在我心的是有一b/s講佢覺得2003係最苦的一年。

令我回想，究竟苦的滋味會是如何?

人的味蕾有甜、酸、苦、辣，我想當中最不受歡迎的係苦的味道，因為是沒有其他食物能解苦的味道。人點解會怕食藥呢?因為藥也是苦的，人心點解不喜歡苦悶，因為苦悶的感覺是由內心發出，那種孤單的感覺、那份寂寞的感覺，我想真是沒有人歡喜去領受。

但我又發現，如果一個人沒有嘗過苦的滋味，他也無法明白究竟甘甜的味道是如何美好。當你翻查聖經的時候，會發覺原來聖經中有苦字的章節是遠遠多於甜字的章節﹕

既是兒女、便是後嗣、就是　神的後嗣、和基督同作後嗣．如果我們和他一同受苦、也必和他一同得榮耀。
誰能使我們與基督的愛隔絕呢．難道是患難麼、是困苦麼、是逼迫麼、是饑餓麼、是赤身露體麼、是危險麼、是刀劍麼。
所以我親愛的弟兄們、你們務要堅固不可搖動、常常竭力多作主工、因為知道你們的勞苦、在主裏面不是徒然的。
我們這至暫至輕的苦楚、要為我們成就極重無比永遠的榮耀。
那賜諸般恩典的　神、曾在基督裏召你們、得享他永遠的榮耀、等你們暫受苦難之後、必要親自成全你們、堅固你們、賜力量給你們。
你們蒙召原是為此．因基督也為你們受過苦、給你們留下榜樣、叫你們跟隨他的腳蹤行．
倒要歡喜．因為你們是與基督一同受苦、使你們在他榮耀顯現的時候、也可以歡喜快樂。

但當你看完以上聖經的時候，你會回心微笑，因為雖然當中真是出現苦字，但係卻能令你心裡重新有力量，因為我們在世，雖然經過苦難，但寶貴有神與我們同在。2003是已經過去的一年，2004是更榮耀的一年，雨後必有彩虹為你張顯!!!努力吧，每一位b/s，特別送給仍在磨爛當中及艱難中的你。

>>January 5, 2004 at 6:01:35 AM GMT+8

2004 年 1 月 3 日 星期六 【晴】

沒有大妹姐的一日

今朝我鬧鐘沒有電呀，當我仲以為8:00的時候，其實已經係8:30lu，好彩都係冇遲到去聚會，但因為果病好似都係未好得番，個人都係病病地。所以由親近主去到聚會，個人都係好疲倦，我地團等下等下人都已經11:00lu，所以最後睇聖經的時間唔係太多，另外今日聚會大妹姐沒有到，因為佢要開工，所以我地幾個一手包辦d聚會。

今日領詩的時候，曉琳不停叫壞蛋英、壞蛋英，起初我都冇圍意，但係有個妹妹問點解佢不停叫壞蛋的時候，我才發覺，玩遊戲的時候又攪笑，要出動4個人幫佢地手，但係最攪笑都係柏航講的信息，佢講得比較深d，又成日講咩膽機，咩(馬嬲met)，又成日講18世紀d人，好似國柱咁不停以前d偉人，攪到d妹都唔知佢講乜，但其實我地今次的題目係祈禱咋喎..................佢定的題目仲攪笑﹕你們當誰......呢?............真係9唔搭8呀..............

下午分團，我地同工相聚，每個都有相交自己心靈的得著及感恩的事。我面前立心志係再一次認真去親近主，無論何時、何地，在何竟況。

>>January 5, 2004 at 5:31:26 AM GMT+8

2004 年 1 月 2 日 星期五 【晴】

被亞媽屈買梳化

今日返到公司其實冇乜特別野攪，只需要安排d傳遞出便可以，因為舊會長將20個月曆send左過黎，叫我地幫佢出比d執委。

原本諗住可以早d走，因為亞姐係1:00就好準時咁走左，留低我同個會計，但係因為個會計有好多野未攪點，所以要等埋佢先走得，去到大牛都已經2:30lu，但去到的時候，原來又唔係好多人到左咋，因為月香去左camp，而美鳳又剛剛去完旅行，我想她都要整理下d野啦。

今日最攪笑的莫過於惠儀仔啦，佢成日都掛住食，食完個麥當勞加大餐，跟住又食雪糕，然後同你講佢唔飽，聚會後又要食，擘餅時又叫肚餓，最攪笑係，當分組祈禱的時候，佢話一句禱告一串燒賣喎，真激死人啦。最後佢真係禱告左一句，但係佢要一串50粒的燒賣。

今日終於都見到阿sir啦，因為佢去左星馬旅行，佢晒到好黑呀，好似成個look唔同晒咁，佢今次終於都有買手信比我地啦，佢話係人肉乾同狗肉乾黎架喎，真係狗到上腦呀。惠儀仔一聽到有野食，又第一時間飛到埋去，真係好快架。

原本我諗住去同大妹姐佢地去食飯，但亞媽打電話比我，叫我返去同佢去睇梳化喎，因為屋企一早都已經叫買架啦，但又未睇合心水的，亞媽又話自已冇主意，又話冇人陪佢，我原本都唔明，因為前果幾日亞爸又放假，家姐又未返學，細路又係度，咁多人咁多日都唔去睇，係要我去。最後我終於知道啦，係因為我有匯豐咭，亞媽其實一早就睇晒d款，同埋問晒價錢，個sales同佢講有匯豐咭有折喎。當我去到的時候，亞媽已經同我講佢鍾意的那一張幾多錢，送貨期要幾耐，跟住佢問我，你係咪有好多張信用咭ge，好似有匯豐呵，有折架，我果刻先知道點解亞媽要我陪佢買啦......................

不過張梳化都唔係好貴，1600咋，幾扺啦，之後亞媽請我去餐廳食扒，都幾好味架。不過我就用左塊扒換左張梳化。

>>January 5, 2004 at 5:17:08 AM GMT+8

2004 年 1 月 1 日 星期四 【晴】

話咁快就到了2004年，新年快樂啦!! 小女子在此祝各位有一個更榮耀、更快樂、更多經歷的一年。

2003年12月31日當大家都在倒數的時候，我已經訓著了。因為我的病還未好番，唉.........真要我命呀，已經冇得去玩架啦，再加上食完d藥後，我個頭都好似暈暈地咁，之後如果一訓落牀，就好似不省人事咁，一直訓。

尋日，我地家族分開去親近主，姊妹去清水灣安靜，最準時到的是我家團的姊妹，真係教導有方啦，不過係惠儀仔唔知醒囉，起初因為我覺得太辛苦啦，我想自己安靜下，但去到的時候，都覺得ok，係把聲唔係咁得姐，唱完歌之後我地就分組安靜啦，我同惠儀仔一齊，其實最多係我講野，因為佢揀左首係我阿爸(何虎山)作的歌唱喎，咁我咪講下我出外的開心野囉，其實我自己都好回味那段日子。

睇完聖經後，我買左包熱浪我地2個食，係自私的薯片，但當佢地發現後，就展開了一場搏鬥，最後包薯片只剩下個包裝袋..........................，佢地之後又玩水又玩沙，個個都濕晒，如果唔係佢地話肚餓呀，我估佢都唔想走呀。因為一小包的薯片的確係唔夠餵飽佢地架，所以我地最後去了鑽石山FOOD COURT食野LU。

去到食野的時候，又有攪笑野，當瑩芬話佢好想食炸兩的時候，我話好想食小籠包同鍋貼喎，跟住瑩芬就話"你唔好讚我啦"，我真係摸不著頭腦呀，我話我想食小籠包咋喎，但係點解會變成讚佢的說話呢?最後惠儀仔好攪笑地分析比我知，小籠包係指你好靚喎，鍋貼係指你好叻。之後，我地一群人就不停地講"你好小籠包呀"，"你真係好鍋貼呀".............仲之就係笑過不停啦。

當我地食完野之後，惠儀仔又話要食野啦，佢見到有D懷舊小食又話要食，咁我地就停係度諗住叫乜啦，惠儀仔話想食砵仔糕，因為10蚊有3樣，我問佢點解揀啦，佢話砵仔糕解得意喎，真激死啦，但係因為見到砵仔糕冇豆呀，所以最後都冇買，但係惠儀仔叫碧茹陪佢返到秀茂坪的時候去買粥食喎，真係唔知食幾多先至夠呀。

原本我係想去沙田睇D野，因為近期亞媽成日話要裝修喎，又話換傢私又話換組合櫃喎，咪諗住去睇下囉，但係因為太想去訓啦，都係那林林回家，食完藥諗住睇一陣聖經啦，但係乜都睇唔到就訓著LU。

>>January 2, 2004 at 2:35:56 AM GMT+8

2003 年 12 月 30 日 星期二 【晴】

今日病到溫溫燉燉，尋晚去左大牛附近睇醫生，可能真係唔係自己睇開，我覺得麻麻地，今朝起都起唔到身，個人暈暈地咁tim呀。

回到公司，就好似發緊夢咁呀，把聲又變晒，好慘呀。食完早餐之後又食藥，食完仲慘，好想訓呀，而家先係11:30，我已經攰到死啦，主呀，我想回家呀。

今日係12月31日啦，理應約friend去wet架嘛，點知...................我要回家同病魔戰鬥，醫生叫我唔開去玩啦，多d休息啦.................................唉................

>>December 31, 2003 at 3:52:33 AM GMT+8

2003 年 12 月 29 日 星期一 【晴】

今日病倒了。.............唔知係咪果日同她們去安靜的時候，吹風又或者被人傳染，尋晚已經開始覺得唔多舒服，但係我已經食左一個幸福傷風素架啦，點知今日起身的時候，發覺仲嚴重了。

回到公司，一時冷一時熱，一時又頭暈暈，最後原本諗住去睇醫生啦，但我已知附近乜都冇架啦，搭地鐵去美孚啦，去到的時候，點知發現d醫生全部休息，要到下午4:00先開工喎，唉..........真係命苦呀，有錢都冇得睇呀.......................

惟有捱到放工先去睇囉，今晚有祈禱會tim呀，希望有精神啦。

>>December 30, 2003 at 7:09:02 AM GMT+8

2003 年 12 月 28 日 星期日 【晴】

尋日原本係我地家族off，但係因為麗香返左香港，又好想聽佢講下野喎，所以約埋一齊去公園相交，由原本的3人，後來變成6個人，多左大妹姐、晶晶、碧凝。

去到公園後，因為係分團，所以我、敏萍姐同麗香一齊去左個好地方一齊相交。當中麗香所用的字眼同字句，十分攪笑。但係佢覺得自己比起上一年去的時候有進步，當聽見其他b/s分享的時候，又好感動，我想原來每個係主內都有不約而同的進步，無論你信主有多少歲月，只要你對肯付出，主必會大大祝福你。

另外，我地都有相交其他方面，當中包括去camp的笑話，相交聚會的感受，其他b/s的需要，當中尤以敏萍姐相交祈禱會的信息最放在心，她講到當日志明哥以一針見血地說，"我地當中最怕就係失去神的同在，有d地方雖然時代不停轉變，我地需要配合外，有些地方是我地不能改的。但無何口非，我地比起以前的時候，有些是遜色了或流失了"。

另外，他又提到，"有什麼令到我地會喊呢?就係當我地失去神的同在時，我地就應該喊"。"如果我地祈禱的時候，不知自己真係需要什麼或者唔知自己為什麼而祈禱，就應該去求問神，自己要什麼，不是習慣，不是其他人叫你祈禱就祈禱"。

令我想到我地學生的擘餅聚會，當中少了b/s的相交，當中彷彿少了神的感動，弟兄姊妹好似缺少了以往的澎湃。我不是比較，但有時候我地需要更新，不要慣了過安逸的生活。我們要活得有展望，因為我們有神在我心中。

新的一年就快來臨，盼望弟兄姊妹為了神的心意而奮鬥，再一次被從天來的異象而燃燒從而成為心裡的動力，再次對神充滿熱情同戀慕，記住教會需要你、世界需要你。

>>December 29, 2003 at 3:47:52 AM GMT+8

2003 年 12 月 25 日 星期四 【晴】

今朝起身的時候，又係被班弟兄嘈醒，佢地又要練拳喎，六叔拳喎。但係班弟兄又話比亞倫嘈醒喎，佢d鼻寒聲呀，連大佬盛都話勁過火車聲呀，但係柏航又可以同佢同一個營訓得著喎，仲勁呀。

去完camp這幾日，我地家族要開始改名啦，叫做自私的家族，全部都要叫做自私的人，因為有人用自私的營，因為碗、筷子不夠，每個人都要認住自己的那隻，全部要自私的碗，自私的筷子，我地要學習的榜樣係阿sir，因為佢早上起身的時候，話d餅好味呀，但當我地問佢想試下的時候，佢話已經食晒lu。另外，佢因為病所以早走喎，攪到我地走的時候，要攞番晒d野呀，所以佢係最自私的人，有車都唔車d野走。

另外我地又要學習的榜樣就係月香啦，佢個背囊呀，好似d人去5日4夜咁呀，佢係阿sir的相反，佢叫慷慨，因為係佢個袋度，可以乜都有的，多帶2個睡袋，早餐的時候，可以有其他罐頭供應，另外又有綠茶提供，連cook set都有，最攪笑做埋我地的營長，連係營門前的鞋怎樣放，佢都會理埋，實在冇得嘆呀。

由於我地冇車，所以走的時候，就要分2邊，一邊係返大牛洗野，一邊係去還營，由於人手有限，所以連d妹都要負責取東西走，我地找了瑩芬同倩惠取大牛的廚房組的冰箱，其實都幾重架，不過都要佢地負責下，當倩惠去攞的時候，佢話早知我就帶埋工人黎啦，真係激死呀。

去到大牛，全部人入晒廚房洗野，第一次我地2個家團長唔洗做喎，全部係班妹同d弟兄洗喎，第一次倩惠係廚房洗野咋，我地有幫佢影相，又幫雅婷影啦，佢已經有著圍裙架啦，但都攪到全身污糟晒，班弟兄啦，將一個薰黑晒的煲，變回一個新的一樣，勁呀。

最後我地去左祥榮食野之後就回家lu。

>>December 27, 2003 at 2:11:43 AM GMT+8

2003 年 12 月 25 日 星期四 【晴】

下午的時候，一齊去玩遊戲，但係我唔小心呀，玩玩下跌左去後面呀，因為有好多鐵線網呀，最後條褲就咁爛左啦，係FILA黎架，就咁報銷左啦，不過好彩大妹姐有多條褲咋，多謝大妹姐先得.....

夜晚的時候，我地有相交的聚會，一開始，我都就分組啦，問左D簡單問題，跟住就係深入一D的相交，感覺比上年好好多，因為大家心情都舒緩左，在輕鬆的心情下相交，當中有相交歡笑的、有相交哀痛的、有相交感恩的。好寶貴在神的家中，不單有吃喝玩樂的時候，還有靈裡相交的時候，還可以彼此互相扶持同代禱。當中以JOYCE的相交好放在我心，雖然面對爸爸的癌症，又要面對自己功課上的壓力，雖然如此，但佢都冇對主放棄，反而更經歷神的愛同保護，主確實將每次她眼淚都裝在皮袋裡。另外就係一班妹妹的相交，好寶貴她們一年一年的進步，真係感謝主呀。

另外就係同麗香傾電話啦，佢因為返左上大陸所以沒有同我地去camp，但我地有hand free同佢傾左一陣呀，唔可以話傾係只不過每個人講自己叫乜名咋，因為電話費實在太貴啦，跟住同佢左聖誕快樂啦，好開心每次聽到她的聲音時，都係咁開心，好雀躍的心情，同埋她的相交，確實能暢快我心，好寶貴身邊在這個難得的姊妹。

相交後，佢地又話要食消夜，實在太厲害啦，由朝食到晚到可以唔飽的，但我實在太眼訓啦就走左去訓，我地個營多左倩盈，因為我知前晚太凍啦，所以我架多左一件底衫，係保暖果隻，所以我都訓得好好。

>>December 27, 2003 at 1:36:43 AM GMT+8

2003 年 12 月 25 日 星期四 【晴】

第2朝起身的時候，已經係8:15啦，但係6:00點幾已經被電話聲嘈醒，又被d弟兄講野聲攪到冇得再訓。因為佢地又要起爐煮野食。

食完早餐後，我地去親近主，因為我地果邊d妹都唔係初信，所以分開各自安靜，其實我自己都好想自己去親近主，因為恍惚好耐冇分開親近主啦，每次都要分享同付出，今次難得有機會同時間。我叫佢地想一件感恩的事情，因為覺得一年又過了，我地不可做忘恩的人。

當我自己去安靜的時候，我唱了一首歌給主聽，第8冊36頁，係我聽詩歌學回來的﹕
神子耶穌，愛我為我捨己
真是驚天動地，粉身難報
最苦之死，寶貴之死
救罪人，勝魔鬼，榮耀父神
奇妙的愛，堅強的愛
我主我神，竟為我受死
奇妙的愛，堅強的愛
我主，我神，竟為我受死。

聖誕日子，回想主那份恩情的時候，心都會特別被感動，因為主在過去一年內真有不少恩情在我身上，無論係工作、事奉、心靈上，都有祂對我獨特的愛。回想起來，新工作已做了差不多9個月，能夠轉到新工作，實在有主的幫助，因為轉工的日子正是失業率最高的時候，人工仲可以高過舊的那份，真感恩。事奉上，其實我真係覺得有好多方面的功課要學習，分別係帶團的時候，我真欠缺智慧同聰明，但好彩我唔會成日同人比較，但係我自己有時會覺得自己麻麻地，但係每次都被主愛激勵同鼓勵。

果日親近主的時候，睇到以弗所書第2章 "當我們死在過犯中的時候，便叫我們與基督一同活過來，他又叫我們與耶穌一同復活，一同坐在天上，要將他極豐富的恩典，就是他在基督裡向我們所施的恩慈，顯明給後來的世代看，你們得救是本乎恩，也因著信，這並不是出於自己，乃是神所賜的，也不是出於行為......"

>>December 26, 2003 at 11:34:35 AM GMT+8