2004 年 2 月 1 日 星期日 【晴】

同工相聚

近期自己心裡有個負擔，就係好想每個睇見自己的位置同價值，從而係心底裡回應對的教會需要，我地不是一個個個體的生活，而係一個教會，同出於一的。

以下節錄的一段信息

「眼不能對手說：『我用不著你。』頭也不能對腳說：『我用不著你。』不但如此，身上肢體人以為軟弱的，更是不可少的。身上肢體，我們看為不體面的，越發給他加上體面；不俊美的，越發得著俊美。我們俊美的肢體，自然用不著裝飾；但神配搭這身子，把加倍的體面給那有缺欠的肢體，免得身上分門別類，總要肢體彼此相顧。」（林前十二21-25）

「我用不著你」就是「我不需要你」的意思，但這是否事實呢？當然不是。每位弟兄姊妹在教會中都有自己重大的作用和重要的崗位，重要是我們學習配搭，正如保羅說：「神配搭這身子。」

信主越久，我們就當越謙卑，更學會與弟兄姊妹配搭，這是我們事奉得喜樂與否的關鍵。有些弟兄姊妹起初很熱心事奉主，但後來漸漸冷淡、退縮，問題之一往往就是與弟兄姊妹的配搭出現難處，例如個性太強。我們實在需要謙卑，學習配搭。

什麼是身上特別軟弱的肢體呢？眼睛。眼睛非常軟弱，容易受傷，需要特別的保護；眼睛本身也沒有力量可以抬起或移動任何物件，與手腳不同，但眼睛卻非常重要，不可缺少。即使你以為自己是一個軟弱、沒有甚麼力氣、容易受傷的肢體，但神以你為不可缺少的一份子。
什麼是「不體面」的肢體呢？內臟。不體面就是不光采，不能給人觀賞的。內臟本身不美觀，卻非常重要，是身體不可或缺的部份。

什麼是「不俊美」的肢體呢？疤痕或染病的皮膚。臉部有疤痕，人總想辦法妝飾那不俊美的部份。體面的肢體不需加上其他東西，卻要給不體面的肢體加上體面。在教會中，有人或以為某些弟兄姊妹不可愛，神卻要越發使他們可愛，為的是叫我們彼此相顧。

神給我們不同的恩賜，是叫我們一起配搭，互相幫助，建立基督的身體。沒有配搭，就不是主所喜悅的事奉。「一腳踢」、「一手包辦」的人雖然忠心勞苦，但不是主所要的事奉方式。教會不是倚賴屬靈強人去維生，乃是各肢體彼此盡職，發揮功用，在愛中建立自己。

尋日當分祈禱會完分組的時候，我為寶瑩的艱難流淚為她禱告，我係覺得如果我早d知道就可以為她多禱告，為著她遇到的，我好痛心。我實在不是不信神比她的經歷，而是覺得如果我可以早d知就可以再早d為她祈禱，同樣，我都為著惠儀仔的艱難係禱告裡為她記念，我想我們是一家人，當一個肢體有困難，其他肢體都為她而擔心。

係相聚裡，我特別感受教會要係一條心，如果大家都係各顧各的需要，不理會別人的感受時，我想這個家不美麗，但如今常存的有信、有望、有愛，其中最大的是愛。我想愛真能包容、愛真能使人謙卑、愛真能使人無條件的付出，不望回報，如果47粒燒賣可以使惠儀仔對主的愛有信心，不致動搖，我買又何況呢。

我特別係相聚裡提到對聚會的觀念，我地星期日約10:00親近主，我請求大家10:00就到，前一晚早d訓，唔好到的時候，好似想死一樣的面貌。我地星期六約1:15親近主，就希望大家來到係親近主唔係去食飯，或者攪黎攪去，都未開始，這會末殺對其他早到或者想親近主的姊妹的渴求。

因為時間不多了，還有一點點時候，主就回來了，人子正在門口了。我想對大家的不是命令，我是出於愛心的提醒，我也有同碧茹傾計，因為我真想佢好，我真想使她明白團的需要，對佢我大有想望，是可造之材。我盼望大家一同同心同工，建造教會。

>>February 2, 2004 at 2:27:35 AM GMT+8

2004 年 1 月 29 日 星期四 【晴】

合神心意的大衛

17:34 大衛對掃羅說、你僕人為父親放羊．有時來了獅子、有時來了熊、從群中啣一隻羊羔去。
17:35 我就追趕他、擊打他、將羊羔從他口中救出來．他起來要害我、我就揪著他的鬍子、將他打死。
17:37 大衛又說、耶和華救我脫離獅子和熊的爪、也必救我脫離這非利士人的手。掃羅對大衛說、你可以去吧．耶和華必與你同在。
17:38 掃羅就把自己的戰衣給大衛穿上、將銅盔給他戴上、又給他穿上鎧甲。
17:39 大衛把刀跨在戰衣外、試試能走不能走．因為素來沒有穿慣、就對掃羅說、我穿戴這些不能走．因為素來沒有穿慣。於是摘脫了。
17:40 他手中拿杖、又在溪中挑選了五塊光滑石子、放在袋裏、就是牧人帶的囊裏．手中拿著甩石的機弦、就去迎那非利士人。
17:41 非利士人也漸漸的迎著大衛來．拿盾牌的走在前頭。
17:42 非利士人觀看、見了大衛、就藐視他．因為他年輕、面色光紅、容貌俊美。
17:45 大衛對非利士人說、你來攻擊我、是靠著刀槍和銅戟．我來攻擊你、是靠著萬軍之耶和華的名、就是你所怒罵帶領以色列軍隊的　神。
17:46 今日耶和華必將你交在我手裏．我必殺你、斬你的頭．又將非利士軍兵的屍首、給空中的飛鳥地上的野獸吃．使普天下的人都知道以色列中有　神．
17:47 又使這眾人知道耶和華使人得勝、不是用刀用槍．因為爭戰的勝敗全在乎耶和華．他必將你們交在我們手裏。
17:49 大衛用手從囊中掏出一塊石子來、用機弦甩去、打中非利士人的額．石子進入額內、他就仆倒、面伏於地。
17:50 這樣、大衛用機弦甩石、勝了那非利士人、打死他．大衛手中卻沒有刀。

詩歌都有得唱啦﹕大衛有娥卵石............，大衛就係憑著一塊石頭就能擊打有刀劍的非利士人，今日同樣憑著愛我地的主，我地凡事都能作。

>>January 31, 2004 at 2:40:07 AM GMT+8

2004 年 1 月 27 日 星期二 【乍雨乍晴】

終於去左冬季嘉年華

星期二的時候，我地小組去左冬季嘉年華度玩，因為我中唔到公仔呀，好想嬴返一個回家，同埋又應承左d妹一齊去，所以果日上午去了中環親近主，然後去玩。原本果朝早我覺得好似有d唔舒服，好想休息下，但當我掙扎的時候，想起一早應承左佢地去又唔去唔係咁好的，所以最後都是去了，但我去的時候，我好想主比一份禮物喎，點知主真係比左。因為當亞姐明明講好年初七返公司一齊執下個會議室同埋d紀念品的，但果日下午亞姐打比我話佢要睇牙醫，唔返啦，就係咁樣我又多一日假啦，又去到年初八先返工。哈哈....主真好，主真好。

係親近主的時候，同惠儀仔睇馬可福音第一章，我想到主雖然係王的身份，他卻沒有佳容美貌使我地羨慕祂，但祂的愛卻是最動人的，祂用笑臉來幫助我。同樣，當惠儀仔問點解d門徒可以咁容易去跟隨主的時候，我話其實每個門徒都有他自己背後一個動人的故事。雖然聖經中沒有寫下他們怎樣放下什麼去跟隨主，但我想每個都有想到自己的工作、家庭，當跟隨主之後的路同生活會怎樣，但他們卻是撇下一切去跟隨主。令我回想其實跟隨主每個b/s都有他自己不同的故事，如要一一寫下，真得世界也容不下了。好寶貴我地人生可以交在主手中。

去到冬季嘉年華的時候，我地一開始就玩了過山車，之後大家都發現d公仔其實是好難中的，我地用了10個金幣都中唔到一個呀，唉.........眼見d人個個都有一個大大的公仔時，好羨慕他們。之後能得利就玩了那個有10層樓的團團團，當她在10層的空中時，佢仲可以放開雙手，眼望地下同我地揮手喎，所有人都嚇了跳，連d工作人員都話她大膽呀。

因為惠儀仔唔夠年齡同能得利一齊玩，所以她"唱"的金幣惟有迫我同佢玩那個風車轉啦，嘩.....實在用晒我全身的氣力去叫呀，實在太刺激啦，因為那個機動遊戲不止自己轉，還會不公轉，終之就係不停轉啦，仲要玩足5分鐘喎，實在攞我命呀。玩完之後就開始覺得好眼訓，實在根疲力盡。

>>January 29, 2004 at 2:43:46 AM GMT+8

2004 年 1 月 26 日 星期一 【乍雨乍晴】

"為什麼" 同 "做什麼"

星期一的時候，去了中央圖書館安靜，是小女子平生第一次去的圖書館，真係失禮晒。入到去好似個自由行咁，不停周圍望，又唔知洗唔洗放低袋喎，因為我真係好耐、好耐冇去過圖書館啦，以前的圖書館不准帶書包入內的嘛，攪到我好似個伯痴咁，唉...........

當我去到一個可以望到維園的位置安靜時，我覺得好似不太在狀態，心裡好似冇感受，但當望出窗外的時候，我見到一隻鷹在空中翱翔，它不需拍打翅膀、它不需有任何背負、它不需有任何掛慮，只管在空中飛翔，令我想到我都可以好舒暢的回到神面前，因為神的寶座是施恩的寶座，神的懷是我安息的地方，最主要是能夠使我如鷹展翅上騰。那一刻，我再運用信心的返到神面前去享受神同親近神。我真覺得主好識得安排同使我更認識祂的愛。

我在圖書館內找到的一本見證書(我唔記得他的名字，但他是一名外國人)，當中提到他在出生時因為缺氧導致腦到麻痺而手因此而不停震，骨頭會容易受捐的病人，他的爸爸是一位傳道人，他也認為自己是信了主，但當他經歷一次又一次的挫折後，當中包括﹕父母的分離、轉校的適應、同學的戲弄、成積的退步、屋企人的離棄，令他對主產生懷疑，最後因為母親的去世，更令他整個跌到谷底。開始不面對神、不相信神、自暴自棄，但當他每每問神"為什麼" "點解" 的時候，仲是沒有答案，但當他問神"要他做什麼的時候，他好清楚神每次都是要他去親近神同再一次認真去面對神。但他往往都是逃避，因為他覺得自己唔好，覺得自己不配，但當他有一次流淚為自己的事去求主赦免的時候，他彷彿聽到神用浪子的比喻呼喚他。及後他為此勇敢作見證，在美國多州多巿去傳道，也不怕人怎看他的疾病，他也安慰了很多身有此疾病的人。

我也想回擘餅聚會時，耀耀哥哥的分享，今日我地不用自設什麼祭物去獻，想得到自己覺得做得不好時使神赦免，因為今日我地是與主相連，同主沒有任何的隔絶，今日主的救恩已是最完美的救恩，係最完美的，我地不用自創獻祭的禮物，不要以為自己在聚會中沒有感受是當然、不要自己為自己嘆息或者愁眉苦臉是應該的。我地應該歡喜快樂同回應主才是最正確的。

>>January 29, 2004 at 3:20:03 AM GMT+8

2004 年 1 月 25 日 星期日 【乍雨乍晴】

家訪碧茹屋企

今日我地去完david屋企之後，就去碧茹屋企，原本阿sir話唔駕車去喎，停車場錢好貴喎，咁我地不停同佢講叫佢駕啦，因為我借比碧凝的"急"想羅返屋企喎，我已經買份禮物比阿sir架啦，佢都話唔喎，最後出動到敏萍姐一叫，阿sir就肯啦，真係呀，用出動度太后先得ge。

去到碧茹度的時候，其實已經係7:30啦。佢阿爸己經預備好晒d野，但我地見到的打邊爐係好特別的，佢地是用火水爐同埋坐係地下度打的。好新穎喎，我地的主要食物係丸，分別有墨魚丸、黑椒牛丸、龍蝦丸、2款碧茹最喜歡的丸(有函)的，以上的丸類係每樣一磅喎、芝士腸、獅子狗同菜、一點點的肉，最緊要係加埋烏冬。大家係咪覺得好奇怪，點解全部都係丸，因為佢話其實佢都唔知買乜架，但係跟得大妹姐多去買打邊爐的野食，所以就照舊執喎，怪不得我地覺得咁奇怪，好似係大牛打邊爐又係食lee d，去到佢屋企又係食lee d啦。原來都係大妹姐的作為呀。攪到我地每人起碼食左10粒丸落肚呀，最後仲要話每人一個烏冬麵喎，嘩.......嚇死我咁濟呀。

當我地收執d野後，坐下來的時候，碧茹媽又推出她的賀年食品，蛋散同角仔、糖果，嚇到我地又死左，止不過係相隔3-5分鐘的時間，又要食啦，佢阿爸仲講話不如開埋罐曲奇餅呀，嘩......我地即刻話唔洗啦。

之後阿sir車敏萍姐入沙田，入去的時候係好暢順的，但當回程的時候，阿sir竟然話唔識路喎，等我仲想讚佢而家熟路左好多tim，佢不停望指示，一時又話點解去了九龍中，一時又話去了馬鞍山、一時又話死啦，唔識路tim，攪到我都唔知點好，死人鄭志健又話唔緊要啦阿sir，去西貢啦，跟住轉入西沙公路再出啦，我即刻話阿sir我想返屋企啦，阿sir都話佢都想喎，最後出左大"腦"山後，阿sir又去錯左，入左新蒲崗喎，我問阿sir點解入新蒲崗架，佢竟然又話佢都唔知喎，最後車完志健先到我喎，我足足用了1個鐘零15分鐘由季茂坪回到藍田啦。唉.......如果我自己搭的士呀，唔洗10分鐘呀，仲唔洗跳錶呀。

回到家之後，實在太頂唔順阿sir的急停同轉彎啦，成日叫人扶實呀，救命呀，最後我將d丸全部嘔返晒出黎呀，辛苦到我呀，即刻話冇食過野落肚一樣呀，真係便宜莫貪呀..........................

>>January 29, 2004 at 3:18:04 AM GMT+8

2004 年 1 月 24 日 星期六 【乍雨乍晴】

時間過得真快!!

時間真係過得快呀，話咁快就過左幾日啦。不知各位b/s過得快樂嗎?我就在有時繁忙、有時清閒中過渡了今個新年。

年初一同年初二，例牌我屋企是主場，意思即係等人來我屋企賀年，因為我媽咪係屋企的大女，所以她的弟妹，即係我的亞姨同舅父分別都到我屋企，當中包括﹕simon姨一家、3姨、5姨、6姨、舅父一家、亞公、所有表弟妹，加上另外有3家人，又加上亞公親戚那邊。嘩..........我屋企d人日日都不同，人話貨如輪轉，來我屋企d人都一樣。而最開心的不是我地3姊弟，而是我亞媽，她時常講的話說就是﹕好耐冇見啦，新一年賺多d。

當所有到完我屋企賀年後，我亞媽就會安排一等人再去我地最高輩份的親戚屋企，點解我會介紹呢?因為她的身份實在太高啦，我亞媽亞姨叫她做五舅婆，當我地去到的時候，她就會升級做五伯婆，所以去到佢屋企的時候，就會不停聽到伯婆，伯婆咁架啦，好攪笑的。但她就年年都叫我地唔好咁叫佢，但係我亞公話唔得架，lee d係尊敬黎架。所以去到門口就要大聲叫﹕五伯婆新年快樂呀。

賀年的日子就係忙碌的時候，但每年其實我都不太歡喜，可能我成日都覺得我好悶，又唔知做咩好，又唔知講咩好，又唔會同佢地打雀仔，但今年主都比我清閒的時候。有1-2日都可以出去親近主，因為我亞媽唔係好鐘意當有人到的時候，屋企人就走左，所以我問過亞媽先，佢竟然話你要出去咪出去，記得返來食飯就得啦。嘩.............就係咁，我有機會同時間係新年的日子出去安靜啦。雖然有時會好疲倦、又會覺得好凍，但仲好過冇啦。

>>January 29, 2004 at 3:20:42 AM GMT+8

2004 年 1 月 19 日 星期一 【晴】

放假啦~~~~~~

今日亞姐終於宣佈我地明天開始放假啦，放到年初七先返工，不過返工頭2日係用黎執野咋。好開心呀，所以小女子在此宣佈，我lee個假期可能未必有機會寫日記呀，因為節目太過豐富同冇時間啦。希望如果有時間，又可以坐係電腦面前的時候就寫下啦，如果唔係就會係放完假先再寫啦。!!!

在此本人謹祝各位﹕
身體健健康康
心靈強強壯壯
新年快快樂樂
每日都笑呵呵

恭喜!!恭喜!!

>>January 20, 2004 at 7:42:35 AM GMT+8

2004 年 1 月 18 日 星期日 【晴】

聖靈的感動

星期六擘餅的時候，好想對主有回應，因為我同自己講過，我唔想銷減聖靈的感動，記得上星期有一次安靜的時候，我同主禱告，如果我唔開聲去讚美主，連石頭都要開聲去讚美主，我求主使我有膽量，果日係擘餅裡，我求主比我機會，因為人太多啦，我又驚會disturb人地啦，我又求主幫我喎，首先係lily話想"點唱"歌喎，雖然最後都冇唱到，但係我知係主比我預備，跟住係雅婷的禱告，因為回想我同佢講過，我地一齊讚主呀，點知都冇試過，我又知主比我記得我講過我要回應祂。

另外，又我求主使我禱告的內容是冇人講過的，雖然就算講過，我知主聽我地每個講都不同的，但係我仲係覺得好似人人都係講果d咁呀，好感謝主，當我祈禱的時候，真係冇人講過相類同的祈禱，又有機會比我冇人同我爭喎，雖然講的時候，好驚，手到震晒，又講到痴晒痢根咁，但我知道同我深信，主係好歡喜的，我好開心呀，我能夠再一次去讚美lee位咁愛的主，我越來越相信，當你大大的張口，神會大大充滿你。

>>January 19, 2004 at 2:51:01 AM GMT+8

2004 年 1 月 17 日 星期六 【晴】

團年飯加生日會

尋日碧凝同碧茹上左我屋企，因為碧凝借我的喼比佢去旅行呀，所以我地尋晚去了沙爹王食飯，原來觀塘果間裝修過，好靚喎，好似去左椰林地方同埋d坐位好特別架，真係冇揀錯地方食野，食左大約200蚊度啦，當中不斷吹水同講笑話，最後差不多9:45先走，佢地上到我屋企的時候，只係我家姐係度，參觀完一輪之後，我就送佢地去搭車走lu，因為時間已經不早了。

不過回到家後，因為又要預備生日會同埋d禮物，最後攪到成1:00幾先訓覺，不過今朝都算有精神喎，但係今朝實在太多野攪啦，又要買蛋糕又要預備其他野，攪到親近主都冇乜心機tim，不過今日好多妹妹都有出呀，好開心呀，因為好多時候，佢地都唔會留到咁夜，今日佢地好多都考完試又開始放假啦，所以今日佢地好多留到生日會先走。

中午的時候，我地食團年飯，不過係打邊爐，因為人太多啦，好似冇乜食過，d妹就好勁呀，由頭食到尾呀，尤其緊係惠儀仔啦，一開始食，食到最尾的粉絲呀，班弟兄都唔夠佢黎呀。跟住就開始我們的生日會，今日生日會其實好早先已經思想，唔知點解好似主比我好多idea咁喎，今次玩好多遊戲都好好玩，又有新意，多謝主呀。最攪笑的莫非柏航啦，佢又多左個別名，就係13姨啦，因為佢係今朝套話劇裡面扮演的角色，就係13姨囉，真係非常攪笑，玩遊戲的時候，連佢果組都係叫年青的13姨喎，仲知就係笑爆你咀啦。

>>January 19, 2004 at 2:07:58 AM GMT+8

2004 年 1 月 16 日 星期五 【晴】

清閒的日子

lee段日子實在得閒到嘔呀，咩野都唔洗做又冇得做又加上唔想做，咁就攤屍咁攤係度，日日返到公司就睇報紙，食早餐、上網，跟住等食飯，食完飯就落街行，行到2:30先返，跟住又係等放工，lee幾日都可以6:30前走呀，幾勁呀................不過實在太得閒啦，可能我lee d 辛苦命呀，唔係好慣咁ge生活，唉...........做唔到闊太的生活tim...............講笑姐...........

尋日又係去左買禮物同賀年用的用品，亞媽見我買左個hello kitty的公仔揮春貼係度門度，佢竟然話你見唔見到好似少左一個呀，不如你買多一個呀，跟住惟有我去買多一個囉，跟住又叫買果樣同果樣..........變左工人咁呀.......

>>January 17, 2004 at 5:18:36 AM GMT+8