2004 年 5 月 12 日 星期三 【晴】

我隻好有智慧的智慧牙呀..... lee幾日，其實自己都講過好似冇乜特別感受喎，可能我病病地啦，lee幾日一早都咳到肺凹又有痰，阿媽話我咁咳法，係冇飲佢d湯水喎，又係point黎架喎。攪到我一早都冇咩心機，再加上我隻好有智慧的智慧牙呀，佢原本已經生斜左，上次洗牙的時候，牙醫已經講我知，不過佢話都ok啦，冇乜問題的，但這個星期，佢又生出黎喎，攪到我d牙肉好痛呀，食野只可以食另一邊，今日先叫做好番d咋，真係辛苦得緊要呀。 尋晚去了我平時最喜歡去的匯景公園安靜，我買粉果同主耶穌一齊分享，你一個時我一個，大家快樂笑呵呵(兒歌黎架)，唔知大家識唔識，但其實2個都係我食晒，好好味呀，食完之後，我安靜的時候，係個公園內見到班小朋友一齊玩遊戲，我發現原來我都好outdate，好多我都唔識玩，但係我發現，佢地玩得好開心，1佢地玩得好放心，因為父母在身邊睇住，2.佢地根本就不用顧慮太多野，無憂無慮，盡情咁玩，有時反觀自己，就算返到神面前，都未必會咁舒暢，因為實在好似有好多憂慮，但記起聖經上講﹕要好似小孩子的樣式，舉起雙手向父求同要亞爸的幫助。 摩西對他說、我一出城、就要向耶和華舉手禱告、雷必止住、也不再有冰雹、叫你知道全地都是屬耶和華的。 摩西離了法老出城、向耶和華舉手禱告、雷和雹就止住、雨也不再澆在地上了。 你舉手向海伸杖、把水分開。以色列人要下海中走乾地。 摩西何時舉手、以色列人就得勝、何時垂手、亞瑪力人就得勝。 我還活的時候要這樣稱頌你．我要奉你的名舉手。 之後，我為自己祈禱，求神比我睇見需要，教我愛的事奉，更新同變化自己的心靈。那一刻望同有小朋友坐千秋，跟住的禱告係，雖然人生有高高低低的時候，但主的恩同愛堅固我前走。當望向另一邊，見有人打網球的時候，人生仲有跌倒，但寶貴主愛及雙手永遠不會離開我。 雖然祈禱的時間唔係好長，但我覺得好舒服同釋放。之後行左一陣就回家了，因為病病地，快d回家訓下覺。

>>May 13, 2004 at 6:17:14 AM GMT+8

2004 年 5 月 10 日 星期一 【晴】

>>May 11, 2004 at 4:41:17 AM GMT+8

2004 年 5 月 9 日 星期日 【清涼】

世上只有媽媽好，碧茹請我食早餐，我同亞媽食晚飯..... lee幾日自己好似病病地，唔知係咪因為亞媽只比得一張被我同家姐，家姐最鍾意就係捲住佢自己，而我就只可以去搶，我又最近窗邊，可能就係咁攪到我好似病下病下咁。 星期日約了碧茹食早餐，因為我地約左10:30係大牛等，原本我是陪阿媽的，但因為佢要返工，所以我可以一早出來，就係咁我地約係麥當勞等。開頭我諗住唔去，因為病病地，但係約左咪去囉，誰知，今次的早餐係碧茹請我食架，真係感動呀，但因為我食得唔多，都幾浪費，之後我地去大牛親近主啦。 親近主的時候，其實個頭都暈下暈下咁，但之後都算可以啦，尤其是大家相交的時候，因為以往比較少時間大家坐埋一齊去相交，通常星期日我地都分組親近主，而今次只得碧茹、倩惠、雅婷、麗香同我。人數比較少，而大家又可以舒服地相交。在相交中，倩惠第一個相交，佢的相交往往都是自己好深的經歷，又可以好激勵到人。 之後，我有感而發的相交，雖然在近期彷彿沒有任何得著，好似離主好遠，但其實應該唔係咁，因為主已經為我復活，他24小時住在我內，我是可以經歷同感受。今日，往往第一樣是比自己的感受去影響自己的感覺，可能有時第一個feeling，係咁，就直覺果件事或者果個人就係咁啦。可能有時候自己不經不覺得會被感覺帶著信心走。但今日，我地的人生，應該係用信心帶著2感覺而去走，才是對的。感覺不同神的話語，但我地信神確實與我們同在，也應該信就算自己沒有感受的時候，主確實最歡喜等候向我地話說。之後，我地一齊祈禱，在祈禱中，感受姊妹之情是好重要同寶貴。 之後，我地同慧英果邊一齊去金加利食下午茶，都算幾扺喎。原本話去朱記打波，但望下個太陽的時候，晒到呀.......日頭烤人呀。但係最後都去了朱記，我就冇郁過，一路坐係度，見住佢地去打波，真係有點兒覺得命都冇呀。 之後，因為約左阿媽去食飯，所以就早走lu。

>>May 11, 2004 at 1:28:07 AM GMT+8

2004 年 5 月 3 日 星期一 【晴】

2個生日會...... 星期六的那一日，我慶祝了2個生日會，第一個係雅婷的生日，因為勞動節正是雅婷的生日，所以我地果日中午分團的日子，我地已經幫佢慶祝了，地點係九龍灣的staryberry forever，今次係麗香請客呀，因為佢話佢會加人工喎，而星期六出的姊妹又唔係好多，所以佢請客喎....哈哈...就係咁所以果日不停食呀。 下午完左擘餅聚會後，我地開了一個小型生日會，除了雅婷之外，我地都有幫5月生日的姊妹慶祝，原本我諗住我去買蛋糕，但因為附近都冇麵包鋪，又冇找個平d架，所以買唔到，但原來弟兄竟然買左個，價錢仲好貴tim呀，係美心蛋糕黎架，雖然外貌唔好睇，但又幾好味喎...... 食完蛋糕之後，我就那那林要走啦，因為又要去另一個的生日會，今次慶祝的主角係舊同事-janice，即係將會係6月結婚的舊同事。但今次食得麻麻地開心，因為大家的話題係宗教信仰的問題，大家因為信仰不同，所以傾得有d火，不過因為janice都係基督徒，所以我地都同心d。不過整體上都算ok啦，食物很不錯呀，雖然今次全部都係自己整，但因為係coco的妹妹幫手攪，佢煑野的技術呀...真係高手呀....咩都整到，仲有蘋果批tim呀....之後又係食美心蛋糕。真係死得呀......一日食2個蛋糕呀。 之後抱著個大肚dum走人呀。在途中，話題都係環繞標準多，真好彩我已離開了，如果唔係人工真係冇咁高同咁舒服呀。

>>May 4, 2004 at 3:27:49 AM GMT+8

2004 年 4 月 28 日 星期三 【晴】

慶祝晶晶生日...... 星期二同晶晶同大妹姐傾好去慶祝晶晶生日，但尋日大妹姐打比我話我知，話晶晶唔得閒喎，我其實都冇所謂啦，唔去慶祝咁我諗住去剪頭髮架，但最後都冇去到，因為大妹姐又打比我，話我知晶晶又得喎....就係咁，我地3丁人去了九龍城食日本野，但我走的時候，都唔知搭乜車好，因為係荔枝角好似冇車到，又唔想搭地鐵轉巴士喎，咁問人的時候，又比人老點去搭6c，但原來去到發現6c係去九龍城碼頭，去唔到九龍城，就係咁又再搵過巴士站，一路行下行下，又比我搵到架去牛頭角的巴士，那刻我惟有再問人經唔經九龍城啦，那個人又答我經架，就係lee個時候，又架巴士到，跟住那個人又話經架，叫我上車，我就係咁上左車，其實我心裡都唔知架車去邊架，當大妹姐打比我的時候，問我係邊喎，我都唔知點答佢好，因為基本上同實際上我都唔知我自己係邊度，我一路望住出面，一路想我究竟去左邊呀......... 我成日話比大妹姐知我仲有排先到呀，但當架車行行下，我就發現原來我到了九龍城啦，我那那林落車，跟住join埋佢地囉，今次慶祝的地點係陽一日本料理，幾好味喎d野食，跟住我就走去行街，因為d鋪頭好多都就"山"門，所以行得好快。當行到一間鋪頭的時候，我話買睡衣，大妹姐又話買，跟住老闆鋃話20蚊一套，100蚊5套，大妹姐即刻話扺呀...買5套啦，跟住我話買咁多做乜呀，但最大問題係....20蚊一套，100蚊5套，係冇平過喎....大妹姐同我最後買左份禮物比雅婷....平左.......5蚊呀........幾攪笑呀.....又係咁讚老闆娘又話佢實賺多d呀...講咁耐先平得5蚊咋....真辛苦呀...... 最後搭巴士回家lu，因為這幾日都覺得好辛苦，又攰喎...攪到我好想訓耐d，lee幾日返工都遲到tim呀，仲要足足遲左半個鐘....攪到我都唔好意思...........

>>April 29, 2004 at 9:08:55 AM GMT+8

2004 年 4 月 25 日 星期日 【晴】

信主10周年啦....... 星期六，即係4月24日，係小女子10周年的紀念日，回想自己跟隨主的10裡，主真係我個人的救主，也真是活生生可經歷的救主，無論我失意時，無論我失望、跌倒時，主仍然用他那長闊高深的愛來包圍同擁抱我，他也用那大能的手托著我，感謝主真係能大斷改變人同不斷慕造我這個人。10的光景，話長唔長，話短唔短，但對於面前的日子，我信是更榮耀的一程，對於我來說，我盼望在主內不斷學習、更新同突破，我知我仍有好多需要學習的地方。 星期六的那日，我真係驚會遲來呀，因為星期一要開會，好多事情未做好，也有好多其他波折，我自己又唔係好多時間去安靜喎，令我覺得好似白白就過左個紀念日咁，我用了最快的時間去做啦，做名牌啦、排位啦，所以係1:30，我就將d野做好，亞姐又肯放我走喎，就係咁我就走啦，跟住去買了個蛋糕比月香，因為月香又係係4月24日生日喎。然後，好快咁去大牛，去到大牛，小明就問我係咪會感恩啦，我話係，跟住佢竟然同我講要講2分鐘喎，又要係最後先講喎，其實我冇乜預備，又冇諗過要攪咁大，我只不過係想簡單介紹下咋，不過我見小明咁想講野，就冇所謂啦，最後我同小明一齊相交。 之後我地分團的活動係為月香慶祝生日，大家都有小小野講啦，跟住夜晚的時候，我地去了金加食飯，第一次小志強請食飯呀，佢話係為了慶祝月香(師姐)的生日，所以佢請，但係要主意係師姐唔在場架喎，幾攪笑呀。小志強又不停話大妹姐喎，但係大妹姐冇嬲喎，佢話因為係小志強請客，所以話乜都得喎。

>>April 26, 2004 at 3:38:58 AM GMT+8

2004 年 4 月 21 日 星期三 【晴】

比我撞到慧英喎 話說尋日其實應該係我最得閒的日子，因為亞姐病左，佢原本請半日，下午返工，但佢係下午的時候，都係頂唔順，話要休息埋下午喎，咁我全日的工作，就冇做過野啦，因為懶得去做，下午我仲叫埋tea食tim，當我諗住放工可以去剪一頭髮啦，book埋個師傅啦，但係5:30的時候，亞姐話會長叫佢出封信比其他商會喎，就係咁我都知不妙啦，亞姐又話要等，又要上網睇資料，又要等電話，一等我就等到7:00啦，係7:00的時候，亞姐先叫我打封信出黎喎，我想同佢講我都唔道打咩，點打呀，我一路作下作下，寫完都差不多8:00，send埋比亞姐先有走呀。 那時，我正想問下慧英係邊喎，當我打比慧英的時候，我已經聽佢果邊好嘈，彷彿同我係地鐵內的一樣，慧英問我係邊喎，咁我講話去到九龍灣啦，佢問我係咪行緊街，我話唔係呀，係地鐵到九龍灣咋，跟住彷彿大家都聽到"下一站九龍灣"，跟住我問返佢你又係九龍灣，就係咁我游說佢同我去九龍灣，因為我去U2改褲，然後就一齊走啦。幾開心呀。然後當我去到藍田的時候，我決定要買衫到鞋，因為我又冇夏天衫著啦，次次都係咁架，不過只不過買左2件衫同1對鞋咋，全部費用都不過100元，我又再一次要介紹下藍田匯景商場啦，對鞋50蚊咋，扺到冇人有呀。 我尋日打比麗香，同佢傾下計啦，點知一傾就傾左好耐，其實我都好開心同佢傾計的時候，當中提及星期二祈禱會的得著，雖然我去到都已經差不多8:00，但係我好感謝神，當我願意去的時候，神必大大祝福，當中最深刻志光哥哥分享神用挪亞的4個原因： 1. 挪亞願意被神用 2. 挪亞願意做個與世代不同的人 3. 挪亞願意順服神，當神叫他做什麼，他不單沒有問原因，也願意聽神話去做 4. 挪亞沒有放棄，雖然做方舟要120年，但他仍抱住不放棄的心態去做

>>April 22, 2004 at 9:02:23 AM GMT+8

2004 年 4 月 19 日 星期一 【晴】

大家可以click去右面我的相簿呀，有相睇架，不過未算最update，如果大家有相可以send比我呀

>>April 21, 2004 at 2:06:21 AM GMT+8

2004 年 4 月 18 日 星期日 【晴】

愉快的一天

尋日星期日我地分團活動，而我地的地點就係雅婷屋企，佢搬左咁耐都冇去過，緊係要踩下佢地板同攪亂下啦，我地原本的行程都好緊密架啦。
首先一早親近主
跟住買野食
下午相交遊戲
跟進book左場打波

但當我地親近完主的時間已經係1:00啦，佢地果果都叫肚餓，因為時間遲左啦，又多野講，又有人黎喎，攪到d時間好更加緊迫，而我地上到雅婷屋企的時候，麗香、月香同敏萍姐負責煮野食，我其實都好想幫手架，不過我費時去攪亂啦，最攪笑係雅婷屋企d煲好細，搵左好耐先搵到大煲出煲米粉，我地買左2大包，月香就將2大包米粉煮晒喎，攪到煲米粉係冇水架，雖然係咁，但大家都食得好開心，又有雞翼又有雅婷家鄉小食(叫卷煎喎)，幾好味架。當佢地煮緊野食的時候，我地就係出面玩啤牌，幾緊張同刺激呀，個個都大叫。今次出ge人係最多的一次啦，有雅婷、碧茹、倩惠、倩盈、惠儀仔、慧妮、龜仔、祁恩同我地4個。嘩係有史以來最多人出的一個星期日，佢地玩得幾開心呀。

早上親近主的時候，倩惠好似未訓醒咁，佢同麗香負責領詩喎，明明安排左遊戲又唔記得，要麗香提佢喎，跟住麗香又係未訓醒喎，話叫人諗個動作唔好重覆，佢示範的時候，又成日重覆果動作喎，最後輸得最多都係佢地2個。

我就同惠儀仔一齊去親近主，我揀左耶穌履海的一段去睇，寶貴當門徒面對連他們都懼怕的大風浪時候，又見到人個不知明的物體越來越接近他們的時候，他們心裡又驚慌又害怕的時候，主同他們講"不要怕，是我"。當彼得踏出他人生行在水面上的第一步後，因小信，快要沈下去的時候，寶貴主"趕緊伸手拉住他"。寶貴主當我地人生踏出第一步願意去跟隨主的時候，主已用祂雙手保抱我地的人生，也感謝主，當我地面對試探、艱難、灰心、失意，快要沈下去的時候，主趕緊伸出祂大能的手扶持我們，也感謝主講"不要怕"，當面對順境、逆境的時候，主永遠都有離開過我地，相反祂永遠都有慈繩愛索來引導我們，同走祂永生的道路。

親近完主就那那林去買野食啦，原本諗住間惠康係超級廣場，咩都有，點知原來係咩都冇，最後，我地只好選揀了壽司同煑米粉。

食完之後，麗香就負責帶遊戲，可能時間緊密呀，攪到得番45分鐘，大家又掛住食野喎，冇咁多時間去思想同深入相交，玩完遊戲之後，跟住就落去打波啦，時間剛剛好，4點開始，打到我手抽筋咁濟，佢地話我同麗香係世界第一的比賽，因為打到砰砰聲喎......我好鐘意咁樣打人打波架，我地計算過，最高紀錄係大家來回41球呀，真係勁呀。

當我地打波的時候，倩惠就要做功課，佢有一樣係新詩寫作，我就幫佢諗左頭3句，
太陽明麗照綺人
紅葉片片落我心
絲絲細雨輕輕問
當作到lee到的時候，碧茹就話要回應反第一句的太陽，佢話要講月亮喎，但我又諗唔到喎，跟住碧茹就話啦，月亮、月亮咩好呢。就係lee個時候，突然間敏萍講左一句﹕月亮代表我的心。就係咁，笑到我地死死下，而倩惠的功課就係咁完成左啦﹕
太陽明麗照綺人
紅葉片片落我心
絲絲細雨輕輕問
月亮代表我的心

當我地去地鐵站的時候，時間只不過係5:10咋，真係早得濟，而我地去到藍田的時候，就打比妍妍問下佢地點啦，點知原來佢地都未走喎，所以我地又上埋佢屋企坐下啦，佢地就係度寫緊心意咭，我地幾個就同細佬打機呀，吹下水呀。就係咁樣6:30我地就全部走人lu，因為妍娘話返緊黎啦喎。全日的活動就係咁完滿結束。當返到商場時我買了一點點的禮物，希望有時間整比大家啦。

>>April 19, 2004 at 2:18:47 AM GMT+8