2009 年 6 月 30 日 星期二 【晴】

好耐無打過日記
因為一直都係響懶惰同埋忙既生活度過
難得一日假期, 又無動力要我返工
很好

不過都迫自己早早起身
事關約左 Konnie 睇戲
由佢上星期六返香港直至今日都無正式同佢行街
尋晚放學後出銅記搵佢當然唔計啦（因為佢係出開黎順便等埋我嘛）

1200 同佢一齊上佢屋企
經過尋晚既抱抱, Dydie 好似開始記得我係邊個
很好, 不過佢都係唔多願出聲同埋跳
無晒以前既活潑同百厭
唔通同要食減肥糧有關？

佢開電腦 check email
睇完輪到我
無 check 幾日, 有成 214 封 email
其中大部份係 tag 相及 comment
真係痴晒線

1240 就離開屋企
唔早唔遲, 所以無食飯
過百佳買左包粟米片就入場
冰河世紀三我覺得唔錯, Konnie 就話麻麻
可能係配音問題掛~~~

買左兩條毛畀 Tim & Dy 玩
食晏已經係三點幾
食水餃鍋貼
之前聽過幾個人都話果間野唔錯
食完, 頗為失望

去街市買食送
事關 Konnie 今晚要煮飯
拍拖拍到去買食送唔算好新鮮
但係買食送然後煮畀屋企人食我就好少見....

返到屋企 Konnie 就開始煮飯
由於不斷被人話我佔用公共地方關係（即係阻住晒）
所以走左去走廊同 Tim & Dy 玩
不過邊玩邊眼訓
所以經常畀 Dydie 咬著條毛

1900 就食飯, 很早
食完睇電視
睇到 2200 就返歸
同樣很早

希望日後仲有時間同心情打日記啦......

>>July 1, 2009 at 5:41:24 PM GMT+8

2009 年 5 月 20 日 星期三 【晴】

起身返工
今日準時返到公司
公司黎左個 summer 既女仔
今年 F.7, 做秘書, 叫何糖果
哈哈

基本上全日都係咁做野
無停過, 亦無玩過
只係差唔多食下午茶果陣先休息左一陣
Tracy 屈左老細請食下午茶
其間講起尋日我話我好專一既話題
老細就話："Brian 個女朋友 ok 靚架！"
很好

Alex 同 Sam 去左醫院開會
老細本來都要去, 最後甩底
Tracy 同糖果都幾準時走
老細就遲 D, 不過都係 1900 前就走
無心戀戰, 不過都要繼續做野

做到棄機就諗信點寫, 寫完就 email
執錯左份舊版本, 不過之前 send email 有留底
新舊信差異極大, 如果 send 錯一定無行
差 D 連地址都未改就出左街
好彩收得切油！

過南山食飯
去到品香大家差唔多食完
成員有一, 肥仔, 豆, SMC, 靚仔
食完再過 PCC 飲野

SMC 唔想做我同事
真可惜
想點下 SMC 幫我手都唔得添

>>May 21, 2009 at 3:48:00 PM GMT+8

2009 年 5 月 19 日 星期二 【晴】

上星期開始要同學校開會
老細講得好, 同教育界做野要早 D 起身
我了解, 我同意
所以我決定犧牲錢打的, 都唔願早起身

但係當我 0852 到左學校
打畀老細時, 佢話: "你咁早呀？我未得喎, 你等下我啦！"
最後佢 0930 先到
我啞左

開完會, 同老師四圍行睇 defect
學校佔地不廣, 但係鬼祟位甚多
以前 DB 都無咁多地方行
宜家就難講咯, 唔係使乜請人駐場做維修？

行完返 office
繼續做野
一 send 左個 email 畀我, 好吸引
有 push factor 既同時, 當然有 pull factor
不過真係要我做決定, 其實都有 D 唔捨得

晏晝過太子搵 RSE 開會
行緊既時候收到個無來電顯示既電話
由於老細打親黎都係咁, 所以都以為係老細搵我
點知一聽就有把女聲問我: "$30一個電飯煲貴唔貴？"
呆掉了

開頭以為打錯
個腦運作左陣先知果個係 Konnie
講緊既亦係澳幣
講左陣就收線

返到公司, 見到 Tracy 張檯附近有份履歷
相中人居然係著校服
原來係聽日返公既 summer 秘書
之後將我既 comment 話畀兩位兄弟知, 畀 Tracy 話我目及女
隨即我就話: "我好專一架！"

阿B 2130 打黎問我如果聽日改練 1930 得唔得
一來我一向以為星期五先練
二來我果時一定未做完野（基本上都唔會有做完既一日）
即使老細仲未走都照同佢講
1. 我講電話時仲響公司
2. 我尋日做到 0045 先走

阿B 聽完都啞左
之後又話: "其實呢兩次你黎練, 都知你好勁, 所以你唔黎都無問題"
多謝你咁睇得起
不過如果我可以既我都會出席

放工時, Alex 同 Sam 都仲響度
我無佢兩個咁捱得
打完電話返屋企, 仲諗住九點幾十點都唔算太夜
望下電話顯示既時間
2300？！
完全係做到唔知時間.........

>>May 21, 2009 at 4:21:59 PM GMT+8

2009 年 5 月 16 日 星期六 【晴】

尋晚同 Konnie 講 msn
同埋傾左陣電話
不過條線有少少問題, 成日都收唔到
結果接近五點先訓

Konnie 既問題既然已經去到咁既階段
就唔好諗太多啦

接近一點起身
發呆
直至六點又訓

今日無乜時間係清醒既.....

>>May 17, 2009 at 4:06:23 PM GMT+8

2009 年 5 月 15 日 星期五 【晴】

呢輪都好懶唔打日記
不過係我懶, 唔係日記懶

尋晚話左會返工
朝早 0830 就畀個鬧鐘叫醒
0900 先捨得唔坐響張床
沐浴更衣, 之後坐響度睇書唔願走
直至 1150 先離開屋企

去到九龍塘
尋晚一畀番雷拎轉交既大眾及榆林會員咭畀我
由於大眾轉會聽日就夠期
橫掂有時間, 一於去續會

懶得行路, 坐巴士過去 Mega Box
好慢既 lift 令我決定行上去
當然, 係用電梯行啦
仲係覺得呢個商場既設計好失敗

去到, 先睇書
Konnie 發現我無上網, 於是打黎問我去左邊
一邊行一邊傾電話
搵極都搵唔到想睇既書
續完會就算

陳倫打黎搵我
原來佢話今晚睇波
過荃灣既酒吧餐廳
都好喎, 橫掂我呢輪都無乜出街
有 D 自閉

繼續同 Konnie 傾偈
邊傾邊食八番拉麵
食完就返工
Alex 都返左去
邊做邊恰眼訓, 雙眼仲有 D 乾
望得電腦熒幕太耐真係唔太健康

1815 就出發過荃灣
過到九龍塘陳倫先響觀塘
先過荃灣, 無人響度
諗著上三聯行陣
望著個舖位, 點解成個場吉晒, 得番一把梯？？？

上去
好多花籃
原來裝修過後, 無左半邊舖位
細左好多, 同埋好多玻璃
搞到我唔專心行路就會撞埋牆

漲打黎, 再上黎搵我
陳倫打黎, 無得上黎
因為要過去霸位先
原來去既係歌德餐廳

坐左個好位
衰在有人食煙
過左陣就好多人
好彩有霸位

一同肥仔都無黎
黃蜂就半場先黎到
位位最低消費 $100
睇完場波, 再坐左一輪先走

送陳倫同漲去坐小巴
然後同黃蜂坐地車
問佢既退休生活過成點
聽左件唔太愉快既事

每個人都有自己既事
要體諒其他人, 而唔係一味話人
響批評他人之前, 最好了解背後既故事
當然, 好難去了解所有野
所以結論係：
唔知頭唔知路就唔好亂出聲！

太疲累, 所以最後都係放棄聽日既遊船河

>>May 17, 2009 at 4:35:42 PM GMT+8

2009 年 5 月 7 日 星期四 【晴】

由於尋晚早左訓
儘管唔算好訓（疲累都訓唔著）
但係都早左起身
0900 呀！

算係準時返到
因為基本上遲到
但係就響老細返之前返到
所以只要無人爆料既, 無人會知
古龍話過, 死人先可以保守秘密
故此我應該考慮殺左 Tracy
哈哈

尋日同o者喱仔講左陣 msn
今日高官開工都有搵我吹下水
高官問我公司係咪得幾個人
事關高官睇我日記, 黎黎去去都得果幾個名
不過只係見到我其中一個男同事
無理由架！

做到 1335 先食飯
三人行到淘大
入左易牙妙手
Sam & Alex 好快就有飯食
我等到 1400 先有飯開
唉......

飯後繼續
今日要去隔離公司度野
人地先後見晒我地所有同事咁滯（除左 Alex）
Tracy 一邊幫手度, 一邊催我快 D 搞掂
結果我一邊離開, 一邊諗單憑手頭上頗為甩漏既資料夠唔夠用

老細走左, 老細返黎, 老細再走
做到2000就走
返歸食飯
今日晏過尋日
不過食完飯都仲有時間休息下

聽晚要過 APA 練野

>>May 8, 2009 at 4:06:57 PM GMT+8

2009 年 5 月 6 日 星期三 【晴】

死啦
我已經唔太記得尋日發生過乜事添......

2009.05.08

－－－－－－－－－－－－－－－－－－－－－－－－－－－－－－－－－－－－－－
已經遲左好多日
唔想咁衰日日遲到
於是迫自己早起
今日卒之完成任務！

已經做到傻左
除左工作
同埋 hae......

o者喱仔突然蒲頭
將 D 好耐無講過既野用文字打出黎
我都好似無乜以文字講野講得咁起勁
所以證明高官既出現, 絕對係犯賤的

此外
Konnie 今日卒之估錯左我響邊
之前就話睇我 msn 有冇相就知我響公司定屋企
今日我個 msn 傻傻地, 居然響公司都有頭像
未到 1800 就返到屋企, 我都想呀！

不過原來 Konnie 果陣都未離開學校
佢 off 左無耐我就走
老細唔返, 又無乜野趕
1830 就起程返歸

由於太眼訓
食完飯就走左去訓
扎醒左, 想訓但係又未訓著之際有人打黎
接電話既時候對方就收線
當然, 我知係邊個......

我知果陣係 2156
眼訓呀嘛
仲要叫醒完人就訓
無品呀！！

不過話就係訓
實際上沖完涼再 hae 左好一大輪 Konnie 先肯訓
果時已經係 2336 了
聽日有人要四出撲幼稚園, 睇下有冇地方可以畀收留兩個 post grad. 扮專家做治療
唔肯早訓既人真係唔o岩！

好早訓
0100 就上床
不過睇楚留香睇到 0130 先肯訓

>>May 8, 2009 at 5:30:45 PM GMT+8

2009 年 5 月 3 日 星期日 【晴】

返工
遲到係好正常既事
但係行到電梯大堂就見到老細同秘書
呢下都咪話唔尷尬.........

上到公司
Tracy 先同我講番
原來秘書都係響 lift lobby 撞到老細
老細一見到 Tracy 就質問做乜遲到
但係又無同我講
唔通老細諗住暗中記得我遲左幾多次, 然後遲 D 一次過算帳？！

老細下左命令叫我做野
叫左我畫一大堆圖
然後話：「er......今個禮拜....都係唔好啦, 今個禮拜頭交啦！」
er......
都未 er.... 完, 老細就叫我「順手」做埋另一樣野

唔覺唔覺做左一朝
晏晝同 Tracy 食飯
Sam, Alex 同老細今日都要去傳染病醫院開會
唔知會唔會感染埋豬流感？

過牛頭角下村食飯
其間 Tracy 講番今朝點解遲到
話說秘書坐未來老公電單車返工
坐到紅隧口好塞車
電單車梗係左攝右攝架啦
但係突然聽到警車響安, 仲開埋喇叭講：「XXXXXX（車牌號碼）, 做乜左攝右攝呀！」
好搞笑

食完飯, 買埋洗手液先返公司
做到 1530 就出門口
首先係去油麻地停車場大廈拎圖
之後去太子 RSE 度拎番 D 圖
拎完就返九龍灣翻印
印完就返公司

Konnie 今日仲係唔舒服
仲走埋堂
但係聽日要測驗
即使再唔舒服都要溫書（因為唔多熟）
食完藥叫我兩個鐘後扮鬧鐘
打去做人肉鬧鐘, 電話係接通左, 不過無人講野
原來有人聽到我講野, 但係唔駁咪
所以我聽唔到聲......

今日要聽 concert
$680, 不容有失（由於真係好貴既關係, 所以尋日講完今日都要講多次）
同時今日既音樂會, 遲到者須待中場休息方可進場！！
好彩老細開會未返
聽到秘書問左老細話返緊黎就拿拿聲出埋個 email 就走
唔係畀老細捉住走唔切咪好大鑊！

臨走 Konnie 響 MSN 表現得好唔開心
打電話畀 Konnie
病, 壓力大, 加上外國無人照顧
又試唔開心啦

一個人過左外國, 係要獨立一 D 架啦
愛錫既人全部都唔響自己身邊, 就要更錫自己
好好愛惜肉體同精神既健康
響彼邦既我地, 只係可以精神上錫你架咋！

學業當然重要（畀左咁多錢過去都係求學業進步）
但係最緊要都係身體健康
唔能夠裝備好自己既身體, 點再響上面裝配智慧為盔甲？
點去消滅萬惡既考試同測驗呢？

所以都係先養好身子, 再行備戰！

去到太子大記者就打黎
剛探完媽媽既大記者約我響油麻地會合
再去尖咀同淦權會合
一齊去搵早就穩座紅螞蟻既一及尤珍尼亞

食完飯就行去文化中心
肥仔聽完尋晚果場, 好想聽埋呢場
不過可惜全場爆滿
尋日同肥仔同場聽既有何生, JJ 及慶恩
今日坐響我地對面 Balcony 既有英輝及肥仔江

樂評不多寫了
弦樂真係好優秀
管樂稍遜
是日節目如下：
韋伯　　　《奧伯龍》序曲
貝多芬　　第三鋼琴協奏曲
布拉姆斯　第四交響曲

聽完就返歸
先同一坐火車至九龍塘
然後轉地車
咁就一日

聽日預左要 OT 到至少 2200 架啦.........

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
德累斯頓國家管弦樂團（Staatskapelle Dresden）

二零零八年九月二十二日，德累斯頓國家管弦樂團慶祝成立四百六十周年。
樂團早於一五四八年由薩克森的莫利茲選帝侯創立，源遠流長，是世界上最古老的樂團之一，
經歷各個音樂世代，一向地位崇高，更是唯一有超過四百五十年歷史、恆久不衰的管弦樂團。
樂團蜚聲國際，叫好復叫座，被譽為現今世上最佳的交響樂團之一。
成它]素除了樂團優良的合奏精神所培養出來的卓越音樂修養外，
數世紀以來不綴的傳統，也為樂團造就了獨一無二的「德累斯頓樂團之聲」，音色美妙、通透、和諧。

歷代傑出的指揮和國際知名的器樂手，
都曾為這個一度是宮廷樂隊的音樂組織出力，造就今日的德累斯頓國家管弦樂團。
曾經擔任總監的名家包括舒茨、哈賽、韋伯、華格納等。
華格納更把樂團譽為自己的「美妙豎琴」。
在二十世紀，
樂團的知名指揮計有舒克、雷納、布施、貝恩、基爾布夫、簡柏、殊拿、桑達寧、布隆斯達等。
先奴浦利於一九九二年出任首席指揮，二零零一年於任上去世，
由海廷克於二零零二年繼任，直至二零零四年。
雷西在二零零七至零八樂季出任德累斯頓薩克森國家歌劇院音樂總監，
亦即兼任德累斯頓國家管弦樂團的首席指揮。
戴維斯爵士自一九九零年起為樂團的桂冠指揮。

理察．史特勞斯與樂團有長達六十多年的緊密關係，
他有九部歌劇是於德累斯頓首演的，
包括《莎樂美》、《伊利特拉》、《玫瑰騎士》，
並把《阿爾卑斯交響曲》題獻給德累斯頓國家管弦樂團，
使樂團至今仍有「(理察)史特勞斯樂團」的美譽。
此外，多位知名作曲家曾把作品題獻給樂團，或把作品交由樂團首次公演，
這些作曲家包括韋發第、舒曼、華格納、李斯特、亨德密特、懷爾，
以及較近期的馬土斯、齊麥曼、魯伊捷卡、里姆等。
自雷西開始每年挑選一位「駐團作曲家」這計劃後，
樂團首演新音樂作品的悠久傳統亦得以延續。
不久前，奧地利籍的作曲家伯納德-朗恩接替伊索貝-蒙德莉為二零零八至零九年度駐團作曲家。

早在十七世紀初，德累斯頓國家管弦樂團便為歌劇伴奏，
現時每年在森珀歌劇院演出約二百六十場歌劇和芭蕾舞劇，以及五十場交響樂與室樂音樂會。
此外，樂團還在德累斯頓的聖母教堂定時舉行音樂會。
二零零五年，這座德累斯頓的地標復修完成，
重開的慶祝節目之一，便是由雷西指揮樂團演奏貝多芬的《莊嚴彌撒曲》。
除此之外，樂團並訂下一個忙碌的巡迴表演計劃，
每年定期到歐洲、亞洲和美國的各大音樂重鎮演出三十五場。
多年來，樂團是維也納的音樂協會會堂及巴黎香舍麗榭劇院的駐場演奏家，
每年更在香舍麗榭劇院劇院演出多次。

自一九二零年代初以來，樂團為歌劇院及音樂會演奏的錄音無數，
多張與指揮大師和獨奏名家合作的演奏，更成了經典之作。
最近替德國唱片公司灌錄的唱片，
是與紀慕、沙羅倫、郎朗、聶翠柯、費亞松、加索荷夫、柏比等名家合作。
樂團在雷西指揮下，
灌錄由新力古典唱片公司製作的理察-史特勞斯管弦樂作品第一套專集，推出後大受好評。

二零零七年四月，在布魯塞爾一個隆重典禮上，
德累斯頓國家管弦樂團獲頒授「世界保護音樂遺產歐洲文化基金獎」，
是迄今第一個也是唯一獲此榮譽的管弦樂團。
二零零八年十二月，英國古典音樂雜誌《留聲機》選舉世界十大交響樂團，
德累斯頓國家管弦樂團再次榮登榜上。

>>May 4, 2009 at 5:35:46 PM GMT+8

2009 年 5 月 2 日 星期六 【晴】

晏一晏先起身
不過同樣係早過 1200
仲要係 1130 就起身
一上網 Konnie 就搵我
仲諗住一鼓作氣練琴添

Konnie 又試病
今次又係感冒
豬流感肆虐既期間病
真係危險

由於尋晚咁努力打既日記都唔可以上載至 showhappy
所以 send 左畀 Konnie 睇
睇完之後 Konnie 話根據資料, 野生袋鼠都係訓到一 pat pat
唔單止困響動物園會搞到咁
當我話 D 袋鼠懶既時候, Konnie 講左一句就令我無野講
就係：「你唔駛返工果陣咪一樣......」

黃不可講左一陣就溫書
但係話溫書無耐就打畀我
之後就無無聊聊講左半個鐘
直至藥力發作 Konnie 就昏迷

臨訓前 Konnie 叫我做人肉鬧鐘
一粒鐘後叫 Konnie 起身
不過有人話要訓多陣
結果藥力過左先醒

食完野 Konnie 又再食藥
睇報紙話有豬流感唔可以食阿士匹靈
否則可能會肝臟受損, 甚至死亡
必利痛有冇既呢？
由於 Konnie 話自己覺得得好番少少, 所以就係普通流感
果然係黃綠醫師

再次問使唔使做人肉鬧鐘
但係當有人答我既時候, 我已經訓左
Konnie 叫我響悉尼時間 2000 叫醒病人
我就響香港時間 2030 先起身

唔係一提醒我, 我都唔記得聽日要聽 Concert
$680 一張票, 不容有失！
所以聽日唔 OT 得！
睇番康文署既節目簡介
藝評如下：
「……是全歐洲最出色的。」貝多芬
「……這隊舉世無匹的樂團，總一次又一次從我內心引起感激與欽佩之情。」理察 - 史特勞斯

原來唔止貝多芬話好
仲有理察 - 史特勞斯
但係點解過左咁多年, 無個新少少既音樂家讚好既？
不過連肥仔尋日聽完今日都想聽多次
應該無問題既....

>>May 3, 2009 at 4:30:17 PM GMT+8

2009 年 5 月 1 日 星期五 【晴】

又係 1200 先起身
起身至到 1430 先有飯開

今日約左豬 Ray 聽 concert
所以 1700 就出門口
1740 到達
諗住豬 Ray 好少遲到, 所以好放心唔打電話 confirm 時間
先去三聯, 再去大眾

1800 都未有電話打黎
於是打畀豬 Ray
居然遲到！
原來有人目送架車走
但係架車只係近車門地方擠塞, 車尾部份就好鬆動

到左既豬 Ray 唔知大眾響邊
所以我要行落戲院果層會合
食雪國, 邊食邊吹水
同埋講番澳洲異地重逢既經歷
講講下發現唔見左對筷子
估計係食食下畀人收左
連同一開頭無人 serve 我地, 以及連 Menu 都唔拎畀我地既經歷
下次叫我再幫襯都幾難.....

食完行去葵青劇院拎票
拎完無野做, 繼續吹水
坉鴩荌筑I今個學期就唔教國王書院
轉會至盛棵男女
轉會要三個月通知, 仲耐過肥仔
不過官校都真係有危機, 如果上面有人派人黎做
就會無啦啦唔同你續約
諗起都心寒

今日聽既係彈撥樂
有兩首中阮協奏曲
話就話係協奏, 但係得個名, 都唔係協奏曲黎既！
不過彈既人彈得唔錯, 歌都幾有難度

其餘仲有琶策P柳琴
不過琶筋J表現麻麻
柳琴就比麻麻更麻麻
同樂隊夾唔齊

聽完同 JJ 吹左幾句水
又講起上堂事宜
肥仔返左香港做野, 時間應該易就 D 既
希望可以響 JJ 由歐洲返黎之後無耐上番堂啦

返歸
埋首打日記工作
卒之完成 20090411 既日記
咁就打到 0230
但係未能上載至 showhappy
到底你幾時可以回復正常呢？

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
回應留言

我唔係亂作喎
只係理解錯左你講乜o者
又唔係有心既
你見到咪話我知咯
使乜講到要忍我好耐咁嚴重呀！？
宜家好大件事咩？

>>May 2, 2009 at 7:07:19 PM GMT+8