2008 年 2 月 13 日 星期三 【晴】

趁仲未有咩人返工, 今日搵爸媽來學校附近與我飲茶啦~ 佢o地好鐘意去飲茶, 對於試勻各酒樓的下午茶很有興趣, 所以都很願意由大埔出o黎彩雲村飲茶. :) 不過飲下午茶則太晏了, 都係要俾貴少少幫趁午茶時段... ^^ 食食o下o野愛姨打電話俾媽咪, 知道佢出o黎同我飲茶又想出埋o黎, 但佢響上水呀, 出o黎都要成個幾鐘, 都係拒絕o左佢了.

每次同媽媽相見都好多o野可以談, 始終我實在很少回家見到佢. 以前一起住, 見得多, 有時都會覺得爸媽嘮叨; 而家見少o左, 反而會更珍惜相處時間. 所以比起家姐, 我會更喜歡和爸媽一起去旅行. :)

的而且確, 我見男朋友仲多過見屋企人呀~~ 而家阿哥都搬埋出去住, 一年都唔知有冇見到十次, 只係過時過節返大埔食飯、或者我地之中有人生日約出o黎食 buffet 才會見到面, 我平日又好少同佢電話聯絡o既 @_@. 不過我o地三兄妹自細就感情好好, 所以見到面都好似以前一齊住咁. 之不過我知哥哥和家姐佢o地會談o下心, 我就不會了... 始終我年紀同佢o地隔遠o的, 而家姐和哥哥的性格、嗜好、成長經歷都比較相近 (佢o地只係相差一年), 所以特別會談得來.

媽媽說, 佢三個仔女三個唔同性格, 佢都用不同的方法待我地. 比較明顯o既係, 爸媽會比較讓哥哥家姐自由發展, 對我則比較愛護有加, 因為我在家人眼中, 似乎是不能受任何風吹雨打(抵受不了?!). 這是因為我是家中最小麼? 自小我就在溫室中長大, 在家人的極力保護下成長, 就算而家長大了, 在爸媽眼中仍是長不大的. ^^ 還記得幾年前學車, 單單只係去駕駛學院報名, 我媽都親自出動幫我去格價, 報名時爸媽和家姐都出晒o黎同我一齊去報名, 我都覺得好攪笑, 男朋友更加覺得好誇張... 中學時, 媽媽驚我俾細路蝦, 唔俾我暑假幫人補習, 所以中學年年暑假都吽在家. 我是在新界成長的人, 細個都唔係成日出九龍, 記得中七時我仲未識搭地鐵 (以前一年才搭一次去拜年啊... 在大埔出九龍都係搭火車或巴士! 我讀 U 時才因為環境迫使我去學.. 因為我讀的是港島區的 HKU), 有次和表妹去街, 媽媽竟吩咐小我 4 年的表妹照顧我... =_=" (諗返起都覺得荒謬, hahaha!!!) 媽媽驚我辛苦, 讀大學開始就讓我搬出去和同學租住近大學的屋子, 出o黎做o野都買間近學校的樓俾我住方便返工. 記得她說過, 在我的學業、事業中, 她幫不了什麼忙, 只要爸媽負擔得起, 他們會在其他方面盡量令我舒適, 減低我其他額外o既o野的勞碌.

以前哥哥和家姐曾經話過媽咪對我過份照顧, 但媽媽不認同... 小時候我讀書叻, 但我認同哥哥所講, 我是個天才大白痴.

至於男朋友卻正正相反, 自小便很獨立了. 所以他比我更能經得起風浪, EQ 也比我高. 他會羨慕我家人咁錫我, 但我卻覺得越受保護、見識也越少. 出o黎做o野便覺明顯, 好common sense 的東西原來我都不曉. 但時間過去了, 也回不了頭, 唯有好多o野而家才去學. 凡事有好也有不好, 不過若俾我揀, 我仍會揀響我這個幸福家庭中成長. :)

>>March 30, 2008 at 2:23:43 PM GMT+8

2008 年 2 月 11 日 星期一 【晴】

話說前日上網見到東瀛遊已經出o左復活節價錢, 見到有個 7 天華東團好抵, 即刻話俾媽咪聽, 今日就報o左名了! 好快好快~~ 真係未試過一個學生假期未完, 就報定下個假期的旅行團... 哈. 今年香港旅遊業生意暢旺, 旺季旅行團好多都好早爆滿, 今次咁早報一定未爆啦, 不過唔知到時成唔成團呢? 個職員同媽咪講話好大機會成喎~ 聽住先啦. 今次愛姨都跟埋去, 好呀! :DDD

其實讀 Year 2 放暑假時, 同爸媽、家姐都去過華東, 但那時是 5 天團, 沒去南京. 加上那時我對旅行不是特別好有興趣, 屋企人去又會帶埋我去咁, 記得去過那幾個城巿, 但對當地既環境的印象都比較模糊, 因為對行程心不在焉. 加上當年跟關鍵安排極之差, 而爸媽而家都想重遊華東, 所以今次再揀個華東團呢.

講講o下又諗返以前去旅行的事... 第一次去旅行係 11 歲時跟童軍團去廣州, 小學那旅團攪o左個好大型的交流團, 幼童軍三團、童軍一團、深資童軍一團, 連埋領袖和同行家人成百幾人去. 之後都跟過去北京交流, 不過都係冬天去, 加上水土不服, 我病到七彩... 都唔係好記得自己去過邊 (所以我第日一定會重遊北京!). 以前去旅行係帶個驅殼去咁, 個人係踩過那幅土地, 但個心完全唔知行程, 去過邊度好快又唔記得, 因為唔係我選擇, 唔係自己比錢去亦唔會珍惜. 響咁既情況之下, 最奇怪我 Year 2 暑假可以係去o左三個旅行團.. @@ 去華東5天、台北5天係跟埋爸媽和家姐去, 即係佢o地去又會帶埋我去咁 (我咁唔在意卻又會就我暑假去喎!), 兩團中間有 5 日空檔, 家姐又"挾帶"o左我去日本東京... 純粹因為佢想去, 那時唔敢自己去, 見個團只係 $2799 (6月淡季, 那時讀 U 5月已經考晒試), 簡直超值啦~ 好記得家姐當時係咁同我講個行程, 叫我去埋, 我只係"哦, 哦, 好, 好"咁... again, 錢又唔係我出, 可能呀媽見平平地就俾我同家姐去啦 (爸媽幫我俾錢). 去過邊!?? 真係唔知... 直到而家, 我都只能同人講, 我係去過東京囉 @@.

而家去旅行要自己俾錢, 又可以自己選擇地方和行程, 情況當然完全唔同啦~ :p

>>February 13, 2008 at 3:55:49 AM GMT+8

2008 年 2 月 10 日 星期日 【晴】

四日假期話咁快就過了, 好唔想返工呀~~~ >_< 好難得可以連續 4 日都留在大埔, 每日過著訓覺、食o野、打機、睇戲既生活, 日日訓到中午至下午自然醒才起床, 好爽~~ 唔知等到幾時才可以咁, 因為以往放假都去o左旅行, 去旅行仲早起身過返工呀~ 日日都好忙咁趕行程o架~ hahahaha...

以前都好爭取星期六日的日子, 一得閒近近地都去o下深圳玩o下. 但自從開始儲錢之後, 人都變得孤寒o左 @_@, 去玩意慾大減. 之前有諗過去澳門玩兩日, 但自從一間間睹場開始掘起, 酒店房價錢貴o左好多! 而家book(乙水)仔酒店一晚o既價錢竟然仲貴過澳門半島同級的酒店, 相信都係多得威尼斯人, 結果計劃告吹, 睇o下幾時或許來個一日遊(即日來回)吧~ 不過仲係冇乜意慾想去短線遊...

不過假期搭飛機既旅行仍很有興趣, 我仍期待三月的復活節假期同爸媽去旅行的. ^^

>>February 13, 2008 at 3:29:07 AM GMT+8

2008 年 2 月 6 日 星期三 【晴】

大年初一, 恭喜發財! ^o^ 今年過年比往年凍, 亦係比往年最冇新年氣氛(對我一家人來說)... 因為有一位老人家親戚沒久之前過身了, 他那邊的一班親戚不方便到別人家拜年, 不如一班人去旅行了, 反正真係好難咁多人全部都放假. 咁我o地每年年初一都係去佢家拜年, 所以今年不用去了. 以往年初一會逗到很多利是, 今天只有爸媽的兩封.

今天很凍, 好似得 8 點幾度? 大埔仲凍, 我昨晚已經著住長袖底衫+羊毛長袖底衫+樽領衫、羊毛長褲+長褲、密指手襪、長襪(但不厚)去訓覺, 仲要唔理焗唔焗照關晒房門和窗訓覺, 但整晚腳總是涼浸浸, 到朝早 8 點鐘, 唯一暴露於空氣中的面部因為太凍, 我便被凍醒.... 一﹏一" 難道我要戴埋口罩訓覺麼!?

由於大埔家只有薄薄的襪, 今晚要著兩對襪訓覺至得...

p.s. 我的確又比較怕凍~

>>February 8, 2008 at 6:16:26 AM GMT+8

2008 年 2 月 4 日 星期一 【晴】

今日放工去o左深水步買wii, 買機去某鋪頭買, 手制和配件去另一間專買配件的鋪頭度買... 平好多!

價格如下:

wii機+變壓器 $2200
手制 $420
直插 $40
色差線 $30

另外買o左一個 NDS 硬膠殼 $12 (抵!)

Wii合共承惠 $2690~ :) 返家試機時都玩o左陣, 真係好好玩.. ^^

由於明天我放工直接返大埔, 唔想拎住兩大袋o野返學校, 所以等爸爸出鑽石山家幫我拎部 wii 返大埔先再有得玩呢.

>>February 6, 2008 at 12:55:47 PM GMT+8

2008 年 2 月 3 日 星期日 【晴】

今晚去了維園行花巿. 我們就是年年都會去, 唔係想買o的咩, 純粹去行o下迫o下咁 :p. 今年o的貨品沒什麼驚喜, 好多上年已經賣緊, 不過我地都買了三個公仔揮春. 次次去到我o地都會買o野食, 今年想食返上年的燒魷魚, 點知由 $28 加價到 $38, 貴咁多! 於是轉o左買 $20 包的韓國焗魷魚... ^^

>>February 6, 2008 at 12:48:57 PM GMT+8

2008 年 2 月 2 日 星期六 【晴】

剛過去的星期五同屋企人食 buffet 補祝我生日, 家姐忽然提起 wii, 我都覺得好玩, 媽媽便二話不說拎錢出o黎叫我o地去買了~! (前後不過一分鐘, 媽咪買o野俾我o地係特別豪爽o既.. :p) 於是男朋友便被委以重任過年前幫我o地買, 包埋安裝+試機~ :p

今朝和幾個朋友去打羽毛球, 食埋 lunch 之後一起去旺角睇 wii 格價. 其實我都想屋企有部玩, 不過逛的時候不太投入, 一來累, 二來我係想要件實實在在的 product 而不 enjoy 格價過程. 反而男朋友很重視呢個被阿強稱之為 "大 project" 的任務 (哈哈哈哈~~), 好積極投入去做資料搜集和格價. 阿強更唔話得, 同埋我地一齊格價和俾意見, 佢幫朋友係最落力. :)

第日部 wii 會放在大埔家, 好處係有大o的o既空間玩同埋有大螢幕, 唔好處就係我好少有機會玩到囉~ @_@

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今年凍得特別久.. 我已經將去旅行才出動的保暖衣物拎晒出o黎著. 由於幾日才洗一機衫, 天氣又潮濕, o的衫晾上好幾日才乾透, 開始發覺保暖衣物只係僅僅夠循環著... @_@

由於已經習慣了住在九龍區, 遲o的過年返大埔住, 天氣仲係咁凍, 新界仲要再凍o的, 真係死得~

>>February 3, 2008 at 5:11:46 PM GMT+8

2008 年 2 月 1 日 星期五 【晴】

今天家姐 + Macy + 男朋友來了我鑽石山家吃 Haagen Dazs 朱古力雪糕火鍋 (家姐請! ^o^), 我和男朋友之前去買一些生果、麵包、薯片等食物伴火鍋吃. 雖然 Haagen Dazs o的雪糕味道係幾特別、有特色, 雪糕也很好味, 但真係唔明點解可以咁貴. 曾經聽人講話覺得雪糕係滑o的, 不過我又食唔出... 最唔明o既係, 點解家姐年年為o左續佢個會員証而成日花咁多錢去買雪糕食?! 好似o的信用咭咁, 為o左儲多o的積分換某份禮物而去碌多o的... 不過我都唔好話人o地, 我自己買護膚品儲積分、買衫買鞋買多件又有折頭等等... 咪一樣係咁... XDDD

下午同男朋友去了荷里活睇《長江 7 號》. 其實我好少去戲院睇港產片, 可以話冇咁濟, 因為我成日覺得花幾十蚊去睇套戲, 應該要睇o的大製作的西片才"值", 而我睇戲亦純粹為娛樂. 其他o既, 可以遲o的買碟睇, 再唔係有時搭長途飛機都大把戲揀. 不過今趟要陪一個超級周星星電影迷去睇, 以免俾佢話我拍拖前和拍拖後都係唔肯同佢睇周星星的戲... heehee! 睇完覺得 ok 啦, 一般, 以前o個o的攪笑o的又好睇o的, 不過臨尾意外發生後o個幾幕係幾感人, 睇到我眼濕濕... ^^"

>>February 3, 2008 at 5:00:38 PM GMT+8

2008 年 1 月 28 日 星期一 【晴】

某晚臨睡前通電, 他已經眼訓到有點迷糊, 迷糊中他告訴我他早前發的一個夢... 夢中他看見我抱著呀B, 手抱咁大的, 不知是男是女. 聽著心裡有點甜絲絲, 我高興他造了這個夢, 真係發夢都希望同我建立一個幸福的家, hahahaha~~~ 由於他太眼訓的緣故, 我們掛了線, 讓他去睡了.

但.... 到了第二晚, 我追問他夢境的細節........ 他竟然什麼都記不起!! 激氣!!!! 連跟我通電時說過什麼都記不起了!! 究竟你係咪真係發過呢場夢架??! >_<

>>January 29, 2008 at 9:51:51 AM GMT+8

2008 年 1 月 24 日 星期四 【晴】

今天看了一篇和我有關的新聞, 將它記錄下來做 reference.


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

《頭條日報》 25-1-2008

中大新耳瓣手術 治膽脂瘤見成效

因耳咽管功能失衡，中耳反覆感染，最終引發而成的膽脂瘤，可致失聰，甚至
形成腦膜炎。傳統治療手術效果未如理想，令患者有機會持續流膿，但中大於
八十年代發明的耳瓣手術，可以一次性手術解決舊有問題，三百名曾接受手術
的患者中，逾九成人的膽脂瘤能徹底被割除。

嚴重可致腦膜炎

膽脂瘤是一種常見但有潛在危險的慢性中耳病，根據統計，全球約有一千萬人
患有膽脂瘤，而本港現時有百分之二的人患有慢性中耳炎，當中有五十分之一
有膽脂瘤後遺症。

膽脂瘤需要二十年時間形成，病因是由於連接咽喉和中耳的耳咽管功能失衡，
中耳反覆感染，令鼓膜上皮細胞不正常地向中耳生長，致流出膿液及弱聽。當
膽脂瘤型中耳炎發展成囊腫狀後，脫落的皮層會不斷累積，耳骨附近會受破壞
，若不治理，更可導致腦膜炎及腦膿腫。

中大頭頸外科系系主任尹懷信指，患者接受傳統治療膽脂瘤手術後，原有傷口
可能不能復元，令他們的耳朵持續流膿；但中大於八十年代發明「香港耳瓣手
術」，便可解決舊有問題，利用耳內深層筋膜填補傷口，令傷口不再流膿。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

適逢今天覆診便看到這篇新聞, 之前讀 U 讀 hearing 時都有讀過少少有關膽脂瘤的東西. 我係全港百分之二的慢性中耳炎患者的其中一個, 不過希望我唔會成為當中五十分之一有膽脂瘤後遺症的一人.

>>January 29, 2008 at 1:59:21 PM GMT+8