2008 年 10 月 16 日 星期四 【晴】

今日譚老師話我瘦o左好多... 其實我自己都知自己呢排有o的唔妥... 睡得不好, 不論我幾點上床, 都係要成 00:45-1:00 甚至更夜才能入睡... 朝早六點幾總會醒一醒, 跟住又訓得唔"林"... 有時半夜人有三急去完廁所又訓唔返.... 試過成 30-45 分鐘後才能再入睡... 近日更加食慾不振, 係唔想食/冇o左食o野o既興趣... 曾幾何時我都好為食, 係咁食零食... 而家冇乜咁濟.... 午晚兩餐一個細細的飯盒都食唔晒... 但我又真係覺得飽先唔要個喎... 人又冇乜精神, 好冇 mood... 尤其一到星期五, 很累很累...

昨晚去 Physical 磅, 輕o左, 但似乎踩入o左警界線... 現返 8 字頭... 不過我著返鞋磅又會變返 9 字頭o既... o_O

我都有諗過點解會咁. 可能呢排有o的壓力? 無形壓力?? 我都唔知我有咩壓力...
食方面, 我某一段時間食得多會食大o左個胃, 會係咁食o野食零食... 呢排食少o左, 個胃縮o左水, 食好少好少o野就飽... 係少到我都覺得奇... 例如今日晚餐 = 壽司 x 3 件 + 赤貝刺身 x 4 塊 + 燒牛肉 x 1 件 + 少量燒魷魚, 返到屋企飲了些果汁先生橙汁, 飽o左成晚, 個胃有點頂住頂住的感覺.

為o左正視呢個食得太少的問題, 頭先即刻去百佳買o左百幾蚊零食... 不過原來而家物價高漲, 百幾蚊只係買到 2 盒 Dreyer's 雪糕 + 2 包大薯片 + 1 筒 Lays 薯片.... =_=

早前男朋友扭傷了腰, 照 X 光卻發現有一截脊骨有輕微退化, 提醒了我倆要多飲高鈣牛奶/荳奶的重要性. 但我飲一盒 100ml 足以令我飽好耐... 朝早食個包加盒奶, 盒奶可以飲到 11 點幾先飲完, 影響了我 lunch 唔太食得落; lunch 期間飲會令我食少o左飯盒o的(食送), 如果改 lunch 之後飲我又飲唔落; 我又習慣 7pm 食晚餐, 前中後時間飲同 lunch 的問題一樣; 臨訓前更加唔好飲, 我唔想頂住個胃訓, 又唔想半夜又要去小便影響睡眠.... 飲盒奶都可以攪到咁煩 =_- 我諗係我太易飽, 咁唔正常先會煩... 邊有人飲奶會飲瘦個人o架 =_=

最後結論係: 相信我訓返好o的, 各樣o野都會改善到, 因為長期唔夠 → 冇精神 + 冇 mood + 食慾不振. 觀察多一排睇o下點...

>>October 17, 2008 at 3:58:21 PM GMT+8

2008 年 10 月 10 日 星期五 【晴】

原本約好o左同阿強等一行 6 人去深圳兩日, 主攻去食o野 (阿強的意願!), 點知男朋友星期日要開 OT, 所以我o地甩o左底冇跟埋上去了. 不過今日我o地都另外搵o左節目 --- 去迪迪尼!

我o地遲遲都未去迪迪尼, 係因為之前朋友搭朋友在迪士尼度做, 原本一早免費去o左, 但佢星期六日唔方便帶人免費入場, 等到我可以閒日去時 (學生假期) 佢都冇o係迪迪尼度做了... 即係都係要俾錢入場啦. 但由於傳聞中的香港迪迪尼太小, 感覺唔值得而家俾三百幾蚊去, 想遲o的開多o的新o野玩先. 不過今次趁佢萬聖節的「黑色世界」多o的o野玩o下, 又延長樂園時間至 11pm, 所以一於去啦~~ 暫時見最抵係去工聯會買飛, 平 $30/張, 不過要你本身係會員先得~ 我o地卒之可以 $320/張 買到. :)

個樂園又真係細o左o的, 去一日都可以行得晒. 日頭o的遊戲冇乜人排隊, 有o的等 10 分鐘就有得玩, 最耐都係 30 分鐘左右 (鬼屋). o的機動遊戲又真係幾低能o既, 哈哈哈哈~~ 不過o岩我啦, 我而家好多o野都唔玩得, 「黑色世界」個 Space Mountain 最激得o黎人人都話唔夠時, 我玩完已經頭暈暈叫晒救命... =_=~ 此外, 好在我o地趁 6:30pm 夜場開始前玩o左部份「黑色世界」的東西, 唔洗點排隊, 一到夜晚就超長龍!! 最後夜晚我o地淨返一間鬼屋要排成個鐘先玩到~

去到邊我都係鐘意影相多o的, 樂園入面好多影相位. 我最鐘意睇煙花, 好靚啊~~ 其實我未試過現場睇煙花呢 (唔計去北海道時試過坐船睇過少少... 爆得果幾o野, 又唔係靚) 其次係鐘意睇花車巡遊~ 今次多o左個萬聖節主題的花車巡遊, 不過我都係鐘意普通迪迪尼o既花車, 我都係鐘意靚o野/得意o野多o的~ :p

食方面, 好多食巿喎, 樂園食o野當然唔平, 不過可能預o左會貴, 所以覺得佢貴得o黎又好合理. 不過我食量唔多, 一個餐我一定食唔晒, 所以午晚兩餐都係買一個餐兩個人 share 食. 反而買o野買o左 over $500... 鬼叫我都好鐘意米奇老鼠咩~ O_O

去到迪士尼站o既時候大約 10:30am, 走o既時間係 10:15pm, 逗留o左接近 12 小時! 玩得好開心, 去邊度同你玩都會好開心!! ^___^ 香港o既迪迪尼去過了, 唔知幾時可以去到東京迪迪尼呢?? 我要自助遊去晒兩個樂園個喎! :)

>>October 12, 2008 at 7:16:56 AM GMT+8

2008 年 10 月 5 日 星期日 【晴】

我至憎攪校慶....
加重工作量之餘, 組長永遠都係一個夾心人...
既要聽上頭o個班人o既指示, 又要做醜人搵組員幫手做乜乜物物....
我最怕叫人做o野, 做得掂o既我鐘意自己快手快腳攪掂佢
兩個組長之中我好少做決策/決定邊個做o的乜, 但仍然要係我開聲叫人去做o野
組員做好o左既o野唔到我去欣賞, 因為最後收返o黎都係要大改一場...
話俾自由度我o地, 可唔可以唔好又要求多多;
可唔可以一早講明有咩要求先叫人去做... 我最怕做中間人又要人o地去大改
明明遲o的都係要俾錢人去 design, 點解又要我o地去 design 埋先再交俾人去 design... 搵o黎攪
要我o地盡快交稿, 但你o地又遲覆稿, 想點
可唔可以 10 年先o黎一次校慶?? 最好唔好攪添, 都冇人會同我o地普天同慶o架啦~ 一﹏一
.
.
.
.
.
.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呻完........
聽朝訓醒, 都係要繼續攪校慶o的o野.... ~_~
希望快o的到當日, 事件才能有個了結!! >_<

>>October 7, 2008 at 4:57:28 PM GMT+8

2008 年 10 月 1 日 星期三 【晴】

小小的人生交叉點, 好多疑問... 謝謝男朋友的耐心聆聽、媽媽的意見, 特別鳴謝 Brian 的有用資料和意見, 佢解答o左我 98% 的問題之餘, 從佢口中我仲得到好多一直都冇諗過的資訊, 佢最清楚所有o野~~ 呢餐 buffet 一定唔少得! :DDD

其實心入面都好多謝某個人的安排, 不過我真係唔知點報答佢喎~ :O

>>October 1, 2008 at 4:40:49 PM GMT+8

2008 年 9 月 30 日 星期二 【晴】

十一國慶假期, 今日去o左迪欣湖+東薈城. 在迪欣湖行o下抖o下影o下相都待了兩個多小時, 幾 hea, 難聽d係... 真係幾無聊喎! XDDDDDD 不過拍拍拖去行冇乜所謂啦, 都係消磨o下假期 :)

之後去了東薈城, 在 I.T 買了皮帶一條, 另外在 columbia outlet 買了行山鞋一對. 我試鞋時有 2 名自由行小姐想搵我夾單, 因為買 3 件貨品可以再 8 折, 佢o地揀o左兩件羽絨. 我其實都驚佢地會唔會呃我呢... 不過都照去馬啦~ 佢o地其中一人碌咭, 我o地俾返 cash 佢. 結果我對鞋買平o左, 佢地 total 又慳o左有二百幾蚊, 大家結賬後都互相多謝大家~ :)

男朋友成日話我dup低頭就有草食(話說有次我無聊send o左一篇講運程o既文章俾佢睇, 其中一句話我係一出世就"垂低就便有草吃"的人, 佢就生成勞碌命+不受人重視... 我們成日拎o黎當做笑料 :p), 今日真係dup低頭試鞋就無端有額外 8 折, 哇哈哈哈哈~~ XDDDD

>>October 1, 2008 at 4:45:17 PM GMT+8

2008 年 9 月 14 日 星期日 【晴】

中秋連放三日假, 當然唔會放過呢o的日子去玩啦~ 早於 8 月尾就報o左團, 我和四方、瞳瞳、Ray一行四人去, 原本四方有兩個朋友後尾都想 join 埋, 但個團 4 架旅遊巴都爆滿, 沒法子 join 埋了... 如果我o地 4 個遲一日報名都報唔到呀!

13/9 (六) -- 由於瞳瞳要返工, 阿Ray要返工+返學, 所以一早 plan o左只能報 2 天團而去唔到 3 天. 不過呢日我等阿Ray 6pm 放學後, 就先行上了深圳樂園路吃海鮮和 dup 骨過夜. 平日上開深圳幫趁開的海鮮酒樓, 原本好食夾抵食, 點知而家....... 要 blacklist 佢一排先得! 食完海鮮晚餐好滿足, 然後打的去了「金色陽光」dup 骨. Again, 以前幫趁開o個間貪佢平平地, 上次去服務差了... 所以今次改去呢間, 貴少少, 但服務比起以往o個間好得多了.

14/9 (日) -- 6:45am 起身, 梳洗沖涼, 搭了按摩中心架車返羅湖火車站, 因為個團於 8am o係羅湖集合. 早一晚上深圳真係好好多, 至少可以訓晏o的, 又唔洗紅日過關要同人迫~~ 同四方和瞳瞳於口岸餐廳會合, 待了約 15mins 個團便出發了~ 一上旅遊巴便倒頭大睡... 中途去食 lunch, 去o左一個不知名的無聊"景點"... 下午約 4pm 到達廣州九龍湖公主酒店了! 成個景區造到歐陸式咁, 好靚呀~~ 酒店房又超大, 去咁多次旅行真係未住過咁大間酒店房, 個廁所有我鑽石山家個廳咁大... 我o地去了個湖度游水, 夜晚有 buffet dinner 和晚會.

15/9 (一) -- 朝早基本上都係酒店內自由活動, 個團包埋可以去玩水上單車和遊船 (原本可以玩 golf... 可惜要少數服從多數, 團友們好多都揀遊船囉 -_-). 中午 check out, 要離開呢間正正酒店了... 再響酒店內吃圍餐, 然後搭返旅遊巴返深圳, 又去了一個無聊"景點", 再乘車返羅湖解散. 我和阿Ray之後就搭深圳地鐵去大劇院站的「中森名菜」吃日本菜做晚餐. 激氣呀, 一心去係想食個超級巨型的芒果冰沙, 點知點菜時才知冇呀~~~ >,< 都冇計啦..... :( 食完就返香港了, 唔想太夜走, 驚人多~~

呢個團其實幾 hea, 主要都係享受o下九龍湖公主酒店o的設施. 都好呀, 悠悠閒咁過o左個短假期, 也很開心~~ ^_^

>>September 17, 2008 at 3:20:41 PM GMT+8

2008 年 9 月 11 日 星期四 【晴】

放工有忽然而來的娛樂, 就係去睇張達明的楝篤笑~ 其實昨天已經知道可能有得去睇, 不過今日先confirm囉. 事緣男朋友公司一個 vendor 送出 2 張 tickets, 佢呀頭今日話唔去, 所以變o左我同佢有得去. 地點係九龍灣展貿 EMAX, 睇個 talk show 之前有個 pre-show party, 先o黎每人送隻 USB 手指 (用個盒裝住, 攪咁靚做乜 @_@...), 我仲要貼住阿 Ray 公司個名響心口... 我公司明明係百周年, 要我貼住別間公司名, 感覺極之奇怪....

個 vendor 安排了"buffet" (小食為主) 和抽獎, 我去到都係以食為先, 至少醫飽個肚先去睇 show o丫~ 第一次去呢類形式的 business gathering, 真的不慣... 人不多, 男的恤衫西褲女的 OL look... 我還是最 causal 的一個 @_@. 阿 Ray 有時俾個 sales 捉住傾偈, 我就只顧食食食... heehee. 抽獎又輪唔到我o地 (冇運!), 還是一心去睇個 show 好~

其實我對 talk show 興趣不大, 仲要唔係黃子華或林海峰... 不過 free ticket, 算! :p 以為會送 $100 ticket, 點知係最貴的 $380 喎! 坐得 ok 前啦, 睇到張達明個樣咁囉. 有o的比較有共鳴o既笑位又真係幾好笑, 而佢本身都係一名演員, 所以娛樂性有得加分. :p

散場時已經 10:20pm, 個 sales 送俾阿 Ray 張美心月餅券諗住到期又夜了, 都收晒檔關晒鋪換唔到啦, 點知行經德福有間美心 Food2 已經拉o左 2/3 個閘落o黎 (當時都差不多 11pm), 入面有 2 個女人執緊一箱箱月餅, 我o地嘗試拎住張 coupon 行埋去, 其中一個女人見到, 好好心咁都執一盒俾我o地 :) 不過多o左盒月餅都有點煩惱, 我一個人點食得晒呢?? @_@~~

>>September 13, 2008 at 6:05:39 AM GMT+8

2008 年 9 月 6 日 星期六 【晴】

今日同家姐和 Ray 去o左科學館睇《深海奇珍》, 睇一o的深海怪魚o既標本, 值得睇呀~ :) 原本冇諗住申請家庭全年入場証, 反正唔係成日去o的博物館, 但家姐和 Macy (her friend) 都有興趣申請喎, 咁 4 個人就可以以 $200 申請 (大家的"親屬關係"當然係老作... hahahaha~~ 佢又唔會審查o既), 每人 $50 就可以全年好幾個博物館免費入場, 都抵o既~ 淨係今次睇《深海奇珍》都要 $25 了.

申請o左, 就鼓勵我o地今年多o的去參觀o下o的博物館啦~ :)

夜晚同 Ray 去o左睇《80分鐘死亡直播》.... 睇到我真係想死~~ 我唔嚇得, 真係唔受得恐怖片, 全程大部份時間都要瑟縮於呀 Ray 粗壯的臂彎內 + 掩住耳仔睇... 好有貼錢買難受的感覺!!! =_= 我要重申一次, 我以後唔要再睇恐怖片!!! >___<

p.s. 爸媽今日出發去以色列... 連以色列都去埋了, 第日又少個地方可以揀同佢o地去了 =_=...

>>September 7, 2008 at 4:19:24 PM GMT+8

2008 年 9 月 4 日 星期四 【晴】

無意中發現以前的相, 主要係大學時期和朋友去玩時影的相. 這段時期開始興起數碼相機, 身邊好多朋友都買一部玩, 所以特別拍得多. 一睇就呆了, 而家終於明白點解自中學到大學以o黎, even 出o黎做o野第一年, 個個都話我太瘦了.... 睇返o的相, 那時真係好瘦好瘦, 個身成支竹咁, 得返個頭... 怪不得有同事話我以前好似一支牙簽篤住粒魚旦咁, 哈哈哈... -_-

一個人十幾廿年o黎都係咁瘦, 人o地話佢太瘦佢自己唔覺的... 應該話, 當時我知道自己係一個瘦人, 但唔知瘦o既程度係咁厲害... 咁多年o黎 keep 住得 86-88 磅, 有時會仲輕o的. 但實在沒法子, 那時讀書壓力大, 我食極都係咁瘦... 直到出o黎做o野冇o左讀書的壓力, 做o左一年o野開始熟手了, 壓力減輕了, 人才漸漸長肉, 肥返o的係比起以前好看些. (不過早前卻肥得有點失控... 最重o個時大約 97-99 磅, 對比起我的身高真係不得了, 肚腩大, 手臂又粗... 節食o左一排又輕返幾磅.)

早排去 Physical 做 gym, 磅o左幾次都係 91.9 至 92.7 磅. 其實比起以前都只係重o左幾磅, 但睇落差別已經很大了... 真係唔好睇少呢幾磅肉. 不過我想消滅我肚腩、大脾和 pat pat 的肥羔, 估計 90 磅左右呢o的肥羔會消失吧, 而同時又不至於太瘦, 希望做gym夾多o的大脾、跑多o的步, 同時食少o的雜食, 可以快o的達到目標! :)

p.s. 某人睇完我o的舊相響度狂笑.......... 一.一 佢話我以前個樣好 cute... 又好驚訝我個口點解會咁大... =_= 冇計呀, 人o地o個陣時未箍牙嘛........

>>September 7, 2008 at 4:20:47 PM GMT+8

2008 年 8 月 26 日 星期二 【晴】

昨晚同Ray, Jess, 超去o左圓方的 The Grand 戲院睇 3D 版《地心探險記》. 第一次睇 3D 戲, 真係好好睇, 好有視覺上的享受! 呢間戲院張椅仲會隨住劇情需要而震動的, 花 $110 睇本來我覺得貴, 但全套 3D 的話都值回票價!

>>August 27, 2008 at 3:18:37 AM GMT+8