2007 年 6 月 8 日 星期五 【晴】

自從某人五月中考完試和交埋 project 後, 我o地個個 weekend 或假期都安排了節目去遊玩. 之前逛過了赤柱和大澳, 又跟幾個朋友去了深圳玩 (吃喝玩樂逛書城), 今日我o地跟教協去了東平洲. ^^

近來天氣陰晴不定, 時有雷暴, 一直都諗緊教協會否取消今天的活動, 不過結果都係成行. 今天的東平洲一日遊共有 50 個團友, 領隊話要視乎天氣才決定需否走捷徑返碼頭, 但最後我o地都成功環島一周, 走遍預定的 6 個境點 (除o左「難過水」沒有行, 亦不是預定境點之一, 係因為比較難行和危險? 還是因為潮漲行唔到? 那兒的確是"難過"的地方啊~). 一邊行, 間中有微微驟雨, 但只係灑一兩分鐘. 我反而喜歡陰天去玩, 因為我怕曬; 不過今天仍很焗很熱...

臨尾去到一間士多, 有半數人先到便先叫飲品, 我o地叫了隊領推介的「三色冰冰」. 飲飲o下, 竟然落起滂沱大雨!! 真係「落狗屎」o個種~~~ 還未到的半數人變晒落湯雞, 真係行得快好世界...

今天的快船較快, 來回程都只需 1 hr 15 mins 到達 (原定搭船時間為 1 hr 40 mins), 所以 5pm 前可以解散了~

下星期六要返工呢, 佢又係要返半晝. 原本都冇 plan 去邊度, 因為得半晝時間唔去得遠, 又唔知去邊度好. 不過適逢星期六日有旅遊展, 上年都有去, 今年都唔會錯過! ^_^

>>June 11, 2007 at 10:33:36 AM GMT+8

2007 年 6 月 7 日 星期四 【晴】

近日常常不期然想起 Wong MH... 唔知佢o係新學校點呢? 仲記唔記得嚴姑娘呢?

原來我仲好掛住佢.

>>June 9, 2007 at 11:54:40 AM GMT+8

2007 年 5 月 4 日 星期五 【晴】

柬埔寨之旅 video 一輯:

http://www.youtube.com/watch?v=cKAl09ZfIH0

多謝呀媽o既攪笑配音, 點解佢好似當o左我響佢附近咁? (以為我聽到佢講o野?? hahaha~~~)

p.s.「逸仔」是領隊 :)

>>May 5, 2007 at 3:48:15 PM GMT+8

2007 年 4 月 14 日 星期六 【晴】

10.4.2007~14.4.2007 柬埔寨 (金邊、湄公島、吳哥窟、女皇廟) 5 天豪華團 PRE05

康泰旅行社, 團費 $4299
(乘搭港龍航空來回金邊, 雙程內陸機來回金邊和暹粒, 住宿兩晚五星級 Inter-continental Hotel)

遊記:

●港龍航空, 不錯不錯~ 座位好 colourful, 飛機餐幾好味~
●柬埔寨, 一個落後國家, 估唔到去到吃的、住的、廁所衛生程度都比想像中好得多!
●柬埔寨 4 月份係最熱的月份, 中午時份曬和熱得很, 佢o地有"鄧小平時間", 很多境點都會於 11am - 2pm 關閉, 所以呢個時間都係俾我地逛室內仍然開放的境點/地方, 或者食 lunch, 甚至會返酒店休息小睡. 所以呢個團幾悠閒舒服, 唔似得去土耳其時咁辛苦: 日日要乾蒸的感覺, 又要趕行程...
●四晚住了兩間酒店, 頭尾兩日在金邊住5星的洲際酒店, 比起一般的5星酒店佢又唔似5星喎, 但都算係不錯. 中間兩晚住Angkor Century SPA and Resort, 4星, 反而呢間又比起一般4星酒店好喎~~ 可惜冇時間游水.
●導遊說, 柬埔寨沒有公共車輛, 最多得 tuk tuk (當地的士. 不過我在金邊機場發現了一架私家車型的的士). 因為剛戰亂不久, 政府未為巿民安排公共車輛和路線, 所以每家每戶都會有自己的車輪, 冇錢買車都會想盡辦法整架電單車.
●第一日架旅遊巴就麻麻地..... 殘舊. 第二日轉了架好o的, 乾淨o的, 但係兩架都冷氣不足. 冇計... o個度o的旅遊巴係咁的, 加上天氣太熱了
●當地人崇拜蛇, 就好似中國人崇拜龍一樣.
●行程中包括一個自費項目 ~ 萬人塚 (killing field): 一座擺滿赤柬統治時期被殺害的人的頭顱骨. 1986 年有套奪得金像獎的電影 ---《殺戮戰場》, 原來係以前一名記者冒著生命危險去柬埔寨實地取境, 然後拍成電影... 最後套戲得到全世界o既人o既注意, 聯合國即刻幫柬埔寨脫離赤柬統治的黑暗時代... 那名記者(唔記得個名), 就成為柬埔寨的英雄. 赤柬統治年代, 殺人無數, 呢個境點好快會拆卸... 就係因為柬埔寨開始漸漸復甦和發展, 名義上係想逝世者遺骸早日火化和得到安息, 實際上是要將歷史醜惡的一面永遠埋葬...
●於萬人塚處會發現一個個 "乙水"... 就係當年埋著無數人民屍體的地方, 係就咁掉入個"乙水"度... 沒有用泥去埋, 以前有好多屍水和傳出惡臭.. 那名英雄記者試過意外掉入 "乙水"中.... 而家已經長滿草了. 邊行會邊發覺有死者的骨、衣物... 聽說有旅客見到, 把它堆放在一旁, 免被人踏中. 導遊說當地人一定唔會咁做, 因為實在太多了...
●旅程中, 成日遇到向旅客行乞的大人和小孩... even 你上o左車, 佢o地依然會拍打你的車窗伸手要錢... 不過他們不一定是行乞的, 有些是做生意的, 賣 postcards、書、T-shirts 等等... 隨時可以隔著車窗交易.
●暹粒機場好細啊, 仲細過一間酒樓.. XDDD 有工作員直接"拎"行李出唻o架, 沒有輸送帶. 呢個機場曾於 1997 年被炸掉, 後來於 1999 年重建並開放給遊客前往, 但實質上到了 2003 年才開始有遊客到訪...
●旅程中的戲肉---吳哥皇城、巴戎廟、塔普倫廟 (《盜墓者羅拉》取境地)、小吳哥窟... 我把相片都混淆了, 分不清哪張是哪處, 花了我不少時間才整理好 @_@
●高棉微笑, 確實係云云微笑雕像之中, 笑得最靚o既一個 (亦係最不被破壞的一個).
●我和家姐爬上了 13 米高、斜度成 75 度既塔!! 我初初只係諗住爬幾級、影幾張相算, 點知爬的容易.. 係咁跟住家姐爬, 唔覺唔覺已經爬o左一半, 一另轉頭影相... 哇!!!! 嚇死我呀~~~~~~~~~ 好斜架!!! 影完相想落返落o黎... 真係上梯容易落梯難, 望唔到梯級... 落唔返去... 唯有繼續爬上頂囉 @_@|| 但上到去個感覺係... 好興奮架XDDDDD 若果想爬o既, 就要快o的去柬埔寨喇, 呢度 2 年後唔比再爬了.. (其實都 feel 到o的梯級被人踏蝕o左, 變得有少少 slippery) 落就可以去另一面扶住欄杆落, 但都唔易落呀. 聽校長講, 佢早幾年去冇欄杆的, 得鐵鍊.. @@
●以前睇旅遊書中小吳哥窟的倒影照片, 以為o個度有一個好大的水塘, 點知去到先知原來只係一個積o左水的水"乙水"... 可能因為仲係罕季, 水不算多. 最可惜係天氣麻麻, 多雲, 影唔到日落的金色吳哥.. 係咸蛋黃都冇隻, 只係睇住個天慢慢變黑 -_-
●去到波布戰爭陳列館, 睇到好多殘殺人的相片, 同埋死者的相片.... 真係好殘忍. 沒怎麼影相, 一來... 聽到咁慘的歷史, 心都 up 晒.. 都唔想影了; 二來.... 當係對死去的人的一份尊重.
●唱o左 US250 去, 最後只係洗o左 US28... 可以留返下轉旅行時用 (如果都係洗美金的話)~

去完柬埔寨, 真係覺得香港人、自己好幸福... 要好好珍惜而家自己所擁有o既o野, 因為幸福不是必然的.

>>April 28, 2007 at 9:23:19 AM GMT+8

2007 年 4 月 8 日 星期日 【晴】

呢個桂林陽朔團真係好抵玩, 原來都有包埋乘船遊漓江o架~~ 食o既安排幾好, 住就一般啦, 三星酒店, 叫做張床整整齊齊, 有水有電視有冷氣囉. 係第一間酒店竟然冇 lift o既, 住四樓... 好在之後越住越好, 真係三星都有分級數. 購物點的確多, 好在佢集中在第二日去晒, 第三日真係純遊山水. 頭尾兩日係咁搭車去和返, 要平就係要付出的了~~ 不過又有度好, 頭尾兩日就係最累的兩天 (第一日太早起床, 又因為係紅日, 好辛苦先迫到火車去到羅湖集合... 最後一日則玩到累了), 咁長車程可以好好休息o下.

我同媽咪分別再自費 $280 遊多三個境點: 陽朔世外桃園、銀子岩、圖騰古道. 銀子岩真係好靚呀~~ 影相都影唔到o的靚境, 因為o個o的水中倒影真係令人目不暇給, 由於個溶洞都幾黑, 影相和拍片都影唔到佢o個種靚法, 真係要親眼去睇o下先得! 世外桃園都係遊o下船河睇山水, 而圖騰古道則有少少"貼錢買難受"的感覺...

「桂林山水甲天下，陽朔山水甲桂林。」桂林已經好靚, 但陽朔真係重靚呀~ (雖然同靚絕的雲南麗江都係冇得比 :p) 第日跟團搭飛再去的話, 一定要揀o的去埋陽朔o既團! 同埋要揀月份去, 四月去天陰陰, 春天天氣又潮濕會下雨, 或許夏天去會好o的. 今次遊唔晒咁多境點, 真係如媽咪話齋, 當俾幾百蚊逍遣幾日、遊o下車河, 唔抱太大的期望, 就唔會有咩失望. ^^"

唯一最差就真係個導遊喇, 佢態度幾好, 但似係新手, 好多o野冇交代好、安排不周. 媽咪話係我唔好彩啦, 佢跟親o的大航團個導遊都 ok 個喎~ (我見隔離 B 團o個個都好過我o地呢團個導遊...) 同埋個團有兩個極之百厭的小朋友, 有個重要坐正o係我地前座.. 有時真係想o係架車度好好訓一覺都唔得...

睇o下幾時再參加大航, 平玩內地短線啦 ^_^. 長線就未必會考慮了~

p.s.: 相片已 upload 上 msn space (30張) 和 yahoo 相簿 (64張) 了~ :D

>>April 15, 2007 at 8:34:52 AM GMT+8

2007 年 4 月 3 日 星期二 【晴】

5/4/2007 ~ 8/4/2007 復活節 桂林 陽朔 四天超值團 (大航假期)

行程：賀州、桂林、陽朔 (巴士團)
團費：$368 (!!!)


一個月前的一個星期日, 我因為有空又貪得意, 跟住爸媽o係大埔四圍去細行旅行社搵佢o地同愛姨去的三天溫泉團... 搵到佢o地幫趁開的大航假期報名之際, 由於之前被 serve 的女士參加一個四天桂林團實在超值 ($399 團費!! 15/3 之前報名減 $30!!), 報名人數仲已經達到第三架旅遊巴了!! 雖然知道爸爸於復活節紅日冇得放假, 但媽媽大力慫恿我同佢二人遊, 於是我響三分鐘之內好急咁決定同佢去, 並即時報名了... 行程都冇乜子細研究, 總之立過眼見到唔會去o的大型境點, 亦明知係一個巴士團, 但實在太平. 在我媽立場, 反正放假, 緊係要離開香港玩啦~~ (咁我都認同o既) 咪當遊o下車河囉... 哈哈. 報名時我都先旨聲明, 我第日實會跟返大型旅行社搭飛機去多次桂林, 去返o的大境點o架! (免得第日呀媽話我waste $$$ 又再去, 因為家姐數年前先後去了兩次埃及和兩次東歐, 俾佢話足咁多年...) 點知媽咪回應一句:「唏, 你咪自己去飽佢囉!」原來佢都話第日都會搭飛機再去多次.. heehee :p

今次我係第一次同媽咪二人遊外地, 媽咪亦係第一次撇甩爸爸去玩, 家姐都話呢個配搭都幾攪笑 :p. 或許在佢立場, 佢見反正呀細女放假, 平平地 (計埋小費才不過 $608!!) 同佢玩幾日, 好過等佢留響屋企咁悶啦? 只是我估. 聽日出發喇, 要 7:30am 響羅湖集合. 之前我都跟過一次大航假期去玩一日, 都係媽咪極力推介又平又抵玩, 都ok o既, 係去買o野地方太多了. 呢個超平桂林團預o左都係咁, 第日可以考慮去o的純玩團 (爸媽一向都係 join 純玩團去浸溫泉的).

>>April 4, 2007 at 5:01:57 AM GMT+8

2007 年 3 月 31 日 星期六 【晴】

原本一早 plan o左昨天去郊遊, 點知早幾日有人個呀頭因為唔舒服, 手頭上有兩張換返o黎o既海洋公園入場卷於 31/3/2007 到期, 送o左俾佢, 於是我o地昨天就改去海洋公園玩了! ^_^

之前兩次去分別係 2005 年的「聖誕全城 ho ho ho」同埋 2006 年的「十月全城哈囉喂」, 超多人~~ 排隊多過玩. 今次算係少o的人喇, 除o左去摩天輪同埋新o既升空熱氣球分別要排半個鐘和個幾鐘隊、動物全接觸睇動物稍為擠迫之外, 其他如睇海獅、水族館、鯊魚館同埋我o地第一次去的水母館都唔係咁多人, good~ (年紀大喇, 唔受得刺激, 冇玩過任何一個機動遊戲.. XD 我怕轉轉轉的機動遊戲, 會暈, 唯一肯玩的跳樓機佢又唔想玩) 個升空熱氣球真係幾搵笨, 假o既, 根本就係氫氣球一大個... 同我去土耳其坐的真熱氣球完全係兩回事!! 算... ~HK$2,000 同免費的分別, 我都冇期望o的乜, 只不過真係冇諗過佢一o的火都冇, 仲要咁易俾風吹得走... 加上有人未坐過, 點都要試o下~ (雖然坐完之後佢都話, 排個幾鐘玩得o個兩分鐘XDDDD) Anyway, 玩緊o既時候升到咁高都係興奮o既, 坐完之後都係開心o既~ 今趟我最鐘意o既係水母館, 真係幾得意, 我係咁影相 :p. 另外動物全接觸剛剛昨天引入, 係呢次遊海洋公園的一個意外 bonus (日子剛剛好去到呀!), 親眼見到咁多珍禽異獸, 見識多o左 ^.^

玩完就去o左銅鑼灣「笑笑」食日本料理, 之後我返大埔家了, 結束了今天開心的一天! 至於一早 plan 好的離島遊, 唔知幾時去返呢? =)

~~~~~~~~~~~~~~~~~~
1/4/2007 後記

原來係自己誤會了, 睇返o的相先知那個叫做「昇空氣球」, 海洋公園可沒說過是"熱氣球"呢... :ppp

>>April 1, 2007 at 3:48:42 PM GMT+8

2007 年 3 月 14 日 星期三 【晴】

日子一天一天的過去, 越來越捨不得 MH.

繼 HM 之後, 其實 MH 係我第二最愛學生 (雖然而家仲多o左個 LS...), 只不過以往注意力較集中在 HM 身上...

他們, 有媽媽愛, 爸爸錫; MH 不同, 出身於一個可悲家庭. 喜歡他, 除了因為他靚仔又可愛, 或許也多一份憐惜.

還記得初入學的 MH 是個插班生, 冬菇頭, 有時爸爸給他 gel 好個靚仔頭才返學, 真的很逗人歡喜! 他還會唱很多兒歌, 雖然全都是唸口簧. 他會發脾氣, 嬲的時候會急唱"有隻雀仔跌落水", 有時見到佢唔合作, 嬲之餘又會覺得幾攪笑. 初跟他上課, 我同佢爭持過 --- 哭聲響遍全層, 初時我都俾佢嚇親... 一堂又一堂的堅持, 他終於"屈服".

教 HM 不會有太大的滿足感, 因為進度不大, 表現也很反覆. 不過, 當他終於認得我係"嚴姑娘"、常常"我想去輔導" (雖然佢未必真係想, 或許只當我個房係個避風塘, 因為少了很多課室裡要求的秩序); 至到今年佢第一次跑向我身邊、笑著、望著我、捉著我的手自發叫了一聲"嚴姑娘" (係第一次, 也是唯一一次), 都給我無限的驚喜.

我明白, 一個 A 仔進入一個家庭, 會為家人帶來無窮的壓力. 由於家人情緒上的困擾, 導致種種問題, 同時引發他的情緒波動 --- 惡性循環.

妻與兒, 爸爸作出了選擇.

希望 MH 到了寄宿學校之後, 會有新的生活, 會過得更好、學得更多. 更希望他會記得"嚴姑娘" --- 或許這只是一份奢望.

>>March 15, 2007 at 4:37:26 PM GMT+8

2007 年 3 月 3 日 星期六 【晴】

3/3~4/3, 我o地一行四人去肇慶玩o左兩日: 我、賢、志、Jackie

由於今次目的地比以往去廣東兩天遊遠o的, 所以船程同埋車程都長呀... 首先由中港城出發, 搭船搭去鶴山坐o左兩個幾鐘(回程三個鐘!), 仲要轉 1.5 個鐘車先到達午膳地方... 真係坐到 pat pat 累, 腳都腫 -_-. 雖然係晨咁早 8:20am 船, 但去到就已經中午了, 食埋個 lunch 就去呢個行程 sell 的最大境點: 七星岩! 記得我讀中一時, 暑假一家人跟過童軍團去肇慶三天交流團, 其中一個境點都係七星岩, 夜晚去燒煙花~ 十幾年前o既我去過邊都唔係好記得, 只有零碎片段留在腦海中; 所以十幾年後o既今日, 我打算"翻炒"以前去過的地方 :p o個度而家已經唔同晒, 設施比以前好o的. 我對七星岩的印象已經變得很模糊, 今次去呢個"小桂林", 覺得環境都好大、好靚 (雖不及真正的桂林靚), 影o左唔少相^_^! 行o左足足有 2 個鐘, 之後就去o左o的細境點. 食完晚餐就 8 點幾, 自費夜遊星湖同埋睇噴泉; 跟住就係自由活動時間, 我地選擇出o黎燒煙花!

講起燒煙花, 今次真係緊張、難忘又攪笑... 十幾年前燒都好難忘, 好記得支龍吐珠響我手中爆開了... 火花燒到我個膠眼鏡一點點溶了, 嚇得大家要命, 之後個個只敢放在地上用石頭頂住個尾端去燒... 今次原本好順暢, 買完煙花、問過人邊度可以燒之後, 齊齊走去星湖旁玩~ 又玩煙花、龍吐珠、好響亮的"炮" (唔知叫乜, 一發過向上爆的, 得阿志敢玩... ^^")... 當大家都玩得好開心之際, 突然有兩名保安人員(唔知係乜水? 著住迷彩制服的...)騎著電單車走過來, 第一句就唔太客氣咁問我o地: "你地燒夠未呀? 呢度唔俾燒煙花, 快o的收起佢." 果一刻突然好緊張, 我手上的龍吐珠仲係"發炮"中... 問o下: "咁邊度可以燒o架?" 點知其中一人的回應係: "o係巿區係唔俾燒煙花o既" @_@ 我o地好無奈地等埋我支龍吐珠燒完, 就執o野走人囉... 呢兩位保安就撓住雙手睇住我o地執晒o的o野, 我o地越走越遠時已經唔知佢o地有冇跟埋o黎了. 由於手上仲有一堆煙花, 諗住細細支度度都玩得, 於是咪響空地燒囉~ 影影o下相佢o地又騎著電單車走埋o黎! 有個保安話: "乜又係你o地呀? (語氣明顯比之前客氣了, 可能之前唔知我地係遊客... 我o地乜都唔知o架嘛), 你o地影完相就好收o野喇" 完來細支o既煙花都唔俾燒... -_- 同時開始發現, 點解在場冇乜人燒o既呢? 只係間唔中聽到遠處有人燒一兩o下... 唔通真係唔俾燒??? 咁我o地咪又走囉... 當時手上仲有三支"炮"、兩支龍吐珠同埋一束煙花, 真係唔知點好, 於是議決走遠o的、快快手燒埋佢就閃人啦...

我o地去o左離兩位保安稍遠的湖邊, 搵到個僻靜位置有o的夜遊星湖、已經收工了的船遮擋視線, 燒了一串龍吐珠. 中間有幾發射得幾遠o下, 我即刻變得好緊張, 好驚又引起兩位不遠處的保安注意; 燒完又走遠少少, 再燒埋支龍吐珠; 跟住我o地又走遠少少, 準備發放埋o個三支"炮"! XDDD 呢一刻我仲緊張, 因為估計係之前放呢種"炮"而被保安發現了我們燒煙花. 阿志把三支炮放埋一齊, 打算一次過點晒三支 KO 晒佢! o個一刻非常緊張... 點知第一個爆的時候, 比起之前o個個爆得勁好多! 哇~~ 我驚到死呀, 一來o的響聲真係勁o左o的, out of my expectation, o彭o彭聲有點嚇人; 二來我怕死, 好驚收到 2 次 warning 後就會俾人拉... @﹏@ 接著阿志連點兩發, o彭、o彭、o彭、o彭、o彭.... 我好驚o丫~~ ("怕死"呢個原因大o的XDDDD), o個一刻剩係識得係咁叫"快o的走o丫!!!"同時都按著頭開始跑開, 什麼煙花都沒看到... 同時聽到 Jackie 同賢指住個天話"好o靚呀!", 賢同時亦都好驚, 同我一樣按住個頭走開; 同場加映一名內地男子拍著手說: "嘩, 好靚呀好靚呀!" 同時我少少向後望上個天, 看到 1/3 邊綠色的煙花在盛放... 相信真的很美... ^^ 由呢一刻起, 相信我o地已經再度引起保安的注意, 總之見路就走, 邊走就邊拍心口, 真係又驚又喜, 不停o地談論大家有幾驚、同時又有幾好玩 XDD 稍為冷靜後, 我o地就開始扮作沒事般(雖然沒法子掩飾到心入面o個種緊張和興奮! XDD), 繼續行, 繼續留意住馬路上的電單車... XDD 行o左一段時間都唔見有咩異樣, 於是我o地走入個公園仔入面, 快快手燒埋手上最後一束燒花. 我第一個燒, 心入面一邊諗住 "快o的! 快o的!", 好驚俾人捉o丫~~ 點知燒到一半, 賢發現兩位保安渣著電單車, 向住我o地頭先"發炮"的方向駛去!! (效率可真慢... XDD), 嚇得我o地即刻背向馬路, 用個身遮住燒緊的火花XDD 等佢o地駛遠後就拿拿臨燒埋最後的燒花, 然後安安樂樂咁走去食糖水宵夜, 哈哈哈!!!

第一日係最好玩, 七星岩最靚、燒煙花最難忘! 第二日就慘o的, 都係逛一o的回佣購物店 (4間), 食埋個 lunch 就要搭 1.5 個鐘車返鶴山碼頭了, 因為全日只得一班 4pm 的船返香港呀~ 坐o左好耐船... 7pm 返到香港, 就係咁樣過o左一個好開心的週末~! ^_^ ("報應"就係... 第二日返工好累呀!! xp)

每次去完玩之後又會再諗: 下次可以幾時再去短線旅遊呢?? 下次去邊度好呢?? ^_^" 兩天旅程暫時未知幾時可以再去, 選擇亦多; 但肯定的是, 復活節可以搭飛機去旅行呢, 因為爸爸取到 6 天假期呀! 期待... ^0^

p.s. 回程的時候, Jackie 問了領隊為何我們燒煙花會俾人驅趕? 領隊都覺得奇怪, 但估計係因為過了年初七唔俾再燒/捉得緊o的...

>>March 6, 2007 at 3:08:31 PM GMT+8

2007 年 3 月 1 日 星期四 【晴】

3.3.2007 ~ 4.3.2007
AMZ 七星岩風景區、天下第一硯、古城牆、裹蒸粽工場二天團 (中國旅行社, 團費 $399)

<行程特點>
玩樂: 暢遊"小桂林"之稱-七星岩風景區
美食: 三點八品宴 一品魚翅宴 西江河鮮宴
交通: 直航船來回，舒適快捷

<詳細行程>

第一天：七星岩風景區、冬草堂、古城牆、牌坊文化廣場

請團友準時於指定的時間及地點集合，乘直航船前往廣東。後乘旅遊車前往肇慶，午餐品嚐【三點八品宴】。餐後前往七星岩風景區，稱為'桂林之山、西湖之水'的七星岩。此處風光如詩如畫、仿似人間仙境。主要有水月宮、湖心亭、鐵索橋、石柱岩、石室岩、蟾蜍岩等必令游人樂而忘返。繼往冬草堂，了解冬蟲夏草的培育過程。後往古城牆，始建於宋朝，已有九百多年的歷史，是廣東省唯一主體和城周基本完整的古城牆，也是全國罕見的宋城牆。晚餐品嚐【一品魚翅宴】。餐後往牌坊文化廣場，了解當地文化之餘，團友亦可自費乘船欣賞七星湖燈光燦爛、五光十色的星湖夜景（每位約￥30）。住宿金山酒店、端城大酒店或同級。

第二天：天下第一硯、健生源、裹蒸粽工場、憩庵

早餐之後，前往天下第一硯，參觀中國四大名硯之首"端硯"，獨特之石質與精細的雕工必令遊客惊嘆與讚美。繼往健生源，由專人講解有關鹿的價值，介紹各種鹿製品，以供團友選購。後往參觀裹蒸粽工場，了解“裹蒸粽”的泡製過程，並可選購新鮮“裹蒸粽”作手信。再往憩庵參觀，是當地新開放的寺廟，依山傍水，環境優美，香火鼎盛，吸引很多善信參拜。午餐品嚐【西江河鮮宴】，後乘直航船返香港。

三點八品宴
倫教糕 三絲卷 黃金蛋糕 紫菜蛋花湯
飄香雞 蘿蔔浸魚鬆 山水豆腐 蝦米粉絲煲
花腩炒蓮藕 清蒸河上鮮 郊外油菜 雞湯珍菇

一品魚翅宴
濃湯魚翅湯 端城飄香雞 豉汁蒸西魽 桂花炒魚翅
魚翅一品煲 珍菇浸肉丸 紫蘇蒸山坑魚 碧綠炒驢片
郊外油菜 絲苗白飯

*** 行程到此結束，敬祝各位旅客旅途愉快！***

備註：
1.逢星期一、三、六出發。
2.以上行程僅供參考,如有調動,以當地接待社安排為準。
3.團費已包港幣三十萬人身意外保險及港幣三仟元意外醫療保險。
4.建議旅客付予香港領隊的服務小費：每人每天港幣50元正 (含國內導遊和司機的服務小費)。
5.本行程由2007年3月1日至2007年6月30日生效。
ABC-AMZ070301

>>March 2, 2007 at 10:51:36 AM GMT+8