2007 年 9 月 15 日 星期六 【晴】

補祝麗雯和 Carmen 生日, 我們一行 14 人去了北京酒樓吃晚餐, 當然唔少得有生日蛋糕. 一圍檯坐得都幾迫, 如果 Maggie 和翠愉都o黎埋, 真係唔知點攝入去了.

小祥子上年拍拖唔話俾人知, 突然某天同人講要結婚了 (當時男朋友形容: 收到消息的時候, 感覺簡直好似聽到佢話生 cancer 一樣咁突然、咁難接受... XD 咁好朋友都唔講出o黎, 仲要眾都人認為佢唔會追女仔的, 他的消息的確引起嘩然). 婚後數個月, 又突然宣佈佢太太有o左 4 個月了 (而家已經 5 個月). 以前會覺得佢係眾人之中走得比較慢的, 而家佢卻一馬當先, 忽然一年之間經歷咁多o野咁.

不過祥嫂的肚子好細, 好似得o個三個月咁大... o_o 反而小祥子人未到中年便發福, 胖了不少~

另外, 家姐今晚(其實係 17/9 1am)飛了~ 今次佢飛去約旦... o_O 佢又一個人跟團喇.

>>September 17, 2007 at 2:21:18 PM GMT+8

2007 年 9 月 14 日 星期五 【晴】

由於之前跟家人去皇家太平洋酒店吃buffet, 擦擦咭擦中一位免費 lunch buffet, 今天便拿著 coupon 和他一起去吃吃吃~~ 我們很少吃 buffet, 一來好吃的都很貴(個人價值觀, 對於食唔係咁重視), 二來他常常喊著要 "keep fit" (磅數已經超「標」... 由他定的「標」, 雖然我都覺得不能再超), 三來我不能吃得多, 永遠食 buffet 都係唔抵o既.

對上一次食應該係去澳門旅遊塔上吃的旋轉餐廳 buffet, 都已經 9 個月前的事了. 忽然想起一件攪笑事件: 我們一直以為它旋轉的方式係成座「飛碟」轉, 其實唔係, 而係座位和桌子下的路軌在轉. 食食o下唔見o左佢個背囊, 嚇一嚇, 原來它在路軌外原封不動, 而我們食客卻在"旋轉", 所以背囊已經走o左去我身後那位食客身旁XDDD

皇家太平洋酒店的 buffet 的確不錯, $168+10% 一位, 碌咭有 8 折, 賣單 2 位合共 $151.2. 見到隔離檯一pair男女要俾 $300, 竟然覺得特別高興XDDD (只是高興我們今次很抵食罷~~ :ppp)

>>September 17, 2007 at 2:03:28 PM GMT+8

2007 年 8 月 19 日 星期日 【晴】

放o左一個多月假, 今日已經到了悠長假期的最後一天, 好唔捨得! 每年7-8月都係我的旅遊月, 今年亦不例外:

21/7~25/7 台北五天自助遊 (with friends, 一行四人)

27/7~3/8 紐西蘭南北島8天之旅 (with 爸媽、家姐)
[http://www.wingontravel.com/chi/tours/new_detail.asp?country=nz&city=&tc=ALZ08&tn=&year=&month=&day=&price=&pax=]

12/8~17/8 長沙、鳳凰古城、張家界6天之旅 (with 爸媽)
[http://202.66.51.28//htpublic/TourItin/DKC06SPC(004).pdf]

去台北o既時候已經想著要寫遊記, 結果.... 又係一個字, 懶! (heehee...) 不如各位睇相算啦~ :p 簡單o的o既comments有:

台北: 始終係自助遊, 加上天氣悶熱, 比較花體力響交通和步行上, 第日plan行程要考慮呢一點.

紐西蘭: 一個靚絕、零污染的國家!! 係我去過咁多o地方旅遊, 最靚、最鐘意的一個地方~~ 雪山好靚, 搭直昇機上雪山好好玩(當然亦好$$$$....), o的海鮮和刺身好新鮮好好味!! (來自零污染的國家, 大家都可以好安心去食~)

鳳凰古城、張家界: 其實係去完紐西蘭返香港才報團的, an unexpected journey, 媽咪見我仲有假期就同我玩盡佢. 天氣熱, 行山、行路多, 其中最長一段行o左足足兩個鐘, 大家趁後生仲有腳骨力時好去張家界了... 所以呢個行程比較辛苦一點, 幸而勝在係跟團, 有專車接載到各境點.

明天返工喇, 又要過返正常生活. 下次旅遊(唔計2-3日的), 要等12月聖誕假期了.

>>August 22, 2007 at 11:24:56 AM GMT+8

2007 年 7 月 15 日 星期日 【晴】

好開心呀, 以色列團唔成團呀, 會改去紐西蘭!!

一路以o黎我都勁唔想 8 月去以色列... 我真係好怕熱和曬 ~_~. 奈何爸媽好多地方都去過, 已經冇咩選擇; 家姐又勁想去以色列, 我響冇得反對o既情況之下唯有肯首去以色列囉... :( 點知個幾月以o黎都仲係爭 4 個人先成團, 即係一路都冇人報名. 星期六我o地已經去永安搵定另一個團留位, 最後今日收到通知話唔成團, 我o地決定改去紐西蘭!! yeah~~!! ^o^

上年暑假本身已經打算去紐西蘭, 但媽咪唔鐘意寒冷天氣去旅行... 佢寧願熱. 但佢都好就我, 原意今趟去北歐或西班牙+葡萄牙, 貪o個度 8 月天氣涼涼地o岩我呀~ 但家姐o既大假頭段偏偏又冇北歐團或 11 天西葡團, 我o地又唔想去 9 天西葡喎, 因為 9 天去唔到直布羅陀, 所以根本冇乜得揀... 最後只係得以色列團時間最 fit. 而家以色列又唔成團, 雖然媽咪唔想去寒冷的紐西蘭, 但最後都照揀了~ :D

其實我都係個麻煩人... 我怕熱怕曬又怕凍, 但若果俾我揀, 我寧願凍, 因為可以著禦寒衣物保住體溫(一件羽絨掂晒!); 而熱都唔係最大問題, 我真係唔曬得... x_x" 上年暑假的土耳其旅程真係嚇怕o左我.... 39 度高溫, 日日在烈日下乾蒸, 真係好辛苦 +____+...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢個就係我地報o左既紐西蘭 8 天團喇~
http://www.wingontravel.com/chi/tours/new_detail.asp?country=nz&city=&tc=ALZ08&tn=&year=&month=&day=&price=&pax=

>>July 17, 2007 at 6:07:12 AM GMT+8

2007 年 7 月 14 日 星期六 【晴】

不如又講講一個人住時, 有咩o野會做, 但係同屋企人住又唔會做o既事情:

1. 去廁所唔關門
2. 換衫唔一定要走入房閂埋門換
3. 食完o的o野成個鐘後才拎去洗
4. 天氣熱時, 睡覺只穿上內衣
5. 成屋o的櫃貼滿自己喜歡的公仔貼紙, 擺滿自己喜歡的擺設
6. 4-6日才洗一機衫
7. 睇緊電視時, 隨時隨地按自己意願隨便轉台
8. 適逢女性每月的特別日子, 把巾巾暴露在當眼位置, 方便取用, 直至日子完結

(全部都係經驗之談, 嘩哈哈~~~~)


另外仲有一些係因為我個人問題而做的:

a. 廳入面的窗全關上, 只開廁所的大窗和廚房的窗 (因為個廳較常有昆蟲飛入!!)
b. 關上大門後便順手lock晒所有鎖 (人身安全問題)
c. 過年時, 雖然唔會有人來拜年, 但有時會四圍貼o下揮春, 自娛一番
d. 廚房不放置垃圾筒 (因為地方淺窄+甚少煮食)
e. 半張大餐桌放滿自己心愛的零食
f. 對住電腦/書/雜誌食"飯" (餐盒吧...)

只係諗到咁多... :)

>>July 16, 2007 at 12:15:53 PM GMT+8

2007 年 7 月 14 日 星期六 【晴】

近日唔知"了"起邊條癮, 愛上了看書.

呢排睇緊本漫畫插圖的書, 係高木直子的《一個人住第5年》, 上年書展時買的, 買完就收埋o左一年...

由初初在高街與 3 個 HKU dental 學生同租唐樓, 到油麻地同家姐50%時間同住、50%時間一個人住, 到而家鑽石山100%一個人住. 數數手指, 原來我搬出o黎住都有 7.5 年喇~

高街環境較差, 我只擁有一張大書桌連書櫃、半個衣櫃、碌架床的上格三個私人空間, 其他都係大家一起分擔一起用. 後來當然係越住越多o野啦~ 我因為書桌太大了, 擺唔到入房, 所以放了在咩傢俬都冇的廳度, 後來也漸漸"霸掂"了 1/3 個廳, 因為我的 notes、實習時用的自製道具玩具多得很, 仲要放部 printer... 響高街, 我住了 2.5 年.

到油麻地消防局宿舍, 媽媽為我買來各種傢俬和電器, 280呎的空間足夠有餘~ 以前間中同 roommates 傾o下偈、一起煮個飯一齊食, 所以初初搬入油麻地宿舍覺得悶悶地... 但間唔時家姐會來, 都好~ 雖然我好多時會覺得佢開大喇叭聽歌很吵耳... 溫唔到書... 響油麻地, 我住了 2 年 3 個月.

然後又搬進鑽石山, 真真正正一個人住. 四百多呎的屋子, 而家大部份空間已經被我填滿了個人+家居物品... 真係越住越多o野! 另一原因係, 我連大埔家o既o野有 9 成都搬晒去鑽石山了. 有時心想, 若要搬返去高街, 會點? ....... 冇可能呀! 一來已經儲落太多o野了, 二來我已經習慣一個人住, 唔想再同外人住了. 響鑽石山, 我已經住o左超過 2.5 年了!

一邊看《一個人住第 5 年》, 係會一邊會心微笑~ 因為實在好多o野都好認同、身同感受的感覺. 不過我比高木直子幸福得多, 我呢頭家有媽媽打理, 平均 2-4 星期會來一次為我打掃, 會為我煮定很多盒o野食, 會為我入貨、入零食, 會.... 數之不盡. 爸爸也會為我維修壞了的東西, 為我換床單, heehee :p.

所以, 即使係一個人住, 但一點都不寂寞! ^_^

p.s. 今年書展, 我決定要買埋高木直子o既其他書呀~

>>July 15, 2007 at 9:38:49 AM GMT+8

2007 年 7 月 13 日 星期五 【晴】

好無奈呀... 發覺又開始有少少撞聾了.

上次手術係2006年3月, 呢次條長o既T-tube原來都用o左1年4個月(醫生通常會話用2年), 算係咁, 好過中五o個時o個條用得6個月, 仲少過以往用開的短tube - 呢種醫生通常話用半年, 我往往又會用到 8 個月喎~

除o左成日聽唔清我左邊身o既人講o野之外, 響好嘈雜的環境之下(background noise), masking o既情況更為嚴重... 成日唔知人o地講乜、笑乜... 又唔好意思好唐突咁叫人 repeat 多一次講過o的乜, 好重被自我隔離的感覺.

我o既 alternative / compensatory / repair strategies 包括:
1. 盡量使用右耳去聽o野 - 即係令一令個頭改變方向
2. 繼續用左耳, 不過就要拱個頭近o的對方
3. 叫人repeat 多一次... (請原諒我成日皺著眉"嗄?嗄?嗄?咩話??..."咁... 皺眉是不自主的...
4. 問問身邊的熟人, 人o地講過o的乜/笑緊乜...

暫時左耳撞聾情況還輕微, 不過呢個已經係一個小小的 warning - 會越來越差. 真係寧願耳膜因為長期要放 tube 而有個不再癒合的傷口 → 聽o野麻麻地, 好過佢埋口之後又再積水 → 聽o野更差. 後者情況若然再出現, 又唔可以唔理... 即係又要一次小手術, 循環不息.

27/7 覆診了~ 且看看醫生點講、中耳和耳膜情況如何. 也擔心不來, 睇o左耳鼻喉科都超過廿年了, 小手術都有做過十次 (高峰期每年半做一次), 有時我覺得我比醫生對呢種中耳問題更熟悉, 尤其當我遇到一個臨床經驗較少的新醫生.

>>July 15, 2007 at 2:50:32 PM GMT+8

2007 年 7 月 3 日 星期二 【晴】

30.6.2007 ~ 2.7.2007

沒有待在香港看回歸, 卻去了肇慶遊玩. 悅城龍母廟, 不是我目標想去的地方, 只係跟團便順道一遊. 金林水鄉冇書/雜誌入面o既相咁靚, 仲要係差好多皮, 真係幾失望~ 德慶盤龍峽(今年香港小姐去玩激流的地方)水車群的水車真係又多又大, 第一次見! o的水分成幾節瀑布, 邊行邊有 "reaching checkpoint"的 feel, 但我始終較喜歡大的、一望無際的境點, 而不是「行行行... checkpoint 1... 行行行.... checkpoint 2....」的感覺. 上山乘車, 然後沿樓梯行落山睇瀑布, 行到腳仔軟 → 腳震震, 之後小腿痛o左兩日! 我始終係個少運動的人... ^^" 第二晚住燕峰溫泉, 很偏遠的溫泉~~ 坐o左好耐車呀... 成年幾冇浸過溫泉, 感覺很好! ^_^ 加錢遊的寶錠山, 是一個竹林 - 四圍都是竹, 看的全部都是不同的竹, 可憐自己今趟忘了噴蚊怕水和貼蚊貼(去盤龍峽o個時記得o架...), 不惹香港蚊的我卻很惹肇慶的蚊, 雙腳被狂叮, 連pat pat都唔放過.... 而家仲係好痕呀~~~~~~~ >,<

原來我真係一個貴人 - 今次去玩又落雨喇... 真係落足咁多日. 不過勝在唔係大雨, 我反而幾鐘意, 怕曬的我最鐘意天陰陰去旅行, 間中才要擔o下遮~ (浸溫泉都冇咁熱)

感受不到回歸的氣氛, 感覺像錯過了些什麼... 冇喇, 都冇得後悔嚕, 鬼叫自己鐘意離開香港去遊玩咩.

>>July 4, 2007 at 12:52:15 PM GMT+8

2007 年 6 月 12 日 星期二 【晴】

一如我o地所料, 今晚「客家好棧」的飯局, 唔見黃小j的出現. 當然肯定唔係「拒絕邀請」, 而係「不被邀請」.

但奇怪的是, 小刀子竟然全程絕口不提黃小j --- 直至臨尾, 提起麗雯, 稍稍講起他. 但不再是數他的不是了, 而係真的只係簡單的「提起」. 同時, 日記風波似乎已經(暫時?)平息了.

唔知麗雯返香港後又會點呢? 一個係小刀子的極好友, 一個係被仇人般看待的「普通同事」, 兩者是情侶關係.

其實我o地都睇得出, 小刀子除o左想發洩自己的不滿之外, 另一方面都係想拆散鴛鴦...

以外人角度o黎睇, 人o地兩口子的事, 又關你何事呢~~ 你何必要干預呢?

以小刀子的角度o黎睇, 黃小j 在小刀子眼中, 真的是「萬惡不赦」的, 所有事係冇得返轉頭的, 他的「罪」係永遠都不能被「赦免」的. 現在他要救麗雯「逃出魔掌」.

以小刀子和黃小j 身邊的人o黎睇, 大家要合力「拯救」麗雯!!

而我的睇法係, 我明白小刀子的難處... 似乎係自己一手造成的「錯」, 因為當初係小刀子自己介紹黃小j 俾麗雯識的... 他怕麗雯感情被騙, 現在他要作出補救. 我相信他所做的一切係出於一份內疚 --- 若不是他, 麗雯便不會認識黃小j --- 繼而轉化成憤怒.

人, 可以因為一份內疚, 而做出各種補償的事; 而所作的事, 可能會係o岩的, 可能會係錯的. 對與錯, 永遠都是主觀的.

再以「外人」的身份看自己 --- 呢件事又關你何事呢?

Loop死o左...
.
.
.
.
.
.
.
.

到最後, 發現自己原來又想得太多了~~

~~~~~~~~~~~~~~~~~~~~~~~~~~~~~~~~~~~~~~~~~~~~

某人說得對, 我常常想得太多了~~ 常常會鑽了牛角尖....... ^^"

>>June 15, 2007 at 1:58:46 PM GMT+8

2007 年 6 月 11 日 星期一 【晴】

近日「小刀子猛數黃小j」事件, 令我諗起好多o野.

初初睇到小刀子的日記、聽佢講o既o野都係得啖笑, 跟住越來越八... 之後, 當小刀子在我o地面前繼續數算黃小j時, 對某些 "point" 會禁不著附和... 最後, 一如我以往, 會無端端來個檢討, 思想一下整件事情, 和反省自己於事件上扮演著什麼角色、有冇過o左火位.

先說說黃小j. 我跟他不熟, 見過數次面, 與朋友一起聚會過數次, 但同佢好似傾過偈都冇三句. 一向給我的印象都是很 nice, 做朋友幾好.

再說說小刀子. 跟他很熟了~~ 一起遊玩過很多次. 為人很sociable, 對住我呢o的比較沉默o既人, 可以好快"破到冰" (對住我, 真係唔係人人做到! 哈~~ 因為我常常給自己圍起一幅牆... 呢個的確係我好大的弱點). 跟他做朋友感覺很好, 因為他很會照顧好友. 不過佢比較衝動和火爆, 什麼芝麻綠豆小事都要投訴一番... (不煩的麼?)

關於黃小j的事跡, 我沒有親眼見過、親身經歷過, 只是道聽途說... 不, 事實上都是出於小刀子的口. 好的、不好的, 統統都聽過了~ 兩者比率係按著小刀子對他的感覺而變遷.

所聽見有關黃小j的事跡, 大多都不敢恭維... 甚至開始對他有點討厭的感覺... 因為最醜惡的事都在腦中繪聲繪影地描繪了出來.

早幾日的某一天, 回心一想... 呢o的係咪都係片面之詞呢? 我相信種種事件係有發生過, 因為我知道唔會係「生安白做」. 但聽返來的版本, 係咪都加了多少---好多---偏見呢? 黃小j可沒有為自己辯護過 --- 當然, 佢亦都冇咁o既機會.

憎一個人, 係咪一定要想盡辦法、千方百計要令雙方身邊o既人同時圍攻他、令他無處身之地呢? 為乜? 自己又有什麼得益?

雖然我仍對黃小j所做過的事感到討厭, 亦繼續對他留下壞印象, 但我亦不認同小刀子的處理手法. 你講人時, 人o地亦在你背後講緊你. 每個人都可以選擇不同的生活方式, 可以選擇搞著是非之漩渦, 每人一個湯匙, 真係越攪越大; 亦可選擇抽身, 什麼都不聽、不理; 更可選擇做中立的我, 甚至做個中間人.

性格使然, 工作上、家庭上、朋友之間, 我通常都係做「抽身」的我. 不過自己又好易受人影響, 有時甚至覺得呢個「時勢」都要隨波逐流一下, 使自己能在當中立足. 不過很快, 我又會開始自我檢討... 將心比己一下, 會無端覺得受害者其實都好慘. 每個人都有錯, 但都不會是萬惡不赦. 做唔到深交, 都可以做普通朋友, or even a hi-bye friend! 心裡不期然出現內疚... 到最後, 因為一份內疚, 我會想做個中間人---想想好了, 通常都做不了, 亦沒有這樣的能力, 只會越做越衰, 左右做人難, 甚至被雙方排擠, 被人視為牆頭草.

最好的, 一係「什麼都不聽、不理」. 「無知」才是最幸福快樂.

或者, 做個中立的人. 聽的聽, 可以一笑置之便最好, 不要「講」.

我佩服真係可以做到咁的人, 並以此為榜樣, 不過我見他們多數都係閱歷較豐富的人... 據聞係因為, 自己撞過板太多次了.

不過有時開o左個不好的頭, 係好難/冇得返轉頭的... 既然係咁, 亦既然自己功力唔夠深厚, 唯有做返個「什麼都不聽、不理」的人好了.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

近日諗得太多「人生哲理」, 常常分了心... 上兩個星期下雨天, 一邊行著地鐵扶手電梯、一邊在想著東西, 一個 pk, 撻得好勁... pat pat跌瘀了, 手臂留下一吋疤痕... 真的活該! @_@ 早幾日晚上, 想著想著睡不著, 忍不著深宵來電訴苦... 打擾了 ^_^~ 今朝起身又邊吹頭邊想東西... 忘記 morning call O_O!! 之後仲繼續在想... 忘了每朝一 sms... sorry啦! ^__^"

>>June 12, 2007 at 5:14:17 PM GMT+8