2006 年 2 月 16 日 星期四 【晴】

阿YAN話我束髮同散左D頭髮年紀相差成十歲.......咁樣打擊我呀~>.<

收到miss個email,知道其中一科exam result有b grade.......開心到高呼"miss, i love u so much!!!",
最擔憂果科都ok,超級開心!!!!!!!!

放工去拉返直D頭髮,終於剪走晒D開差頭髮~
唔知Short左邊到,無端端叫個師傅同我剪留海,個頭又扁,
個頭簡直慘不忍到......低b+怪雞~

走果陣係荃灣搭車返青衣都行錯站,好彩個剪頭師傅剛行過,
指返我去啱果邊....方向白痴.....=.="



>>February 19, 2006 at 4:28:20 PM GMT+8

2006 年 2 月 16 日 星期四 【晴】

sasa,

我成日玩某食肆附近餵果隻貓貓~^^

睇到第二擊了,今晚返去貼~:)

>>February 17, 2006 at 9:39:50 AM GMT+8

2006 年 2 月 15 日 星期三 【晴】

請左假,都係用黎溫書....
碰巧隔離屋裝修....鑽到有點煩燥~~

半夢半醒,夢見自己一訓起身,有兩隻唔認識ge貓,貪玩,係我身旁ge窗口跌下,
掛住左係窗邊,自己呆左係到,無及衝前,眼白白望住兩隻貓就咁跌左落去,
係個夢入面同樣覺得好心痛,喊到七彩,醒後果種感覺久久不散,
發埋d咁ge夢,大吉利是~

考試,算係比想像中好啦!
裝到阿sir好似俾左個唔錯ge分我~^^
好開心!今日係last day,上晒個course喇!唔使再返學!
睇下搵到咩新工先再決定讀唔讀上去啦~

原來坐係隔離位個pair好靚ge情侶同學仔,係miss hk...李思雅....
無諗過佢係咁細個,見熟口熟面,所以一直以為佢係雜誌d model~~
考試果陣,d同學一齊八先知道~:p

好熱.....咁又春天喇....



>>February 17, 2006 at 9:32:11 AM GMT+8

2006 年 2 月 14 日 星期二 【晴】

無乜野做,溫下書.....又一日~

又問下Anise意見....

尋日已經收到郵包了,謝謝!



>>February 17, 2006 at 9:22:01 AM GMT+8

2006 年 2 月 13 日 星期一 【晴】

8日內放兩日假,再有兩日放半Days SL去覆診&打針,老闆面如鑊撈~
再同老闆講我無簽新約....佢竟然忍唔住係咁偷笑,可惡,哼~

放半晝,見左兩個人就走人去左UCH覆診,
果然無book左日子,情人節,無乜人睇醫生,唔使等+醫生得閒慢慢講,
上次矯形科醫生講果,如無意外,手術只要住院3日,
4個鐘就搞掂,如果唔好彩,上顎都有問題GE話,
將會住院5日,手術要花11個鐘.....

今日,唔係見上次個Consultant,呢個Dr.Fung超級盡責,講解得好詳細,
不過佢就帶左個壞消息我知,就係上顎骨都有問題!!!!!
突然覺得有點晴天霹靂.....

佢好唔建議我做手術,話我係at the margin....唔係好嚴重果種,
亦聽到佢同姑娘用d病房術語講,唔想花時間做d唔係太嚴重ge手術,
所以佢好落力咁勸我唔好做手術,建議我戴牙膠頂痛...
但我拒絕用治標不治本ge方法!
痛唔係大問題,我驚緊d骨快速老化啫...

佢完全推反左矯形醫生所講ge野,一時間,令我覺得好徬徨....
矯形醫生想我做手術,就將手術講得好聽d:"會慢慢調較d骨長度"
外科醫生唔想同我做手術:"會扑碎你d骨,而且上顎骨係連住整個頭骨,出血會比較多,
麻醉11個鐘,亦都有危險性....."
私家同政府ge分別。

之後俾左d資料我返屋企慢慢睇,話即使會做手術,都有四種做法,
會診個日,佢同矯形醫生都會講各自ge方案,由我自己去揀,
但我都未做過,我點知邊種方法係最好????????

之後醫生幫我影低左好多長半臉大頭影270℃相,
又整左兩個模,話如果真係要做手術就會用得著.....
跟住又聽到佢問姑娘,點解唔係上次覆診時就整好,
姑娘應佢:"上次陳醫生心情唔好......."(有無搞錯呀!心情唔好拖我兩個幾月?????)

份資料上話我....
咬合功能有問題,
發音有問題,
呼吸有困難(我有時半夜訓覺會抖唔到起扎醒,睇醫生話鼻敏感,但我無其他鼻敏感徵狀,係咪都因為"斷錯症"?)
.
.
.
仲有外觀缺陷導致病人心理嚴重受損(<--咁我又無咁嚴重)
望到呢到時,醫生突然拍拍我安慰說:"我好明白你感受,醫好之後,個樣會祥和d!"
我第一次見佢,佢彈呢句出黎,明顯地,佢都覺得我個樣係惡/不友善/串,
其實我笑要好用力架,難怪即使對住d病人微笑時,佢地都成日話我無笑容.....
成日仲俾人話木口木面/黑口黑面/cool/串....

無心情陪人食飯,好想即刻衝返屋企。
想問下意見,同阿爸阿媽講,佢地聽唔明....
同二佬講,佢覺得唔可以唔做,當然,佢認為,無乜會叫痛ge我,唔係好嚴重,唔使搞咁多....
同大佬講,做啦!做啦!緊係要做手術啦~
但......問題係,應該用邊種手術方法先係最好.....

會診個日可以有家人陪同,媽子會陪我一齊去,不過我諗佢到時都係唔太清楚,
一樣都係俾返我自己決定........

手術做唔做,診金都係幾萬,無分別,但真係唔識揀,
本想係到問下意見,但d手術過程又煩又複雜,都唔知點講....
總之,心情唔好!!!!!!!



肥仔,好想同佢講,好想攬實佢,好想........


>>February 17, 2006 at 9:20:06 AM GMT+8

2006 年 2 月 12 日 星期日 【晴】

日日返工溫D溫D,今日再放埋自己一日假嚟溫書,
都唔見得溫多好多,雖然miss都將貼士講得好明,但實在太多喇~~
係咁溫係咁背果d,竟然出晒係MC同Matching到,
d SQ & LQ就係無溫到果幾課.....望住份卷真係無眼睇~
加埋平日d assignment同classwork都危危乎....
考緊時頹晒,考完就好得多,起碼又搞掂一科。

踩單車終於有望喇~^v^
罕有地唔係由我提議~
對上果次係舊年阿靜生日,係長洲示範左低斜坡炮彈飛人~:p

近期返工,考試都返到癲癲地,搞到D脾氣差晒之餘,
成日都會無故失落,即使無咩事發生,都係唔多開心咁~
原來寶奀都係咁,我仲以為自己唔正常添~
都市病??



>>February 17, 2006 at 8:14:16 AM GMT+8

2006 年 2 月 11 日 星期六 【晴】

全日都用黎咪書,但咪足一日都只係溫左一課咁大把~
睇緊都入唔到腦....望住大大份筆記,越溫就越緊張....仲有好多都未溫晒...>.<






>>February 17, 2006 at 8:10:52 AM GMT+8

2006 年 2 月 10 日 星期五 【晴】

今朝搭車,坐隔離個阿婆拍醒我,然後同我傾計:"我後生果陣都試過搭車訓過籠~"
me:".....=.=??....嗯~"(架車好多人,企係我附近d人開始笑...)
婆:"果次我想去馬場,點知訓到去上水,我又唔記得叫隔離位叫醒我,
我又唔識搭返車喎,你知唔知,上水點返馬場架?"
me:"嗯 ...火...車"
婆:"你尋晚好夜訓呀?"
me:"嗯..(12點,唔眼睏,我一樣都照訓架啦...成個鐘車喎~)
婆:"我一九點就訓架喇,你都唔好咁夜訓喎~~後生女真係好!(拍拍我膊頭)
跟住婆婆繼續同我講左幾多野....

然後準備落車時,佢竟然拖住我一齊落....但我有排都未到站...
婆婆好大聲咁問:"你未落車咩?"
me:"..哈...未呀~"
之後,車廂d人好多個都笑左出黎........................=.="
點解成日都會有陌生人同我講野ge??

==================================================
離職ge消息慢慢傳開左.....
一早已經有幾個社工入黎傾左陣....
令到我有少少唔知點咁.......
===================================================
收到人生中第一張紅色炸彈呀~~~~~~^v^
寫我名收架~~~~~~




>>February 11, 2006 at 4:30:50 AM GMT+8

2006 年 2 月 10 日 星期五 【晴】

sasa,

多謝你呀~
家家有本難唸的經~
不快的事,記性有限,我不會讓它儲於腦海多於3日,所以沒什麼喇~^^
不過肥仔的事就是忘不了.....尋晚坐係床到溫溫下書,諗返起d舊記憶,都係心upup咁....
話咁快就8個月,有時都唔覺時間去得咁快~

我試過去抱其他貓貓,有時抱抱下,會想試試從牠們身上找找肥仔的感覺,
不過,感覺差好遠,而且根本不可以代替......但一對住d貓貓,心情的確會好好,
好似乜都唔需要去理,去記~^^

>>February 11, 2006 at 4:28:52 AM GMT+8

2006 年 2 月 9 日 星期四 【晴】

今日簽約deadline,想通知大老闆,我唔續約,佢又請假.....
轉左搵細老闆,佢先記起我只做埋下個月,留左幾句,佢自己都覺得唔應該再留,
政府工養懶人,佢好清楚,所以佢都讚成我出去睇多d,仲俾左d朋友公司ge咭片我,
叫我上去見下.......^^






>>February 11, 2006 at 3:41:08 AM GMT+8