2006 年 5 月 12 日 星期五 【晴】

完全忘了這天做個什麼........=.="



>>May 15, 2006 at 4:48:34 PM GMT+8

2006 年 5 月 11 日 星期四 【酷熱】

今早一早出門去面試,人數若30多人,女生只佔8個,填寫資料時,
madam開始捉人黎鬧,鬧下d人唔聽指令,接收能力差,但無鬧過女仔,
只係對住其中兩個女仔講:(乜你地係女仔黎架?),著西裝打呔,我都以為係男仔.....=.="

8個女仔,我八到當中我學歷比佢地高,所以佢地問我,我只答中五,
但我跟足指示,著到行晒咁入場,我都留意到,自己比較顯眼,但我無諗過其他人係咁求其....
太過顯眼,會成為目標.....

跟住坐後面ge兩個男仔,拍一拍我膊頭:(你好似係成堆女仔最得果個喎,睇樣睇身型~),
即時打個突,佢地咁講,即時令我變成犯眾憎.......咪搖搖頭,好好好細聲咁講:(唔係...),
madam見到,即使指住我大鬧:"你唔好係到傾計!"
當時傾到大大聲ge人,都無人鬧...

鄰座ge女生每個都聽到後排男仔講ge野,之後開始唔係點啋我,
得阿豆係咁睇住我,我一緊張,就拍一拍我,氹下我笑,又教我有d咩技巧,
佢係表現最top果個女仔,佢話估我會得,希望可以同我一齊拍住上去繼續in.....好好人。

可能是昨日的字體"出錯"問題,揮走了太多人,所以今天換回了正常的字體,
我還在想,如果要揮走我,就在這一環節Byebye好了~
不然辛苦考完一場,到頭來才要走,失落感更大。
結果,順利通過眼力測試,而且連散光有300度的人都OK,全場所有人都能通過,
阿架好唔抵!已經感覺到不公平的存在......=.="

然後花一大段時間去熱身,考體能...我有信心,我過得到。
跳高果part,madam突然話我夠高,抽左我出黎,叫我去跳男生果塊板,
(比我高ge女仔,有二,三個),伸高手後,發現板都掂唔到,諗住同madam講,
madam已經掘住我,喝:(你同我照跳,我會計返(高度)俾你!),
隔空都無得度,即係佢話幾多就幾多,結果比標準高少少,但我覺得係少左,
而且,只有我一個俾人捉左去跳男板...

另一part,啱啱合格,有好多人好低分....
第三part,又係揀左我同男仔同一個round跑,係佢地身後食塵,我比標準跑慢左一秒,諗住拉上保下,應該都ok。

睇住d計分紙俾人揀黎揀係,抽左出黎ge,又放返入去...
我果份俾人計完分後,見佢地再劃左3次.....好似出左d問題咁,
但出黎ge結果3 part表現比我地差ge人,可以留低,而我地竟然唔 合 格。
我唔知慢左一秒會俾人扣幾多,但可以肯定,點計部份留低ge人一定仲低分過我地,
當中有個仲講明識人ge,可以叫得出未自我介紹ge考官名....

出去攞信時,madam無神神再鬧我多次:(你發緊夢呀?),莫名其妙,我幾時發緊夢?
走時,同樣落選ge人都好不滿,點解可以咁黑暗....
有個男仔問我,點解我都要走,我表現唔錯,(因為我排得前,係俾望住黎考ge),
其他人都咁問我,仲問我係咪串親madam,因為madam只鬧我一個女仔,
又話我個樣串串地,唔係咁和順,所以俾人揮走.....=.="
我知個樣俾人感覺係咁,我今日專登全程保持微笑,結果人地對我觀感都係咁....好好好無奈!

辛苦操左一排,結果竟然係咁,真係好唔甘心,但無何奈何,我的確自己衰左一part,
如果係全部pass,佢地就無可能out我.....
第一個打俾阿哥,換來:(你連入場卷都攞唔到,仲有咩好講吖,呻都無用....)
原本諗住,pass到ge話,可以證明俾阿哥睇,我無偷懶,我有練過,但...

返到屋企,同阿媽講起,阿媽話佢一直都唔想我見得成呢份工,因為太辛苦。
哇一聲,眼水都流出黎,我係唔鍾意份工,但我想考到,因為個個都覺得我考唔到,
輸左係d咁唔公平ge情況之下,道氣好難嚥下,後尾睇完個fd俾我ge網,
發現,個遊戲規則根本就係咁....心情亦都好返d....
(http://www.keyhk.com/cgi-bin/guestbook/view.cgi?id=25045)

要開始搵工了,至今見了兩份,都沒著落了~

晚上,收到另一封面試信......繼續操...

>>May 12, 2006 at 5:08:00 PM GMT+8

2006 年 5 月 10 日 星期三 【陰】

未訓醒,阿哥講左四件壞消息.....聽得好唔安樂....

夏天特別難過嗎?這星期,爸的同事,大哥的同學,二哥的一位伯母,一下子走了......
我跟他們都不認識,只在相中見過一次,另一位有一面之緣...
但知道他們的離去,都會感到點點的奇怪感覺....不懂得去形容...
生命很奇妙,來的時候什麼都沒有,但走的時候,也什麼都不帶走..
留下許多的故事,情感,回憶.....

未起床第一件事,是開電話....都是一個壞消息......
明天輪到我了,會怎樣?
負出與收成,未必一定成對比,所以抱平常心去吧!^v^


>>May 11, 2006 at 11:17:19 AM GMT+8

2006 年 5 月 9 日 星期二 【晴】

尋日再去跑,都係發唔到力咁,轉彎時,用錯力,輕輕拗左膝蓋一下....
擔心整親就真係唔使玩了....
懷疑對腳痛左咁多日,係著左對唔係咁適合跑ge波鞋...後日,唔著佢出去,
好彩仲有對做後備的....

今日發夢有好多隻貓,我抱住左其中一隻,個樣同肥仔一d都唔似,
不過係夢入面抱住佢ge感覺好"真實",有重量,有體溫....好似抱住肥仔咁....
一個點點安慰的夢....



>>May 11, 2006 at 11:04:58 AM GMT+8

2006 年 5 月 8 日 星期一 【清涼】

昨天大半天因為失眼而腦袋晃下晃下的.....堅持不走去睡。
結果成功了,終於可以安然入睡.....但早上還是很醒睡,過份警覺不是好事~

"休息"了一天,雖然還是有點點痠軟,但還是去練一練習比較好.....
還差點速度.......
我越來越倚賴媽呢~

到了晚上,突然覺得好像輕鬆了,果然有個目標,我的自信心又回來了,
要保持這心態呀小玲!!!

夏日炎炎,懶洋洋的~>o<



>>May 9, 2006 at 5:33:04 PM GMT+8

2006 年 5 月 7 日 星期日 【晴】

變態的,一家到六點才睡著,八點鐘竟然連細微的聲音都可以把我弄醒.....
幹嗎我"警覺"性這樣高...不知道幾多天沒有睡過喇.....
睡了,又醒過一會,又睡著,又再醒....直至九時多,就起來了,今天要覆診。

今次醫生客氣多了,雖然照舊把我的頭轉來轉去,但解釋得詳盡了。
經上次匯診後,由二個方案變為五個方案了,good!
只要和私家醫生商量過後,落實那個較為完善,就可以開始了!

醫生竟然認為我會看得懂那份報告...=.="
他叫我咬著一舊紗布,好讓他試試把我的顎骨推到正確位置看看,
紗布一取出,骹位發出的格格聲,坐在房間另一端的媽都聽到,
痛至面容扭曲了不少,抱著面說不出話....
坐在身旁的醫生,看到這樣後,就沒再說我的痛很輕微了....
覆診期在兩個月後....開心,不用來得那麼密了!

晚上,媽突然慶起說要罷煮,提早賀母親節,一行六人,
就去了佐敦的北京酒樓,哥很喜歡那兒的北京填鴨,但其實全家都不吃鴨的~:p
結果,辛苦哥吃下了一半,其他人吃了一片就不吃,我勉強吃了幾片......
我其實連燒鵝都不吃的...:p
一個六人宴+一條魚,只吃下了一半,胃容量很低的一群人。
這間酒樓,服務一流,幾乎都是外籍遊客光顧,很懷舊的~^^


>>May 9, 2006 at 4:58:44 AM GMT+8

2006 年 5 月 6 日 星期六 【晴】

明明好眼訓,12點去訓,但碌到六點......唉~
失眠到想發癲.......>o<

有件事,想做未做....
跟媽談起,媽一語道破.....
別人找我幫忙時,我絕少say no.....
但原來到我想找人幫忙時,是很難........嗯...

睡醒四肢痠痛.....一跑已乏力...幾乎跪下....
知道原因了,應該是之前跑得太過份...
怎麼辦...日子也快到了....

腳真的好痠軟呀,走路也不穩....>o<



>>May 7, 2006 at 3:43:32 PM GMT+8

2006 年 5 月 5 日 星期五 【酷熱】

失眠,好討厭呀!

今天,連支持我的媽都叫我放棄了......
我不甘心......
雖然有點差距......
負面說話聽得太多了.......心情低低地......

對腳點解無晒力ge?未跑已經軟晒......

背資料......頭昏腦脹~@.@

替哥借了本書<不能比貓兒更寂寞>,幾本書中,一看書名都猜到他會借這本....
雖然說的是溝通,但愛貓人,多數都是這類選擇喇~

某日看他的功課,比我的認真得多,我每次答問題都會很精簡,只要得過且過就行了,
考試,面試也一樣........都不明白,為什麼總要把答案去發大,拖長,看起來不沉悶嗎?
但看他功課後,想....如果我是老師,我會覺得他是個用心去做功課的學生.......
怪不得以前拿著試卷時,老師總愛說:"你不是不懂,不過你不想答我......."




>>May 7, 2006 at 3:52:41 PM GMT+8

2006 年 5 月 4 日 星期四 【晴】

連續兩天不停發惡夢,睡著又發,醒了再睡又發.....
沒有了優質睡眠.....

今天狀態不佳,跑得不好.....
手的力還是不足夠......試試練掌上壓看看有沒有幫助.....
原來距離日子不多了.......

去行了石春路,腳踭位會痛,是什麼位置呢?

哥認為我不努力......他不明白什麼是力有不逮......

可否不要我捲入你們的問題之中......


>>May 5, 2006 at 5:53:39 PM GMT+8

2006 年 5 月 3 日 星期三 【晴】

一樣無所事事....

因高跟鞋而起的水泡,因跑步而消失了,good!

昨天去跑步時,經海濱公園,遇見一個廿幾至三十歲的女人,追著一隻史納莎,
追到後,把牠按在櫈上,用手箍着牠的口,鬧:"跑吖嗱!要我追你九條街..."
然後用手上的長遮手柄,狠狠的打落狗兒身上,我隔離她兩,三米,聽到打得啪啪作響...
狗兒嘴巴雖然被箍着,仍不禁發出嗚嗚聲的哀鳴....
每打一下,牠叫一聲....聽得心很痛....

當時傍晚時份,距離不足十米有4,5位放狗散步的狗主,也有多隻小狗在散步,
但沒人理會,我走向那個女人,被媽拖着走,叫我別多事,
我邊走邊鬧,引起了其他狗主注意,年老的叫我別管喇!
年輕的就看著我,又看著打狗女人......

但媽把我扯到五,六米遠時,我還清楚到那女人打狗而發出的聲音時,
忍不住了,掉頭衝回去,邊轉頭跟我媽說報警喇!
年老的狗主提醒我小心,那女人聽到我說報警,停手了,
我未走到她身邊,她己抱起狗兒,向我笑笑,然後就跑了,
我沒追,我知道,即使報警,作用不大...
其實,我們可做什麼?寄望狗兒回家後,不會遭遇更惡劣的對待......




>>May 4, 2006 at 1:34:26 PM GMT+8