2006 年 7 月 10 日 星期一 【晴】

今朝無端端激嬲左一個人.......儘管我怎樣做怎樣同佢講對唔住，佢都好似唔領情，
件事足足困擾左我成日，幸好佢大人有大量，總算解決了
不過其實今次的確係一個幾好的機會比我去反省一下......就呢件事，我會好好檢討的

下午去左踢波，同一大班柴灣天主教張振興中學的阿sir去順利切磋.....
今次係第二次同呢班港男踢。好多人都問我點解會同呢班人踢，
其實係因為我姨丈響果度教書的。
三點開波......好熱...... 其實我自己幾鐘意踢人造草的，但就好鬼憎踢落過雨的人造草!!!
今朝落過大雨，所以個波一落地果下就會突然變速........仲快過卡路士的遠射....
一去到就比呢班老師叫我打中場......即係要走上走落...... 呢班老鼠真係識嘆喇，成日響
度等波到......踢前面的又企到鬼咁前，踢後面的又企到鬼死咁後，
我的活動範圍就真係大喇...........係大鑊..........我個人黎講真係好憎咁樣踢波的......
坦白講，每隊八個人之中每隊都係得果幾個肯走.......不過都好難怪的.......始終佢地都已經
幾十歲了.........換著係我都未必頂得住踢成場......
最後大家踢成一比一........佢地話要分到勝負......所以.......<<互射十二碼> !!!
我射完之後......慢慢行番去場邊抖大氣....實在太太太累........最後射晒八輪......好似係我地輸
但邊個射失我已經無氣力睇....成個人果時都已經攤左出場邊............

candy中途都有黎探班......幾好...有野飲......最後同呢班港男響更衣室度抖左十幾分鐘
就一齊去附近的茶餐廳食野+...................再抖過 !!!!!

擔心左整天...............
Beyond <<我是憤怒>>

WOO....A 可否爭番一口氣
我是惡夢 天天都可騷擾你
與你與著在路途 你莫退避
我是憤怒 分分鐘可燒死你
幾多虛假的好漢 都睇不起！

* 只想吞千噸的怒火 未去想失聲高叫
I'LL NEVER DIE I'LL NEVER CRY
YOU'LL SEE
WOO.....A 可否爭番一口氣
WOO.....A 真本性怎可以改

你勿說話 皆因今天的真理
講起始終都跟我 有段距離
拒絕說話 皆因今天的天氣
怎樣呼吸都不慣 太沒趣味

WOO....A 可否爭番一口氣
WOO....A 真本性怎可以改

>>July 12, 2006 at 9:47:49 AM GMT+8

2006 年 7 月 9 日 星期日 【晴】

世界盃終於畫上句號，我也像發了一場夢...
所支持的球隊通通在紅牌下輸波.......英格蘭..法國......
呢幾日聽左泳兒首"你我她", 非常感嘆.....以下是我填詞的"你我她".......
希望有緣人能與我一同細味.......

<<無奈版"你我她">>
走到馬會中觀察　多執迷的你我她
相信可以發達　建造花花世界
有百萬人在玩過關

走到大街中走散　多失望的你我她
想過澳門玩番攤　拋掉種種冰冷
這個鬧市沒有期盼

＊挫敗在我心間　哪個領略它　同在城內輸錢　同樣怕
　你有過貼士嗎　信過外圍嗎　可最後　哀傷滿街
　盼望在我心間　哪位糟蹋它　同在城內希冀　同樣慘
　幾多位失敗　多得堆滿牛池灣嗎
　到最後　你我歸家　哪個在喊(各自在喊)＊

窮到條褲穿窿　連三餐也無得�(yak)
個個也是成頭白髮　我努力忘記英軍
你也盡快放低施丹

REPEAT＊

幾多個望見這賽果　想喊

>>July 11, 2006 at 5:58:27 AM GMT+8

2006 年 6 月 22 日 星期四 【晴】

六月二十一日，去左做義工
第一次同一大班弱智人仕相處帶佢地出去玩，其實佢地的心態就好似小朋友，
對佢地又要鬧又要錫，真心對佢地的話根本無野需要驚。今日的確係好難得的經驗，
起碼學識左點樣同佢地相處，對呢類人仕的認識又多左，希望對將來可以用得著吧。

六月二十二日，
美國對加納，
輸到杰撻撻。
shit shit shit!!holy shit!

>>June 23, 2006 at 7:18:54 AM GMT+8

2006 年 6 月 17 日 星期六 【晴】

18/6

今朝彈琴果時個魂魄好似唔知行左去邊咁，大概係唔夠訓的關係吧....
今日並無參與聖母軍開會，皆因呢段時間用左黎同choir練阿rex婚禮d歌，無法啦....
再唔練就真係無時間練，練左個零鐘吹左陣水，收緊琴的時候，廖志樂兄弟
突然走唔黎同我講:
"咦.....你收琴呀?"
(語氣真係好鬼死得意.....大佬呀，梗係收緊琴啦，真係幾想答佢: "唔係呀,
我見條電線鬆鬆地再插下佢之嘛....") , 但當然我無啦，我係同佢講:
"um.....都唔係既...你有野想搵我?"
結果一問就出事...同佢jam左一個鐘.....原來佢星期三要"教區choir考試"...每兩年一次，
我仲記得上次佢好似揀左"主慈頌"...
一齊響度揀歌, 揀下又練下,比左好多choice佢，佢話佢係tenor....
唔想唱太低音，亦唔想揀首無乜難度太普通的，又要揀首幾熟幾好聽的....
拍子亦唔想太單調........1,2,3,4,5,係五樣條件... 那時候......我真想死.....真想哭.....
之後同班聖母軍去食飯，再次發揮我的吹水+串咀這些低能本色，其實呢d野我都係睇人睇心
情架姐，如果我真係好靜咁坐響你隔黎的話，我自己都驚...

下午去左孻舅父家，去到阿公阿婆阿媽舅父響度打牌，
我陪阿晞響度玩.....唉.......佢真係好似唔識高咁.......同佢打左一陣機，
舅父要去車其餘親戚黎，就係因為咁，我又有得打喇......真係奇怪，一係好耐先有得打，
一打就練續兩日都打，哈~打左一陣又贏佰幾蚊，不過有一半係比左孻舅父，
因為之前叫左佢幫我買野。
之後比番孻舅父同大舅母打，我就同班表弟妹響度低能一番，
打ps2..winning...真係無敵.....連表姐都落埋場......又如何..........!?!?!?!? XD

打到食飯，其實次次開party都係食呢d野都無乜新鮮感，又係三文魚又係牛肉粒焗薯熔
又係雞翼等等等等呢類食物，不過.......都好欣賞兩位舅父的勞力，話晒全部都係落手落腳整.

之後響度睇波，一部電視係有線，另一部就睇美女廚房，但我只集中睇波，
因為sa姐有錄到嘛，遲下先再問佢拎.....場波上半場都幾緊湊呀，仲有十二碼....
睇完上半場就鬆人喇，因為老豆原來今晚車左沈神父去機場，依家響樓下車我地走

落到樓下同老豆傾掂數，最後係由我揸的..........haha
不過佢點左我行另一條路呀，真係麻煩，並唔係話行錯路，但呢條路我唔熟嘛
睇路牌睇到我暈......行龍翔道咪好囉.....直去唔洗煩.....雖然我都知佢專登的，
想我行下其他路，但真係....唉..........有時間就話借架車周圍行練熟D路姐，
依家趕時間嘛...... 算了.....都尚算是一個難得的寶貴經驗。

番到屋企攪左一陣，十二點就訓了，實在太累喇，尋日踢波黎，但又只訓得三個鐘，
今日又癲完一餐，要大訓特訓.............。

>>June 19, 2006 at 6:44:04 AM GMT+8

2006 年 6 月 16 日 星期五 【晴】

17/6

今日下午打算同姑姐佢地打牌的，但由於唔夠腳的關係打唔成，
佢地亦都係好準時咁響食晚飯時間先黎...
晏晝無節目所以去左同班中年人仕踢波，好曬....但踢落去感覺唔錯丫，
好耐都未試過踢大場喇............我又整親隻腳喇...今次係比人一野踩落右腳腳面，
依家隻腳指骨都仲有點痛...... 觀塘..........真是我的兇地......
夜晚果餐我碌卡呀....我請客.......不是啦........其實係因為我手頭上無乜cash.....
所以咪簽卡收番八舊幾現金黎用囉.........

食完飯番屋企同二叔睇波，其他人響度打牌，我一向都有預感會落場打的，
果然，我的毅力並沒有白費，大約係尾場意大利對加納的開波時間，我亦都落場
開波.....一路睇波一路打，打左兩個鐘頭....贏得果一佰....真失策....

打完就散band啦，我都衝上床爭取時間訓.......訓三個幾鐘就要起身去聖堂。

>>June 19, 2006 at 5:31:03 AM GMT+8

2006 年 6 月 7 日 星期三 【晴】

食得鹹魚抵得渴
我係深深明白呢個道理.......

相信無人會比我感受更深

>>June 8, 2006 at 6:21:22 AM GMT+8

2006 年 6 月 3 日 星期六 【晴】

今日係沈神父向小堂主持最後一台彌撒，完左有同佢影相呀。

其實我彈左八年，這段時間有好多神父來往過，但我對佢有一種好特別的感覺，
同佢幾夾，覺得佢幾warm,又玩得,最仲要係唱得!
佢向我印象中，把聲係最靚果個，d音亦都係最準的(呢樣對我黎講好重要)，
大家根本好有默契，知道邊隻字邊一句個聲調應該係點，，點先更加好聽，
真係好夾，坦白講，每次佢主持的彌撒，我都真係特別有心去彈，
更加有心去將首歌再加點創意，
轉一轉個彈法，簡單黎講，有佢的時候真係可以講係更加投入。
我仲記得以前辦告解時都係搵佢架，印象最深刻的就係有一次我同佢傾傾下仲
.....流馬尿.......真係........唉.......一定唔會忘記......

其實佢依家被調走，我好耐之前都預左的，因為每個神父都必定會有個所謂的期限，
服務完呢間，年屆就要被調去第二度，但只不過呢一個月，當我知道
一個星期又一個星期咁過去的時候，不捨的感覺就越黎越強烈.....

今日同佢最後一次合作，感覺真係好難形容.........

衷心希望佢去到第二度會有更好的發展

唔好唔記得我呢個司琴呀.......

學果個 elvin 話齋，有緣的我地一定會再見，
一定會碰頭喔 !!!

>>June 4, 2006 at 10:27:20 AM GMT+8

2006 年 6 月 1 日 星期四 【晴】

尋日下午果餐向屋企食，由家姐負責攪搪掂
雞蛋+一堆綠色的物體+公仔麵+三文魚
仲要飲埋檸檬茶...........
其實我都驚驚地架喇，唔知咁食法得唔得，都驚攪肚....
點知真係應喇，痾左一劑........
這是第一劑........

夜晚果餐食唔飽.....走去雪櫃拎左隻"\蒸黎食
唔知係唔係太滯的關係...........肚痛了.....又要排毒.........
這是第二劑......

其實成晚訓覺果陣個肚都有癮癮作痛咁，不過無理會繼續死訓
今日...........卒之又要再痾....
這是第三劑......
三劑都有一個共通點，就係..........d臭臭好鬼死爛.......
(尋晚半夜三間莎姐成兩點幾打黎唔知做乜鬼野，我三點幾醒左先知
打番去響左兩下無人聽就算數喇
希望唔係d咩大件事la，不過根據非正式統計好大機會都又係無野做........
佢又煽我一鑊喇....ding~)

紅雨的關係，唔駛番補習社，晏晝打算溫下星期一要考果科
成二十個lecture.......我睇睇下第一個lecture已經頂唔順訓著左
真係睇到我一頭霧水
得番一日半時間，唔理喇
睇極都係唔明架喇

>>June 2, 2006 at 1:43:02 PM GMT+8

2006 年 5 月 29 日 星期一 【晴】

28/5

今日超級黑仔!!
唔想出聲
真係想即刻避世咁滯

29/5

今日係最後一日school day,之後就要準備考試
但我真係唔知從何入手，等死吧
放左學，飲可樂，最後死去將軍澳行街食飯
又落雨.....加上心情還未平復.......好多野煩....... 悲上加悲
補習果時不自覺地拎左班學生黎出氣.......

30/5

今日唔駛番學，但由於要趕份功課下午番去交，八點幾迫於無奈要起身
狂做猛做，終於響一點四十五分完工..........之後落去美心好趕咁食飯
趕住番去print 野同交功課，之後又趕住去將軍澳
成日都係響好趕的氣氛下做野。
今日又要發火鬧人.........真係弊.......日日都咁鬼死躁，
我真係驚自己會有問題
其實我真係唔想鬧任何人的，
因為我好清楚知道自己鬧人的模樣真係好惡
連我自己對住塊鏡望番都覺得好驚.....何況係班靚仔........
但我真係好頂阿馮生唔順，唔該你留心d........
我係好鐘意小朋友的，真的唔想見到有人會比我鬧到喊.........

>>May 30, 2006 at 3:23:15 PM GMT+8

2006 年 5 月 24 日 星期三 【晴】

今日有兩個鐘頭 lunch，去左黃大仙飲茶，今次可以話係我地呢班人最後一次一齊去
果度飲茶喇，遲下都無乜幾何會去
超低能.............十四個人逼埋坐響一張"中檯"...........睇見對面一個二個的女孩子坐到成隻
龜咁款，都咪話唔攪野......XD
好憎tracy..............!! 短短幾堂佢已經取代左daniel 個位置.......可想而知我對佢的憎恨程度.....
最後一堂，goodbye都懶得同佢講..........實在唔值得我為佢呼出一口氣
放學歸家途中搭果條長命電梯，上緊果時隔黎落緊去果邊突然間有個男仔喂我，
揮手同我打招乎......我唔知邊度黎的反應又立即同佢打番招乎hi番佢，但我果刻
完全唔知佢係乜水............超超超..................超級低能.....之後先至覺得好似幾面善，
無錯，係聖言的師弟........係喇.........好似係天主教同學會的人呀....
佢都幾眼利，咁短時間一望就認得我........但我呢..........
或者我對人對事真係太唔上心了.............

>>May 25, 2006 at 11:02:08 AM GMT+8