2004 年 6 月 16 日 星期三 【晴】

　　雖然又有一個機會，但係我一點興奮的感覺也沒有。

>>June 17, 2004 at 11:03:03 AM GMT+8

2004 年 6 月 15 日 星期二 【晴】

　　今日同比卡超去左.NET Lab玩，之後吳子文黎左，俾左D資料我地，佢又做D Gag野。佢搵左好多個明／歌星的xanga網，包括周麗淇、容祖兒、Cookies成員及方力申等。夜晚，同比卡超去左第四街某餐廳食野，雖然有D貴，但係都食得幾飽。
======================================================
　　好唔開心，好Down，一敗塗地，一事無成，一籌莫展，一二三四，一成不變。
　　成個二零零四年都無乜開心過，唉！
　　我唔知幾時先可以開心番，谷底，真係谷底，真係谷底。
======================================================

>>June 16, 2004 at 1:50:22 PM GMT+8

2004 年 6 月 14 日 星期一 【晴】

　　呢排，我發覺我同比卡超夾左，我話悶的時候佢又想話悶，我話唔開心佢又話唔開心，我地連幫一個人改新稱號用的字也不約而且。好像是開始有點默契.........
=================================================================
　　Kenneth Hui之前一直都想約我出來吃飯，但是因為之前唔得閒，所以推左佢。今日終於得閒出左大街同Kenneth Hui吃飯，我好耐無見佢同只係見過佢一次，但係我仲認得佢。我地食完野之後，佢帶我上佢朋友屋企，果度仲有好多人，同埋個個都大過我，人生經驗也比我豐富。有個人生經驗比我豐富的人仲教左我應該做乜，我仲識左個鄰居。
=================================================================
I had a great time.
=================================================================

>>June 15, 2004 at 5:50:34 PM GMT+8

2004 年 6 月 13 日 星期日 【晴】

　　英格蘭呀！
　　完場前，前利物浦球員希斯基在禁區頂犯規，我心想不妙，點知.......
　　以為由贏變和，現任利物浦隊長謝拉特回傳給龍門占士（前前利物浦球員），龍門出迎，剷掉敵軍，十二碼..............
　　甚麼事也可以發生，即使只有三分鐘。
===========================================
　　Finish reading 4 books.
===========================================

>>June 14, 2004 at 1:23:54 PM GMT+8

2004 年 6 月 12 日 星期六 【晴】

　　今日同比卡超、孖田、Katrina同文禮去香港仔吃午飯，好耐無見孖田，佢好似又gag左。食完之後，Katrina走了，我們四個gag人便逛香港仔，笑死我。
　　自從五月二十九日考完試起，開始放假，但直至今日為止，只有一日是沒有出街的，出得太多街了，明天應該可以留在家休息。
=============================================


>>June 13, 2004 at 8:56:20 AM GMT+8

2004 年 6 月 11 日 星期五 【晴】

　　今日同比卡超、Katrina及文禮去Lindsay Ride Sports Centre打羽毛波，我已經好耐好耐無打羽毛波了。
　　打完之後，去左莉碧嘉食野。食完野之後，睇同學以前的相，原來以前比卡超和Katrina都比現在肥，比卡超仲有第二個花名，正！

>>June 12, 2004 at 7:40:48 AM GMT+8

2004 年 6 月 10 日 星期四 【晴】

　　今天是最後一堂English Grammar Improvement Course了，因為小弟出席率逹八成之多, 故遲些會有五百元refund。上完最後一堂後，和比卡超到Swire吃午飯，然後到馮平山博物館，以增進咱們的藝術修養。其實大部份東西較早前已看過，今次主要是去看新展出的相片，都是以前中區的相。然後，再去圖書館，今次我沒有借書，比卡超卻借了許多，多得自己的借閱限額也用完了，要用我的三個借閱限額。
　　之後，我便和比卡超告別，去我堂哥屋企打機，我爸的嫂竟在初期認不到我。我和堂哥打我?最喜歡的遊戲-WE7，我們實力不相伯仲，他略勝我一籌，他也贏得比我多。
　　然後去了香港仔和八個朋友吃晚飯，去綠野仙蹤吃，也頗好吃。然後，上了John的屋企玩了一陣，但之後覺得自己有點累，所以比其他人早走。

>>June 12, 2004 at 7:41:00 AM GMT+8

2004 年 6 月 9 日 星期三 【晴】

　　今朝又去阿仙奴街的警署總部，今次比上次更加多人去Interview。我二零零四年真運滯，今朝竟然在香港仔隧道塞了大半個鐘頭車，我已經好早出門口，但依然難逃此劫。等左好耐先輪到我，原來我果班仲有第二個去In。今次只係見到一個著制服的警察。
　　因為已經太晏了，所以決定翹Grammar Improvement Course。
　　之後，行左一陣灣仔，竟讓我遇見了阿邊個邊個。

>>June 10, 2004 at 5:37:22 AM GMT+8

2004 年 6 月 8 日 星期二 【晴】

　　今朝凌晨重睇"Funeral March"。
　　又再上Grammar Improvement Course，不過今日就遲左十五分鐘先去到。落堂後和比卡超到SU Canteen吃飯。
　　昨晚比卡超提議今天到數碼港一逛，反正之前也沒有參觀很多地方，所以今天又去數碼港。今次，我地差唔多可以去0既地方都去左，那裡的升降機設計很新穎，我們也參觀了HKU SPACE數碼港學院，那裏裝修得很靚（基本上，整個數碼港都好靚，連洗手間也是這樣），比起咱們所用的Computer Lab(Haking Wong 31X)靚唔知幾多倍，唉！D風景又靚到暈喎，有得0係果度做野簡直就好喇。數碼港乜都要Cyber過人，連果度0既百佳亦都先進D。
　　後來，比卡超提議去睇「明日之後」，反正我之前已經有興趣睇同時間適合，所以便買飛睇。跟住，比卡超又搞Gap，提議到Palace坐情侶位，不過就分開坐，這樣好的建議，我又怎可以接受呢？所以都係正正常常買普通位算了，我今次坐的位置係我上個禮拜日坐的位買後一位再偏側幾個位。間戲院好凍，套戲的感覺又好凍，搞到我都好凍。
　　我四日裡面去左同一間戲院睇左兩套戲。

>>June 10, 2004 at 5:30:44 AM GMT+8

2004 年 6 月 7 日 星期一 【晴】

　　今朝又係要上Grammar Improvement Course，又無遲到。孖田離開了港大，所以今天只得我和比卡超吃午飯，吃完便歸家了。
　　然後去阿仙奴街的灣仔警署總部，雖然係警署，但係我0係裡面淨係見到兩個著制服的警察而已。星期四又要去果度。果度唔係好靚，「無間道」中的警察總部（數碼港X期)靚果度好多。

>>June 8, 2004 at 9:13:00 AM GMT+8