2002 年 10 月 4 日 星期五 【晴】

心情極差！


>>October 5, 2002 at 10:48:11 AM GMT+8

2002 年 10 月 4 日 星期五 【晴】

今日先去中大，後去city，嘩，中大.....熱爆，所以好快bye bye，之後去city。
都撞到兩個羅中女高材生、B女、恆、元米同埋蓉蓉，佢地勁啦！

>>October 5, 2002 at 10:41:58 AM GMT+8

2002 年 10 月 4 日 星期五 【晴】

呀袋個學生會win左呀！仲要大咀銘都入埋prefect，好terrible呀!!

>>October 5, 2002 at 1:05:55 AM GMT+8

2002 年 10 月 4 日 星期五 【晴】

亞運會上晒我個腦！

>>October 5, 2002 at 1:04:50 AM GMT+8

2002 年 10 月 4 日 星期五 【晴】

唉.....聽到一d野令我好好好慚愧呀...
唉......

>>October 5, 2002 at 1:04:12 AM GMT+8

2002 年 10 月 1 日 星期二 【晴】

喂呀，你地唔好咁啦
我冇諗過9月29號既日記會帶黎咁大回響喎
我真係冇野先講番出黎咋
多謝你地

>>October 2, 2002 at 11:20:12 AM GMT+8

2002 年 9 月 29 日 星期日 【晴】

其實我真係冇事架，只不過分享我既經歷、感受。
過去左已經過去，我安於現狀。

>>September 30, 2002 at 2:30:58 PM GMT+8

2002 年 9 月 29 日 星期日 【晴】

最近成日俾屋企人話我晚晚發開口夢，又問我最近係唔係壓力大?
我想答係架....因為猛緊自己 !! 好忙好忙...



>>September 30, 2002 at 9:40:06 AM GMT+8

2002 年 9 月 28 日 星期六 【晴】

今日我同step、carman、7仔跟左lam sir去返教會，感覺都ok。之後就去埋團契，sorry，我講返以前經歷，可能諗番o個一刻既感覺，所以好突然流左兩滴眼淚。可能，我以往冇乜點提過，不過以前有d身邊既同學都略知一二。
話說，form 5 o個年既某一個星期日，我、爸、媽o係屋企，媽話腰骨好痛，所以去訓晏覺抖一抖。跟住，下晝佢訓醒之後，佢個樣青、白晒，佢好細聲講話佢起唔到身，嚇到我同呀爸好驚，呀爸即刻報警。我同爸都跟埋上救護車，我最記得架車去緊醫院時好"凳"，每"chok"一下，我媽就瞇埋眼，我知佢一定好痛好痛......，我仲見到佢痛到眼角流出眼淚，我第一次見佢唔係因為睇電視而喊，我一邊拎紙巾一邊個心好酸好酸......架車上我同呀爸都冇出聲，因為我地都好沉重。
媽咪住左醫院成個禮拜，期間媽咪被抽背脊骨組織、照x光去化驗，醫生先突然話我媽咪既脊骨其中有兩節好似俾野蛀左咁冇左一半，一定要做手術補番佢，如果唔係後果不堪設想。一切都好突然，呀爸去聽醫生講個手術詳情，話由肚"tong"開至背脊，先把內臟小心拋開或移動，然後用一d唔知乜野去補番兩節骨，然後放番好d內臟........。成功率係60%，我一下子真係唔係好接受到......，但係我又唔可以做任何反應，因為我知道媽咪自己比我地所有人係最驚既一個，佢自己都唔出聲......。呀爸一邊叫媽咪講冇事既，應該對醫生有信心，唔使驚.....其實我都知道呀爸同我感受一樣，只係佢要先唔可以俾媽咪驚。
我記得做手術o個日係某個星期六，o係大埔那打素醫院，朝早我同呀爸去陪媽咪，期間，呀爸行開左一陣，媽咪同我傾計，叫我記低佢既好多提款咭、信用咭密碼，又話如果有咩事記住點、記住點，我話傻啦！唔好咁驚啦！但係我內心真係擔心都極點，又唔可以放o係面上！o個日仲有幾個媽咪d工友陪住我地。11:30am，媽咪要去見麻醉師，跟住就入左手術室，我地一路等一路等，下晝呀爸唔俾我改期，叫我去學埋琴先，咁我就返鑽石山hollywood學琴，學完之後拿拿聲搭車番大埔！我去到醫院，終於鬆一口氣，媽咪6點幾先送番病房，d麻醉藥令佢未醒，但係個樣令我又流眼淚，佢好白好白，而且好憔悴。我、爸、家姐、幾個工友都圍住佢，等佢醒，不過佢到好夜先醒。就係咁媽咪住左差不多半年醫院，o個段時間24個小時都要帶住個腰"cool"，好大個，而且好硬，唔准除。
呢段時間六、日、假期、一放學就搭71a去醫院，陪下媽，而呀爸都每日放工就趕去醫院。每次去探佢，我地都會煲湯、燉燕窩，有時會整埋晚盒由鑽石山拎俾佢，有一次呀媽話好耐冇食雞，呀爸就特登整白切雞俾媽食，我o個一刻覺得呀爸對呀媽好好，好好。我都唔記得我有幾多餐晚飯係o係醫院canteen到食，我只知道每晚都好攰好攰，又要做功課、溫書。而呀爸就睇睇下電視都訓著喇。一時間，變化好大。而我家姐?唔好講啦。
漸漸地，我同病房入面d人、媽咪d工友都好熟悉，陪媽散步時、做物理治療時都撞到熟人，而我媽隔離張床都轉左好幾個病人，不過d病人都同我媽熟左，有d出左院之後都特登煎魚、煲湯俾呀媽飲，有時仲傾電話tim，而媽d工友一落更就黎搵呀媽，送花、水果、飲品，煮埋飯俾佢都有，我都覺得媽咪好好，有好多人去陪佢，照顧佢。
我最憎係魚腥，我從來都唔會自己去買魚整，不過媽話想飲生魚湯，冇計，咁我一朝早都去街市買條滑"散散"既生魚，好核突，仲要返屋企洗o個下先難頂！最後都煲左一煲湯，中午送埋去醫院。
記得有一日，同一個大病房既一個女病人，佢好肥好肥，我估起碼有250磅，佢見到我成日黎陪媽散步，佢首次同我打招呼，佢坐o係床上面，張為床都凹左，我好記得好記得。點知.....過左幾日，呀媽同我講，話o個個女病人o係半夜想去洗手間，落床時失足，跌左落地......咁就突然去左。我聽到，好心酸，覺得人好化學，前幾日先打過招呼，幾日後已經唔見左佢......
有一個病人係一個婆婆，佢好風趣，有時傻傻地，有時又唔傻得晒，佢成日認錯人，有時叫我老豆洪金寶，有時叫呀爸周潤發，好搞笑，有時又叫我姑娘，有時叫我姐姐......
有一次有個工友黎探我媽，見到我之後，問我媽︰「點解成日都只係見到你細女既?」我知我媽個心好痛架......我家姐份人就係咁，媽咪有事，佢平均一個月都唔知有冇去醫院兩次，仲就係我叫佢，佢先去。講真，我都心痛，媽咪有事，個個知道都好緊張，海南島、印尼既親戚都紛紛打電話黎，連堂大佬同呀叔都由印尼飛黎探媽咪，可惜，最唔放o係心既卻係我家姐，我都唔想同佢講野。
平時我覺得呀爸好大男人，不過呢件事令我對佢改觀。好似，佢會去每日幫媽咪抹身，扶媽咪去洗手間，一放工即刻去醫院，煮飯、煲湯......有次仲同媽咪講︰「如果你想既話，不如唔好做野啦」我好佩服佢，我知道媽咪其實都好感動，佢係一個好老公。
出院之後，媽仍然要帶住個龜殼(腰cool)，佢行路都好慢，夜晚沖涼都係呀爸幫佢，食完晚飯由我洗碗，而呀爸就帶呀媽落去散散步。令我覺得佢地既感情係前所未有咁好！因為平時總有鬥咀既時候。
漸漸地，媽咪康復，而我就會考、暑期工、放榜、入馬理信......都令我漸漸冇再提呢件事，不過我呢世都唔會忘記o個一年令我經歷左好多好多野。一諗番起o個時既野，我都有百般感受，係難以形容既感受。特別好多野突如其來既時候，往往都唔知點好，好驚。

呢d就係我會考o個年既經驗。

前幾日同家姐鬧交時，我都有提到「o個時媽咪出院之後，我陪媽咪o係屋企傾計時，佢講起家姐冇乜點探自己，而且連工友都咁問，媽咪一路講一路流眼淚....」我問佢覺唔覺得自己有問題，佢竟然好大聲咁講︰「你知我一向都係咁架啦，你想我點者！」我冇野講。


>>September 30, 2002 at 8:52:03 AM GMT+8

2002 年 9 月 27 日 星期五 【晴】

嘩，今日去左科大open day呀，超大，行左超耐，我地呢d讀商既竟然聽呀柴點，去左電機lab參觀！嘩，科大真係大！連canteen都多過人，成個food court咁！我地仲見到tvb成班新聞報導員食tea添呀！有胡力漢啦、陳可欣啦、趙麗如啦、其他唔記得個名喇！
嘩，最正都係個宿舍呀！超得啦！有波台、有線電視、仲有可以look ling既房呀！
我地都話拿拿聲番屋企溫書啦！

>>September 28, 2002 at 11:29:04 AM GMT+8