2006 年 9 月 25 日 星期一 【晴】

因為有人有露比星期二餐廳既一百蚊折扣卷，
所以今晚去左那度食。
需以扣減了一百蚊，
不過都仍然係好貴，
埋單仲要四佰元。
留這只係叫左一客沙津、一碟意粉同兩杯 Drinks。

入席個時，
侍應問我們申唔申請 VIP 卡。
VIP 卡 $450 三個月有效期。
有效期內，
每次幫趁都有 50% Off。

以今餐價錢為例，
要食兩次半先為到半，
食三次以上先有得平。

三個月食三次星期二餐廳，
係幾重負擔
無論係荷包定體重。

唔係話畀唔起，
不過二百蚊又係一餐，
二十蚊又係一餐，
二十蚊已經醫到肚，
有冇需要用二百蚊呢？

當然，
二百蚊既好食 d（假），
畀多少少去享受，
也不為過。

但係我覺得間唔中一次半次先享受到。
如果你係食慣左，
我又唔覺得咁係享受，
咁樣反而係為洗錢而洗錢。

飯後去睇戲，
今次係 DOA。
改篇自同名格鬥遊戲，
笑位比想像中好，
故事內容同打鬥場面就……
不提也罷。

>>September 29, 2006 at 5:01:15 PM GMT+8

2006 年 9 月 24 日 星期日 【晴】

下午油麻地有個比賽睇，
之後夜晚要撲入沙田同人食飯。
個比賽比預期早完，
所以時間比較充裕。
可惜等巴士等左好耐先有車，
結果當然又遲到啦。

曾經想過轉坐火車，
不過好彩冇咁做咋。
因為上到巴士後聽收機，
聽到火炭有人墮軌被火車阻到。
北行線要成二十分鐘先有一班，
如果轉左仲耐呀。

今晚食小籠包，
好好味。
不過北方食物，
大多很辣。
甚麼担担麵、
甚麼醬爆牛展，
總之就辣辣辣啦。

今完飯，
去睇戲。
睇戲之前，
去左買 CD 同食甜品。

買左三隻 CD，
一隻平井堅精選，
一隻 Dear Jean，
另外一隻係崇基、崇德兄弟再加上劉美娟既一隻福音 CD，
埋單 $313。
某人又係買三隻 CD
又係埋單 $313，
有冇咁巧合呀？

甜品食左朱古力募斯蛋糕，
同一杯綠茶乳酪咖啡。
蛋糕好好食，
但係杯咖啡就……

>>September 29, 2006 at 4:41:42 PM GMT+8

2006 年 9 月 23 日 星期六 【晴】

成日都撞 Event，
今晚又撞。

pc 定向會個班約今晚食飯，
仲好似話同某人慶祝生日 tim。
不過呢，
我就因為約左人睇詹瑞文，
所以去唔到。
（事後聽講今晚好齊人）

講返詹瑞文，
其實我好鍾意睇呢 d 表演。
棟篤笑呀，歌劇呀，舞台劇呀我都好鍾意。
其實管弦樂呀個 d 我都鍾意聽，
不過呢個就要有精神先聽得，
如果唔係好易會訓著。

又講返詹瑞文，
今次係重演萬世歌王。
下兩個星期就會睇男人之虎。
男人之虎其實舊年應該睇左，
個時係約艾文去睇，
碰巧當時我同佢都失業。
點知叫佢買飛買到我同佢都找到工，
套野做完都未有。

今次重演，
又碰巧有人得閒陪我睇，
即刻去撲飛。

場 Show 真係好正，
好好笑之餘，
又有 Message 帶出黎。

睇完咁好睇既一場 Show，
正場戲先上演。
就係極速傳說。

灣仔->旺角->沙田第一城->旺角
全程只用了六十分鐘，
其中約二十分鐘係用於行路同等車，
可見 d 車係開得幾快！

再加上彌敦道近窩打老道爆水管，
三線變兩線，
架小巴左穿右插。
大衛同學曾經話過，
佢係美國旅行個時坐某某人架車，
話佢駕駛得太狼，
今晚加小巴，
比佢仲狼！

之後旺角轉巴士，
可能之前塞車，
所以要追返 d 時間，
所以又係咁飛車。

回程小巴就更加唔駛講啦！

>>September 29, 2006 at 3:49:07 PM GMT+8

2006 年 9 月 22 日 星期五 【晴】

公司身處那座大廈部電梯好攪笑，
而且係想唔明點解會咁設計，
亦都唔明點解現實真係會咁發生。
講 d 事例。

話說今日我入電梯，
同事追出黎找我。
咁我按開門制啦，
睇下佢想講乜啦。
點知我點樣按個開門制都好，
度門係會繼續關既。
咁，
個開門制整黎做乜？

同一部電梯，
不過今次我係想關門。
按關門制，
結果度門係唔會關既。
想關門咩？
按樓層數個 d 制啦。
咁，
個關門制整黎做乜？

都係同一部電梯，
我係廿七樓，
部電梯係二十五樓。
按制叫架電梯上來啦，
之後我繼續打 PSP。
三分鐘之後，
我發覺部電梯仲未到。
原來佢落左去二十樓，
仲一路繼續落。
而另一部原本係地下既，
就開始上緊黎……

有時不禁會問：
究竟係邊個寫呢部電梯既 Program？

D 制按左冇作用；
有部近既電梯唔黎，
要調部遠 D 既過黎。
一 D 效率都冇……

>>September 29, 2006 at 3:05:37 PM GMT+8

2006 年 9 月 21 日 星期四 【晴】

託人整左幾段 Test Movie 我試機，
終於收到喇。
不過，
結果都係用唔到，
因為燒左做 VCD 之後，
係部機睇唔到。
唔知點解，
夜晚返到屋企再試，
結果都係唔得，
攪到我四點幾……

2006 年 9 月 20 日 星期三 【晴】

Tune 左好耐部機都 Tune 唔好，
後耐發現可能係個 Source 既問題，
結果今晚老闆買左部新 DVD 機黎做 Source，
唔知會唔會好 d 呢？

話分兩頭，
昨日個客黎睇 Demo，
初步幾滿意。
唔係掛，
我自己對個質素都唔滿意，
佢要求真係低。

之後傾 d Hardware/Software 點夾，
結果上左佢地公司，
攪左成兩個鐘。
上完佢，
開始明白點解佢地要求低喇。

佢地好似咩都未想咁，
邊個模組放邊到好似剛剛想咁。
例如佢地話放 Harddisk 個位置，
隔離就有 FM Tunner 同 TV Tunner，
實干擾到七彩。

根住 d Interface 又亂晒大龍。
你地有冇見過一個 Device 係有兩個 USB 插位，
而兩個係唔同 Functions。
又或者有兩個 Memory 卡漕，
一個 For Read，
一個 For Write？

簡直係笑話一籮籮……

今晚繼續 Tune 畫質，
Tune 極都覺得差 d 咁，
結果成八點先走得。
但有個比賽七點半係灣仔舉行，
我仲要應承左幫手 Tim，
結果當然遲大到啦，
成八點半先到

>>September 22, 2006 at 5:32:22 PM GMT+8

2006 年 9 月 19 日 星期二 【晴】

道聽途說返黎，
有幾真確有不得而知喇，
當然我絕對相信我情報源既說話啦。

係某舊同學眼中，
我係一個唔上進既人。
不過，
何謂上進呢？

要不斷爭取升職？
要不斷爭取加人工？
定還是不斷爭取唔駛加班？

對於現在呢份工，
我好滿意。

滿意既唔係話因為人工好高、福利好好，
事實上我覺得我仍然係 Under-pay 既。
滿意既亦唔係話因為工作間好好，
事實上現在呢份工工時都幾長。

我滿意既係，
我覺得我適合呢份工，
呢份工亦適合我。
我找到既唔係一份 Job，
而係一份 Career。

我唔介意加班，
因為完作工作會令我很有成功感和滿足感，
我熱愛現在既工作。

或者，
這就是某些人眼中既「唔上進」。

昨晚睇左套戲，
「The Devil Wears Prada」。
講既亦都係關於職場既野，
睇完之後，
對工作有更深既體會。
我亦都決定，
會繼續「唔上進」下去……

>>September 22, 2006 at 5:32:04 PM GMT+8

2006 年 9 月 18 日 星期一 【晴】

呢篇日記係幾日後先寫返，
係想等自己完全冷靜落黎先寫，
唔想有任何偏差。
不過，
事隔幾日既後果係，
有好多野唔記得。

話說昨日講到話心痛，
當然呢到講既心痛，
唔係心痛啦。

心痛有兩個原因，
第一個係有被人出賣既感覺。
雖然明知只係一個玩笑，
唔過我係信任一個人先讓佢做 d 咁既野，
但結果卻換黎咁既結果。
肉體上（我指個鼻）唔係話真係十分之痛，
起碼有流鼻血。
痛既係個一刻有被信任既人出賣既感覺，
好憎呢種感覺，
不過卻偏偏讓我碰上了。

第二個痛既原因，
係故事既最後一幕，
得到既，
係一個如同給予陌生人既道謝。
個一刻，
只有無言……

2006 年 9 月 17 日 星期日 【晴】

累積既疲勞終於帶來惡果，
今朝唔知醒返崇拜。
中午終於一嘗所願，
去左 Pizza Hut 食 Lunch，
不過始終食唔到厚批 Pizza ><

之後入赤柱行。
我地選了個最少轉車既方法，
就係火車落紅磡再轉 973。
不過程巴士好慢，
過西隧後，
先繞香港大學到香港仔，
再沿海岸線到赤柱。
計埋火車，
用左兩個鐘先到。

未到總站我地就落車，
呢度起左座商場，
叫赤柱廣場。
不過好明顯就唔夠客，
好多間都話搬遷大減價。

之後去左海事博物館，
二十元入場費，
不過就唔係咁多野睇，
我覺得細個波士頓那個博物館。

之後行左陣市集。
我記得上次黎應該係獅子座流星雨，
同上次黎比，
呢度變左好多，
但又可以話無乜點變。

海邊個幾間酒吧都係咁樣，
市集依舊，
間屈人寺仲係度。

夜晚係美利樓食飯飯，
好飽好好美，
不過個肚好痛 ><

個肚痛完到過鼻痛，
因為撞左埋牆。

鼻痛完到個心痛。

總之就痛痛痛啦……

>>September 18, 2006 at 3:53:18 PM GMT+8

2006 年 9 月 16 日 星期六 【晴】

因為應承左幫人今朝燒碟，
所以縱然我昨晚三點先訓，
今朝都六點起身。
係七點幾既時候，
我收到佢電話，
話昨晚通頂做都做唔晒，
所以唔黎喇。

結果我有訓返落床。
原本個計劃係朝早落姐度整機，
之後下午再找地方去，
可能去九龍灣睇比賽，
可能去睇戲；
夜晚呢？
可能去觀塘睇比賽，
可能去踢波。

不過，
我再醒既時候已經係十點幾，
梳洗完之後都成十一點幾。
當我約左幾點幾點係火車站等既時候，
冇耐姐就打電話黎話佢剛剛放工，
問駛唔駛車埋我。
咁我就改返個等候地點去佢屋企樓下。

當架車去到沙田既時候，
我先醒起唔記得拿個 Rounter，
咁整鬼整馬咩。
到現在我都唔明，
點解 Linksys 個 Router 唔識 Update 個 DDNS 個 Record；
就算人手 Update 左，
都係 Connect 唔到，
真係激死。

已經兩三點，
影如仲係係俯睡。
佢婆婆好衰咁嘈醒佢，
係咁叫「起身去街喇」。
好攪笑既係，
影如一聽到就兩手一撐，
成隻海獅咁。

>>September 18, 2006 at 3:52:49 PM GMT+8