2003 年 7 月 16 日 星期三 【晴】

我今晚睇左國際台一個介紹過山車既節目. 佢介紹左歐洲十大過山車, 不過實際有十一部, 因為有雙冠軍....(我覺得佢好有賣廣告既成份, 因為兩部冠軍既過山車都係係英國同一個既遊樂場).....
好淨係睇我都覺得好恐怖呀~~~~
我一定唔會去玩架~~~~
去遊樂場我只會食雪糕同埋玩旋轉木馬(不過唔可以轉得太快, 因為我會暈架)

我個icq近排short short地呀! 好慘呀! 佢識無端端自己hang自己架! 我都無佢咁好氣喇.....>_<"

死啦, 我仲未背星期六d野添~~~~

有d緊張添, 我驚希望愈大, 失望愈大呀~~~
希望今次去得成旅行啦~~~~
其實去台灣都得架喎, 而家唔駛隔離啦, 不過而家講開, 我又好想去泰國喎~~~
一係新加坡吖, 我聽朋友講, 三日兩夜既自由行只係千鬆d, 仲可以自己額外留多幾日添呀~~~~
唔得喇! 愈諗愈想去呀~~~~

>>July 17, 2003 at 3:49:51 PM GMT+8

2003 年 7 月 14 日 星期一 【晴】

今年我既驛馬星郁都唔郁, 有好多計劃都告吹左...........可能係因為我舊年"郁"得太犀利啩, 上天今年就唔俾我去玩........唉.......之前攪左咁耐就去唔到, 究竟今次去唔去得成旅行呢?...............我都想知呀! 希望上天"網開一面"吧!

>>July 15, 2003 at 5:04:43 PM GMT+8

2003 年 7 月 13 日 星期日 【晴】

我覺得自己好似中左"元氣"既毒咁呀!
之前果掛差唔多次次出街都係元氣, 之後嘗試脫離元氣既引誘, 成功左一陣........點知, 又復發喇!

我一路都鍾意坐order枱, 我對bar枱無咩好感. 所以, 我就好唔明點解有d人一定指定要坐bar枱(仲係大部份人添)???

我將會在22/7-24/7去中山+澳門三天遊with my family!
我又啱啱醒起: 我21號攞result...........有ddddddddddddd驚添...>_<"

>>July 15, 2003 at 4:56:56 PM GMT+8

2003 年 7 月 12 日 星期六 【晴】

大約一至兩星期前(我已經無晒時間觀念喇.....), 我好無聊咁上網周圍search野, 一時search下brad pitt d website, 一時又睇下一些電影既網站. 總之咩野我都search下, 諗到咩就search咩. 我在無意間search到一篇日記(我當時search緊"丹桂軒"). 那是一個女仔寫的, 內容是她十九歲生日, 去深圳玩, 買左好多野, 又去世界之窗玩. 我留意那日記既原因係because佢有相睇, 個女仔放左d相係佢個日記度. 再者, 她的日記寫得好詳細, 淨係睇佢既日記都知佢琛圳之旅玩得好開心. 就係咁, 佢既日記就吸引左我. 我bookmark左佢既日記, 打算之後可以慢慢睇. 之後, 我又走左去search其他野.

我有諗過睇其他唔識既人的日記會唔會唔係幾好, 不過, 果個女仔既日記又好似好好睇喎. 所以我今日就拎返她的日記出黎睇啦.

睇多佢幾篇日記, 原來果個女仔有血癌架!
我知道之後好愕然呀! 係不久之前, 我同irene傾到差唔多大部分在香港播既韓劇既女主角都有絕症, 仲要係血癌果隻, 如:藍色生死戀, 爆米花, 美麗的日子....我地仲笑唔通韓國有好多女人都有cancer. 點知, 我無意間search到一個患血癌既香港女仔既日記.....唔通真係有天意?

起初, 我當睇人地既故事. 不過, 睇睇下, 我就覺得我睇緊朋友既事咁. 因為佢既日記寫得好生動, 佢所post出黎既相, 差唔多張張都係笑容滿面, 完全唔似一個病人. 佢(果個女仔叫呀咩)好可愛同樂觀, 又鍾意玩. 佢日記裡, 就寫左好多佢同家人and朋友去玩既經過. 我被佢既日記吸引, 我一直睇下去..........睇到後面.......最後那幾篇日記是由她媽媽憶述的.......

在她的網頁中, 除了她的日記, 還有photos, 她畫既晝(非常可愛)等等. 我最最最欣賞既一part係"快樂速成班".

http://meredith.com.hk是一個很值得細心and用心去睇的網站.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
而家依一刻既月光好圓好光呀! 佢四周圍都有雲圍住, 不過又遮唔到個月光喎......好靚呀! d雲又唔算厚, 因為月光既光可以穿過d雲透出黎呀~~~~


>>July 13, 2003 at 7:03:41 PM GMT+8

2003 年 7 月 11 日 星期五 【晴】

今日上秘書course既第二堂......有d悶添.....死啦, 今個禮拜要背野呀! 下一堂佢話要背俾佢聽......唉....

好期待下星期六, 因為又可以同兩位靚女食dinner^_^
(我唔去睇係因為我唔係咁like芭蕾舞囉, 我like歌劇多d. 因為歌劇有靚衫睇, 跳芭蕾舞就得條緊身褲>_<"..........都唔靚既!)

>>July 15, 2003 at 4:36:21 PM GMT+8

2003 年 7 月 10 日 星期四 【晴】

唉~~~~一連幾日無寫日記添....>_<"
唔係我唔想寫呀, 因為我無時間寫呀~~~~
不過隔左幾日先寫日記, 我既老人痴呆症又發作喇! 我又唔記得我邊日做過d咩, 我無晒時間觀念添....>_<".....唉.....

有一日, 我係火車撞到一個好耐無見既朋友呀! 真係好耐好耐無見喇! 耐到我地都唔記得左有幾耐無見, 時間過得真係快呀~~~~

又有一日, 原來我好耐無過新城市喇(起碼超過10日!) (係最巔"瘋"期, 我可以一星期去四次架!), 咁就去行下啦! 仲去食左我好耐無食既雪國添. 之前, 我覺得雪國d拉麵愈來愈唔掂. 今次食返, 又覺得佢回復水準喇! 不過佢d壽司同咖啡奶茶依然好唔掂...>_<"....自從味千進軍新城市, 雪國既前景真係......唉.......希望佢有競爭就有進步啦! 佢最好用減價去吸引顧客, 哈哈哈, 咁我一定多d幫襯架!

>>July 11, 2003 at 12:06:39 PM GMT+8

2003 年 7 月 6 日 星期日 【晴】

今日同freda, wenlau and stephen去左坪洲玩呀~~~~
我等左依日好耐喇! 由開始放暑假, 到今日先可以同可愛又聰明既樹仁同學仔去玩. 既然最聰明果個同學放我地飛機, 不過人地唔舒服, M同學又唔去, 所以T同學唔去都可以理解既......
我之前未去過坪洲架. 原來坪洲真係好細, 又無咩舖頭喎. 可能有d shops假日先開門做生意, 所以d街道"靜蠅蠅", 好似死城咁......
因為坪洲無野好行, 我地就諗住過梅窩, 不過果陣又未有船住, so, 我地行多陣先. 咁我地就向手指山進發! 我地由南灣果邊上山, 因為唔識路既關係, 我地不斷咁問路. 上山時, 我地問過四個人(兩位伯伯+一位拖住小朋友既太太+警察叔叔) 佢地都好樂意答我地架, 可能係因為我地人見人愛啦, 哈哈哈~~~
我地沿住果條無樹蔭既樓梯上山, 雖然好曬, 不過d風景好靚架~~~
上到山頂果個鳳萍亨, 好好風架, d view又靚喎, 完全唔捨得走. So, 我地打消去梅窩既念頭. 逗留左個幾鐘, 我地先走. 走個陣先知我地由陡斜果邊上山, 唔怪得咁斜啦......, 我地走就行另一條路, 依條路無咁斜, 又有樹蔭, 好行好多呀!
跟住我地又去左碼頭附近既惠康買野飲. stephen請架! 哈哈, 多謝晒喎! ^_^
返到中環, 我地又搭船過尖沙咀, 去左海運大廈果間哈迪斯食野. 哈哈, 我同freda只係食少少野. 因為我地準備去打邊爐, 呵呵~~~~
今晚又可以同freda"撐枱腳"^_^, 又可以同佢一齊搭車返屋企. 大家住係附近真係好, 又可以一齊返學放學, 去完街又可以一齊走, great呀!
今日好充實呀!

>>July 11, 2003 at 11:29:45 AM GMT+8

2003 年 7 月 5 日 星期六 【晴】

唉~~~~我一定要自我檢討一下, 我近排成日遲到呀! 我都唔知點解架.......點算呀? 我唔想架......

>>July 6, 2003 at 6:09:02 PM GMT+8

2003 年 7 月 3 日 星期四 【晴】

我完全同意terry果句"我都唔係好明d 人嘈乜鬼...好似以為香港現在唔夠衰, 唔夠煩咁... "
不過, 我就唔係咁同意"保護國家係必須既, 有時為左保護一個國家既完整同穩定, 犧牲小小自由係在所難免... ", 因為我覺得我地無野需要犧牲.
唯一犧牲既係葉劉淑儀; 佢為左"23條", 不斷咁俾人話, 俾人鬧, 甚至被人身攻擊. 佢為特區政府和香港承受左好多不必要既壓力. 我覺得佢值得我地去尊重!

>>July 3, 2003 at 7:33:10 PM GMT+8

2003 年 7 月 2 日 星期三 【晴】

我自己覺得董建華同葉劉淑儀都好慘架! 佢地成日俾人鬧, 俾人嘲笑......

其實香港經濟差, 唔可以完全賴晒董伯伯. 金融風暴之前, 係d香港人自己炒樓, 推高晒d樓價. 當時佢地賺錢又唔見佢地埋怨. 而家經濟轉差, 變左負資產, 佢地就鬧政府. 咁樣好不負責任啫! 如果佢地唔係咁瘋狂去炒樓, 邊會蝕得咁勁啫! 投資緊係有賺有蝕架啦! 如果全部人都賺好多錢, 咁d錢係邊度黎呀? 唔通d錢識無性繁殖, 自己"吽"出黎咩!!!

另外, 好多人都鬧葉劉淑儀, 話佢串, 又藐咀藐舌. 大佬呀! 咁多人針對佢, 佢唔爆粗已經好有修養喇! 唔通你一路鬧佢, 你仲奢望佢會同住你笑呀? "一夫當關, 萬夫莫開", 葉劉淑儀就有依種氣勢.

有d人大大聲聲話要爭取返自己既權利, 要爭取自由. 大佬呀! 有權利, 當然都有義務啦! 佢地有無盡過公民義務先? 遊行上街係你地既權利, 無人可以阻止你; 不過, 唔該你地都要做返少少公民義務, 遊行完之後, 通街都係垃圾. 如果真係咁鍾意"dum"垃圾, 不如索性做埋垃圾吖!

董太講得啱, 香港人只識得"complain, complain, complain", 根本唔識反省.

好多香港人都有先入為主既思想. 佢地認為九七之後香港經濟轉差, 係香港政府管理不當所做成. "聖人都有錯", 特區政府起初剛剛接管香港, 就遇上金融風暴依個考驗. 佢提出既政策可能真係不適當, 不過, 特區政府已經盡量盡力去改. 不過, 因為有先入為主既睇法, 好多人都會認為逢係特區政府既決定政策都係唔好. 佢地根本唔俾機會去俾人補救, 只係識反對, 只懂得"雞蛋裡挑骨頭", 吹毛求疵.

"23條"又係另一個問題. 都話明"一國兩制", 好多人既著眼點只放係"兩制"果度, 往往忽略"一國". 既然大家同樣生活係同一個國家, 每個人都係應該去關心, 去保護自己既國家. "23條"都係想保護國家啫, 無問題架喎! 如果大家都忠於自己既國家, 想自己既國家好, 立唔立法根本唔係一個問題!
除非有d人真係想做反, 所以佢地先驚立法. "平生不作虧心事, 半夜敲門也不驚". 有d人咁驚立法, 唔通佢地做左好多虧心事?

(以上內容絕無針對, 純粹個人意見. 敬請留意!)

>>July 3, 2003 at 9:21:37 AM GMT+8